حضرت عمرو بن مرہ فرماتے ہیں کہ ابو وائل رحمہ اللہ ربیع بن خثیم کے پاس ان کی عیادت کے لیے تشریف لائے اور کہا کہ میں تو اس لیے آیا تھا کہ میں نے موت کی خبر دینے والے کی آواز سنی تھی تو ربیع نے جواب دیا کہ میں ایک ماہ سے ایسی حالت پر ہوں کہ میرے لیے ایک سو پچاس نمازوں ”150“ کا ثواب لکھا جا رہا ہے۔ [مصنف ابن ابي شيبه/كتاب الزهد/حدیث: 38324]

حضرت ابوجعفر خطمی رحمہ اللہ بیان کرتے ہیں کہ ان کے دادا محترم عمیر بن حبیب رات کو اٹھ کر کہا کرتے تھے کہ اے لوگو! کوچ کرو دوسرے لوگ تم سے پہلے پانی تک پہنچ گئے ہیں۔ کوچ کرو کوچ کرو، جس شخص سے پہلے لوگ پانی تک پہنچ جائیں وہ پیاسا رہ جاتا ہے اور جس شخص سے پہلے لوگ سورج کی طرف بڑھ جائیں وہ دھوپ میں جلتا ہے۔ کوچ کرو، کوچ کرو۔ [مصنف ابن ابي شيبه/كتاب الزهد/حدیث: 38325]

حضرت عمیر بن حبیب رضی اللہ عنہ کا ایک غلام تھا جو ان کے بیٹوں کو قرآن اور کتاب کی تعلیم دیا کرتا تھا وہ ان سے دنیا اور عورتوں کی باتیں کرنے لگ جاتا تھا۔ تو اس کو عمیر بن حبیب نے کہا کہ اے زیاد! تو نے تو ہمارے بچوں کے اوپر شیطان کا گنبد بنادیا ہے اس کو اتار دے۔ [مصنف ابن ابي شيبه/كتاب الزهد/حدیث: 38326]

حضرت مسلم بن یسار رحمہ اللہ فرماتے ہیں کہ جب تو اللہ تعالیٰ کی کسی بات کو نقل کرنے کا ارادہ کرے تو رک جا اور پہلے اس کا سیاق وسباق معلوم کرلے۔ [مصنف ابن ابي شيبه/كتاب الزهد/حدیث: 38327]

حضرت عاصم رحمہ اللہ فرماتے ہیں کہ حسن رحمہ اللہ کا اکثر کلام یہی ہوتا تھا: سُبْحَانَ اللہِ الْعَظِیمِ سُبْحَانَ اللہِ وَبِحَمْدِہِ۔ [مصنف ابن ابي شيبه/كتاب الزهد/حدیث: 38328]

حضرت مطرف بن عبداللہ بن شخیر رحمہ اللہ فرماتے ہیں کہ جو شخص صفائِ قلب میں لگ جاتا ہے اس کو صفائی مل جاتی ہے اور جو شخص ملاوٹ اختیار کرتا ہے اس پر ملاوٹ ڈال دی جاتی ہے۔ [مصنف ابن ابي شيبه/كتاب الزهد/حدیث: 38329]

حضرت عبدالملک بن عمیر رحمہ اللہ کا ارشاد ہے کہ ایک آدمی نے اپنے بیٹے کو نصیحت کی کہ لوگوں کے ہاتھوں میں موجود چیز سے ناامیدی ظاہر کر اس لیے کہ یہی غنا ہے۔ اور اپنے آپ کو حاجات کے مانگنے سے بچا کیونکہ یہی موجودہ فقر ہے اور اپنے آپ کو ان باتوں سے بچا جن کی معذرت کرنی پڑے اور جب تو نماز پڑھے تو ایسی نماز پڑھ کہ جیسے یہ آخری نماز ہے یہ مت سمجھ کہ دوبارہ بھی موقع ملے گا۔ اور اگر تو اس طرح کرسکتا ہو تیرا آج کل سے بہتر اور آئندہ کا دن آج سے بہتر ہو تو اس طرح ضرور کر۔ [مصنف ابن ابي شيبه/كتاب الزهد/حدیث: 38330]

حضرت یونس بن خباب رحمہ اللہ فرماتے ہیں کہ مجھ کو مجاہد نے فرمایا کہ میں تجھ کو توبہ کرنے والے اور حفاظت کرنے والے کے بارے میں نہ بتاؤں؟ میں نے کہا کیوں نہیں تو انہوں نے جواب دیا کہ یہ وہ شخص ہوتا ہے جو اکیلے میں اپنے گناہوں کو یاد کرکے اللہ سے معافی مانگتا ہے۔ [مصنف ابن ابي شيبه/كتاب الزهد/حدیث: 38331]

حضرت ابواسحاق ہمدانی رحمہ اللہ فرماتے ہیں کہ حسن بصری رحمہ اللہ رسول اللہ صلی اللہ علیہ وسلم کے صحابہ کے بہت متشابہہ تھے۔ [مصنف ابن ابي شيبه/كتاب الزهد/حدیث: 38332]

حضرت حمید رحمہ اللہ اور یونس بن عبید رحمہ اللہ فرماتے ہیں کہ ہم نے بہت سے فقہاء دیکھے ہیں لیکن ان میں حسن رحمہ اللہ جیسا جامع شخصیت کا مالک نہیں دیکھا۔ [مصنف ابن ابي شيبه/كتاب الزهد/حدیث: 38333]