سیدنا ابو موسی اشعری رضی اللہ عنہ سے مروی ہے کہ رسول اللہ صلی اللہ علیہ وسلم چل رہے تھے، پس ایک دیوار کے پہلو میں نرم جگہ کی طرف مائل ہوئے اور وہاں پیشاب کیا اور پھر فرمایا: ”جب بنو اسرائیل کا کوئی آدمی پیشاب کرتا اور اگر پیشاب اس کو لگ جاتا تو وہ اس حصے کو قینچیوں سے کاٹتا تھا۔“ پھر آپ صلی اللہ علیہ وسلم نے فرمایا: ”اس لیے جب تم میں سے کوئی آدمی پیشاب کرے تو وہ نرم جگہ تلاش کر لیا کرے۔“ [الفتح الربانی/كتاب الطهارة/حدیث: 481]

سیدنا عبداللہ بن عباس رضی اللہ عنہما سے مروی ہے، وہ کہتے ہیں کہ رسول اللہ صلی اللہ علیہ وسلم نے فرمایا: ”لعنت والے تین مقامات سے بچو۔“ کسی نے کہا: ”اے اللہ کے رسول! وہ لعنت والے مقامات کیا ہیں؟“ آپ صلی اللہ علیہ وسلم نے فرمایا: ”جس سائے کو استعمال کیا جاتا ہو، اس میں یا راستے میں یا پانی کے گھاٹ میں پیشاب کرنا۔“ [الفتح الربانی/كتاب الطهارة/حدیث: 482]

سیدنا ابو ہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ”دو لعنت کرنے والی چیزوں سے بچو۔“ صحابہ نے کہا: ”اے اللہ کے رسول! وہ لعنت کرنے والی چیزیں کون سی ہیں؟“ آپ صلی اللہ علیہ وسلم نے فرمایا: ”جو آدمی لوگوں کے راستے میں یا سائے میں قضائے حاجت کرتا ہے۔“ [الفتح الربانی/كتاب الطهارة/حدیث: 483]

سیدنا عبداللہ بن سرجس رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ”کوئی آدمی ہرگز بل میں پیشاب نہ کرے، اور جب تم نے سونا ہو تو چراغ کو بجھا دیا کرو، کیونکہ چوہیا اس کی بتی پکڑ کر گھر والوں کو جلا سکتی ہے، مشکیزوں کے منہ باندھ دیا کرو، برتنوں کو ڈھانپ دیا کرو اور رات کو دروازے بند کر دیا کرو۔“ لوگوں نے قتادہ رحمہ اللہ سے کہا: ”بل میں پیشاب کرنے کو کیوں ناپسند کیا جاتا ہے؟“ انہوں نے کہا: ”کہا جاتا ہے کہ یہ جنوں کے مسکن ہیں۔“ [الفتح الربانی/كتاب الطهارة/حدیث: 484]

رسول اللہ صلی اللہ علیہ وسلم نے اس سے منع فرمایا کہ ”آدمی اپنے غسل خانے میں پیشاب کرے،“ کیونکہ عام وسوسے اسی وجہ سے ہوتے ہیں۔ [الفتح الربانی/كتاب الطهارة/حدیث: 485]

(دوسری سند) رسول اللہ صلی اللہ علیہ وسلم نے اس سے منع فرمایا کہ ”آدمی اپنے غسل خانے میں پیشاب کرے،“ کیونکہ عام وسوسے اسی وجہ سے ہوتے ہیں۔ [الفتح الربانی/كتاب الطهارة/حدیث: 486]

حُمید بن عبدالرحمن حِمیری رحمہ اللہ کہتے ہیں: میں ایسے صحابی کو ملا، جن کو سیدنا ابو ہریرہ رضی اللہ عنہ کی طرح چار برسوں تک نبی کریم صلی اللہ علیہ وسلم کی صحبت کا شرف ملا تھا، انہوں نے کہا: رسول اللہ صلی اللہ علیہ وسلم نے ہمیں اس سے منع فرمایا کہ ”ہم ہر روز کنگھی کریں یا غسل خانے میں پیشاب کریں یا بیوی خاوند کے بچے ہوئے پانی سے غسل کرے یا خاوند بیوی کے بچے ہوئے پانی سے نہائے،“ ان کو چاہیے کہ وہ اکٹھے چلو بھر لیں (یعنی ایک وقت میں اکٹھا نہا لیں)۔ [الفتح الربانی/كتاب الطهارة/حدیث: 487]

سیدنا حذیفہ رضی اللہ عنہ کہتے ہیں: جب ان کو یہ بات پہنچی کہ سیدنا ابو موسی رضی اللہ عنہ (پیشاب کے چھینٹوں سے بچنے کے لیے) ایک شیشی میں پیشاب کرتے ہیں اور کہتے ہیں کہ جب بنو اسرائیل کے کسی فرد کو پیشاب لگ جاتا تو وہ اس جگہ کو کاٹتا تھا، تو انہوں نے کہا: ”میں چاہتا ہوں کہ تمہارا یہ ساتھی اس قدر سختی نہ کرے،“ میں نے خود کو دیکھا کہ میں رسول اللہ صلی اللہ علیہ وسلم کے ساتھ چل رہا تھا، پس جب ہم کوڑا کرکٹ والی ایک جگہ کے پاس پہنچے تو تمہاری طرح ہی رسول اللہ صلی اللہ علیہ وسلم نے کھڑے ہو کر پیشاب کیا، میں یہ دیکھ کر دور ہٹنا شروع ہو گیا، لیکن آپ صلی اللہ علیہ وسلم نے فرمایا: ”قریب ہو جا۔“ پس میں آپ صلی اللہ علیہ وسلم کے قریب ہو گیا، یہاں تک کہ آپ صلی اللہ علیہ وسلم کی ایڑیوں کے پاس کھڑا ہو گیا۔ [الفتح الربانی/كتاب الطهارة/حدیث: 488]

(دوسری سند) سیدنا حذیفہ رضی اللہ عنہ کہتے ہیں: میں ایک راستے میں نبی کریم صلی اللہ علیہ وسلم کے ساتھ تھا، پس آپ صلی اللہ علیہ وسلم ذرا ہٹ کر ایک قوم کے کوڑا کرکٹ کے ڈھیر کے پاس آ گئے، پس میں آپ صلی اللہ علیہ وسلم سے دور ہو گیا، لیکن آپ صلی اللہ علیہ وسلم نے مجھے اپنے قریب کر لیا، یہاں تک کہ میں آپ صلی اللہ علیہ وسلم کی ایڑیوں کے پاس کھڑا ہو گیا، پس آپ صلی اللہ علیہ وسلم نے کھڑے ہو کر پیشاب کیا اور پھر پانی منگوا کر وضو کیا اور موزوں پر مسح کیا۔ [الفتح الربانی/كتاب الطهارة/حدیث: 489]

سیدنا مغیرہ بن شعبہ رضی اللہ عنہ سے مروی ہے کہ رسول اللہ صلی اللہ علیہ وسلم ایک قوم کے گندگی والے ڈھیر پر آئے اور کھڑے ہو کر پیشاب کیا۔ حماد بن ابی سلیمان رحمہ اللہ نے کہا: آپ صلی اللہ علیہ وسلم نے اپنی ٹانگوں کو کھلا کیا۔ [الفتح الربانی/كتاب الطهارة/حدیث: 490]