سیدنا عبداللہ بن مسعود رضی اللہ عنہ کا بیان ہے، رسول اللہ صلی اللہ علیہ وسلم نے فرمایا: ”جو شخص مانگے، حالانکہ اس کے پاس بقدر کفایت موجود ہو، تو قیامت کے روز وہ آئے گا اور اس کا چہرہ زخمی ہو گا یا اس پر خراشیں ہوں گی یا نوچا ہوا ہو گا۔“ کہا گیا: ”اے اللہ کے رسول صلی اللہ علیہ وسلم ! غنی ہونے کی کیا مقدار ہے؟“ آپ صلی اللہ علیہ وسلم نے فرمایا: ”پچاس درہم یا اس قیمت کا سونا۔“ یحییٰ رحمہ اللہ نے کہا: عبداللہ بن عثمان نے سفیان رحمہ اللہ سے کہا: ”مجھے تو ایسے یاد ہے کہ شعبہ رحمہ اللہ، حکیم بن جبیر سے روایت نہیں کرتا ہے“، تو سفیان رحمہ اللہ نے جواب دیا: ”ہمیں یہ روایت زبید نے محمد بن عبدالرحمٰن بن یزید سے بیان کی ہے۔“ [سنن ابي داود/كِتَاب الزَّكَاةِ/حدیث: 1626]

بنو اسد کے ایک شخص رضی اللہ عنہ سے مروی ہے، انہوں نے کہا: میں اور میرے گھر والوں نے بقیع الغرقد (موجودہ قبرستان مدینہ) کے پاس پڑاؤ کیا، تو میرے گھر والوں نے مجھ سے کہا: ”رسول اللہ صلی اللہ علیہ وسلم کے پاس جاؤ اور آپ صلی اللہ علیہ وسلم سے کچھ مانگ لاؤ کہ اسے ہم کھا سکیں“، اور پھر وہ اپنی ضروریات گنوانے لگے۔ چنانچہ میں رسول اللہ صلی اللہ علیہ وسلم کی خدمت میں حاضر ہوا، میں نے آپ صلی اللہ علیہ وسلم کے ہاں ایک شخص کو پایا جو آپ صلی اللہ علیہ وسلم سے کچھ مانگ رہا تھا اور آپ صلی اللہ علیہ وسلم فرما رہے تھے: ”میں کوئی ایسی چیز نہیں پاتا جو تمہیں دوں۔“ پھر وہ آدمی پشت پھیر کر چلا گیا اور وہ ناراض تھا اور کہہ رہا تھا: ”قسم میری عمر کی! آپ جسے چاہتے ہیں دے دیتے ہیں۔“ تو رسول اللہ صلی اللہ علیہ وسلم نے فرمایا: ”یہ اس لیے مجھ پر غصے ہو رہا ہے کہ میرے پاس کچھ نہیں ہے جو میں اسے دوں؟ تم میں سے جب کوئی سوال کرتا ہے، حالانکہ اس کے پاس چالیس درہم یا اس کے مساوی کچھ ہو تو اس نے چمٹ کر (بے جا) مانگا ہے۔“ اس اسدی شخص رضی اللہ عنہ نے بیان کیا، میں نے کہا: ”ہماری اونٹنی تو ایک اوقیہ سے بہت بہتر ہے، اور ایک اوقیہ چالیس درہم کا ہوتا ہے۔“ وہ کہتے ہیں: چنانچہ میں لوٹ آیا اور آپ صلی اللہ علیہ وسلم سے کچھ نہ مانگا۔ اس کے بعد رسول اللہ صلی اللہ علیہ وسلم کے پاس جو اور کشمش آ گئی تو آپ صلی اللہ علیہ وسلم نے اس میں سے ہمیں بھی عنایت فرمایا، یا اسی طرح سے کہا حتیٰ کہ اللہ تعالیٰ نے ہمیں غنی کر دیا۔ امام ابوداؤد رحمہ اللہ نے کہا: ”ثوری نے ایسے ہی روایت کیا ہے جیسے کہ مالک نے کہا ہے۔“ [سنن ابي داود/كِتَاب الزَّكَاةِ/حدیث: 1627]

سیدنا ابو سعید خدری رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جو شخص مانگے، حالانکہ اس کے پاس ایک «أُوقِيَّةٌ» (چالیس درہم) کے مساوی موجود ہو تو اس کا سوال «إِلْحَافٌ» (بے جا اصرار ہے) ہے۔“ میں نے کہا: ”میری یاقوتہ اونٹنی ایک اوقیہ سے بہت بہتر ہے۔“ ہشام کی روایت میں ہے: ”چالیس درہموں سے بہت بہتر ہے۔“ چنانچہ میں لوٹ آیا اور آپ صلی اللہ علیہ وسلم سے کچھ نہ مانگا۔ ہشام کی روایت میں اضافہ ہے کہ رسول اللہ صلی اللہ علیہ وسلم کے دور میں ایک اوقیہ چالیس درہم کا ہوتا تھا۔ [سنن ابي داود/كِتَاب الزَّكَاةِ/حدیث: 1628]

سیدنا سہل ابن حنظلیہ رضی اللہ عنہ بیان کرتے ہیں کہ عیینہ بن حصن اور اقرع بن حابس رضی اللہ عنہما رسول اللہ صلی اللہ علیہ وسلم کی خدمت میں آئے اور آپ صلی اللہ علیہ وسلم سے سوال کیا۔ تو جو کچھ انہوں نے مانگا، آپ صلی اللہ علیہ وسلم نے انہیں دے دینے کا حکم دیا اور سیدنا معاویہ رضی اللہ عنہ سے فرمایا کہ انہیں اس کی ایک تحریر دے دو، تو سیدنا معاویہ رضی اللہ عنہ نے ان دونوں کو، جو انہوں نے مانگا، لکھ دیا۔ چنانچہ اقرع رضی اللہ عنہ نے وہ خط لیا، اپنی پگڑی میں لپیٹا اور چل دیا۔ مگر عیینہ وہ خط لے کر نبی کریم صلی اللہ علیہ وسلم کے پاس آ گیا جہاں آپ صلی اللہ علیہ وسلم تشریف فرما تھے اور کہنے لگا: ”اے محمد! آپ کا کیا خیال ہے کہ «صَحِيْفَةُ الْمُتَلَمِّسِ» ”متلمس کے خط“ کی طرح میں یہ خط لے کر اپنی قوم کے پاس چلا جاؤں، نہ معلوم اس میں کیا ہے؟“ تو سیدنا معاویہ رضی اللہ عنہ نے اس کی تلمیح کی وضاحت رسول اللہ صلی اللہ علیہ وسلم کے سامنے پیش کی۔ تب رسول اللہ صلی اللہ علیہ وسلم نے فرمایا: ”جو شخص مانگتا ہے، حالانکہ بقدر کفایت اس کے پاس موجود ہو تو وہ اپنے لیے آگ ہی کا اضافہ کرتا ہے۔“ نفیلی نے دوسری جگہ کہا: ”جہنم کے انگارے زیادہ کرتا ہے۔“ لوگوں نے کہا: ”اے اللہ کے رسول! وہ کیا (مقدار) ہے جو انسان کو کافی ہوتی ہے (اور سوال سے غنی بنا دیتی ہے؟)“ دوسری جگہ نفیلی کے الفاظ اس طرح تھے: ”غنا کی وہ کیا حد ہے جس کے ہوتے ہوئے سوال کرنا لائق نہیں؟“ آپ صلی اللہ علیہ وسلم نے فرمایا: ”جس کے پاس صبح و شام کا کھانا موجود ہو۔“ نفیلی کے الفاظ دوسری جگہ یہ تھے: ”جس کے پاس دن اور رات کے لیے پیٹ بھر کھانا موجود ہو۔“ (امام ابوداؤد رحمہ اللہ فرماتے ہیں): ”نفیلی نے ہمیں یہ روایت مختصر طور پر اسی طرح بیان کی تھی جو ذکر کی گئی ہے۔“ [سنن ابي داود/كِتَاب الزَّكَاةِ/حدیث: 1629]

سیدنا زیاد بن حارث صدائی رضی اللہ عنہ کا بیان ہے کہ میں رسول اللہ صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم سے بیعت کی اور لمبی حدیث بیان کی اور کہا: پھر ایک شخص آپ صلی اللہ علیہ وسلم کی خدمت میں آیا اور کہنے لگا کہ ”مجھے صدقہ میں سے کچھ دیجیے“ تو رسول اللہ صلی اللہ علیہ وسلم نے فرمایا: ”اللہ عز وجل نے صدقات کی تقسیم کا مسئلہ نبی یا کسی دوسرے کی پسند پر نہیں چھوڑا بلکہ اس کے بارے میں خود ہی فیصلہ فرمایا ہے اور انہیں آٹھ قسم کے افراد میں تقسیم فرما دیا ہے۔ اگر تم ان میں سے ہو تو میں تمہیں تمہارا حق دیے دیتا ہوں۔“ [سنن ابي داود/كِتَاب الزَّكَاةِ/حدیث: 1630]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”مسکین وہ نہیں جسے ایک کھجور، دو کھجور اور ایک لقمہ یا دو لقمے پلٹا دیں بلکہ مسکین وہ ہے جو لوگوں سے مانگتا نہ ہو اور نہ لوگوں کو اس کے بارے میں اندازہ ہو کہ اسے دیں۔“ [سنن ابي داود/كِتَاب الزَّكَاةِ/حدیث: 1631]

سیدنا ابوہریرہ رضی اللہ عنہ سے منقول ہے کہ رسول اللہ صلی اللہ علیہ وسلم نے فرمایا (اور حدیث بیان کی) جیسے کہ پہلے گزری ہے (اور) فرمایا: ”لیکن مسکین تو وہ ہے جو (سوال کی عار سے) بچتا اور پاک ہو۔“ مسدد نے اپنی روایت میں زیادہ کیا کہ: ”اس کے پاس اس قدر نہ ہو جو کہ اس کی کفایت کرے اور وہ لوگوں سے مانگتا بھی نہ ہو اور نہ لوگوں کو اس کی ضرورت کا علم ہو کہ وہ اس کو صدقہ دیں، اسی قسم کا آدمی ”محروم“ کہلاتا ہے۔“ مسدد نے اپنی روایت میں «الْمُتَعَفِّفُ الَّذِي لَا يَسْأَلُ» ”پاکدامن جو سوال نہیں کرتا“ کا ذکر نہیں کیا۔ امام ابوداؤد رحمہ اللہ کہتے ہیں کہ اس حدیث کو محمد بن ثور اور عبدالرزاق نے معمر سے روایت کیا ہے اور انہوں نے ”محروم“ کا بیان زہری کا کلام بتایا ہے اور یہی زیادہ صحیح ہے۔ [سنن ابي داود/كِتَاب الزَّكَاةِ/حدیث: 1632]

عبید اللہ بن عدی بن خیار رحمہ اللہ سے منقول ہے، انہوں نے کہا کہ مجھے دو آدمیوں نے بتایا کہ وہ دونوں حجۃ الوداع کے موقع پر رسول اللہ صلی اللہ علیہ وسلم کی خدمت میں حاضر ہوئے جبکہ آپ صلی اللہ علیہ وسلم صدقہ تقسیم فرما رہے تھے۔ ان دونوں نے بھی آپ صلی اللہ علیہ وسلم سے اس کا سوال کیا تو آپ صلی اللہ علیہ وسلم نے ہمیں اوپر سے نیچے (سر سے پاؤں) تک دیکھا۔ آپ صلی اللہ علیہ وسلم نے دیکھا کہ ہم دونوں طاقتور ہیں، تو فرمایا: ”اگر تم چاہو تو میں تمہیں دیے دیتا ہوں مگر (حقیقت یہ ہے کہ) اس میں غنی اور طاقتور کما سکنے والے کا کوئی حصہ نہیں ہے۔“ [سنن ابي داود/كِتَاب الزَّكَاةِ/حدیث: 1633]

سیدنا عبداللہ بن عمرو رضی اللہ عنہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”صدقہ کسی غنی کے لیے حلال نہیں ہے اور نہ کسی طاقتور صحیح سالم کے لیے۔“ امام ابوداؤد رحمہ اللہ فرماتے ہیں کہ: ”اس حدیث کو سفیان نے سعد بن ابراہیم سے اسی طرح روایت کیا ہے جیسے کہ ابراہیم (ابن سعد) نے۔ اور شعبہ نے سعد سے یہ لفظ روایت کیے ہیں «لِذِي مِرَّةٍ قَوِيٍّ» یعنی «سَوِيٍّ» کی جگہ «قَوِيٍّ» کہا جب کہ نبی کریم صلی اللہ علیہ وسلم سے بعض دیگر احادیث میں «لِذِي مِرَّةٍ قَوِيٍّ» اور بعض میں «لِذِي مِرَّةٍ سَوِيٍّ» آیا ہے۔“ عطاء بن زہیر کہتے ہیں کہ: ”میں سیدنا عبداللہ بن عمرو رضی اللہ عنہ سے ملا تو ان کے لفظ تھے «لَا تَحِلُّ لِقَوِيٍّ، وَلَا لِذِي مِرَّةٍ سَوِيٍّ» ۔“ [سنن ابي داود/كِتَاب الزَّكَاةِ/حدیث: 1634]