(نبی کریم صلی اللہ علیہ وسلم نے فرمایا:)
”بلاشبہ کچھ لوگ جہنم کی آگ سے نکالے جائیں گے جو اس میں جل چکے ہوں گے سوائے ان کے چہروں کے نقوش کے، یہاں تک کہ وہ جنت میں داخل ہو جائیں گے۔“ [صحيح الجامع الصغير وزيادته/[حرف الألف] -- أنا/حدیث: 1576]

(نبی کریم صلی اللہ علیہ وسلم نے فرمایا:)
”بلاشبہ دنیا میں جو لوگ سب سے زیادہ پیٹ بھر کر کھاتے ہیں، قیامت کے دن وہی سب سے زیادہ طویل عرصے تک بھوکے رہیں گے۔“ [صحيح الجامع الصغير وزيادته/[حرف الألف] -- أنا/حدیث: 1577]

(نبی کریم صلی اللہ علیہ وسلم نے فرمایا:)
”بلاشبہ مومنوں میں کامل ترین ایمان والا وہ شخص ہے جس کے اخلاق سب سے اچھے ہوں، اور یقیناً حسن اخلاق انسان کو روزے اور نماز کے درجے تک پہنچا دیتا ہے۔“ [صحيح الجامع الصغير وزيادته/[حرف الألف] -- أنا/حدیث: 1578]

(نبی کریم صلی اللہ علیہ وسلم نے فرمایا:)
”بلاشبہ اونٹ شیاطین سے پیدا کیے گئے ہیں، اور ہر اونٹ کے پیچھے ایک شیطان ہوتا ہے۔“ [صحيح الجامع الصغير وزيادته/[حرف الألف] -- أنا/حدیث: 1579]

(نبی کریم صلی اللہ علیہ وسلم نے فرمایا:)
”بلاشبہ اسلام اجنبی حالت میں شروع ہوا تھا اور عنقریب یہ پھر سے اجنبی ہو جائے گا جس طرح یہ شروع ہوا تھا، پس خوشخبری ہے ان اجنبیوں (یعنی اس پر استقامت دکھانے والوں) کے لیے۔“ [صحيح الجامع الصغير وزيادته/[حرف الألف] -- أنا/حدیث: 1580]

(نبی کریم صلی اللہ علیہ وسلم نے فرمایا:)
”بلاشبہ اسلام اجنبی حالت میں شروع ہوا تھا اور عنقریب یہ پھر سے اجنبی ہو جائے گا جس طرح یہ شروع ہوا تھا، اور یہ دونوں مسجدوں (مکہ اور مدینہ) کے درمیان اس طرح سمٹ آئے گا جیسے سانپ اپنے بل میں سمٹ آتا ہے۔“ [صحيح الجامع الصغير وزيادته/[حرف الألف] -- أنا/حدیث: 1581]

(نبی کریم صلی اللہ علیہ وسلم نے فرمایا:)
”بلاشبہ اشعری قبیلے کے لوگ جب جہاد کے دوران خوراک کی کمی کا شکار ہوتے ہیں یا مدینہ میں ان کے اہل و عیال کا کھانا کم پڑ جاتا ہے، تو ان کے پاس جو کچھ بھی ہوتا ہے اسے ایک کپڑے میں جمع کر لیتے ہیں، پھر اسے ایک ہی برتن سے آپس میں برابر برابر تقسیم کر لیتے ہیں۔ پس وہ مجھ سے ہیں اور میں ان سے ہوں۔“ [صحيح الجامع الصغير وزيادته/[حرف الألف] -- أنا/حدیث: 1582]

(نبی کریم صلی اللہ علیہ وسلم نے فرمایا:)
”بلاشبہ اعمال پیر اور جمعرات کے دن (اللہ تعالیٰ کے حضور) اٹھائے جاتے ہیں، لہٰذا میں یہ پسند کرتا ہوں کہ میرا عمل اس حالت میں اٹھایا جائے کہ میں روزے سے ہوں۔“ [صحيح الجامع الصغير وزيادته/[حرف الألف] -- أنا/حدیث: 1583]

(نبی کریم صلی اللہ علیہ وسلم نے فرمایا:)
”بلاشبہ امانت (شروع میں) لوگوں کے دلوں کی گہرائیوں میں اتری، پھر قرآن نازل ہوا تو انہوں نے قرآن سے (امانت داری) سیکھی اور سنت سے سیکھی۔ (پھر امانت کے اٹھ جانے کا وقت آئے گا کہ) آدمی ایک نیند سوئے گا تو اس کے دل سے امانت نکال لی جائے گی اور اس کا نشان محض ایک ہلکے دھبے کی طرح رہ جائے گا۔ وہ پھر ایک نیند سوئے گا تو اس کے دل سے (بقیہ) امانت بھی قبض کر لی جائے گی، پس اس کا نشان ایک چھالے کی طرح رہ جائے گا جیسے تم کسی انگارے کو اپنے پاؤں پر لڑھکاؤ تو وہ آبلہ پڑ جائے، تم اسے پھولا ہوا دیکھو گے حالانکہ اس کے اندر کچھ نہیں ہوتا۔ پھر لوگ صبح اٹھ کر ایک دوسرے سے خرید و فروخت کریں گے لیکن کوئی بھی امانت داری کا حق ادا نہیں کرے گا، یہاں تک کہ کہا جائے گا کہ فلاں قبیلے میں ایک امانت دار شخص موجود ہے۔ یہاں تک کہ کسی شخص کے بارے میں (بظاہر دیکھ کر) کہا جائے گا کہ وہ کتنا بہادر ہے، کتنا خوش مزاج ہے اور کتنا سمجھدار ہے، حالانکہ اس کے دل میں رائی کے دانے کے برابر بھی ایمان نہیں ہوگا۔“ [صحيح الجامع الصغير وزيادته/[حرف الألف] -- أنا/حدیث: 1584]

(نبی کریم صلی اللہ علیہ وسلم نے فرمایا:)
”بلاشبہ حاکم جب لوگوں میں شک و شبہ (اور عیب جوئی) کی تلاش میں لگ جاتا ہے تو وہ انہیں بگاڑ دیتا ہے۔“ [صحيح الجامع الصغير وزيادته/[حرف الألف] -- أنا/حدیث: 1585]