حضرت عمر بن عبد اللہ مولیٰ غفرہ رحمہ اللہ فرماتے ہیں کہ حضرت عبد اللہ بن عمر رضی اللہ عنہما کے ایک بیٹے نے تیس دن جہاد کے لیے گذارے۔ جب واپس آئے تو حضرت ابن عمر رضی اللہ عنہما نے ان سے فرمایا کہ میں تمہیں قسم دیتا ہوں کہ تم واپس جاؤ اور دس دن مزید جہاد کے لیے گذارو تاکہ چالیس دن پورے ہوجائیں۔ [مصنف ابن ابي شيبه/كتاب الجهاد/حدیث: 20610]

حضرت ابو امامہ اور حضرت جبیر بن نفیر رحمہ اللہ فرماتے ہیں کہ لوگوں پر ایک زمانہ ایسا آئے گا کہ اس میں افضل جہاد رباط ہوگا۔ راوی کہتے ہیں: میں نے پوچھا کہ ایسا کب ہوگا؟ انہوں نے فرمایا کہ غزوے کم ہوجائیں گے، تاوان زیادہ ہوجائیں، مال غنیمت کو حلال سمجھا جانے لگے گا تو اس موقع پر افضل جہاد رباط ہے۔ [مصنف ابن ابي شيبه/كتاب الجهاد/حدیث: 20611]

حضرت یزید بن عبد اللہ رحمہ اللہ اور صفوان بن سلیم رحمہ اللہ فرماتے ہیں کہ جو شخص سرحد کی حفاظت (رباط) کی حالت میں انتقال کر گیا تو اس نے شہادت کا درجہ پا لیا۔ [مصنف ابن ابي شيبه/كتاب الجهاد/حدیث: 20612]

حضرت ابو امامہ باہلی رضی اللہ عنہ فرماتے ہیں کہ کچھ قوموں نے بہت سی فتوحات حاصل کیں۔ ان قوموں کی تلواروں کا زیور سونے یا چاندی کا نہیں تھا بلکہ اونٹ کے پٹھوں، سیسے اور لوہے کا تھا۔ [مصنف ابن ابي شيبه/كتاب الجهاد/حدیث: 20613]

حضرت عبد اللہ بن عمرو رضی اللہ عنہ رضی اللہ عنہ سے روایت ہے کہ رسول اللہ صلی اللہ علیہ وسلم نے ارشا فرمایا کہ جس شخص کا اللہ کے راستے میں سر درد ہوا اللہ تعالیٰ اس کے گذشتہ سارے گناہوں کو معاف فرما دیتے ہیں۔ [مصنف ابن ابي شيبه/كتاب الجهاد/حدیث: 20614]

حضرت ابو قبیل رحمہ اللہ کہتے ہیں کہ کسی نے حضرت عبد اللہ بن عمرو رضی اللہ عنہ رضی اللہ عنہ سے سوال کیا کہ پہلے قسطنطنیہ فتح ہوگا یا رومیہ؟ حضرت عبداللہ بن عمرو رضی اللہ عنہ نے اپنا ایک حلقوں والا صندوق منگوایا اور اس میں سے ایک کتاب نکال کر پڑھنا شروع کردی۔ پھر فرمایا کہ ہم رسول اللہ صلی اللہ علیہ وسلم کے گرد بیٹھ کر لکھا کرتے تھے ایک مرتبہ آپ سے سوال کیا گیا کہ پہلے قسطنطنیہ فتح ہوگا یا رومیہ؟ نبی پاک صلی اللہ علیہ وسلم نے فرمایا تھا کہ پہلے ہرقل کا شہر فتح ہوگا۔ [مصنف ابن ابي شيبه/كتاب الجهاد/حدیث: 20615]

حضرت سلمان بن ربیعہ رضی اللہ عنہ فرماتے ہیں کہ میں نے اپنی اس تلوار سے سو ایسے زرہ پوش آدمیوں کو قتل کیا ہے جو سب غیر اللہ کی عبادت کرتے تھے میں نے ان میں سے کسی آدمی کو باندھ کر (قید کی حالت میں) قتل نہیں کیا۔ [مصنف ابن ابي شيبه/كتاب الجهاد/حدیث: 20616]

حضرت ابو موسیٰ رضی اللہ عنہ فرماتے ہیں کہ میں نے خود دیکھا، میں ان پانچ یا چھ آدمیوں میں سے ایک تھا جن کے ہاتھوں اور پاؤں کا ہر ناخن نکل چکا تھا۔ پھر فرمایا کہ نہ جانے میں نے کیوں اس بات کو بیان کردیا میں تو اس کا اجر صرف اللہ سے چاہتا تھا۔ [مصنف ابن ابي شيبه/كتاب الجهاد/حدیث: 20617]

حضرت حسن رحمہ اللہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ جو شخص بھی مرتا ہے اور اس کے لیے اللہ کے پاس بھلائی ہو، وہ یہ پسند نہیں کرتا کہ واپس دنیا کی طرف لوٹے، خواہ اسے دنیا جیسی نعمتیں مل جائیں، سوائے شہید کے، کیونکہ وہ جب شہادت کے اجر کو دیکھتا ہے تو خواہش کرتا ہے کہ واپس دنیا میں جائے اور دوبارہ اللہ کے راستے میں شہید ہو۔ [مصنف ابن ابي شيبه/كتاب الجهاد/حدیث: 20618]

حضرت مکحول رحمہ اللہ فرماتے ہیں کہ اللہ تعالیٰ کی طرف سے شہید کو چھ طرح کا اجر ملتا ہے اس کے خون کا پہلا قطرہ گرتے ہی اللہ تعالیٰ اس کے گناہوں کو معاف فرما دیتے ہیں۔ B اسے ایمان کا زیور پہنایا جاتا ہے۔ C حورعین سے اس کی شادی کی جاتی ہے۔ D اس کے لیے جنت کا دروازہ کھول دیا جاتا ہے۔ E قبر کا عذاب اس سے ہٹا لیا جاتا ہے۔ F قیامت کے دن کی سختی سے وہ محفوظ ہوجاتا ہے۔ [مصنف ابن ابي شيبه/كتاب الجهاد/حدیث: 20619]