(نبی کریم صلی اللہ علیہ وسلم نے فرمایا:)
”بیشک پرانے تعلق اور عہد و وفا کا لحاظ رکھنا ایمان میں سے ہے۔“ [صحيح الجامع الصغير وزيادته/[حرف الألف] -- إن ب/حدیث: 2056]

(نبی کریم صلی اللہ علیہ وسلم نے فرمایا:)
”بیشک اللہ تعالیٰ کا یہ طے شدہ اصول ہے کہ وہ دنیا کی جس چیز کو بھی بلندی پر اٹھاتا ہے، اسے آخر کار پست کر دیتا ہے۔“ [صحيح الجامع الصغير وزيادته/[حرف الألف] -- إن ب/حدیث: 2057]

(نبی کریم صلی اللہ علیہ وسلم نے فرمایا:)
”بیشک میرا حوض (سعت میں) مقامِ ایلہ سے عدن تک کے فاصلے سے بھی زیادہ طویل ہے، وہ برف سے زیادہ سفید اور دودھ میں شہد سے زیادہ میٹھا ہے، اور اس کے برتن آسمان کے ستاروں کی تعداد سے بھی زیادہ ہیں، اور بیشک میں لوگوں کو اس سے اس طرح ہٹاؤں گا جس طرح کوئی آدمی دوسرے لوگوں کے اونٹوں کو اپنے حوض سے ہٹاتا ہے۔ صحابہ نے عرض کیا: کیا آپ اس دن ہمیں پہچانیں گے؟ آپ صلی اللہ علیہ وسلم نے فرمایا: ہاں! تمہاری ایک ایسی نشانی ہوگی جو کسی اور امت کے پاس نہیں ہوگی، تم وضو کے اثر سے چمکتے ہوئے سفید پیشانی اور ہاتھ پاؤں والے میرے پاس آؤ گے۔“ [صحيح الجامع الصغير وزيادته/[حرف الألف] -- إن ب/حدیث: 2058]

(نبی کریم صلی اللہ علیہ وسلم نے فرمایا:)
”بیشک میرا حوض ایلہ سے عدن تک کے فاصلے سے بھی زیادہ وسیع ہے، اس ذات کی قسم جس کے ہاتھ میں میری جان ہے! اس کے برتن آسمان کے ستاروں کی تعداد سے بھی زیادہ ہیں، وہ دودھ سے زیادہ سفید اور شہد سے زیادہ میٹھا ہے، اس ذات کی قسم جس کے ہاتھ میں میری جان ہے! بیشک میں اس سے (غیروں کو) اس طرح ہٹاؤں گا جس طرح کوئی آدمی اجنبی اونٹوں کو اپنے حوض سے ہٹاتا ہے۔ صحابہ نے عرض کیا: اے اللہ کے رسول! کیا آپ ہمیں پہچانیں گے؟ آپ صلی اللہ علیہ وسلم نے فرمایا: ہاں! تم وضو کے اثرات کی وجہ سے چمکتے ہوئے سفید پیشانی اور ہاتھ پاؤں والے حوض پر آؤ گے، اور یہ خصوصیت تمہارے علاوہ کسی اور کے لیے نہیں ہوگی۔“ [صحيح الجامع الصغير وزيادته/[حرف الألف] -- إن ب/حدیث: 2059]

(نبی کریم صلی اللہ علیہ وسلم نے فرمایا:)
”بیشک میرا حوض عدن سے عمانِ بلقاء تک ہے، اس کا پانی دودھ سے زیادہ سفید اور شہد سے زیادہ میٹھا ہے، اس کے پینے کے برتن ستاروں کی تعداد کے برابر ہیں، جو شخص اس سے ایک گھونٹ پی لے گا اسے اس کے بعد کبھی پیاس نہیں لگے گی، حوض پر سب سے پہلے آنے والے لوگ مہاجرین کے فقراء ہوں گے: جن کے بال بکھرے ہوئے ہوں گے، کپڑے میلے ہوں گے، جن سے خوشحال اور مالدار عورتیں نکاح نہیں کرتی ہیں اور جن کے لیے بڑے دروازے نہیں کھولے جاتے، وہ لوگ جو اپنا فرض تو پورا کرتے ہیں لیکن انہیں ان کا حق نہیں دیا جاتا۔“ [صحيح الجامع الصغير وزيادته/[حرف الألف] -- إن ب/حدیث: 2060]

(نبی کریم صلی اللہ علیہ وسلم نے فرمایا:)
تمہاری حیض کی حالت تمہارے ہاتھ میں نہیں ہے (یعنی اس حالت میں کھانے پکانے یا دیگر امور میں شریک ہونے سے ہاتھ ناپاک نہیں ہوتے)۔ [صحيح الجامع الصغير وزيادته/[حرف الألف] -- إن ب/حدیث: 2061]

(نبی کریم صلی اللہ علیہ وسلم نے فرمایا:)
”بیشک اللہ کے بہترین بندے وہ ہیں جو وعدے کے پورے اور پاکباز ہوتے ہیں۔“ [صحيح الجامع الصغير وزيادته/[حرف الألف] -- إن ب/حدیث: 2062]

(نبی کریم صلی اللہ علیہ وسلم نے فرمایا:)
”بیشک تم میں بہترین لوگ وہ ہیں جو ادائیگی کے اعتبار سے سب سے اچھے ہوں (یعنی قرض یا حقوق عمدگی سے چکائیں)۔“ [صحيح الجامع الصغير وزيادته/[حرف الألف] -- إن ب/حدیث: 2063]

(نبی کریم صلی اللہ علیہ وسلم نے فرمایا:)
”بیشک تابعین میں سب سے بہترین شخص وہ ہے جسے اویس کہا جائے گا، اس کی ایک والدہ ہے جس کے ساتھ وہ بہت نیکی کرنے والا ہے، اگر وہ اللہ کی قسم اٹھا لے تو اللہ اس کی قسم کو ضرور پورا کر دے گا، اس کے جسم پر سفیدی (برص) کا نشان ہے، لہٰذا تم اس سے کہنا کہ وہ تمہارے لیے مغفرت کی دعا کرے۔“ [صحيح الجامع الصغير وزيادته/[حرف الألف] -- إن ب/حدیث: 2064]

(نبی کریم صلی اللہ علیہ وسلم نے فرمایا:)
”بیشک مردوں کی بہترین خوشبو وہ ہے جس کی خوشبو ظاہر ہو اور رنگ چھپا ہوا ہو، اور عورتوں کی بہترین خوشبو وہ ہے جس کا رنگ ظاہر ہو اور خوشبو چھپی ہوئی ہو۔“ [صحيح الجامع الصغير وزيادته/[حرف الألف] -- إن ب/حدیث: 2065]