سیدنا عبداللہ بن عمرو رضی اللہ عنہما بیان کرتے ہیں: میں نے قرآن کو یاد کر لیا اور میں نے ایک رات میں اس کی تلاوت کی، تو نبی اکرم صلی اللہ علیہ وسلم نے مجھ سے فرمایا: ”تم ایک مہینے میں اس کی تلاوت کرو۔“ میں نے عرض کی: یا رسول اللہ! آپ مجھے موقع دیجیے کہ میں اپنی قوت اور اپنی جوانی سے فائدہ حاصل کر لوں۔ نبی اکرم صلی اللہ علیہ وسلم نے فرمایا: ”تم دس دن میں اس کی تلاوت کر لو۔“ میں نے عرض کی: یا رسول اللہ! آپ مجھے موقع دیجیے کہ میں اپنی قوت اور اپنی جوانی سے فائدہ حاصل کر لوں۔ نبی اکرم صلی اللہ علیہ وسلم نے فرمایا: ”تم سات دن میں اس کی تلاوت کر لو۔“ میں نے عرض کی: یا رسول اللہ! آپ مجھے موقع دیجیے کہ میں اپنی قوت اور اپنی جوانی سے فائدہ حاصل کر لوں۔ راوی بیان کرتے ہیں: تو نبی اکرم صلی اللہ علیہ وسلم نے میری اس بات کو تسلیم نہیں کیا۔ [صحیح ابن حبان/كتاب الرقائق/حدیث: 757]

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص تین دن سے کم میں اس کی (یعنی پورے قرآن کی) تلاوت کر لیتا ہے اس نے اسے سمجھا ہی نہیں۔ (یا وہ شخص سمجھ بوجھ ہی نہیں رکھتا)۔“ [صحیح ابن حبان/كتاب الرقائق/حدیث: 758]

سیدنا جندب بن عبداللہ رضی اللہ عنہ مرفوع حدیث کے طور پر یہ بات نقل کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”تم قرآن کی تلاوت اس وقت تک کرتے رہو، جب تک تمہارے دل اس کی طرف مائل رہیں اور جب طبیعت منتشر ہونے لگے، تو تم (اس کی تلاوت ختم کر کے) اٹھ جاؤ۔“ [صحیح ابن حبان/كتاب الرقائق/حدیث: 759]

سیدنا سہل بن سعد ساعدی رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے پاس تشریف لائے، ہم اس وقت قرأت سیکھ رہے تھے، آپ صلی اللہ علیہ وسلم نے فرمایا: ”ہر طرح کی حمد اللہ تعالیٰ کے لیے مخصوص ہے۔ اللہ تعالیٰ کی کتاب ایک ہے، تمہارے اندر سفید فام بھی ہیں اور سیاہ فام بھی ہیں، تم لوگ اس کی قرأت سیکھ لو اس سے پہلے کہ ایسے لوگ اس کی قرأت سیکھیں جو اس کی یوں قیمت لگوائیں گے جس طرح وہ اپنی زبانوں (دراصل یہاں لفظ سامان ہونا چاہیے) کی قیمت لگواتے ہیں اور وہ لوگ اس کا معاوضہ جلدی (یعنی دنیا میں ہی) وصول کریں گے، وہ اسے تاخیر سے (یعنی آخرت میں) وصول کرنا نہیں چاہیں گے۔“ (امام ابن حبان رحمہ اللہ فرماتے ہیں:) سماع اسی طرح واقع ہوا ہے، لیکن اصل لفظ «أَلْسِنَتُهُمْ» نہیں ہے بلکہ «السَّهْمُ» (یعنی حصہ) ہے۔ [صحیح ابن حبان/كتاب الرقائق/حدیث: 760]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کوئی شخص یہ نہ کہے: میں فلاں فلاں آیت کو بھول گیا ہوں، وہ شخص اسے بھولا نہیں ہوتا بلکہ وہ آیت اسے بھلا دی گئی ہوتی ہے۔“ [صحیح ابن حبان/كتاب الرقائق/حدیث: 761]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قرآن کو یاد کرتے رہو، کیونکہ یہ آدمی کے سینے سے اس سے زیادہ تیزی سے نکلتا ہے جتنی تیزی سے کوئی جانور اپنی رسی سے نکلتا ہے اور کسی شخص کا یہ کہنا بہت برا ہے کہ میں فلاں، فلاں آیت کو بھول گیا ہوں، وہ بھولا نہیں ہے، بلکہ اسے بھلا دی گئی ہے۔“ (امام ابن حبان رحمہ اللہ فرماتے ہیں:) سعید نے اعمش کے حوالے سے اس روایت کے علاوہ کوئی اور روایت ”مسند“ حدیث کے طور پر روایت نہیں کی۔ [صحیح ابن حبان/كتاب الرقائق/حدیث: 762]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قرآن کو یاد کرتے رہو، کیونکہ یہ آدمی کے سینے سے اس سے زیادہ تیزی سے نکلتا ہے، جتنی تیزی سے جانور اپنی رسی چھڑا کر نکلتا ہے اور کسی شخص کا یہ کہنا بہت برا ہے کہ میں فلاں، فلاں آیت کو بھول گیا ہوں، بلکہ وہ اسے بھلا دی گئی ہے۔“ (امام ابن حبان رحمہ اللہ فرماتے ہیں:) اس حدیث میں اس بات کی دلیل موجود ہے کہ استطاعت فعل کے ہمراہ ہو گی، اس سے پہلے نہیں ہو گی۔ [صحیح ابن حبان/كتاب الرقائق/حدیث: 763]

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”قرآن کا علم حاصل کرنے والے کی مثال بندھے ہوئے اونٹ کے مالک کی مانند ہے، اگر وہ اس کا دھیان رکھے گا تو اسے روک کر رکھے گا اور اگر چھوڑ دے گا تو وہ چلا جائے گا۔“ [صحیح ابن حبان/كتاب الرقائق/حدیث: 764]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”قرآن کے عالم (یا حافظ) کی مثال بندھے ہوئے اونٹ کے مالک کی طرح ہے، اگر وہ اس کا خیال رکھے گا تو اسے روک کر رکھے گا اور اگر اسے چھوڑ دے گا تو وہ چلا جائے گا۔“ [صحیح ابن حبان/كتاب الرقائق/حدیث: 765]

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”قرآن کے حافظ سے قیامت کے دن یہ کہا جائے گا: تم تلاوت کرنا شروع کرو اور (جنت کے درجات پر) چڑھنا شروع کرو اور تم اسی طرح ٹھہر ٹھہر کر تلاوت کرو جس طرح تم دنیا میں ٹھہر ٹھہر کر تلاوت کرتے تھے، تمہارا مقام اس آخری آیت کے پاس ہوگا، جس کی تم تلاوت کرو گے۔“ [صحیح ابن حبان/كتاب الرقائق/حدیث: 766]