سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھے سورہ رحمٰن پڑھنا سکھائی، ایک دن میں شام کے وقت مسجد میں آیا، تو کچھ لوگ میرے پاس آ کر بیٹھ گئے، میں نے ان میں سے ایک شخص سے کہا: تم میرے سامنے تلاوت کرو، تو اس نے کچھ الفاظ ایسے طریقے سے تلاوت کیے جنہیں میں نے نہیں پڑھا تھا۔ میں نے دریافت کیا: تمہیں کس نے یہ تلاوت سکھائی ہے؟ اس نے جواب دیا: مجھے اللہ کے رسول صلی اللہ علیہ وسلم نے یہ تلاوت سکھائی ہے، پھر ہم لوگ روانہ ہوئے اور نبی اکرم صلی اللہ علیہ وسلم کی خدمت میں حاضر ہوئے، میں نے عرض کی: ہمارا قرأت کے بارے میں اختلاف ہو گیا ہے، تو نبی اکرم صلی اللہ علیہ وسلم کا چہرہ مبارک یہ سن کر متغیر ہو گیا، جب میں نے اختلاف کا تذکرہ کیا، تو آپ صلی اللہ علیہ وسلم کو اس سے بہت افسوس ہوا۔ آپ صلی اللہ علیہ وسلم نے ارشاد فرمایا: ”تم سے پہلے لوگ اختلاف کرنے کی وجہ سے ہلاکت کا شکار ہو گئے تھے“ پھر آپ صلی اللہ علیہ وسلم نے سیدنا علی رضی اللہ عنہ کو حکم دیا، تو انہوں نے ارشاد فرمایا: ”بیشک اللہ کے رسول صلی اللہ علیہ وسلم تم کو یہ حکم دے رہے ہیں کہ تم میں سے ہر ایک شخص اسی طریقے کے مطابق تلاوت کرے جس طرح اسے تعلیم دی گئی ہے، کیونکہ تم سے پہلے لوگ اختلاف کی وجہ سے ہلاکت کا شکار ہو گئے تھے“۔ راوی بیان کرتے ہیں: پھر ہم لوگ وہاں سے آ گئے، ہم میں سے ہر شخص اسی طریقے کے مطابق تلاوت کرتا تھا (جو اس نے سیکھا تھا) اس کا ساتھی اس کے طریقے کے مطابق تلاوت نہیں کرتا تھا۔ [صحیح ابن حبان/كتاب الرقائق/حدیث: 747]

سیدنا عبداللہ بن مغفل رضی اللہ عنہ بیان کرتے ہیں: نبی اکرم صلی اللہ علیہ وسلم نے فتح مکہ کے موقع پر تلاوت کی، تو آپ صلی اللہ علیہ وسلم نے اس تلاوت کے دوران ترجیع کی۔ معاویہ نامی راوی یہ بات بیان کرتے ہیں: ”اگر مجھے اس بات کا اندیشہ نہ ہوتا کہ لوگ میرے اردگرد اکٹھے ہو جائیں گے، تو میں اس طریقے سے تلاوت کر کے دکھاتا۔“ [صحیح ابن حبان/كتاب الرقائق/حدیث: 748]

سیدنا براء بن عازب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: «زَيِّنُوا الْقُرْآنَ بِأَصْوَاتِكُمْ» ”قرآن کو اپنی آوازوں کے ذریعے آراستہ کرو۔“ (امام ابن حبان رحمہ اللہ فرماتے ہیں:) یہ وہ الفاظ ہیں، جنہیں ہو کر متضاد مفہوم مراد لیا جاتا ہے۔ نبی اکرم صلی اللہ علیہ وسلم کے اس فرمان سے مراد یہ ہے: ”تم قرآن کو اپنی آوازوں کے ذریعے آراستہ کرو“، یہ نہیں کہ ”تم قرآن کے ذریعے اپنی آوازوں کو آراستہ کرو“۔ [صحیح ابن حبان/كتاب الرقائق/حدیث: 749]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قرآن کو اپنی آوازوں کے ذریعے آراستہ کرو۔“ [صحیح ابن حبان/كتاب الرقائق/حدیث: 750]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ کسی بھی چیز کو اتنی توجہ سے نہیں سنتا جتنی توجہ سے وہ اس نبی کو سنتا ہے، جو قرآن کو خوش الحانی کے ساتھ تلاوت کرتا ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”وہ قرآن کو خوش الحانی سے پڑھے“ اس سے مراد اس کو دردمندی سے پڑھنا ہے۔ اگر یہ «الْغُنْيَةِ» (یعنی خوش الحانی) سے ماخوذ ہوتا، تو آپ صلی اللہ علیہ وسلم یہ کہتے: «يَتَغَانٰی بِهٖ»، یہ نہ کہتے: «يَتَغَنّٰى بِهٖ» ۔ قرآن کو دردمند انداز میں پڑھنے کا یہ مطلب نہیں ہے کہ حلق پر بوجھ لادا جائے یا آواز کو سنوارا جائے یا نغمگی کی پیروی کرتے ہوئے (آواز میں اتار چڑھاؤ پیدا کیا جائے)، قرآن کو دردمندانہ انداز میں پڑھنے سے مراد یہ ہے کہ تلاوت کے ہمراہ دو چیزیں ہوں: افسوس کا اظہار کرنا اور غمگین ہونا، یعنی آدمی سے جو غلطیاں سرزد ہوئی تھیں ان پر افسوس کا اظہار کرنا اور جس توقیر کی خواہش ہو اس پر غمگین ہونا۔ جب دل الم اور تکلیف کو محسوس کرے، تو آواز غمگین ہو جائے اور وہ ترجیع کرے، آنکھیں آنسو بہائیں اور دل روشن ہو، تو اس صورت میں مناجات کے ہمراہ تہجد پڑھنے والے کو لذت محسوس ہو گی اور وہ شخص مخلوق سے فرار ہو کر خلوت کے گھونسلے (یعنی اس کی پناہ) میں آ جائے، اس بات کی امید رکھتے ہوئے کہ اس کے گزشتہ گناہوں کی مغفرت ہو جائے اور اس کے جرائم اور عیوب سے درگزر کیا جائے۔ ہم اللہ تعالیٰ سے اس کی توفیق مانگتے ہیں۔ [صحیح ابن حبان/كتاب الرقائق/حدیث: 751]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ کسی بھی چیز کو اتنی توجہ سے نہیں سنتا، جتنی توجہ سے قرآن کی خوش الحانی سے کی جانے والی تلاوت کو سنتا ہے، جو بلند آواز میں کی جاتی ہے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان «مَا أَذِنَ اللَّهُ» سے مراد یہ ہے یعنی ”اللہ تعالیٰ کسی بھی چیز کو اتنی توجہ سے نہیں سنتا“، «كَأَذَنِهِ» یعنی ”جس طرح وہ سنتا ہے“ اس شخص کو جو خوش الحانی سے قرآن کی تلاوت کرے، جو بلند آواز میں اس کی تلاوت کرتا ہے۔ اس سے مراد یہ ہے: وہ دردمندانہ انداز میں قرأت کرے جو اس کے مطابق ہو، جس کی صفت کو ہم نے بیان کیا ہے۔ [صحیح ابن حبان/كتاب الرقائق/حدیث: 752]

مطرف بن عبداللہ رحمہ اللہ اپنے والد رضی اللہ عنہ کا یہ بیان نقل کرتے ہیں: میں نے نبی اکرم صلی اللہ علیہ وسلم کو نماز ادا کرتے ہوئے دیکھا، گریہ و زاری کی وجہ سے آپ صلی اللہ علیہ وسلم کے سینے سے یوں آواز آ رہی تھی جیسے ہنڈیا ابلتی ہے۔ (امام ابن حبان رحمہ اللہ فرماتے ہیں:) اس روایت میں اس بات کا واضح بیان موجود ہے کہ جس دردمندانہ تلاوت کو اللہ تعالیٰ سنتا ہے اور پوری توجہ سے سنتا ہے، وہ ایسا درد ہے جو آواز میں آغاز اور اختتام کے ہمراہ ہو؛ کیونکہ آغاز یہ ہوتا ہے کہ اس بات کا پختہ ارادہ کیا جائے کہ ممنوعہ چیزوں سے لاتعلقی اختیار کی جائے گی اور انجام یہ ہے کہ مختلف نوعیت کی عبادات میں بھرپور کوشش کی جائے گی، تو جب وہ درد آغاز میں اس کے مطابق ہو جو ہم نے بیان کیا ہے اور اختتام اس کے مطابق ہو جو میں نے ذکر کیا ہے، تو قرآن کے ہمراہ دردمند ہونے والا شخص گویا اپنے آپ کو اپنے پروردگار کے قرب میں ڈال دیتا ہے اور وہ اس کے علاوہ کسی اور چیز سے متعلق نہیں ہوتا۔ [صحیح ابن حبان/كتاب الرقائق/حدیث: 753]

سیدنا فضالہ بن عبید رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جتنے شوق کے ساتھ کوئی شخص کسی کنیز کا گانا سنتا ہے، اللہ تعالیٰ اس سے زیادہ پسندیدگی کے ساتھ اچھی آواز والے شخص کی قرآن کی تلاوت کو سنتا ہے۔“ [صحیح ابن حبان/كتاب الرقائق/حدیث: 754]

سیدنا ابوسعید خدری رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”ساٹھ سال کے بعد ایسے لوگ آ جائیں گے، جو نماز کو ضائع کریں گے، خواہشات کی پیروی کریں گے، وہ عنقریب جہنم میں جائیں گے، پھر اس کے بعد وہ لوگ آ جائیں گے، جو قرآن کی تلاوت کریں گے، لیکن وہ ان کے حلق سے نیچے نہیں اترے گا۔ قرآن کو تین طرح کے لوگ پڑھتے ہیں: مومن، منافق اور فاجر۔“ بشیر نامی راوی کہتے ہیں: میں نے ولید سے دریافت کیا: یہ تین لوگ کون ہیں؟ انہوں نے جواب دیا: منافق سے مراد وہ شخص ہے، جو قرآن کا انکار کرتا ہو، فاجر سے مراد وہ شخص ہے، جو اس کا معاوضہ وصول کرتا ہو اور مومن سے مراد وہ شخص ہے، جو اس پر ایمان رکھتا ہو۔ [صحیح ابن حبان/كتاب الرقائق/حدیث: 755]

سیدنا عبداللہ بن عمرو رضی اللہ عنہما بیان کرتے ہیں: ایک مرتبہ میں نے قرآن کو جمع کیا اور ایک ہی رات میں اس کی تلاوت کر لی، نبی اکرم صلی اللہ علیہ وسلم کو اس بات کی اطلاع ملی تو آپ نے ارشاد فرمایا: ”تم مہینے میں پورے قرآن کی تلاوت کیا کرو۔“ راوی کہتے ہیں: میں نے عرض کی: یا رسول اللہ! آپ مجھے موقع دیجیے کہ میں اپنی قوت اور جوانی سے فائدہ حاصل کر لوں، نبی اکرم صلی اللہ علیہ وسلم نے فرمایا: ”تم بیس دن میں پورے قرآن کی تلاوت کر لیا کرو۔“ میں نے عرض کی: یا رسول اللہ! آپ مجھے موقع دیجیے کہ میں اپنی قوت اور جوانی سے فائدہ حاصل کر لوں، نبی اکرم صلی اللہ علیہ وسلم نے فرمایا: ”تم دس دن میں اس کی تلاوت کر لیا کرو۔“ میں نے عرض کی: یا رسول اللہ! آپ مجھے موقع دیجیے کہ میں اپنی قوت اور جوانی سے فائدہ حاصل کر لوں، نبی اکرم صلی اللہ علیہ وسلم نے فرمایا: ”تم سات دن میں اس کی تلاوت کر لیا کرو۔“ میں نے عرض کیا: یا رسول اللہ! آپ مجھے موقع دیجیے کہ میں اپنی قوت اور جوانی سے فائدہ حاصل کر لوں، لیکن نبی اکرم صلی اللہ علیہ وسلم نے میری اس بات کو تسلیم نہیں کیا۔ [صحیح ابن حبان/كتاب الرقائق/حدیث: 756]