سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جب تو زکوۃ ادا کر دے تو تُو نے اپنی ذمہ داری پوری کر دی اور جو شخص مالِ حرام جمع کرے پھر اس کا صدقہ کر دے، اس کو اس میں کوئی ثواب نہیں ملے گا۔ بلکہ اس پر الٹا اس کا وبال ہو گا۔ [المستدرك على الصحيحين/كِتَابُ الزَّكَاةِ/حدیث: 1456]

سیدنا حماد بن سلمہ رضی اللہ عنہ فرماتے ہیں: میں نے ثمامہ بن عبداللہ بن انس رضی اللہ عنہ سے ایک کتاب لی جس کے بارے میں ثمامہ کا گمان ہے کہ سیدنا ابوبکر رضی اللہ عنہ نے سیدنا انس رضی اللہ عنہ کو جب مصدق (زکوۃ وصول کرنے والا) بنا کر بھیجا تھا تب ان کے لیے تحریر کی تھی اور اس پر رسول اللہ صلی اللہ علیہ وسلم کی مہر بھی موجود تھی اور اس کی تحریر یہ تھی:” یہ فریضۂ زکوۃ ہے، جس کو رسول اللہ صلی اللہ علیہ وسلم نے مسلمانوں پر فرض کیا ہے، جس کا اللہ تعالیٰ نے اپنے نبی صلی اللہ علیہ وسلم کو حکم دیا ہے، لہٰذا مسلمانوں میں سے جس شخص سے اس کے مطابق زکوۃ طلب کی جائے وہ دے اور جس سے اس سے زیادہ زکوۃ مانگی جائے وہ نہ دے (زکوۃ کی تفصیل یہ ہے): پچیس سے کم اونٹوں میں بکریاں دی جائیں گی۔ (اس طرح کہ چار اونٹوں میں زکوۃ نہیں ہے اور پانچ سے اوپر) ہر پانچ اونٹوں کے بدلے میں ایک بکری۔ جب اونٹوں کی تعداد پچیس تک پہنچ جائے تو اس میں اونٹ کی ایک سالہ بچی اور یہ تعداد پینتیس تک پہنچے گی اور اس صورت میں اگر ان میں کوئی ایک سالہ بچی نہ ہو تو دو سالہ بچہ۔ جب یہ تعداد چھتیس تک پہنچے تو اس میں اونٹ کی دو سالہ بچی 45 تک۔ جب تعداد 46 تک پہنچے تو اس میں تین سالہ جوان اونٹنی 60 تک۔ جب ان کی تعداد 16 تک پہنچے تو ان میں چار سالہ اونٹنی، 75 تک۔ جب تعداد 76 تک پہنچے تو ان میں 2 دو سالہ اونٹنیاں 90 تک۔ جب تعداد 91 تک پہنچے تو ان میں تین سالہ جوان 2 اونٹنیاں 120 تک۔ جب یہ تعداد 121 تک پہنچے تو اس کے بعد ہر چالیس اونٹوں کے بدلے، اونٹنی کا یکسالہ ایک بچہ اور ہر پچاس اونٹوں میں ایک تین سالہ اونٹنی۔ جب اونٹ کے دانت ظاہر ہو جائیں فرائضِ صدقات میں، تو جس شخص کے پاس اونٹ اتنی تعداد میں ہوں کہ اس پر چار سالہ اونٹنی واجب ہوتی ہو لیکن اس کے پاس کوئی چار سالہ اونٹنی نہ ہو تو وہ تین سالہ اونٹنی دے دے، اس کی طرف سے یہ قبول کر لی جائے گی۔ لیکن بہتر یہ ہے کہ اگر میسر ہو تو اس کے ہمراہ دو بکریاں یا 20 درہم بھی دے۔ جس کے پاس اونٹ اتنی تعداد میں ہوں کہ اس پر تین سالہ اونٹنی واجب ہوتی ہو اور اس کے پاس تین سالہ بچہ نہ ہو بلکہ چار سالہ ہو تو اس سے یہ چار سالہ بچہ قبول کر لیا جائے گا اور وصول کنندہ اس کو دو بکریاں یا 20 درہم دے گا۔ جس کے پاس اتنی تعداد ہو کہ اس پر اونٹنی کا دو سالہ بچہ واجب ہوتا ہو لیکن اس کے پاس دو سالہ بچہ نہ ہو بلکہ اس کے پاس تین سالہ اونٹنی ہو، تو اس سے وہ قبول کر لی جائے گی۔ اور زکوۃ وصول کنندہ اس کو 20 درہم یا 2 بکریاں دے گا۔ اور جس کے پاس اونٹ اتنی تعداد میں ہوں کہ اس پر دو سالہ اونٹنی واجب ہوتی ہو لیکن اس کے پاس یہ نہ ہو بلکہ اس کے پاس اونٹنی کا یکسالہ بچہ ہو تو اس سے وہ قبول کر لیا جائے گا اور اس کے ہمراہ دو بکریاں یا 20 درہم بھی وصول کیے جائیں گے۔ جس کے ہاں اتنی تعداد ہو کہ اس پر یکسالہ اونٹنی واجب ہوتی ہو لیکن اس کے پاس دو سالہ بچہ ہو، تو اس سے وہ لے لیا جائے گا لیکن اس کے ہمراہ اور کچھ نہیں ہو گا۔ جس شخص کے پاس صرف چار اونٹ ہوں، اس پر ان میں زکوۃ واجب نہیں ہے۔ مگر یہ کہ ان کا مالک اپنی مرضی سے جو کچھ دینا چاہے۔ خود رو گھاس وغیرہ چرنے والے بھیڑ بکریاں جب چالیس ہوں تو ان میں ایک بکری واجب ہے 120 تک۔ جب ان کی تعداد 120 سے بڑھ جائے تو ان میں 2 بکریاں واجب ہیں 200 تک۔ جب تعداد 200 سے زائد ہو تو تین بکریاں ہیں 300 تک۔ رجب 300 سے زائد ہوں تو ہر 100 میں ایک بکری واجب ہے۔ اور صدقہ میں بوڑھا اور کانا جانور قبول نہیں کیا جائے گا۔ اور نہ ہی پورے ریوڑ کو ” بکرا “ قرار دیا جائے گا۔ اور جو جانور دو شریکوں کے درمیان مشترک ہوں تو ان دونوں سے برابر برابر وصولی کی جائے گی۔ اور اگر کسی شخص کی خودرو گھاس چرنے والی بھیڑ بکریاں چالیس سے کم ہوں تو اس پر کوئی چیز واجب نہیں ہے، اِلّا یہ کہ ان کا مالک ازخود کچھ دینا چاہے اور چاندی کے درہموں میں عشر کا چوتھا حصہ (یعنی اڑھائی فیصد) ہے۔ اور اگر مال صرف 901 درہم ہو تو اس میں کچھ واجب نہیں ہے۔ اِلّا یہ کہ اس کا مالک ازخود کچھ دینا چاہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے، لیکن شیخین نے اسے ان الفاظ کے ہمراہ نقل نہیں کیا اور امام بخاری رحمۃ اللہ علیہ نے اس حدیث کو ایک دوسری سند کے ہمراہ ثمامہ بن عبداللہ سے روایت کیا ہے اور اس روایت میں وہ منفرد ہیں۔ جبکہ حماد بن سلمہ کی روایت زیادہ صحیح اور جامع ہے اور انصاری کی حدیث سے زیادہ کامل ہے۔ [المستدرك على الصحيحين/كِتَابُ الزَّكَاةِ/حدیث: 1457]

سیدنا حماد بن سلمہ رضی اللہ عنہ فرماتے ہیں: ہم نے یہ کتاب ثمامہ بن عبداللہ بن انس رضی اللہ عنہ سے لی ہے جس کو وہ سیدنا انس بن مالک رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: اس کے بعد موسیٰ بن اسماعیل کی حماد سے روایت کردہ طویل حدیث جیسی حدیث ذکر کی ہے۔ ٭٭ ان الفاظ کی ایک شاہد حدیث موجود ہے جو زہری نے سالم کے واسطے سے ان کے والد سے روایت کی ہے۔ [المستدرك على الصحيحين/كِتَابُ الزَّكَاةِ/حدیث: 1458]

سالم اپنے والد کا یہ بیان نقل کرتے ہیں: رسول اللہ صلی اللہ علیہ وسلم نے صدقہ کے متعلق ایک تحریر لکھی، آپ صلی اللہ علیہ وسلم نے اس کو اپنی تلوار کے ساتھ باندھ کر رکھ دیا تھا۔ وہ ابھی آپ نے اپنے عمال کے حوالے نہیں کی تھی کہ آپ کا انتقال ہو گیا۔ پھر سیدنا ابوبکر رضی اللہ عنہ اس پر عمل کرتے رہے یہاں تک کہ ان کا انتقال ہو گیا۔ اس کے بعد سیدنا عمر رضی اللہ عنہ ساری زندگی اسی پر عمل کرتے رہے۔ اس میں (زکوۃ کا یہ طریقہ کار درج تھا): پانچ اونٹوں میں ایک بکری۔ دس اونٹوں میں دو بکریاں۔ پندرہ میں تیبن۔ بیس میں چار بکریاں ہیں۔ 25 اونٹوں میں اونٹنی کی ایک سالہ ایک بچی 35 تک۔ 35 سے ایک بھی زیادہ ہو تو ان میں اونٹنی کی دو سالہ ایک بچی 45 تک۔ اگر اس سے ایک بھی زیادہ ہو تو ان میں تین سالہ اونٹنی 60 تک۔ اگر اس سے ایک بھی زیادہ ہو تو ان میں چار سالہ اونٹنی 75 تک۔ اگر اس سے ایک زیادہ ہو تو ان میں دو سالہ دو اونٹنیاں 90 تک۔ اگر ان سے ایک زیادہ ہو تو ان میں تین سالہ دو اونٹنیاں 120 تک۔ اگر اونٹ اس سے بھی زیادہ ہوں تو ہر پچاس میں ایک 3 سالہ اونٹنی اور ہر چالیس میں ایک 2 سالہ اونٹنی۔ بھیڑ بکریوں میں ہر 40 میں ایک بکری 120 تک۔ اگر ان سے ایک بھی زائد ہو جائے تو دو بکریاں 200 تک۔ جب 200 سے زیادہ ہو تو ان میں 3 بکریاں 300 تک۔ اگر بھیڑ بکریاں اس سے بھی زیادہ ہوں تو ہر 100 میں ایک بکری۔ ان میں اس وقت تک کوئی چیز لازم نہیں ہے، جب تک تعداد (اگلے) 100 تک نہ پہنچ جائے۔ اور صدقہ کے خوف سے مجتمع کو متفرق نہ کیا جائے اور متفرق و مجتمع نہ کیا جائے اور جس چیز میں دو آدمی شریک ہوں تو دونوں کے ذمہ برابر زکوۃ ہے اور زکوۃ میں بوڑھا اور عیب دار جانور قبول نہ کیا جائے گا۔ ٭٭ امام زہری کہتے ہیں: جب زکوۃ وصول کرنے والا آئے تو بکریوں کے تین حصے کیے جائیں، ایک حصہ عیب دار بکریوں کا ایک عمدہ اور ایک میں درمیانی۔ زکوۃ وصول کرنے والا درمیانی حصے سے وصول کرے۔ زہری نے اپنی روایت میں گائے کا ذکر نہیں کیا۔ یہ حدیث اس باب میں بہت بڑی حدیث ہے جس سے ان کثیر احکام پر شہادت ملتی ہے، جو ثمامہ کی انس رضی اللہ عنہ سے روایت کردہ حدیث میں موجود ہے۔ لیکن امام بخاری رحمۃ اللہ علیہ اور امام مسلم رحمۃ اللہ علیہ نے سفیان بن حسین واسطی کی وجہ سے یہ حدیث اپنی کتابوں میں نقل نہیں کی۔ حالانکہ سفیان بن حسین ائمہ حدیث میں سے ایک ہیں۔ یحیی بن معین نے انہیں ثقہ قرار دیا ہے یزید بن مہلب کے ہمراہ خراسان میں آئے اور وہاں سے نیشاپور گئے، ہمارے قہندری مشائخ میں سے ایک جماعت نے ان سے حدیث کا سماع کیا ہے، مثلاً مبشر بن عبداللہ بن رزین اور ان کے بھائی عمر بن عبداللہ اور دیگر محدثین رحمۃ اللہ علیہم اور اس کو عبداللہ بن مبارک کی وہ حدیث شیخین رحمۃ اللہ علیہما کے معیار پر صحیح کرتی ہے جس کو انہوں نے یونس بن یزید کے واسطے سے زہری سے روایت کیا ہے، اس میں اگرچہ تھوڑا سا ” ارسال “ موجود ہے لیکن یہ سفیان بن حسین کی حدیث کے لئے صحیح شاہد ہے۔ [المستدرك على الصحيحين/كِتَابُ الزَّكَاةِ/حدیث: 1459]

سیدنا ابن شہاب رضی اللہ عنہ کہتے ہیں: یہ رسول اللہ صلی اللہ علیہ وسلم کی اس تحریر کا نسخہ ہے، جو آپ صلی اللہ علیہ وسلم نے صدقہ کے متعلق لکھی تھی۔ اور یہی تحریر سیدنا عمر بن خطاب رضی اللہ عنہ کی آل کے پاس ہے۔ ابن شہاب کہتے ہیں: سالم بن عبداللہ بن عمرو نے وہ پڑھایا تو میں نے اس کو ” من و عن “ یاد کر لیا۔ یہ وہ تحریر تھی جو سیدنا عمر بن عبدالعزیز رضی اللہ عنہ نے عبداللہ بن عبداللہ بن عمر رضی اللہ عنہما اور سالم بن عبداللہ رضی اللہ عنہ سے اس وقت لی تھی، جب وہ مدینہ کے گورنر مقرر ہوئے۔ آپ نے اپنے تمام ملازمین کو اسی پر عمل کرنے کا آڈر جاری کیا اور یہی مکتوب سیدنا ولید رضی اللہ عنہ کے طرف بھی بھیجا، ولید نے بھی اپنے ملازمین کو اس پر عمل کرنے کا حکم دیا پھر ان کے بعد تمام خلفاء اسی کا حکم دیتے رہے، پھر ہشام کے حکم پر مسلمانوں کے تمام عاملین کے پاس اس کا ایک ایک نسخہ بھیج دیا گیا اور ان کو اس پر عمل کرنے اور اس سے تجاوز نہ کرنے کا پابند کیا گیا، اس تحریر کی تفصیل یہ ہے: پانچ سے کم اونٹوں میں زکوۃ نہ لی جائے۔ جب اونٹوں کی تعداد 5 تک پہنچے تو ان میں ایک بکری ہے 10 تک۔ جب تعداد 10 تک پہنچے تو ان میں 2 بکریاں 15 تک۔ 15 اونٹ ہوں تو ان میں چار بکریاں ہیں 25 تک۔ جب اونٹوں کی تعداد 25 تک پہنچے تو ان میں اونٹنی کی ایک سالہ بچی ہے، اگر ایک سالہ بچی نہ ہو تو 2 سالہ بچہ دیا جائے 35 تک۔ جب تعداد 36 تک پہنچے تو ان میں اونٹنی کی دو سالہ بچی ہے 45 تک۔ جب تعداد 46 کو پہنچے تو ان میں تین سالہ جوان اونٹنی ہے 60 تک۔ جب 61 ہوں تو ان میں ایک چار سالہ اونٹنی ہے 75 تک۔ جب تعداد 76 تک پہنچے تو ان میں دو سالہ دو اونٹنیاں 90 تک۔ جب تعداد 91 کو پہنچے تو ان میں 2 سالہ تین اونٹنیاں 291 تک۔ جب 130 ہو جائیں تو ان میں دو سالہ 2 اونٹنیاں اور ایک اونٹنی تین سالہ 139 تک۔ جب تعداد 140 کو پہنچے تو ان میں دو اونٹنیاں تین سالہ اور ایک دو سالہ 149 تک۔ جب تعداد 501 تک پہنچے تو ان میں تین سالہ تین اونٹنیاں 159 تک۔ جب تعداد 160 تک ہو جائے تو اس میں دو سالہ چار اونٹنیاں 169 تک۔ جب 170 ہوں تو اس میں تین اونٹنیاں دو سالہ اور ایک تین سالہ 179 تک۔ جب 180 تک تعداد جائے تو ان میں دو اونٹنیاں تین سالہ اور دو اونٹنیاں دو سالہ 189 تک۔ جب تعداد 190 تک پہنچے تو ان میں تین اونٹنیاں تین سالہ اور تین اونٹنیاں دو سالہ 199 تک۔ جب تعداد 200 تک پہنچے تو چار اونٹنیاں تین سالہ یا پانچ اونٹنیاں دو سالہ۔ کسی بھی عمر کے مل جائیں، ان کو اس کتاب کے مطابق وصول کرو پھر اونٹوں کی زکوۃ اسی طریقہ سے لی جائے جو ہم نے اس تحریر میں لکھ دیا ہے۔ اور بکریوں کی زکوۃ اس وقت تک نہ لی جائے جب تک ان کی تعداد 40 تک پہنچ جائے۔ جب ان کی تعداد 40 تک پہنچے تو ان میں ایک بکری ہے 120 تک۔ جب بکریوں کی تعداد 121 تک پہنچے تو ان میں دو بکریاں ہیں 200 تک۔ جب 200 سے زیادہ ہوں تو تین بکریاں ہیں 300 تک۔ جب 300 سے زیادہ ہوں تو اس میں کوئی چیز لازم نہیں ہے جب تک کہ 400 تک نہ پہنچے۔ جب 400 تک پہنچ جائے تو اس میں چار بکریاں ہیں۔ یہاں تک کہ تعداد 500 تک پہنچ جائے۔ جب 500 ہو جائیں تو ان میں پانچ بکریاں ہیں۔ جب تعداد 600 تک پہنچ جائے تو 6 بکریاں۔ جب 700 تک ہو جائے تو سات بکریاں ہیں۔ جب 800 تک پہنچ جائے تو 8 بکریاں۔ جب 900 ہو جائیں تو 9 بکریاں۔ جب 1000 ہو جائیں تو 10 بکریاں۔ پھر جتنے سو بڑھتے جائیں ہر سو کے عوض ایک بکری۔ ٭٭ مذکورہ حدیث کی شاہد احادیث میں سے ایک درج ذیل ہے۔ [المستدرك على الصحيحين/كِتَابُ الزَّكَاةِ/حدیث: 1460]

سیدنا محمد بن عبدالرحمن انصاری رضی اللہ عنہ بیان کرتے ہیں: جب عمر بن عبدالعزیز رضی اللہ عنہ خلیفہ بنے تو انہوں نے مدینہ شریف میں زکوۃ کے متعلق نبی اکرم صلی اللہ علیہ وسلم کے زمانے کی دستاویز کی تلاش میں ایک شخص کو بھیجا تو سیدنا عمر بن خطاب رضی اللہ عنہ کی آل کے پاس ایک تحری مل گئی جو سیدنا عمر رضی اللہ عنہ نے اپنے ملازمین کی طرف صدقات کے حوالے سے لکھی تھی۔ اور یہ تحریر بالکل اسی تحریر جیسی تھی جو نبی اکرم صلی اللہ علیہ وسلم نے سیدنا عمرو بن حزم کی طرف لکھی تھی تو سیدنا عمر بن عبدالعزیز رضی اللہ عنہ نے اپنے زکوۃ کے ملازمین کو حکم دیا کہ وہ انہی دونوں کتابوں میں موجود احکام پر عمل کریں، اس کے اندر یہ تفصیل تھی کہ اونٹوں کی زکوۃ یوں ہو گی: جب ان کی تعداد 90 سے زیادہ ہو تو اس میں تین سالہ دو اونٹنیاں ہیں 120 تک۔ جب تعداد 120 سے زیادہ ہو تو اس میں دو سالہ تین اونٹنیاں ہیں 129 تک۔ جب اس سے زیادہ ہو تو اس میں اس وقت تک زکوۃ نہیں ہے جب تک ان (زائد) کی تعداد دس تک نہ پہنچ جائے۔ ٭٭ نبی اکرم صلی اللہ علیہ وسلم نے عمرو بن حزم کو جو مکتوب لکھا اس کی اسناد ہماری اس کتاب کے معیار کی نہیں ہے، اس لیے میں نے گذشتہ حدیث تفصیلی ذکر کی ہے۔ [المستدرك على الصحيحين/كِتَابُ الزَّكَاةِ/حدیث: 1461]