سیدہ امّ سلیم رضی اللہ عنہا سے روایت ہے وہ بیان کرتی ہیں کہ ایک دن میں نبی صلی اللہ علیہ وسلم کے پاس تھی تو آپ صلی اللہ علیہ وسلم نے فرمایا: ”اے امّ سلیم! جس مسلمان (میاں بیوی) کے تین بچے فوت ہو جائیں تو اللہ ان پر اپنی رحمت کے سبب دونوں کو جنت میں داخل کر دے گا۔“ میں نے عرض کیا: (یا رسول اللہ!) اور دو بچے بھی۔ فرمایا: ”اور دو بھی۔“ [صحيح الادب المفرد/حدیث: 111]

سیدنا صعصعہ بن معاویہ رضی اﷲ عنہ نے بیان کیا کہ ان کہ سیدنا ابوذر رضی اﷲ عنہ سے ملاقات ہوئی وہ ایک مشک گلے میں لٹکائے ہوئے تھے۔ صعصعہ نے کہا: اے ابوذر! آپ کے کتنے بچے ہیں، انہوں نے کہا: میں آپ کو نہیں بتاؤں گا۔ میں نے کہا: آپ ضرور بیان کیجئے۔ انہوں نے کہا: میں نے نبی صلی اللہ علیہ وسلم کو یہ فرماتے ہوئے سنا ہے کہ جس مسلمان کے تین ایسے بچے فوت ہو گئے جو ابھی بالغ نہ ہوئے تھے اللہ ان پر رحمت کرنے کے سبب اس باپ کو جنت میں دخل کر دے گا اور جس شخص نے کسی مسلمان کو آزاد کیا اﷲ عزوجل اس کے ہر عضو کے بدلے اس کے ہر عضو کو جہنم سے نجات دے گا۔ [صحيح الادب المفرد/حدیث: 112]

سیدنا انس بن مالک رضی اللہ عنہ نبی صلی اللہ علیہ وسلم سے روایت کرتے ہیں آپ صلی اللہ علیہ وسلم نے فرمایا: ”جس کے تین بچے اس حال میں فوت ہو گئے کہ ابھی بالغ نہ ہوئے تھے اﷲ تعالیٰ اس شخص کو بھی اور ان بچوں کو بھی اپنی رحمت کی وجہ سے جنت میں داخل کر دے گا۔“ [صحيح الادب المفرد/حدیث: 113]

سیدنا عبداﷲ بن مسعود رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”تم میں سے کون ہے جس کو اپنے وارث کا مال اپنے مال سے زیادہ عزیز ہو۔“ لوگوں نے عرض کیا: یا رسول اﷲ! ہم میں سے کوئی بھی نہیں مگر اسے اس کا اپنا مال اس کے وارث کے مال سے زیادہ عزیز ہے، اس پر رسول اللہ صلی اللہ علیہ وسلم نے فرمایا: ”جان لو، تم میں سے کوئی ایک ا یسا نہیں مگر اس کو اپنے وارث کا مال اپنے مال سے زیادہ عزیز ہے، تمہارا مال تو وہ ہے جو تم نے خرچ کر کے آگے بھیج دیا اور تمہارے وارث کا مال وہ ہے جو تم نے جمع کر کے پیچھے چھوڑ دیا۔“ [صحيح الادب المفرد/حدیث: 114]

سیدنا ابن مسعود رضی اللہ عنہ کہتے ہیں، رسول اللہ صلی اللہ علیہ وسلم نے فرمایا: ”تم اپنے میں سے بانجھ کسے شمار کرتے ہو؟“ لوگوں نے عرض کیا: بانجھ وہ ہے جس کی کوئی اولاد نہ ہو۔ فرمایا: ”نہیں، بلکہ بانجھ وہ ہے جس نے اپنی اولاد میں سے آگے کچھ بھی نہیں بھیجا۔“ (یعنی اس کا کوئی بچہ بچپن میں فوت نہیں ہوا۔) [صحيح الادب المفرد/حدیث: 115]

سیدنا ابن مسعود رضی اللہ عنہ نے کہا، رسول اللہ صلی اللہ علیہ وسلم نے پوچھا؟ ”تم اپنے میں سے پہلوان کسے شمار کرتے ہو؟“ لوگوں نے عرض کیا: وہ جسے کوئی شخص زیر نہ کر سکے۔ آپ صلی اللہ علیہ وسلم نے فرمایا: ”نہیں، بلکہ اصل پہلوان وہ ہے جو غصہ کی حالت میں اپنے اوپر قابو پا لے۔“ [صحيح الادب المفرد/حدیث: 116]

سیدنا عبداﷲ بن مسعود رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”دعوت دینے والے کی دعوت قبول کیا کرو، ہدیہ واپس نہ کرو، اور مسلمانوں کو مارا نہ کرو۔“ [صحيح الادب المفرد/حدیث: 117]

سیدنا علی صلوات اللہ علیہ سے روایت ہے کہ نبی صلی اللہ علیہ وسلم کی آخری گفتگو یہ تھی: ”نماز کا خیال رکھنا، نماز کا خیال رکھنا اور غلاموں کے بارے میں اﷲ سے ڈرتے رہنا۔“ [صحيح الادب المفرد/حدیث: 118]

سیدنا ابودرداء رضی اللہ عنہ سے مروی ہے کہ وہ لوگوں سے کہا کرتے تھے: ہم تم کو اس سے زیادہ پہچانتے ہیں جتنا کہ جانوروں کے ڈاکٹر جانوروں کو پہچانتے ہیں۔ ہم نے تم میں سے اچھوں، بروں کو پہچان لیا۔ تمہارے اچھے وہ ہیں جن سے بھلائی کی امید رکھی جائے اور ا ن کے شر سے محفوظ رہا جائے اور تمہارے برے وہ ہیں جن سے خیر کی توقع نہ کی جائے اور ان کے شر سے محفوظ نہ رہا جائے اور اس کے آزاد کو غلام نہ بنایا جائے۔ (یعنی ایک آدمی کو آزاد کر کے اس پر احسان جتلاتے ہوئے اس سے کام کرواتے رہنا۔) [صحيح الادب المفرد/حدیث: 119]

عمرہ بیان کرتی ہیں کہ سیدہ عائشہ رضی اﷲ عنہا نے اپنی ایک لونڈی کو مدبر کیا (یعنی اسے کہا کہ تم میری موت کے بعد آزاد ہو۔) اس کے بعد سیدہ عائشہ رضی اﷲ عنہا کی طبیعت خراب ہو گئی۔ آپ کے بھتیجوں نے ایک سوڈانی (ہندوستانی) قوم سے طبیب بلایا۔ اس نے کہا: تم لوگ ایسی عورت کے بارے میں بتا رہے ہو جس پر ان کی لونڈی نے جادو کر دیا ہے۔ سیدہ عائشہ رضی اﷲ عنہا کو اس کی خبر کی گئی۔ تو انہوں نے لونڈی سے پوچھا: تو نے مجھے جادو کیا ہے؟ اس نے کہا: ہاں، عائشہ رضی اللہ عنہا نے پوچھا: تم نے کیوں جادو کیا؟ اب تم کبھی بھی نجات نہیں پاؤ گی۔ پھر فرمایا: اسے کسی بدخو بدوی کے ہاتھ بیچ دو۔ [صحيح الادب المفرد/حدیث: 120]