عمرو بن دینار سے منقول ہے کہتے ہیں جب حضرت عثمان کے بارے میں تذکرہ ہوا جس طرح تذکرے لوگ کرتے ہیں تو عبدالرحمن بن عوف اپنے کچھ ساتھیوں کے ساتھ تشریف لائے اور حضرت عبداللہ بن عمر کے پاس آئے۔ پس انہوں نے کہا اے ابو عبدالرحمن کیا آپ نہیں دیکھتے کہ اس آدمی (حضرت عثمان) نے کتنی چیزیں پیدا کردیں؟ حضرت عبداللہ بن عمر نے فرمایا واہ بھئی واہ تم مجھے کس بات کا حکم دے رہے ہو؟ کیا تم چاہتے ہو تم روم اور فارس والوں کی طرح ہوجاؤ کہ جب وہ اپنے بادشاہ سے ناراض ہوتے تو اسے قتل کردیتے۔ اللہ تعالیٰ نے ان کو یہ امارت سونپی ہے کہ وہی زیادہ بہتر جاننے والا ہے میں ان کی شان میں کچھ نہیں کہہ سکتا۔ [مصنف ابن ابي شيبه/كتاب الفتن/حدیث: 40492]

بشر بن شغاف فرماتے ہیں کہ حضرت عبداللہ بن سلام رضی اللہ عنہ نے مجھ سے خوارج کے بارے میں پوچھا تو میں نے کہا کہ یہ لوگوں میں سب سے لمبی نماز پڑھنے والے اور سب سے زیادہ روزے رکھنے والے ہیں، البتہ جب یہ پل کے پار چلے جاتے ہیں تو خون بہاتے ہیں اور مال لوٹتے ہیں۔ انہوں نے فرمایا کہ ان کے بارے میں ایسے ہی شخص سے پوچھا جائے۔ سنو! میں نے ان سے کہا تھا کہ حضرت عثمان رضی اللہ عنہ کو قتل نہ کرو، انہیں چھوڑ دو، اللہ کی قسم اگر تم انہیں گیارہ (راتیں) چھوڑ دو تو وہ ضرور اپنے بستر پر طبعی موت مر جائیں گے، مگر انہوں نے ایسا نہ کیا۔ بیشک کوئی نبی قتل نہیں کیا گیا مگر اس کے بدلے لوگوں میں سے ستر ہزار قتل کیے گئے اور کوئی خلیفہ قتل نہیں کیا گیا مگر اس کے بدلے پینتیس ہزار قتل کیے گئے۔ [مصنف ابن ابي شيبه/كتاب الفتن/حدیث: 40493]

ابو قلابہ سے منقول ہے کہ حضرت حسن بن علی رضی اللہ عنہ حضرت عثمان کی خدمت میں حاضر ہوئے اور عرض کیا کہ میں اپنی تلوار سونت لوں؟ (میں باغیوں سے لڑائی کے لیے تیار ہوں) حضرت عثمان نے فرمایا، نہیں، تب میں اللہ کے سامنے تمہارے خون سے بری ہوں۔ تم اپنی تلوار وہیں (نیام میں) رکھو اور اپنے والد کے پاس واپس چلے جاؤ۔ [مصنف ابن ابي شيبه/كتاب الفتن/حدیث: 40494]

اعمش سے منقول ہے کہ ہم ابن ابو ہذیل کے پاس آئے تو انہوں نے کہا کہ انہوں نے حضرت عثمان کو شہید کردیا وہ پھر میرے پاس آئے ہم نے کہا تم کو شک تو نہیں ہوا کہیں؟ [مصنف ابن ابي شيبه/كتاب الفتن/حدیث: 40495]

سعد بن ابراہیم اپنے والد سے روایت کرتے ہیں کہ میں نے ان کو فرماتے ہوئے سنا کہ یہ میرے دو پاؤں ہیں اگر کلام اللہ میں یہ ہے کہ ان کو قید میں ڈال دو تو میرے دونوں پاؤں میں بیڑیاں ڈال دو۔ [مصنف ابن ابي شيبه/كتاب الفتن/حدیث: 40496]

محمد سے منقول ہے کہ حضرت حذیفہ رضی اللہ عنہ نے حضرت عثمان کے قتل کے وقت فرمایا کہ اے اللہ اگر اہل عرب نے حضرت عثمان کو شہید کر کے اچھا کیا یعنی خیرو ہدایت اور تیری رضا کی خاطر، تو میں اس سے بری ہوں اور میرا اس میں کچھ حصہ نہیں اور اگر اہل عرب نے ان کو شہید کرکے غلطی کی تو میری براءت کے بارے میں تو جانتا ہی ہے۔ پھر فرمایا میری اس بات سے عبرت حاصل کرو جو میں تم سے کہہ رہا ہوں اللہ کی قسم اگر اہل عرب نے ان کے قتل میں بھلائی کی تو عنقریب وہ اس کا نفع دیکھ لیں گے اور اگر انہوں نے اس میں غلطی کی تو اس کا خونی نقصان بھی دیکھ لیں گے۔ [مصنف ابن ابي شيبه/كتاب الفتن/حدیث: 40497]

حمیدبن ہلال سے منقول ہے کہ ابو ذر نے حضرت عثمان سے عرض کیا کہ اگر آپ مجھے حکم دیں تو میں کجاوے کے حلقے کے ساتھ اپنے آپ کو معلق کرلوں اور پھر اسی سے بندھا رہوں یہاں تک کہ مجھے موت آجائے (یعنی میں آپ کی ہر طرح اطاعت کے لیے تیار ہوں) [مصنف ابن ابي شيبه/كتاب الفتن/حدیث: 40498]

ابن حنفیہ سے منقول ہے کہتے ہیں کہ حضرت علی رضی اللہ عنہ فرماتے تھے کہ اگر حضرت عثمان مجھے مقام صرار کی طرف جانے کا حکم دیتے تو میں ان کے اس حکم کو سنتا اور اطاعت کرتا۔ [مصنف ابن ابي شيبه/كتاب الفتن/حدیث: 40499]

حضرت ابو ذر نے فرمایا کہ اگر حضرت عثمان مجھے حکم دیتے کہ میں سر کے بل چلوں تو میں ضرور چلتا۔ [مصنف ابن ابي شيبه/كتاب الفتن/حدیث: 40500]

عبید بن عمرو خارفی سے منقول ہے کہ جو لوگ مدینہ آئے تھے ان میں سے میں بھی ایک تھا پس یہ قافلہ ذی مروہ میں ٹھہرا۔ قافلے والوں نے ہمیں اصحاب محمد (صلی اللہ علیہ وآلہ وسلم) اور ان کی ازواج مطہرات کے پاس بھیجا کہ ہم ان سے یہ سوال کریں کہ ہم مدینہ آجائیں یا لوٹ جائیں اور ہم کو یہ بھی ہدایت کی گئی کہ سب سے آخر میں حضرت علی رضی اللہ عنہ سے سوال کرنا ہے۔ پس ہم نے ان سے بات کی اور سوال کیا آنے یا واپس لوٹنے کے بارے میں۔ انہوں نے آنے کا مشورہ دیا پھر ہم نے حضرت علی رضی اللہ عنہ کے پاس پہنچ کر ان سے سوال کیا تو انہوں نے پوچھا کیا تم لوگوں نے مجھ سے پہلے بھی کسی سے یہ سوال کیا تو ہم نے کہا جی ہاں۔ حضرت علی رضی اللہ عنہ نے پوچھا انہوں نے کیا حکم دیا ہے؟ ہم نے کہا آنے کا حکم دیا ہے۔ حضرت علی رضی اللہ عنہ نے فرمایا لیکن میں تمہیں یہ حکم نہیں دیتا یہ معاملہ ایسا ہے کہ اسکا انجام جلد ظاہر ہوجائے گا۔ [مصنف ابن ابي شيبه/كتاب الفتن/حدیث: 40501]