حضرت عبداللہ بن مسعود رضی اللہ عنہ سے روایت ہے کہ بغیر وضو کے کوئی نماز قبول نہیں کی جاتی۔ [مصنف ابن ابي شيبه/كتاب الطهارة/حدیث: 31]

حضرت عبداللہ بن عمر رضی اللہ عنہما فرماتے ہیں کہ بغیر وضو کے کوئی نماز قبول نہیں ہوتی۔ [مصنف ابن ابي شيبه/كتاب الطهارة/حدیث: 32]

حضرت عمر رضی اللہ عنہ فرماتے ہیں کہ بغیر وضو کے کوئی نماز قبول نہیں ہوتی۔ [مصنف ابن ابي شيبه/كتاب الطهارة/حدیث: 33]

حضرت ابو روح فرماتے ہیں کہ ایک مرتبہ نبی کریم صلی اللہ علیہ وآلہ وسلم نے نماز پڑھائی، آپ صلی اللہ علیہ وسلم نے اس میں سورة الروم کی تلاوت فرمائی، لیکن آپ اس میں اٹک گئے، جب آپ نے نماز مکمل کر لی تو ارشاد فرمایا کہ ان لوگوں کی وجہ سے ہمیں نماز بھول جاتی ہے جو بغیر وضو کے نماز میں شریک ہو جاتے ہیں جب تم میں سے کسی نے جماعت میں شریک ہونا ہو تو اسے چاہیے کہ اچھی طرح وضو کر لے۔ [مصنف ابن ابي شيبه/كتاب الطهارة/حدیث: 34]

حضرت ثوبان مولیٰ رسول اللہ رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: ”وضو کی پابندی صرف مومن ہی کر سکتا ہے۔“ [مصنف ابن ابي شيبه/كتاب الطهارة/حدیث: 35]

حضرت عبداللہ بن عمرو رضی اللہ عنہ سے روایت ہے کہ نبی کریم صلی اللہ علیہ وآلہ وسلم نے ارشاد فرمایا: ”وضو کی پابندی سوائے مومن کے کوئی اور کر ہی نہیں سکتا۔“ [مصنف ابن ابي شيبه/كتاب الطهارة/حدیث: 36]

حضرت ابو مالک اشعری رضی اللہ عنہ فرماتے ہیں کہ نبی کریم صلی اللہ علیہ وآلہ وسلم نے ارشاد فرمایا: ”پاکیزگی نصف ایمان ہے۔“ [مصنف ابن ابي شيبه/كتاب الطهارة/حدیث: 37]

حضرت علی رضی اللہ عنہ فرماتے ہیں کہ پاکیزگی نصف ایمان ہے۔ [مصنف ابن ابي شيبه/كتاب الطهارة/حدیث: 38]

حضرت ابو امامہ رضی اللہ عنہ سے روایت ہے کہ نبی کریم صلی اللہ علیہ وآلہ وسلم نے ارشاد فرمایا: ”جب کوئی مسلمان آدمی وضو کرتا ہے تو اس کے کانوں، اس کی آنکھوں، اس کے ہاتھوں اور اس کے پاؤں سے گناہ نکل جاتے ہیں اور جب وہ بیٹھتا ہے تو اس حال میں بیٹھتا ہے کہ اس کے گناہ معاف ہو چکے ہوتے ہیں۔ [مصنف ابن ابي شيبه/كتاب الطهارة/حدیث: 39]

حضرت عبداللہ بن مسعود رضی اللہ عنہ فرماتے ہیں کہ میں نے عرض کیا: ”یا رسول اللہ! آپ نے اپنی امت کے جن لوگوں کو نہیں دیکھا قیامت کے دن انہیں کیسے پہچانیں گے؟“ آپ صلی اللہ علیہ وآلہ وسلم نے فرمایا کہ ان کے اعضاء وضو روشن اور چمک دار ہوں گے۔“ [مصنف ابن ابي شيبه/كتاب الطهارة/حدیث: 40]