قیس سے منقول ہے جب معاویہ اور عمرو کوفہ آئے تو حارث بن ازمع عمرو کے پاس آئے۔ عمروسوار ہو کر نکل رہے تھے حارث نے انہیں کہا میں ایک کام آیا تھا اگر آپ تشریف فرما ہوتے تو میں آپ سے ایک سوال پوچھتا۔ حضرت عمرو نے فرمایا تم نے جو سوال کرنا ہے وہ کرلو، کیونکہ جس سوال کا جواب میں تمہیں بیٹھے ہونے کی حالت میں دے سکتا ہوں، اب بھی دے سکتا ہوں۔ حارث نے کہا کہ علی رضی اللہ عنہ اور عثمان کے بارے میں مجھے کچھ بتائیے۔ انہوں نے فرمایا غیظ و غضب اور خود غرضی ایک جگہ جمع ہوئے تھے پس غیظ و غضب خود غرضی پر غالب آگیا۔ پھر آپ چل دیے۔ [مصنف ابن ابي شيبه/كتاب الفتن/حدیث: 40482]

اقرع بیان کرتے ہیں کہ حضرت عمر نے ایک پادری کو بلایا حضرت عمر ان سے سوال کر رہے تھے اور میں ان دونوں پر سایہ کر رہا تھا حضرت عمر نے اس سے کہا کیا آپ اپنی کتابوں میں ہمارا تذکرہ پاتے ہیں؟ اس نے کہا ہاں تمہاری صفات اور اعمال کا تذکرہ ہے حضرت عمر نے پوچھا وہ کیا؟ اس نے کہا میں آپ کو لوہے کا سینگ پاتا ہوں حضرت عمر اس بات سے ذرا پریشان ہوئے پھر پوچھا قرن حدید کیا ہے؟ تو پادری نے جواب دیا سخت امانتدار۔ اس بات سے عمر خوش ہوئے۔ پھر کہنے لگے میرے بعد کیا پاتے ہو تو اس نے جواب دیا سچا خلیفہ جو اپنے اقرباء کو ترجیح د ے گا۔ حضرت عمر نے فرمایا اللہ ابن عفان پر رحم کرے۔ پھر حضرت عمر نے پوچھا اس کے بعد آپ کیا پاتے ہیں؟ اس نے کہا لوہے میں شگاف۔ حضرت عمر کے ہاتھ میں کوئی شے تھی جس کے ذریعے الٹ پلٹ کر رہے تھے حضرت عمر نے اسے پھینکا اور دو یا تین دفعہ یہ فرمایا ”یا دفرا“ (اے رسوا ہونے والے) پادری نے کہا آپ اس طرح نہ کہیے اے امیرالمؤمنین! کیونکہ وہ مسلمان خلیفہ ہوگا اور نیک آدمی ہوگا لیکن وہ ایسی حالت میں خلیفہ بنے گا جب تلوار ننگی ہوگی اور خون بہہ رہا ہوگا۔ پھر حضرت عمر میری طرف متوجہ ہوئے اور فرمایا نماز کے لیے چلو۔ [مصنف ابن ابي شيبه/كتاب الفتن/حدیث: 40483]

عبداللہ بن سلام سے منقول ہے کہ انہوں نے فرمایا تم اپنی تلواریں نہ کھینچو، اگر تم تلواریں کھونچَ گے تو قیامت تک یہ نیا م میں نہ جائیں گی پھر فرمایا مجھے اٹھارہ دن کی مہلت دے دو یعنی حضرت عثمان کی شہادت کے دن تک (کیونکہ یہ خود وفات پاجائیں گے) [مصنف ابن ابي شيبه/كتاب الفتن/حدیث: 40484]

حضرت کعب فرماتے ہیں کہ گویا کہ میں اس کی طرف یعنی عثمان کے قاتل کی طرف دیکھ رہا ہوں اس کے دونوں ہاتھوں میں آگ کے دو شعلے ہیں پس اس نے حضرت عثمان کو قتل کردیا۔ [مصنف ابن ابي شيبه/كتاب الفتن/حدیث: 40485]

ابو سعید سے منقول ہے کہ حضرت عثمان نے سنا کہ مصر کا وفد آیا ہے پس حضر ت عثمان نے ان کا استقبال کیا وہ مدینہ سے باہر ایک بستی میں تھے راوی کہتے ہیں کہ میرا خیال ہے کہ حضرت عثمان اس بات کو ناپسند کرتے تھے کہ وہ مدینہ میں ان کے پاس حاضر ہوں یا اس طرح کا کوئی امر تھا۔ پس اہل مصر ان کے پاس آئے اور کہنے لگے کہ آپ صحیفہ منگوائیے تو انہوں نے صحیفہ منگوا لیا پھر کہنے لگے اس کو کھولیے اور سابعہ نکالیے وہ سور یونس کو سابعہ کا نام دیتے تھے پس حضرت عثمان نے پڑھنا شروع کیا اس آیت پر پہنچے: { قُلْ أَرَأَیْتُمْ مَا أَنْزَلَ اللَّہُ لَکُمْ مِنْ رِزْقٍ فَجَعَلْتُمْ مِنْہُ حَرَامًا وَحَلاَلاً قُلْ آللَّہُ أَذِنَ لَکُمْ أَمْ عَلَی اللہِ تَفْتَرُونَ } (آپ کہہ دیجیے تم بتاؤ کہ اللہ تعالیٰ نے جو رزق اتارا پھر اس میں سے تم نے حرام اور حلال بنا لیا آپ کہہ دیں کیا تمہیں اللہ نے اجازت دی یا اللہ پر تم بہتان باندھتے ہو) اہل مصر نے کہا آپ بتائیں کہ جو چراگاہ آپ نے مقرر کی ہے کیا اللہ نے آپ کو اس کی اجازت دی ہے یا آپ اللہ پر بہتان باندھتے ہیں؟ حضرت عثمان نے فرمایا پس اسے چھوڑو یہ آیت فلاں فلاں امر میں اتری ہے بہر حال آپ چراگاہ کی جو بات کر رہے ہیں تو مجھ سے پہلے حضرت عمر نے صدقہ کے اونٹوں کے لیے چراگاہ مقرر کی تھی۔ پھر جب مجھے والی بنایا گیا تو صدقہ کے اونٹ بڑھ گئے، میں نے چراگاہ کو بھی وسعت دیدی اونٹوں کی کثرت کے پیش نظر۔ پس اہل مصر آیتوں سے دلیل پکڑتے رہے اور حضرت عثمان فرماتے رہے کہ اسے چھوڑو اور کہتے رہے یہ آیت فلاں فلاں واقعہ میں اتری ہے۔ جو حضرت عثمان سے کلام کررہا تھا وہ آپ کی عمر کا تھا، ابو نضرہ فرماتے ہیں کہ یہ بات مجھے ابو سعیدنے بتائی، ابو نضرہ فرماتے ہیں کہ میں اس دن تمہاری عمر کا تھا کہتے ہیں میرے چہرے پر مکمل جوانی کے اثرات ظاہر نہ ہوئے تھے یا یوں فرمایا کہ میں اچھی طرح جوان نہ ہوا تھا۔ میں نہیں جانتا کہ انہوں نے دوسری دفعہ فرمایا ہو میں اس دن تیس سال کا تھا۔ پھر انہوں نے حضرت عثمان سے ایسے اعتراضات کیے جن سے وہ چھٹکارا نہ پا سکے اور حضرت عثمان نے ان چیزوں کی حقیقت کو اچھی طرح پہچان لیا پھر فرمایا میں اللہ سے مغفرت طلب کرتا ہوں اور اسی کی طرف رجوع کرتا ہوں۔ پھر ان سے فرمایا تم کیا چاہتے ہو؟ پھر انہوں نے حضرت عثمان سے ایک عہد لیا راوی کہتے ہیں میرا خیال ہے انہوں نے کچھ شرائط بھی طے کیں اور حضرت عثمان نے ان سے عہد لیا کہ وہ مسلمانوں کی قوت کو فرو نہ کریں گے اور نہ ہی مسلمانوں میں تفرقہ پھلائیں گے جب تک کہ میں شرائط پر قائم رہوں گا۔ پھر حضر ت عثمان نے فرمایا تم اور کیا چاہتے ہو تو انہوں نے کہا ہم یہ چاہتے ہیں کہ اہل مدینہ عطا یا نہ لیں کیونکہ یہ مال تو صرف قتال کرنے والوں اور اصحاب محمد (صلی اللہ علیہ وآلہ وسلم) کا ہے پس وہ راضی ہوگئے اور حضرت عثمان کے ساتھ مدینہ آئے پس حضرت عثمان کھڑے ہوئے اور خطبہ دیا اور فرمایا اللہ کی قسم میں نے اس وفد سے بہتر کوئی وفد نہیں دیکھا جو میری حاجت کے لیے اس سے بہتر ہو۔ اور پھر دوسری مرتبہ یہی فرمایا۔ راوی کہتے ہیں کہ میرا خیال ہے کہ اس کے شرکاء اہل مصر ہیں سنو جس کے پاس کھیتی ہے وہ اپنی کھیتی باڑی کرے اور جس کے پاس دودھ والا جانور ہے وہ اس کا دودھ نکال کر گزارا کرے میرے پاس تمہارے لیے کوئی مال نہیں۔ اور مال مجاہدین اور اصحاب محمد (صلی اللہ علیہ وآلہ وسلم) کے لیے ہے پس لوگ غصے ہوئے اور کہنے لگے یہ بنوامیہ کا فریب ہے۔ پھر مصری وفد بخوشی واپس لوٹ گیا۔ راستے میں تھے کہ ایک سوار ان کے پاس آیا پھر ان سے جدا ہوگیا پھر ان کی طرف لوٹا اور جدا ہوگیا اور ان کو برا بھلا کہا۔ تو انہوں نے ا س سے کہا تمہارا کیا معاملہ ہے؟ اس نے کہا امیر المؤ منین کی طرف سے مصر کے گورنر کی طرف سفیر ہوں پس اس وفد نے تحقیق کی تو اس کے پاس سے ایک خط نکلا جو حضرت عثمان کی طرف سے تھا اس پر مہر بھی حضرت عثمان کی تھی اور مصر کے گورنر کو یہ پیغام لکھا تھا کہ وہ اس وفد کو قتل کردے یا ان کے ہاتھ پاؤں کاٹ دیے جائیں۔ پس وہ وفد واپس لوٹا اور مدینہ پہنچا اور حضرت علی رضی اللہ عنہ کی خدمت میں حاضر ہوا اور ان سے کہا تم اللہ کے دشمن کی طرف نہیں دیکھتے جس نے ہمارے بارے میں اس طرح کا حکم جاری کیا ہے، اللہ نے اس کا خون حلال کردیا ہے آپ ہمارے ساتھ چلیے مگر حضرت علی رضی اللہ عنہ نے فرمایا اللہ کی قسم میں تمہارے ساتھ ہرگز نہیں جاؤنگا، اہل وفد نے کہا پھر آپ نے ہماری طرف خط کیوں لکھا تھا؟ تو حضرت علی رضی اللہ عنہ نے جواب دیا اللہ کی قسم میں نے تمہاری طرف کبھی کوئی خط نہیں لکھا، پس وہ ایک دوسرے کی طرف دیکھنے لگے، اور ایک دوسرے کو کہنے لگے کیا اس وجہ سے تم قتال کروگے؟ کیا اس وجہ سے تم غیظ و غضب میں مبتلا ہو؟ حضرت علی رضی اللہ عنہ مدینہ سے نکل کر ایک بستی کی طرف چلے گئے۔ پس وہ چلے اور حضرت عثمان کے پاس پہنچے اور کہنے لگے کہ آپ نے ہمارے بارے میں اس طرح کیوں لکھا۔ حضرت عثمان نے فرمایا کہ تب دو ہی چیزیں ہیں ایک یہ کہ آپ لوگ میرے خلاف مسلمانوں میں سے دو گواہ پیش کریں، اور دوسری یہ کہ میں اس اللہ کی قسم کھاتا ہوں جس کے سوا کوئی معبود نہیں کہ نہ میں نے یہ خط لکھا اور نہ لکھوایا، اور تم جانتے ہو کہ کسی آدمی کے نام سے خط لکھ لیا جاتا ہے اور ایک مہر کے نمونے پر دوسری مہر کندہ کرلی جاتی ہے۔ انہوں نے کہا اللہ کی قسم اللہ نے آپ کا خون حلال کردیا ہے، اور عہد و میثاق ٹوٹ گیا۔ راوی کہتے ہیں پھر انہوں نے محل میں حضرت عثمان کا محاصرہ کرلیا۔ حضرت عثمان نے ان کی طرف جھانکا اور فرمایا السلام علیکم۔ راوی کہتے ہیں میں نے کسی کو سلام کا جواب دیتے نہیں سنا سوائے اس کے کہ کوئی آدمی اپنے دل میں جواب دے دے۔ پھر حضرت عثمان نے فرمایا میں تمہیں اللہ کی قسم دیتا ہوں، کیا تم جانتے ہو کہ میں نے رومہ (کے کنویں) کو اپنے مال سے خریدا تا کہ اس سے میٹھا پانی حاصل کروں اور میں نے اس میں اپنا ڈول مسلمانوں میں سے ایک آدمی کے ڈول کی طرح رکھا؟ کہا گیا جی ہاں۔ فرمایا پھر تم مجھے اس سے پانی پینے سے کیوں روکتے ہو یہاں تک کہ میں سمندر کے پانی سے افطار کروں۔ فرمایا میں تمہیں اللہ کی قسم دیتا ہوں، کیا تم جانتے ہو کہ میں نے اتنی اتنی زمین خریدی اور اسے مسجد میں شامل کردیا؟ کہا گیا جی ہاں۔ فرمایا کیا تم جانتے ہو کہ لوگوں میں سے کسی کو اس میں نماز پڑھنے سے روکا گیا ہو؟ کہا گیا جی ہاں۔ فرمایا پھر میں تمہیں اللہ کی قسم دیتا ہوں، کیا تم نے اللہ کے نبی علیہ السلام سے سنا؟ پھر انہوں نے اپنے بارے میں فلاں فلاں بات ذکر کی، اور میرا خیال ہے کہ مفصل کی کتابت کا بھی ذکر کیا۔ راوی کہتے ہیں پھر ناپسندیدگی پھیل گئی، اور لوگ کہنے لگے امیر المؤمنین سے رک جاؤ۔ ناپسندیدگی پھیل گئی اور اشتر کھڑا ہوا، مجھے معلوم نہیں کہ اسی دن یا کسی اور دن، اس نے کہا شاید ان کے ساتھ اور تمہارے ساتھ فریب کیا گیا ہے۔ راوی کہتے ہیں پس لوگوں نے اسے روند ڈالا یہاں تک کہ اس کو ایسا ایسا پیش آیا۔ پھر حضرت عثمان نے ایک اور مرتبہ ان کی طرف جھانکا، ان کو نصیحت کی اور یاد دہانی کرائی، مگر نصیحت نے ان پر اثر نہ کیا۔ لوگوں پر نصیحت کا اثر پہلی بار سننے پر ہوتا ہے، اور جب وہ دوبارہ کی جائے تو ان پر اثر نہیں کرتی۔ پھر انہوں نے دروازہ کھول دیا اور مصحف اپنے سامنے رکھ لیا۔ [مصنف ابن ابي شيبه/كتاب الفتن/حدیث: 40486]

حسن فرماتے ہیں کہ محمد بن ابی بکر حضرت عثمان کے پاس داخل ہوئے اور ان کی داڑھی پکڑ لی۔ حضرت عثمان نے ان سے فرمایا تم نے مجھے اس طرح پکڑا ہے یا یہ فرمایا کہ تم مجھ پر اس طرح بیٹھے ہو کہ ابوبکر ایسا نہ کرتے۔ راوی کہتے ہیں پس وہ نکل گئے اور ان کو چھوڑ دیا۔ [مصنف ابن ابي شيبه/كتاب الفتن/حدیث: 40487]

ابو سعید کی روایت میں ہے کہ پھر ایک آدمی ان کے پاس داخل ہوا اور کہا میرے اور آپ کے درمیان اللہ کی کتاب ہے۔ پھر وہ نکل گیا اور ان کو چھوڑ دیا۔ پھر ایک آدمی ان کے پاس داخل ہوا جسے الموت الاسود کہا جاتا تھا، اس نے ان کا گلا بار بار دبایا پھر نکل گیا۔ اس نے کہا اللہ کی قسم میں نے ان کے حلق سے زیادہ نرم کوئی چیز نہیں دیکھی، اللہ کی قسم میں نے ان کا گلا دبایا یہاں تک کہ میں نے ان کی سانس کو چھوٹے سانپ کی سانس کی طرح ان کے جسم میں آتے جاتے دیکھا۔ پھر ایک اور آدمی ان کے پاس داخل ہوا اور کہا میرے اور آپ کے درمیان اللہ کی کتاب ہے، اور مصحف ان کے سامنے تھا۔ اس نے تلوار سے ان پر وار کیا، انہوں نے اپنے ہاتھ سے اسے روکا تو اس نے ہاتھ کاٹ دیا۔ مجھے معلوم نہیں کہ اسے الگ کردیا یا کاٹا مگر الگ نہ کیا۔ حضرت عثمان نے فرمایا اللہ کی قسم یہ پہلا ہاتھ ہے جس نے مفصل کو لکھا۔ [مصنف ابن ابي شيبه/كتاب الفتن/حدیث: 40488]

ابو سعید کی روایت کے علاوہ مجھے بتایا گیا کہ پھر تجیبی ان کے پاس داخل ہوا اور ان کو نیزے کے پھل سے زخمی کیا تو خون اس آیت پر پڑا: { فَسَیَکْفِیکَہُمُ اللَّہُ وَہُوَ السَّمِیعُ الْعَلِیمُ } (پس اللہ تمہاری طرف سے ان کے لیے کافی ہوگا اور وہ سننے والا جاننے والا ہے) اور وہ مصحف میں ہے، مٹا نہیں۔ [مصنف ابن ابي شيبه/كتاب الفتن/حدیث: 40489]

اور ابو سعید کی روایت میں ہے کہ قرافصہ کی بیٹی نے اپنے زیورات لے کر اپنی گود میں رکھ لیے، اور یہ ان کے قتل سے پہلے کی بات ہے۔ جب ان کو زخمی کیا گیا یا قتل کیا گیا تو وہ ان پر جھک گئیں یا ان پر پھیل گئیں۔ ان میں سے کسی نے کہا اللہ اسے ہلاک کرے، اس کے کولھے کتنے بڑے ہیں۔ تو وہ جان گئیں کہ اللہ کے دشمن صرف دنیا ہی چاہتے ہیں۔ [مصنف ابن ابي شيبه/كتاب الفتن/حدیث: 40490]

جہم فہری سے منقول ہے کہتے ہیں کہ میں نے اس معاملہ کو ازخود مشاہدہ کیا کہ سعد اور عمار نے حضرت عثمان کو پیغام بھیجا کہ آپ ہمارے پاس آئیں ہم آپ کو ایسی چیزوں کے بارے میں بتانا چاہتے ہیں جو آپ نے نئی نکالی ہیں۔ حضرت عثمان نے پیغام بھیجا کہ آپ آج چلے جائیں آج میں مصروف ہوں فلاں دن تم سے ملاقات کے لیے مقرر ہے تا کہ میں خصومت کے لیے تیار ہوجاؤں ابو محصن کہتے ہیں کہ اشزن کا معنی ہے میں تمہارے ساتھ خصومت کے لیے تیار ہوجاؤں۔ سعد تو واپس چلے گئے عمار نے واپس جانے سے انکار کردیا ابو محصن نے یہ دودفعہ فرمایا۔ تو حضرت عثمان کے قاصد نے ان کو پکڑ کر مارا۔ پس مقررہ دن جب وہ سب جمع ہوئے تو حضرت عثمان نے ان سے کہا تم کس چیز پر مجھ سے ناراض ہو؟ تو انہوں نے کہا کہ آپ نے جو عمارکو مارا ہے اس پر ہم ناراض ہیں حضرت عثمان نے فرمایا کہ سعد اور عمار آئے تھے میں نے ان کو پیغام بھیجا کہ وہ چلے جائیں سعد تو چلے گئے مگر عمار نے انکار کیا تو میرے قاصد نے میرے حکم کے بغیر اس کو مارا اللہ کی قسم نہ تو میں نے اس کا حکم دیا تھا اور نہ ہی میں اس پر راضی تھا۔ پھر بھی میں حاضر ہوں! عمار اپنا بدلہ لے لیں ابو محصن لیصطبر کا مطلب قصاص لینا بتلاتے ہیں۔ پھر وہ کہنے لگے ہم آپ سے ناراض ہیں کہ آپ نے مختلف حروف کو (قراء توں) ایک ہی حرف بنادیا حضرت عثمان نے فرمایا میرے پاس حذیفہ رضی اللہ عنہ آئے تھے پس انہوں نے کہا کہ آپ اس وقت کیا کرسکیں گے جب کہا جائے گا فلاں کی قراءت، فلاں کی قراءت اور فلاں کی قراءت جیسے اہل کتاب نے اپنی کتابوں میں اختلاف کیا؟ پس اگر یہ عمل (ایک قراءت پر عربوں کو جمع کرنا) درست ہے تو یہ اللہ کی طرف سے ہے اور اگر غلط ہے تو حذیفہ رضی اللہ عنہ کی طرف سے ہے۔ پھر انہوں نے کہا کہ ہم آپ سے اس بات پر بھی ناراض ہیں کہ آپ نے چراگاہیں مقرر کردیں ہیں۔ حضرت عثمان نے فرمایا میرے پاس قریش آئے تھے اور کہا تھا کہ عرب کی ہر قوم کے پاس چراگاہ موجود ہے سوائے ہمارے تو میں نے ان کے لیے چراگاہ مقرر کردی اگر تم راضی ہو تو اسے برقرار رکھو اور اگر تمہیں ناگواری ہوتی ہے تو اسے بدل دو یا یہ فرمایا کہ تم مقرر نہ کرو ابو محصن کو اس میں شک ہوا ہے۔ پھر کہنے لگے کہ ہم آپ سے اس وجہ سے ناراض ہیں کہ آپ نے ہمارے اوپر اپنے اقرباء ناسمجھ لوگوں کو مسلط کردیا ہے۔ حضرت عثمان نے فرمایا ہر شہر والے کھڑے ہوں اور مجھے بتائیں جسے وہ پسند کرتے ہیں میں اس کو گورنر بنا دونگا اور جس کو ناپسند کرتے ہیں اس کو معزول کر دونگا۔ پس اہل بصرہ نے کہا ہم عبداللہ بن عامر سے راضی ہیں انہی کو برقرار رکھیے۔ پھر کوفہ والوں نے کہا سعید کو معزول کردیا جائے (یا ولید کہا، ابو محصن کو شک ہوا ہے) اور ابو موسیٰ کو ہم پر گورنر بنایا جائے۔ پس حضرت عثمان نے ایسا ہی کیا۔ اہل شام نے کہا ہم حضرت معاویہ سے راضی ہیں ہم پر انہیں ہی برقرار رکھیے۔ اور اہل مصر نے کہا ابن ابو سرح کو معزول کرکے عمرو بن عاص کو گورنر بنایا جائے۔ حضرت عثمان نے ایسا کردیا۔ انہوں نے جس جس شئے کا تقاضہ کیا اسے انہوں نے حاصل کرلیا اور بخوشی واپس لوٹ گئے۔ ابھی وہ راستے میں تھے کہ ان کے پاس سے ایک سوار گزرا پس ان کو اس پر شک ہواتو انہوں نے اس سے تحقیق کی تو اس کے پاس سے چمڑے کے برتن سے ایک خط برآمد ہوا جو ان کے عامل کے نام تھا۔ اس کا مضمون تھا کہ تم فلاں فلاں کی گردن ماردو۔ پس وہ لوٹے اور علی رضی اللہ عنہ کی خدمت میں گئے پھر ان کے ساتھ علی رضی اللہ عنہ حضرت عثمان کے پاس گئے پھر انہوں نے حضرت عثمان سے کہا یہ رہا آپ کا خط اور یہ رہی آپ کی مہر۔ حضرت عثمان نے فرمایا اللہ کی قسم نہ میں نے خط لکھا اور نہ میں اس کے بارے کچھ جانتا ہوں اور نہ ہی میں نے اس کا حکم دیا۔ حضرت علی رضی اللہ عنہ نے فرمایا پھر آپ کے خیال میں کون ہوسکتا ہے لکھنے والا ابو محصن کہتے ہیں یا کہا پھر آپ کس پر تہمت لگائیں گے؟ حضرت عثمان نے فرمایا میرا خیال ہے میرے کاتب نے دھوکہ دہی سے کام لیا ہے، اور مجھے اے علی رضی اللہ عنہ آپ پر بھی شک ہے حضرت علی رضی اللہ عنہ نے فرمایا آپ کو مجھ پر یہ شک کیوں ہے؟ حضرت عثمان نے فرمایا اس لیے کہ لوگوں میں آپ کی بات مانی جاتی ہے۔ حضرت عثمان نے فرمایا پھر آپ نے ان کو مجھ سے پھیر کیوں نہیں دیا۔ ان لوگوں نے آپ کا اعتبار نہ کیا اور اپنی ضد پر اڑے رہے یہاں تک کہ حضرت عثمان کا محاصرہ کرلیا۔ پھر حضرت عثمان ان کی طرف متوجہ ہوئے اور فرمایا تم کس وجہ سے میرے خون کو حلال سمجھتے ہو؟ اللہ کی قسم مسلمان کا خون حلال نہیں مگر تین وجہ سے ایک یہ کہ وہ مرتد ہوجائے، دوسرا شادی شدہ زانی اور تیسرا کسی کو قتل کرنے والا۔ اللہ کی قسم جب سے میں اسلام لایا ہوں میں نے ان میں سے کسی کا ارتکاب نہیں کیا۔ راوی کہتے ہیں کہ وہ لوگ اپنی ضد پر ڈٹے رہے۔ پھر حضرت عثمان نے لوگوں سے مطالبہ کیا کہ وہ خونریزی نہ کریں۔ راوی کہتے ہیں کہ میں نے ابن زبیر کو دیکھا کہ وہ ایک لشکر میں نکلے یہاں تک کہ ان باغیوں کو شکست دے دی اگر وہ چاہتے کہ باغیوں کو قتل کریں تو قتل کردیتے۔ راوی کہتے ہیں اور میں نے سعید بن اسود بن بختری کو دیکھا کہ وہ ایک آدمی کو تلوار کی چوڑائی سے مار رہے تھے اگر وہ اسے قتل کرنا چاہتے تو قتل کردیتے، لیکن حضرت عثمان نے لوگوں پر تاکید کردی تھی تو وہ رک گئے۔ راوی کہتے ہیں پھر ابو عمرو بن بدیل خزاعی اور تجیبی ان کے پاس داخل ہوئے۔ ان میں سے ایک نے نیزے کے پھل سے ان کی گردن کی رگوں میں وار کیا اور دوسرے نے تلوار سے ان پر حملہ کیا اور انہوں نے ان کو قتل کردیا۔ پھر وہ بھاگ نکلے، رات کو چلتے اور دن کو چھپتے یہاں تک کہ مصر اور شام کے درمیان ایک علاقے میں پہنچے۔ پھر وہ ایک غار میں چھپ گئے۔ پھر اس علاقے کا ایک نبطی اپنے گدھے کے ساتھ آیا، ایک مکھی گدھے کے نتھنے میں گھس گئی تو وہ بدک کر ان کے پاس غار میں جا گھسا۔ اس کا مالک اسے ڈھونڈتا ہوا آیا تو ان کو دیکھ لیا۔ وہ حضرت معاویہ کے عامل کے پاس گیا اور اس کو ان کی خبر دی۔ پس حضرت معاویہ نے ان کو پکڑ کر ان کی گردنیں ماردیں۔ [مصنف ابن ابي شيبه/كتاب الفتن/حدیث: 40491]