سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”جو شخص قرآن کی تلاوت کرتا ہے اور مہارت کے ساتھ اس کی تلاوت کرتا ہے، تو وہ معزز نیک (فرشتوں) کے ساتھ ہوگا اور جو شخص قرآن کی تلاوت کرتے ہوئے مشکل کا سامنا کرتا ہے اس کے لیے دو گنا اجر ہے۔“ [صحیح ابن حبان/كتاب الرقائق/حدیث: 767]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جب بھی کچھ لوگ اللہ تعالیٰ کی مسجد میں بیٹھ کر اللہ کی کتاب کی تلاوت کرتے ہیں اور آپس میں ایک دوسرے کو اس کا درس دیتے ہیں، تو ان لوگوں پر سکینت نازل ہوتی ہے، رحمت انہیں ڈھانپ لیتی ہے، فرشتے انہیں ڈھانپ لیتے ہیں اور اللہ تعالیٰ اپنے پاس موجود (فرشتوں کے سامنے) ان لوگوں کا ذکر کرتا ہے، اور جس شخص کا عمل اسے سست کر دے اس کا نسب اسے تیز نہیں کر سکتا۔“ [صحیح ابن حبان/كتاب الرقائق/حدیث: 768]

سیدنا براء رضی اللہ عنہ بیان کرتے ہیں کہ ایک شخص سورہ کہف کی تلاوت کر رہا تھا اور اس کا جانور بندھا ہوا تھا، اس جانور نے اچھلنا شروع کر دیا، اس شخص نے ایک بادل دیکھا جس نے اسے ڈھانپ لیا تھا، وہ شخص نبی اکرم صلی اللہ علیہ وسلم کی خدمت میں حاضر ہوا اور آپ سے اس بات کا تذکرہ کیا، تو نبی اکرم صلی اللہ علیہ وسلم نے فرمایا: ”اے فلاں! تم تلاوت کرتے رہتے، یہ سکینت تھی جو قرآن کے پاس (راوی کو شک ہے شاید یہ الفاظ ہیں:) قرآن کی وجہ سے نازل ہو رہی تھی۔“ [صحیح ابن حبان/كتاب الرقائق/حدیث: 769]

سیدنا ابوموسیٰ اشعری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”وہ مومن جو قرآن کی تلاوت کرتا ہے اس کی مثال «الأُتْرُجَّةِ» ”ناشپاتی“ کی طرح ہے، جس کا ذائقہ بھی میٹھا ہوتا ہے اور خوشبو بھی پاکیزہ ہوتی ہے، اور وہ مومن جو قرآن کی تلاوت نہیں کرتا، اس کی مثال کھجور کی طرح ہے، جس کا ذائقہ میٹھا ہوتا ہے، لیکن اس کی خوشبو نہیں ہوتی، اور وہ فاجر (یعنی منافق یا کافر) شخص جو قرآن کی تلاوت کرتا ہے اس کی مثال «الرَّيْحَانَةِ» ”ریحانہ“ کی مانند ہے، جس کی خوشبو عمدہ ہوتی ہے، لیکن ذائقہ کڑوا ہوتا ہے، اور وہ فاجر (یعنی کافر یا منافق) شخص جو قرآن کی تلاوت نہیں کرتا، اس کی مثال «الْحَنْظَلَةِ» ”حنظلہ“ کی مانند ہے، جس کا ذائقہ بھی کڑوا ہوتا ہے اور اس کی خوشبو بھی نہیں ہوتی۔“ [صحیح ابن حبان/كتاب الرقائق/حدیث: 770]

سیدنا ابو موسیٰ اشعری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”وہ مومن جو قرآن کی تلاوت کرتا ہے، اس کی مثال «الأُتْرُجَّةِ» (سنگترے یا چکوترے) کی مانند ہے، جس کا ذائقہ بھی میٹھا ہوتا ہے اور اس کی خوشبو بھی عمدہ ہوتی ہے، اور وہ مومن جو قرآن کی تلاوت نہیں کرتا، اس کی مثال «التَّمْرَةِ» (کھجور) کی مانند ہے، جس کا ذائقہ میٹھا ہوتا ہے، لیکن اس کی خوشبو نہیں ہوتی، اور وہ منافق (راوی کو شک ہے شاید یہ الفاظ ہیں: فاجر شخص) جو قرآن کی تلاوت کرتا ہے، اس کی مثال «الرَّيْحَانَةِ» (ریحانہ) کی طرح ہے، جس کی خوشبو اچھی ہوتی ہے، لیکن اس کا ذائقہ کڑوا ہوتا ہے، اور وہ منافق (راوی کو شک ہے شاید یہ الفاظ ہیں: فاجر شخص) جو قرآن کی تلاوت نہیں کرتا ہے، اس کی مثال «الْحَنْظَلَةِ» (حنظلہ) کی مانند ہے، جس کا ذائقہ بھی کڑوا ہوتا ہے اور اس کی خوشبو بھی نہیں ہوتی۔“ [صحیح ابن حبان/كتاب الرقائق/حدیث: 771]

ابوطفیل بیان کرتے ہیں: نافع بن عبدالحارث کی ملاقات سیدنا عمر بن خطاب رضی اللہ عنہ سے ”عسفان“ کے مقام پر ہوئی، نافع سیدنا عمر رضی اللہ عنہ کی طرف سے مکہ مکرمہ کے گورنر تھے۔ سیدنا عمر رضی اللہ عنہ نے دریافت کیا: ”تم نے اپنے پیچھے کس کو مکہ میں اپنا نائب مقرر کیا ہے؟“ انہوں نے جواب دیا: ابن ابزی کو۔ سیدنا عمر رضی اللہ عنہ نے دریافت کیا: ”ابن ابزی کون ہے؟“ انہوں نے جواب دیا: ایک آزاد کردہ غلام ہے، تو سیدنا عمر رضی اللہ عنہ نے فرمایا: ”تم نے ان لوگوں پر اپنا ایک آزاد کردہ غلام نائب بنا دیا ہے؟“ تو نافع نے ان سے گزارش کی کہ وہ اللہ کی کتاب کا عالم ہے، تو سیدنا عمر رضی اللہ عنہ نے فرمایا: تمہارے نبی صلی اللہ علیہ وسلم نے یہ بات ارشاد فرمائی ہے: ”بے شک اللہ تعالیٰ اس قرآن کی وجہ سے کچھ لوگوں کو سربلندی عطا فرمائے گا اور کچھ دوسرے لوگوں کو پستی عطا کرے گا۔“ [صحیح ابن حبان/كتاب الرقائق/حدیث: 772]

سیدنا عبداللہ بن عمرو رضی اللہ عنہ بیان کرتے ہیں کہ ایک شخص نبی کریم صلی اللہ علیہ وسلم کی خدمت میں حاضر ہوا، اس نے عرض کی: یا رسول اللہ! مجھے قرآن پڑھنا سکھائیے۔ نبی اکرم صلی اللہ علیہ وسلم نے فرمایا: ”تم «الرَّ» سے شروع ہونے والی تین سورتوں کی تلاوت سیکھ لو۔“ اس شخص نے عرض کی: میری عمر زیادہ ہو گئی ہے، زبان وزنی ہو گئی ہے اور دل سخت ہو گیا ہے (یعنی حافظہ کمزور ہے)۔ نبی اکرم صلی اللہ علیہ وسلم نے فرمایا: ”تم «حمٓ» سے شروع ہونے والی تین سورتیں سیکھ لو۔“ اس شخص نے اس کی مانند کلمات کہے اور عرض کی: یا رسول اللہ! آپ مجھے ایک جامع سورۃ پڑھنا سکھا دیں، تو نبی اکرم صلی اللہ علیہ وسلم نے اسے سورہ زلزال پڑھنا سکھا دی، یہاں تک کہ جب آپ صلی اللہ علیہ وسلم اس آیت ﴿فَمَنْ يَعْمَلْ مِثْقَالَ ذَرَّةٍ خَيْرًا يَرَهُ * وَمَنْ يَعْمَلْ مِثْقَالَ ذَرَّةٍ شَرًّا يَرَهُ﴾ [سورة الزلزلة: 7-8] پر پہنچے جس کا ترجمہ ہے: ”جو شخص ذرے کے وزن جتنی بھلائی کرے گا وہ اسے دیکھ لے گا اور جو شخص ذرے کے وزن جتنی برائی کرے گا وہ اسے دیکھ لے گا۔“ اس شخص نے عرض کی: اس ذات کی قسم! جس نے آپ کو حق کے ہمراہ مبعوث کیا ہے، میں اس بات کی پروا نہیں کروں گا کہ میں اس کے علاوہ مزید بھی کچھ سیکھوں، یہاں تک کہ میں اللہ تعالیٰ کی بارگاہ میں حاضر ہو جاؤں۔ آپ مجھے یہ بتا دیجیے مجھ پر کون سا عمل کرنا لازم ہے میں وہ عمل کروں گا جس کی میں طاقت رکھتا ہوں، تو نبی اکرم صلی اللہ علیہ وسلم نے ارشاد فرمایا: ”پانچ نمازیں پڑھنا، رمضان کے روزے رکھنا، بیت اللہ کا حج کرنا اور تم اپنے مال کی زکوٰۃ ادا کرو، نیکی کا حکم دو اور برائی سے روکو۔“ [صحیح ابن حبان/كتاب الرقائق/حدیث: 773]

سیدنا انس بن مالک رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم سفر کر رہے تھے، آپ سواری سے نیچے اترے، آپ کے ساتھیوں میں سے ایک صاحب آپ کے پیچھے کی طرف گئے، نبی اکرم صلی اللہ علیہ وسلم نے ان کی طرف توجہ کی اور ارشاد فرمایا: ”کیا میں تمہیں قرآن کے سب سے افضل حصے کے بارے میں نہ بتاؤں؟“ راوی بیان کرتے ہیں: پھر نبی اکرم صلی اللہ علیہ وسلم نے ان کے سامنے یہ تلاوت کی: «الْحَمْدُ لِلّٰهِ رَبِّ الْعَالَمِينَ» ”سب تعریفیں اللہ کے لیے ہیں جو تمام جہانوں کا رب ہے“۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”کیا میں تمہیں قرآن کے افضل کے بارے میں نہ بتاؤں“ اس سے آپ کی مراد یہ ہے: (جسے پڑھنا) تمہارے لیے افضل ہے، ایسا نہیں ہے کہ قرآن کا ایک حصہ دوسرے سے افضل ہو کیونکہ اللہ تعالیٰ کے کلام کے بارے میں یہ بات ناممکن ہے کہ اس میں ”تفاضل“ ہو (یعنی کسی ایک حصے کو دوسرے پر فضیلت ہو)۔ [صحیح ابن حبان/كتاب الرقائق/حدیث: 774]

سیدنا ابی بن کعب رضی اللہ عنہ فرماتے ہیں، نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ فرماتا ہے: تورات میں اور انجیل میں «أُمُّ الْقُرْآنِ» ”ام القرآن“ (یعنی سورہ فاتحہ کی) مانند اور کوئی سورت نہیں ہے، یہی «السَّبْعُ الْمَثَانِي» ”سبع مثانی“ ہے، یہ میرے اور میرے بندے کے درمیان تقسیم ہوئی ہیں اور میرا بندہ جو مانگتا ہے وہ اسے ملے گا۔“ (امام ابن حبان رحمہ اللہ فرماتے ہیں:) روایت کے یہ الفاظ ”تورات اور انجیل میں ام القرآن (یعنی سورہ فاتحہ) کی مانند کوئی چیز نہیں ہے“ اس کا مطلب یہ ہے کہ تورات اور انجیل کی تلاوت کرنے والے کو اللہ تعالیٰ اتنا اجر عطا نہیں کرتا جتنا سورہ فاتحہ کی تلاوت کرنے والے کو عطا کرتا ہے، کیونکہ اللہ تعالیٰ نے اپنے فضل کے تحت اس امت کو باقی تمام امتوں پر فضیلت عطا کی ہے اور اس (امت کو) اللہ تعالیٰ کے کلام کی تلاوت کرنے پر اس سے زیادہ فضیلت عطا کی ہے جو دوسری (امتوں کو ان پر نازل ہونے والے) اللہ تعالیٰ کے کلام کی تلاوت پر عطا کی تھی اور یہ اس امت پر اللہ تعالیٰ کا فضل ہے اور دوسری امتوں کے لیے یہ اس کا عدل ہے۔ [صحیح ابن حبان/كتاب الرقائق/حدیث: 775]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص نماز ادا کرتا ہے اور اس میں سورہ فاتحہ نہیں پڑھتا، تو وہ نماز ناقص ہوتی ہے، وہ ناقص ہوتی ہے، وہ مکمل نہیں ہوتی۔“ راوی بیان کرتے ہیں: ایک شخص نے کہا: اے سیدنا ابوہریرہ رضی اللہ عنہ! بعض اوقات میں امام کے پیچھے ہوتا ہوں، تو سیدنا ابوہریرہ رضی اللہ عنہ نے میرے بازو پر ہاتھ مارا اور فرمایا: اے فارسی! تم اسے اپنے دل میں پڑھ لیا کرو، میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ تعالیٰ فرماتا ہے: میں نے نماز (یعنی سورۃ فاتحہ کی تلاوت کو) اپنے اور اپنے بندے کے درمیان دو حصوں میں تقسیم کر لیا ہے، اس کا نصف حصہ میرے بندے کے لیے ہے اور نصف حصہ میرے لیے ہے اور میرے بندے نے جو مانگا ہے وہ اسے ملے گا، جب بندہ «الْحَمْدُ لِلّٰهِ رَبِّ الْعَالَمِیْنَ» ﴿سورة الفاتحة: 2﴾ ”سب تعریفیں اللہ کے لیے ہیں جو تمام جہانوں کا رب ہے“ پڑھتا ہے، تو اللہ تعالیٰ فرماتا ہے: میرے بندے نے میری حمد بیان کی، جب بندہ «الرَّحْمٰنِ الرَّحِیْمِ» ﴿سورة الفاتحة: 3﴾ ”نہایت مہربان، بہت رحم کرنے والا“ پڑھتا ہے، تو اللہ تعالیٰ فرماتا ہے: میرے بندے نے میری تعریف کی، جب بندہ «مٰلِكِ یَوْمِ الدِّیْنِ» ﴿سورة الفاتحة: 4﴾ ”بدلے کے دن کا مالک“ پڑھتا ہے، تو اللہ تعالیٰ فرماتا ہے: میرے بندے نے میری بزرگی بیان کی اور یہ (یہ بعد والی آیت) میرے اور میرے بندے کے درمیان ہے وہ کہتا ہے: «إِیَّاكَ نَعْبُدُ وَإِیَّاكَ نَسْتَعِیْنُ» ﴿سورة الفاتحة: 5﴾ ”ہم تیری ہی عبادت کرتے ہیں اور تجھ ہی سے مدد مانگتے ہیں“ اور اس کے بعد والا باقی حصہ میرے بندے کے لیے ہے اور میرا بندہ جو مانگے گا وہ اسے ملے گا وہ یہ پڑھتا ہے: «اهْدِنَا الصِّرَاطَ الْمُسْتَقِیْمَ ۝ صِرَاطَ الَّذِیْنَ أَنْعَمْتَ عَلَیْهِمْ غَیْرِ الْمَغْضُوْبِ عَلَیْهِمْ وَلَا الضَّالِّیْنَ» ﴿سورة الفاتحة: 6-7﴾ ”تو صراط مستقیم کی طرف ہمیں ہدایت دے ان لوگوں کے راستے کی طرف جن پر تو نے اپنا انعام کیا ہے، نہ کہ ان لوگوں کے راستے کی طرف جن پر غضب نازل کیا گیا اور جو گمراہ ہوئے“ (اللہ تعالیٰ فرماتا ہے)، تو یہ چیز میرے بندے کو ملے گی اور میرے بندے نے جو مانگا ہے وہ اسے ملے گا۔“ (امام ابن حبان رحمہ اللہ فرماتے ہیں:) ابومغیرہ نامی راوی کا نام عبدالقدوس بن حجاج خولانی ہے۔ [صحیح ابن حبان/كتاب الرقائق/حدیث: 776]