زر بیان کرتے ہیں: میں نے سیدنا ابی بن کعب رضی اللہ عنہ سے کہا: سیدنا عبداللہ بن مسعود رضی اللہ عنہ مصحف میں معوذتین تحریر نہیں کرتے تھے، تو سیدنا ابی رضی اللہ عنہ نے کہا: نبی اکرم صلی اللہ علیہ وسلم نے مجھ سے یہ فرمایا تھا: ”جبرائیل نے مجھ سے کہا: ﴿قُلْ أَعُوذُ بِرَبِّ الْفَلَقِ﴾ [سورة الفلق] (میں نے اسے پڑھا)، پھر انہوں نے مجھ سے کہا: ﴿قُلْ أَعُوذُ بِرَبِّ النَّاسِ﴾ [سورة الناس] (تو میں نے اسے پڑھا)۔“ (سیدنا ابی بن کعب رضی اللہ عنہ فرماتے ہیں) ہم وہ کہتے ہیں جو نبی اکرم صلی اللہ علیہ وسلم نے کہا ہے۔ [صحیح ابن حبان/كتاب الرقائق/حدیث: 797]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ہم (ازواج مطہرات) میں سے کسی ایک کی گود میں سر رکھ کر قرآن کی تلاوت کر لیتے تھے، جبکہ وہ خاتون حیض کی حالت میں ہوتی تھیں۔ [صحیح ابن حبان/كتاب الرقائق/حدیث: 798]

سیدنا علی رضی اللہ عنہ بیان کرتے ہیں کہ قرآن کی تلاوت کے لیے نبی اکرم صلی اللہ علیہ وسلم کو کوئی چیز مانع نہیں ہوتی تھی، صرف جنابت کا معاملہ مختلف تھا (یعنی آپ صلی اللہ علیہ وسلم جنابت کی حالت میں قرآن کی تلاوت نہیں کرتے تھے)۔ [صحیح ابن حبان/كتاب الرقائق/حدیث: 799]

سیدنا علی بن ابو طالب رضی اللہ عنہ بیان کرتے ہیں کہ کوئی بھی چیز قرآن کی تلاوت کے لیے نبی اکرم صلی اللہ علیہ وسلم کے لیے رکاوٹ نہیں بنتی تھی، البتہ اگر آپ جنبی ہوتے تھے (تو آپ قرآن کی تلاوت نہیں کرتے تھے)۔ [صحیح ابن حبان/كتاب الرقائق/حدیث: 800]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم ہر وقت اللہ تعالیٰ کا ذکر کر لیتے تھے۔ [صحیح ابن حبان/كتاب الرقائق/حدیث: 801]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ہر وقت میں اللہ تعالیٰ کا ذکر کر لیتے تھے۔ (امام ابن حبان رحمہ اللہ فرماتے ہیں:) سیدہ عائشہ رضی اللہ عنہا کا یہ کہنا: ”آپ صلی اللہ علیہ وسلم تمام اوقات میں اللہ تعالیٰ کا ذکر کرتے تھے۔“ اس سے ان کی مراد وہ ذکر ہے جو قرآن کے علاوہ ہو، کیونکہ یہ ممکن ہے انہوں نے جو الفاظ استعمال کیے ہیں ان سے مراد قرآن ہو، حالانکہ نبی اکرم صلی اللہ علیہ وسلم جنابت کی حالت میں اس کی تلاوت نہیں کرتے تھے، آپ صلی اللہ علیہ وسلم باقی تمام حالتوں میں اس کی تلاوت کر لیتے تھے۔ [صحیح ابن حبان/كتاب الرقائق/حدیث: 802]

سیدنا مہاجر بن قنفذ رضی اللہ عنہ بیان کرتے ہیں کہ وہ نبی اکرم صلی اللہ علیہ وسلم کی خدمت میں حاضر ہوئے۔ نبی اکرم صلی اللہ علیہ وسلم اس وقت وضو کر رہے تھے۔ انہوں نے نبی اکرم صلی اللہ علیہ وسلم کو سلام کیا، تو نبی اکرم صلی اللہ علیہ وسلم نے انہیں سلام کا جواب نہیں دیا۔ جب آپ صلی اللہ علیہ وسلم نے وضو مکمل کر لیا، تو (سلام کا جواب دے کر) عذر بیان کرتے ہوئے ارشاد فرمایا: ”مجھے یہ بات اچھی نہیں لگی کہ میں بے وضو حالت میں اللہ تعالیٰ کا ذکر کروں۔“ (یہاں ایک لفظ کے بارے میں راوی کو شک ہے) حسن بصری رحمہ اللہ اس روایت کے مطابق فتویٰ دیتے تھے۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کے یہ الفاظ ”مجھے ناپسند ہوا کہ میں بے وضو حالت میں اللہ تعالیٰ کا ذکر کروں“ اس سے مراد فضیلت (کے حصول کا ارادہ) ہے کیونکہ باوضو حالت میں ذکر کرنا افضل ہے۔ ایسا نہیں ہے کہ نبی اکرم صلی اللہ علیہ وسلم نے اس کے ناجائز ہونے کی وجہ سے اسے ناپسند کیا۔ [صحیح ابن حبان/كتاب الرقائق/حدیث: 803]

سیدنا ابو موسیٰ اشعری رضی اللہ عنہ بیان کرتے ہیں: لوگ یعنی (صحابہ کرام) جب بھی کسی گھاٹی پر چڑھتے تھے، تو جب آدمی اوپر پہنچ جاتا تھا تو «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ اور «اَللّٰهُ أَکْبَرُ» ”اللہ سب سے بڑا ہے“ کہتا تھا، نبی اکرم صلی اللہ علیہ وسلم اس وقت اپنے خچر پر سوار تھے۔ جب آپ صلی اللہ علیہ وسلم اس کے ساتھ پہاڑ پر پہنچے، تو آپ صلی اللہ علیہ وسلم نے ارشاد فرمایا: ”اے لوگو! تم کسی بہرے یا غیر موجود (مبعود) کو نہیں پکار رہے“، پھر نبی اکرم صلی اللہ علیہ وسلم نے ارشاد فرمایا: ”اے ابو موسیٰ! (راوی کو شک ہے شاید یہ الفاظ ہیں:) اے عبداللہ بن قیس! کیا میں تمہاری رہنمائی جنت کے خزانے کی طرف نہ کروں؟“ انہوں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”(وہ یہ کلمہ ہے) «لَا حَوْلَ وَلَا قُوَّةَ إِلَّا بِاللّٰهِ» ”اللہ کی مدد کے بغیر نہ گناہ سے بچنے کی طاقت ہے اور نہ نیکی کرنے کی قوت““۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”تم کسی بہرے یا غیر موجود کو نہیں پکار رہے ہو“ لفظی طور پر اس بات کی اطلاع ہے، لیکن اس سے مراد دعا کرتے ہوئے آواز بلند کرنے سے منع کرنا ہے۔ [صحیح ابن حبان/كتاب الرقائق/حدیث: 804]

عمیر، جو سیدنا عبداللہ بن عباس رضی اللہ عنہما کے آزاد کردہ غلام ہیں، وہ بیان کرتے ہیں کہ میں اور عبداللہ بن یسار، سیدنا ابوجہیم رضی اللہ عنہ کے پاس حاضر ہوئے، تو سیدنا ابوجہیم رضی اللہ عنہ نے بتایا کہ نبی اکرم صلی اللہ علیہ وسلم «بِئْرِ جَمَلٍ» ”بئرِ جمل“ کی طرف سے تشریف لا رہے تھے۔ ایک شخص آپ صلی اللہ علیہ وسلم کے سامنے آیا اور اس نے سلام کیا، تو نبی اکرم صلی اللہ علیہ وسلم نے اسے سلام کا جواب نہیں دیا، یہاں تک کہ آپ صلی اللہ علیہ وسلم ایک دیوار کے پاس گئے، آپ صلی اللہ علیہ وسلم نے اپنے چہرے اور دونوں بازوؤں کا مسح کیا یعنی (تیمم کیا)، پھر آپ صلی اللہ علیہ وسلم نے سلام کا جواب دیا۔ [صحیح ابن حبان/كتاب الرقائق/حدیث: 805]

سیدنا مہاجر بن قنفذ رضی اللہ عنہ بیان کرتے ہیں: وہ نبی اکرم صلی اللہ علیہ وسلم کی خدمت میں حاضر ہوئے، نبی اکرم صلی اللہ علیہ وسلم اس وقت پیشاب کر رہے تھے انہوں نے سلام کیا، تو نبی اکرم صلی اللہ علیہ وسلم نے انہیں سلام کا جواب نہیں دیا، پہلے آپ نے وضو کیا پھر آپ نے عذر بیان کرتے ہوئے فرمایا: ”مجھے یہ بات اچھی نہیں لگی کہ میں بے وضو حالت میں اللہ تعالیٰ کا ذکر کروں۔“ (یہاں ایک لفظ کے بارے میں راوی کو شک ہے)۔ (امام ابن حبان رحمہ اللہ فرماتے ہیں:) اس روایت میں اس بات کا واضح بیان موجود ہے، نبی اکرم صلی اللہ علیہ وسلم کا بے وضو حالت میں اللہ تعالیٰ کے ذکر کو ناپسند کرنا اس وجہ سے تھا کہ باوضو حالت میں ذکر کرنا افضل ہے، ایسا نہیں ہے کہ آدمی کا بے وضو حالت میں اپنے پروردگار کا ذکر کرنا جائز ہی نہیں ہے کیونکہ نبی اکرم صلی اللہ علیہ وسلم ہر وقت اللہ تعالیٰ کا ذکر کیا کرتے تھے۔ [صحیح ابن حبان/كتاب الرقائق/حدیث: 806]