حضرت معمر فرماتے ہیں کہ میں نے حضرت زہری سے سوال کیا کہ کیا عورت بغیر ولی کی اجازت کے نکاح کرسکتی ہے؟ انہوں نے فرمایا کہ اگر خاوند بیوی کا کفوء ہو تو جائز ہے۔ [مصنف ابن ابي شيبه/كتاب النكاح/حدیث: 16700]

حضرت شعبی فرماتے ہیں کہ اگر کفوء ہوں تو جائز ہیں۔ [مصنف ابن ابي شيبه/كتاب النكاح/حدیث: 16701]

حضرت علی رضی اللہ عنہ نے ولی کے بغیر ہونے والے ایک ایسے نکاح کو جائز قرار دیا جو اس عورت کی ماں نے اس کی رضامندی سے کرایا تھا۔ [مصنف ابن ابي شيبه/كتاب النكاح/حدیث: 16702]

حضرت ابوسلمہ بن عبد الرحمن فرماتے ہیں کہ ایک عورت نبی پاک صلی اللہ علیہ وسلم کی خدمت میں حاضر ہوئی اور اس نے کہا کہ اے اللہ کے رسول! میرے بچے کے چچا نے مجھے نکاح کا پیغام بھیجا لیکن میرے والد نے اس رشتے کو رد کردیا اور میری شادی ایسی جگہ کرادی جہاں مجھے پسند نہیں۔ حضور صلی اللہ علیہ وسلم نے اس کے والد کو بلایا اور اس سے اس بارے میں سوال کیا۔ اس نے کہا کہ میں نے اس کا نکاح کرایا ہے اور اس کی بھلائی میں کوئی کسر نہیں چھوڑی۔ نبی پاک صلی اللہ علیہ وسلم نے اس عورت سے فرمایا کہ تیرا نکاح نہیں ہوا، جاؤ اور جس سے چاہو نکاح کرلو۔ [مصنف ابن ابي شيبه/كتاب النكاح/حدیث: 16703]

حضرت عبدالرحمن بن یزید انصاری اور مجمع بن یزید انصاری فرماتے ہیں کہ خذام نامی ایک آدمی نے اپنی بیٹی کی شادی کرائی۔ اس لڑکی نے اپنے والد کے کرائے ہوئے نکاح کو ناپسند کیا۔ وہ رسول اللہ صلی اللہ علیہ وسلم کے پاس حاضر ہوئی اور ساری بات کا ذکر کیا۔ حضور صلی اللہ علیہ وسلم نے اس کے والد کے نکاح کو مسترد کردیا۔ پھر اس کے نکاح کے پیغام آئے اور انہوں نے ابو لبابہ بن عبدالمنذر سے نکاح کرلیا۔ [مصنف ابن ابي شيبه/كتاب النكاح/حدیث: 16704]

راوی یحییٰ بن سعید ذکر کرتے ہیں کہ انہیں یہ بات پہنچی ہے کہ وہ خاتون ثیبہ تھیں۔ [مصنف ابن ابي شيبه/كتاب النكاح/حدیث: 16705]

حضرت قاسم بن محمد فرماتے ہیں کہ حضرت عائشہ رضی اللہ عنہا نے حفصہ بنت عبدالرحمن بن ابی بکر کی شادی منذر بن زبیر سے کرادی۔ اس وقت ان کے والد عبدالرحمن غائب تھے۔ جب حضرت عبد الرحمن واپس آئے تو بہت غصے ہوئے اور فرمایا کہ اے اللہ کے بندو! کیا میرے جیسے شخص اس قابل ہیں کہ ان کی بیٹیوں کے بارے میں اس کی مرضی کے بغیر فیصلہ کیا جائے؟ اس پر حضرت عائشہ رضی اللہ عنہا غصہ میں آئیں اور فرمایا کہ کیا منذر جیسے لوگوں سے اعراض کیا جاسکتا ہے؟ [مصنف ابن ابي شيبه/كتاب النكاح/حدیث: 16706]

حضرت ہزیل فرماتے ہیں کہ حضرت علی رضی اللہ عنہ کے پاس ایک ایسی عورت کا مقدمہ آیا جس کے ماموں اور اس کی ماں نے اس کی شادی کرادی تھی۔ حضرت علی رضی اللہ عنہ نے اس کے نکاح کو جائزقرار دیا۔ [مصنف ابن ابي شيبه/كتاب النكاح/حدیث: 16707]

راوی کہتے ہیں کہ حضرت سفیان فرماتے ہیں کہ یہ نکاح جائز نہیں کیونکہ وہ ولی نہیں ہے۔ [مصنف ابن ابي شيبه/كتاب النكاح/حدیث: 16708]

حضرت علی بن صالح رحمہ اللہ فرماتے ہیں کہ یہ نکاح جائز ہے کیونکہ حضرت علی رضی اللہ عنہ نے جب اسے جائز قرار دیا تو وہ ولی کے درجہ میں تھے۔ [مصنف ابن ابي شيبه/كتاب النكاح/حدیث: 16709]