سیدنا ابوسعید بن معلی رضی اللہ عنہ بیان کرتے ہیں: میں مسجد میں نماز ادا کر رہا تھا، نبی اکرم صلی اللہ علیہ وسلم نے مجھے آواز دی، میں آپ کی طرف نہیں گیا (جب میں آپ کی خدمت میں حاضر ہوا)، تو میں نے عرض کی: یا رسول اللہ! میں نماز ادا کر رہا تھا، نبی اکرم صلی اللہ علیہ وسلم نے ارشاد فرمایا: ”کیا اللہ تعالیٰ نے یہ ارشاد نہیں فرمایا: ﴿اسْتَجِيبُوا لِلَّهِ وَلِلرَّسُولِ إِذَا دَعَاكُمْ﴾ [سورة الأنفال: 24] ”جب اللہ اور اس کا رسول تم کو بلائیں، تو تم ان کی طرف جاؤ۔“؟“ پھر نبی اکرم صلی اللہ علیہ وسلم نے فرمایا: ”کیا میں تمہیں ایسی سورت کی تعلیم نہ دوں جو قرآن میں موجود سب سے عظیم سورت ہے؟“ میں نے عرض کی: جی ہاں! نبی اکرم صلی اللہ علیہ وسلم نے فرمایا: ” «اَلْحَمْدُ لِلّٰهِ رَبِّ الْعٰلَمِيْنَ» ”سب تعریفیں اللہ کے لیے ہیں جو تمام جہانوں کا رب ہے“، یہی سبع مثانی ہے اور وہ قرآن ہے جو مجھے دیا گیا ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”یہ سب سے عظیم سورت ہے“ اس سے مراد اجر کے اعتبار سے (سب سے عظیم ہونا) ہے؛ ایسا نہیں ہے کہ قرآن کا ایک حصہ دوسرے سے افضل ہو۔ سیدنا ابوسعید بن معلی رضی اللہ عنہ کا نام رافع بن معلی بن لوذان بن حارثہ ہے، ان کا انتقال 74 ہجری میں ہوا۔ [صحیح ابن حبان/كتاب الرقائق/حدیث: 777]

سیدنا عبداللہ بن عباس رضی اللہ عنہما بیان کرتے ہیں: ایک مرتبہ جبرائیل نبی اکرم صلی اللہ علیہ وسلم کے پاس بیٹھے تھے، اسی دوران انہوں نے اوپر سے (آسمان کا دروازہ) کھلنے کی آواز سنی، انہوں نے سر اٹھایا اور بولے: آج آسمان کا ایسا دروازہ کھلا ہے، جو اس سے پہلے کبھی نہیں کھلا، پھر ایک فرشتہ ان کے پاس آیا اور اس نے نبی اکرم صلی اللہ علیہ وسلم سے کہا: آپ کو دو ایسی سورتوں کی خوشخبری قبول ہو، جو آپ سے پہلے کسی اور نبی کو نہیں دی گئی ہیں، وہ سورہ فاتحہ اور سورہ البقرہ کی آخری آیات ہیں، آپ ان کا جو بھی حرف تلاوت کریں گے آپ کو وہ چیز مل جائے گی۔ [صحیح ابن حبان/كتاب الرقائق/حدیث: 778]

اسید بن حضیر رضی اللہ عنہ بیان کرتے ہیں، انہوں نے عرض کی: یا رسول اللہ! گزشتہ رات میں سورہ بقرہ کی تلاوت کر رہا تھا، اسی دوران میں نے اپنے پیچھے ایک آہٹ سنی، مجھے یہ گمان ہوا کہ شاید میرا گھوڑا چلا گیا ہے، نبی اکرم صلی اللہ علیہ وسلم نے فرمایا: ”اے ابواسید! تم تلاوت کرتے رہو۔“ میں نے توجہ کی، تو وہاں کچھ چراغ نظر آئے، جو آسمان و زمین کے درمیان موجود تھے، نبی اکرم صلی اللہ علیہ وسلم نے فرمایا: ”اے ابوعتیک! تم تلاوت کرتے ہو۔“ میں نے عرض کی: یا رسول اللہ! میں اب تلاوت جاری نہیں رکھ سکتا، تو نبی اکرم صلی اللہ علیہ وسلم نے فرمایا: ”یہ فرشتے تھے جو سورہ بقرہ کی تلاوت کی وجہ سے نازل ہوئے تھے، اگر تم تلاوت جاری رکھتے، تو اور بھی حیران کن چیزیں دیکھتے۔“ [صحیح ابن حبان/كتاب الرقائق/حدیث: 779]

سیدنا سہل بن سعد رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”ہر چیز کی ایک چوٹی ہے اور قرآن کی چوٹی سورۃ بقرہ ہے، جو شخص رات کے وقت اس کی تلاوت کر لیتا ہے، شیطان تین راتوں تک اس کے گھر میں داخل نہیں ہو گا اور جو شخص دن کے وقت اس کی تلاوت کر لیتا ہے، شیطان تین دن تک اس کے گھر میں داخل نہیں ہو گا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”شیطان تین دن تک اس گھر میں داخل نہیں ہوتا“ اس سے مراد سرکش شیاطین ہیں۔ دوسرے شیاطین مراد نہیں ہیں۔ [صحیح ابن حبان/كتاب الرقائق/حدیث: 780]

عبدالرحمن بن یزید بیان کرتے ہیں: طواف کے دوران میری ملاقات سیدنا ابو مسعود رضی اللہ عنہ سے ہوئی۔ میں نے ان سے اس بارے میں دریافت کیا، تو انہوں نے مجھے بتایا کہ نبی اکرم صلی اللہ علیہ وسلم نے یہ بات ارشاد فرمائی ہے: ”جو شخص رات کے وقت سورہ بقرہ کی آخری دو آیات کی تلاوت کر لے، تو یہ دونوں اس کے لیے کافی ہوں گی۔“ [صحیح ابن حبان/كتاب الرقائق/حدیث: 781]

سیدنا نعمان بن بشیر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”وہ دو آیات، جہاں سورہ بقرہ ختم ہوتی ہے، وہ جس بھی گھر میں تین دن تک تلاوت کی جائیں، تو شیطان اس کے قریب نہیں آئے گا۔“ [صحیح ابن حبان/كتاب الرقائق/حدیث: 782]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اپنے گھروں کو قبرستان نہ بناؤ، تم وہاں نماز ادا کیا کرو، کیونکہ شیطان ایسے گھر سے دور بھاگتا ہے جس گھر میں وہ سورہ بقرہ کی تلاوت سنتا ہے۔“ [صحیح ابن حبان/كتاب الرقائق/حدیث: 783]

سیدنا ابی بن کعب رضی اللہ عنہ کے صاحبزادے بیان کرتے ہیں کہ ان کے والد نے انہیں بتایا کہ ان کا ایک گودام تھا جس میں کھجوریں موجود تھیں، وہ اس کا دھیان رکھتے تھے، لیکن کھجوریں کم ہوتی جا رہی تھیں۔ ایک رات وہ اس کا پہرہ دے رہے تھے، تو وہاں ایک نوجوان لڑکے کی طرح کا جانور آیا۔ سیدنا ابی رضی اللہ عنہ فرماتے ہیں: میں نے سلام کیا، تو اس نے مجھے سلام کا جواب دیا۔ میں نے دریافت کیا: ”تم کون ہو، تم جن ہو یا انسان ہو؟“ اس نے کہا: ”میں جن ہوں۔“ میں نے کہا: ”تم اپنا ہاتھ میری طرف بڑھاؤ“، تو اس کا ہاتھ کتے کی مانند تھا اور اس کے بال کتے کے بالوں جیسے تھے۔ میں نے کہا: ”کیا جنوں کی تخلیق اس طرح ہوتی ہے؟“ اس نے کہا: ”جن یہ بات جانتے ہیں کہ ان میں ایسے لوگ بھی موجود ہیں جو مجھ سے زیادہ طاقت ور ہیں۔“ میں نے کہا: ”تم ایسا کیوں کرتے ہو؟“ اس نے کہا: ”مجھے پتہ چلا ہے کہ آپ ایک ایسے شخص ہیں جو صدقہ کرنے کو پسند کرتے ہیں، تو میری یہ خواہش ہوئی کہ میں بھی آپ کے اناج میں سے کچھ حاصل کر لوں۔“ میں نے دریافت کیا: ”تم لوگوں سے کون سی چیز ہمیں محفوظ رکھ سکتی ہے؟“ اس نے کہا: ”یہ آیت یعنی آیت الکرسی ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ [سورة البقرة: 255] ۔“ سیدنا ابی رضی اللہ عنہ کہتے ہیں: میں نے اسے چھوڑ دیا۔ اگلے دن سیدنا ابی رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور آپ کو اس بارے میں بتایا، تو نبی اکرم صلی اللہ علیہ وسلم نے فرمایا: ”اس خبیث نے ٹھیک کہا ہے۔“ (امام ابن حبان رحمہ اللہ فرماتے ہیں:) سیدنا ابی بن کعب رضی اللہ عنہ کے صاحبزادے کا نام طفیل بن ابی بن کعب ہے۔ [صحیح ابن حبان/كتاب الرقائق/حدیث: 784]

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص سورہ الکہف کی دس آیات کی تلاوت کر لے گا، وہ دجال کی آزمائش سے محفوظ رہے گا۔“ [صحیح ابن حبان/كتاب الرقائق/حدیث: 785]

سیدنا ابودرداء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے فرمایا: ”جو شخص سورہ الکہف کی آخری دس آیات کی تلاوت کر لے گا وہ دجال کی آزمائش سے محفوظ رہے گا۔“ [صحیح ابن حبان/كتاب الرقائق/حدیث: 786]