حضرت ضمرہ رحمہ اللہ فرماتے ہیں کہ ابوریحانہ رحمہ اللہ جزیرہ کے علاقے میافارقین میں سرحدی پہرے پر مامور تھے۔ انہوں نے وہاں کے رہنے والے ایک نبطی سے چند پیسوں کے عوض ایک رسی خریدی۔ پھر جب واپس لوٹے اور مقام رستن تک لوگ پہنچ گئے تو اپنی سواری سے اترے اور اپنے غلام سے کہا کہ کیا تو نے اس نبطی کو پیسے دے دئیے تھے؟ اس نے جواب دیا کہ نہیں۔ تو انہوں نے اپنے خرچہ میں سے کچھ خرچہ نکال کر غلام کو دیا اور اپنے ساتھیوں سے کہا کہ میرے گھر پہنچنے تک سواریوں کے معاملے میں اس کی اچھی طرح مدد کرنا۔ انہوں نے پوچھا کہ ابوریحانہ آپ کا کیا ارادہ ہے؟ انہوں نے جواب دیا کہ میرا ارادہ ہے میں اپنے قرض خواہ کے پاس جا کر اپنی امانت ادا کردوں۔ پھر وہ نکل پڑے یہاں تک کہ میافارقین آئے پھر اپنا قرضہ دے دینے کے بعد اپنے گھر واپس آئے۔ [مصنف ابن ابي شيبه/كتاب الزهد/حدیث: 38354]

حضرت حسن رحمہ اللہ فرماتے ہیں { کَلاَّ بَلْ لاَ یَخَافُونَ الآخِرَۃَ } کی تفسیر میں کہ اسی چیز نے ان کو رسوا کیا ہے۔ [مصنف ابن ابي شيبه/كتاب الزهد/حدیث: 38355]

حضرت مالک بن دینار رحمہ اللہ فرماتے ہیں کہ میں نے عکرمہ رحمہ اللہ سے اللہ کے ارشاد { لَئِنْ لَمْ یَنْتَہِ الْمُنَافِقُونَ وَالَّذِینَ فِی قُلُوبِہِمْ مَرَضٌ} کی تفسیر پوچھی تو انہوں نے جواب دیا کہ ان سے مراد زانی ہیں۔ [مصنف ابن ابي شيبه/كتاب الزهد/حدیث: 38356]

حضرت حسن رحمہ اللہ سے اللہ تعالیٰ کے ارشاد { ہُوَ أَعْلَمُ بِکُمْ إذْ أَنْشَأَکُمْ مِنَ الأَرْضِ وَإِذْ أَنْتُمْ أَجِنَّۃٌ فِی بُطُونِ أُمَّہَاتِکُمْ } کی تفسیر میں منقول ہے کہ اللہ تعالیٰ ہر نفس کے بارے میں جانتا ہے کہ وہ کیا عمل کرے گا، اور کیا کام کرے گا، اور اس کا ٹھکانہ کیا ہوگا۔ [مصنف ابن ابي شيبه/كتاب الزهد/حدیث: 38357]

حضرت عمر رضی اللہ عنہ نے ارشاد فرمایا: آہستگی اور ٹھہراؤ ہر معاملہ میں بہتر ہے سوائے ان معاملات کے جن کا تعلق آخرت سے ہے۔ [مصنف ابن ابي شيبه/كتاب الزهد/حدیث: 38358]

حضرت حارث بن قیس رحمہ اللہ کا ارشاد ہے کہ جب تو کسی دنیا کے کام میں مشغول ہو تو جلدی سے نمٹا لے اور اگر آخرت کے کسی کام میں مشغول ہو تو جتنا ہوسکے ٹھہر کر سکون سے کر۔ اور جب تیرے پاس نماز میں شیطان آئے اور کہے کہ تو تو ریا کر رہا ہے تو نماز زیادہ پڑھ اور لمبی کرکے پڑھ۔ [مصنف ابن ابي شيبه/كتاب الزهد/حدیث: 38359]

حضرت ربیع بن خثیم رحمہ اللہ کے بارے میں مروی ہے کہ ان کے پاس ایک مانگنے والا آیا تو انہوں نے کہا کہ اس کو شکر دے دو ان کے گھر والوں نے کہا کہ وہ شکر کا کیا کرے گا؟ تو آپ نے جواب دیا کہ میں اس سے کچھ نہ کچھ کروں گا۔ [مصنف ابن ابي شيبه/كتاب الزهد/حدیث: 38360]

حضرت میمون فرماتے ہیں کہ مجھے یہ بات پہنچی ہے کہ حضرت ابن عمر رضی اللہ عنہما کے ایک بیٹے نے ان سے پہننے کے لیے ازار مانگا۔ لوگوں نے ایک ازار کا ذکر کیا تو حضرت ابن عمر رضی اللہ عنہما نے فرمایا کہ اس کو کاٹ کر پہنو۔ اس نوجوان نے اس بات کو ناپسند کیا تو حضرت ابن عمر رضی اللہ عنہما نے فرمایا کہ افسوس ہے تجھ پر! دیکھ ان لوگوں میں سے نہ ہو جانا جو اللہ کے رزق کو اپنے پیٹوں میں اور اپنی پشتوں پر ڈال لیتے ہیں۔ [مصنف ابن ابي شيبه/كتاب الزهد/حدیث: 38361]

حضرت ابودرداء رضی اللہ عنہ کا ارشاد ہے کہ نہ جاننے والے کے لیے ایک مرتبہ ہلاکت ہے اور جان کر عمل نہ کرنے والے کے لیے چھ مرتبہ ہلاکت ہے۔ [مصنف ابن ابي شيبه/كتاب الزهد/حدیث: 38362]

حضرت وہب بن منبہ فرماتے ہیں کہ ہم نے اللہ تعالیٰ کی اتاری ہوئی کتاب میں یہ بات پڑھی ہے کہ لوگ ”بغیر عبادت کے ہی دین دار بنے بیٹھے ہیں، آخرت کے عمل کے ذریعے دنیا کا شکار کرتے ہیں، لوگ بھیڑ کی کھالوں کا لباس پہنتے ہیں جبکہ ان کے دل بھیڑیوں کی طرح ہیں، ان کی زبانیں شہد سے میٹھی ہیں جبکہ ان کے دل ایلوے سے بھی کڑوے ہیں۔ کیا یہ لوگ مجھ سے دغا بازی کرتے ہیں اور مجھ کو دھوکا دیتے ہیں کہ مجھے قسم ہے میں ان پر ایسا فتنہ بھیجوں گا کہ ان کے بردبار لوگ بھی حیران ہوجائیں گے۔ [مصنف ابن ابي شيبه/كتاب الزهد/حدیث: 38363]