سیدنا ابوامامہ رضی اللہ عنہ سے روایت ہے انہوں نے کہا: نبی صلی اللہ علیہ وسلم تشریف لائے تو آپ صلی اللہ علیہ وسلم کے ساتھ دو غلام تھے آپ صلی اللہ علیہ وسلم نے ان میں سے ایک سیدنا علی صلوات اللہ علیہ کو دے دیا اور فرمایا: ”اس کو نہ مارنا، مجھے نمازیوں کو مارنے سے منع کیا گیا ہے اور جب سے ہم آئے ہیں میں نے اس کو دیکھا ہے یہ نماز پڑھتا ہے“ اور سیدنا ابوذر رضی اللہ عنہ کو ایک دوسرا غلام دے دیا اور فرمایا: ”میری طرف سے اس کے متعلق اچھے سلوک کرنے کی نصیحت حاصل کر لو۔“ سیدنا ابوذر رضی اللہ عنہ نے اسے آزاد کر دیا۔ آپ صلی اللہ علیہ وسلم نے فرمایا: ”تم نے اس کا کیا کیا؟“ سیدنا ابوذر رضی اللہ عنہ نے کہا: آپ نے مجھے حکم دیا تھا کہ اس کے ساتھ اچھا سلوک کرنا تو میں نے اُسے آزاد کر دیا۔ [صحيح الادب المفرد/حدیث: 121]

سیدنا انس رضی اللہ عنہ سے مروی ہے انہوں نے کہا کہ نبی صلی اللہ علیہ وسلم مدینہ آئے تو آپ صلی اللہ علیہ وسلم کے پاس کوئی خادم نہ تھا۔ ابوطلحہ رضی اللہ عنہ نے میرا ہاتھ پکڑا اور مجھے لے کر چلے یہاں تک کہ نبی صلی اللہ علیہ وسلم کی خدمت میں پیش کیا۔ اور کہا: یا نبی اﷲ! یہ انس سمجھدار اور ذہین لڑکا ہے، یہ آپ کی خدمت کرے گا۔ سیدنا انس رضی اﷲ عنہ کا بیان ہے کہ پھر میں نے مدینہ میں تشریف آوری سے وفات تک سفر و حضر میں آپ صلی اللہ علیہ وسلم کی خدمت کی، لیکن آپ صلی اللہ علیہ وسلم نے کبھی مجھ سے کسی کام کرنے پر یہ نہ کہا کہ کہ تم نے ایسا کیوں کیا اور نہ کسی کام کے نہ کرنے پر کبھی یہ فرمایا کہ ایسا کیوں نہ کیا۔ [صحيح الادب المفرد/حدیث: 122]

لقیط بن صبرہ اپنے والد سے روایت کرتے ہیں انہوں نے کہا: میں نبی صلی اللہ علیہ وسلم کے پاس پہنچا جب کہ آپ صلی اللہ علیہ وسلم نے چرواہے کو باڑے کے اندر ایک بکری کا بچہ دیا۔ آپ صلی اللہ علیہ وسلم نے فرمایا: «لاَ تَحْسِبَنَّ» اور یہ نہ کہا: «لاَ تَحْسَبَنَّ» (یعنی اس کو کسرہ کے ساتھ نہ پڑھا) یہ نہ سمجھنا ہم نے تمہارے لیے بکری ذبح کر دی ہے۔ ہمارے پاس سو بکریاں ہیں ہم نہیں چاہتے کہ سو سے زیادہ ہوں۔ جب چرواہا ایک بکری کا بچہ لاتا ہے ہم اس کی جگہ پر ایک بکری ذبح کر دیتے ہیں تاکہ گنتی سو کی ہی رہے۔ آپ صلی اللہ علیہ وسلم نے جو کچھ فرمایا اس میں یہ بھی تھا: ”اپنی بیوی کو یوں نہ مارنا جیسے تم لونڈی کو مارتے ہو اور جب تم ناک میں پانی چڑھاؤ تو مبالغہ کرو سوائے روزے کی حالت میں۔“ [صحيح الادب المفرد/حدیث: 123]

ابوعالیہ کہتے ہیں کہ ہمیں حکم دیا جاتا تھا کہ ہم خادموں کو کوئی چیز حوالہ کرنے سے پہلے اس پر مہر لگا دیں۔ اس کو ناپ کر اور گن کر چیز حوالہ کریں تاکہ اُن کی عادت بھی خراب نہ ہو اور ہمیں بھی بدگمانی نہ ہو۔ [صحيح الادب المفرد/حدیث: 124]

سلمان سے مروی ہے، انہوں نے کہا: میں اپنے خادم کے لیے پْرگوشت ہڈیوں کو گن کر دیتا ہوں تاکہ بدگمانی کا کوئی موقعہ نہ رہے۔ ایک روایت میں «خشية الظن» کے الفاظ ہیں۔ [صحيح الادب المفرد/حدیث: 125]

یزید بن عبداللہ بن قسیط کہتے ہیں کہ سیدنا عبداللہ بن عمر رضی اللہ عنہما نے اپنے غلام کو سونا یا چاندی دے کر (بازار) بھیجا۔ اس نے اسے تبادلے میں بیچا تو تبادلہ لینے میں مہلت دے دی تو جب غلام واپس آیا تو انہوں نے اس کی بہت شدت کے ساتھ پٹائی کی۔ انہوں نے کہا: جاؤ وہ سرمایہ لے آؤ جو میرا تھا اور اس کے بدلے میں نہ لاؤ۔ (یعنی سونے کے بدلے چاندی اور چاندی کے بدلے سونا نہ لاؤ۔) [صحيح الادب المفرد/حدیث: 126]

سیدنا ابومسعود رضی اللہ عنہ سے مروی ہے کہتے ہیں، میں اپنے غلام کو مار رہا تھا تو میں نے اپنے پیچھے سے ایک آواز سنی۔ اے ابومسعود! جان لو، اللہ تم پر زیادہ قدرت رکھتا ہے جتنی تم اس پر قدرت رکھتے ہو جب میں نے پیچھے مڑ کر دیکھا تو وہ اللہ کے رسول صلی اللہ علیہ وسلم تھے۔ میں نے کہا: اللہ کے رسول یہ اللہ کی رضا کے لیے آزاد ہے۔ آپ صلی اللہ علیہ وسلم نے فرمایا: ”خبردار اگر تم یہ کام نہ کرتے تو تجھے آگ اپنی لپیٹ میں لے لیتی یا تجھے آگ چھو لیتی۔“ [صحيح الادب المفرد/حدیث: 127]

سیدنا ابوہریرہ رضی اللہ عنہ سے مروی ہے نبی صلی اللہ علیہ وسلم سے روایت ہے آپ صلی اللہ علیہ وسلم نے فرمایا: ”یہ نہ کہو، اللہ اس کے چہرے پر پھٹکار کرے۔“ [صحيح الادب المفرد/حدیث: 128]

سیدنا ابوہریرہ رضی اللہ عنہ سے روایت ہے، انہوں نے کہا کہ یہ ہرگز نہ کہا کرو: اللہ تیرے چہرے کو داغ دار کرے۔ اور اس کے چہرے کو بھی جو تیرے چہرے کے مشابہ ہو۔ کیونکہ اللہ عزوجل نے آدم صلی اللہ علیہ وسلم کو ان کی صورت پر پیدا کیا ہے۔ [صحيح الادب المفرد/حدیث: 129]

سیدنا ابوہریرہ رضی اللہ عنہ سے روایت ہے، وہ کہتے ہیں کہ نبی صلی اللہ علیہ وسلم نے فرمایا: ”جب تم میں سے کوئی اپنے خادم کو مارے تو اس کے چہرے کو بچا کر مارے۔“ [صحيح الادب المفرد/حدیث: 130]