سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک قرآن میں ایک سورۃ ہے، جس کی تیس آیات ہیں۔ یہ سورۃ اپنے حافظ کے لیے دعائے مغفرت کرتی رہے گی، یہاں تک کہ اس شخص کی مغفرت ہو جائے گی۔ (وہ سورت یہ ہے) ﴿تَبَارَكَ الَّذِي بِيَدِهِ الْمُلْكُ﴾ [سورة الملك] “ تو ابواسامہ نے ان کی بات کی تائید کرتے ہوئے کہا: جی ہاں۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”وہ اپنے ساتھی (یعنی باقاعدگی سے پڑھنے والے یا حافظ) کے لیے دعائے مغفرت کرتی ہے“ اس سے مراد ان کی قرأت کا ثواب ہے، تو یہاں اسم کا اطلاق، اس سے حاصل ہونے والے نتیجے پر کیا گیا ہے اور وہ ثواب ہے، جس طرح سورت کے اسم کا اطلاق اس کے نفسِ وجود پر بھی ہوتا ہے۔ اسی طرح سیدنا ابوامامہ رضی اللہ عنہ کے حوالے سے منقول روایت میں نبی اکرم صلی اللہ علیہ وسلم کے فرمان سے مراد قرآن، سورہ بقرہ اور سورہ آل عمران پڑھنے کا ثواب ہے کیونکہ عرب اپنے محاورے میں (بعض اوقات) کسی اسم کا اطلاق اس سے حاصل ہونے والے نتیجے پر کرتے ہیں جیسا کہ ہم پہلے یہ ذکر کر چکے ہیں۔ [صحیح ابن حبان/كتاب الرقائق/حدیث: 787]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قرآن میں ایک سورۃ ہے، جس کی تیس آیات ہیں۔ یہ اپنے پڑھنے والے کے لیے دعائے مغفرت کرتی رہے گی، یہاں تک کہ اس شخص کی مغفرت ہو جائے گی۔ (وہ سورۃ یہ ہے) ﴿تَبَارَكَ الَّذِي بِيَدِهِ الْمُلْكُ﴾ [سورة الملك: 1] ۔“ [صحیح ابن حبان/كتاب الرقائق/حدیث: 788]

فروہ بن نوفل اشجعی رضی اللہ عنہما اپنے والد کا یہ بیان نقل کرتے ہیں کہ میں نبی اکرم صلی اللہ علیہ وسلم کی خدمت میں حاضر ہوا، میں نے عرض کی: ”اے اللہ کے نبی! آپ صلی اللہ علیہ وسلم مجھے کسی ایسی چیز کی تعلیم دیجیے کہ جب میں بستر پر جایا کروں، تو اسے پڑھ لیا کروں“، تو نبی اکرم صلی اللہ علیہ وسلم نے فرمایا: ”تم ﴿قُلْ يَا أَيُّهَا الْكَافِرُونَ﴾ [سورة الكافرون: 1] پڑھو۔“ [صحیح ابن حبان/كتاب الرقائق/حدیث: 789]

فروہ بن نوفل اپنے والد رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے فرمایا: ”کیا تم اپنی سوتیلی بیٹی کو حاصل کرنا چاہتے ہو؟ وہ اپنے سوتیلے باپ کی کفالت میں ہے۔“ راوی بیان کرتے ہیں: پھر وہ نبی اکرم صلی اللہ علیہ وسلم کی خدمت میں حاضر ہوئے تو نبی اکرم صلی اللہ علیہ وسلم نے ان سے یہی سوال کیا، تو انہوں نے عرض کی: میں نے اسے اس کی ماں کے پاس چھوڑ دیا ہے۔ نبی اکرم صلی اللہ علیہ وسلم نے فرمایا: ”تم کیوں آئے ہو؟“ اس نے کہا: میں اس لیے آیا ہوں تاکہ آپ مجھے کسی ایسی چیز کی تعلیم دیں جسے میں سوتے وقت پڑھ لیا کروں، تو نبی اکرم صلی اللہ علیہ وسلم نے فرمایا: ”تم ﴿قُلْ يَا أَيُّهَا الْكَافِرُونَ﴾ [سورة الكافرون: 1] کی تلاوت کیا کرو، تم اسے مکمل پڑھ کر سویا کرو، کیونکہ یہ شرک سے براءت (کا اظہار) ہے۔“ [صحیح ابن حبان/كتاب الرقائق/حدیث: 790]

سیدنا ابوسعید خدری رضی اللہ عنہ بیان کرتے ہیں کہ ایک شخص نے دوسرے شخص کو سورۂ اخلاص بار بار تلاوت کرتے ہوئے سنا، اگلے دن وہ نبی اکرم صلی اللہ علیہ وسلم کی خدمت میں حاضر ہوا اور آپ صلی اللہ علیہ وسلم کے سامنے اس بات کا تذکرہ کیا، وہ شخص اس سورت کو چھوٹی سمجھ رہا تھا، تو نبی اکرم صلی اللہ علیہ وسلم نے اس شخص سے فرمایا: ”اس ذات کی قسم! جس کے قبضۂ قدرت میں میری جان ہے، یہ تہائی قرآن کے برابر ہے۔“ [صحیح ابن حبان/كتاب الرقائق/حدیث: 791]

سیدنا انس بن مالک رضی اللہ عنہ بیان کرتے ہیں کہ ایک شخص نے عرض کی: یا رسول اللہ! میں سورۃ اخلاص سے محبت کرتا ہوں، نبی اکرم صلی اللہ علیہ وسلم نے فرمایا: ”تمہارا اس سے محبت کرنا تمہیں جنت میں داخل کر دے گا۔“ [صحیح ابن حبان/كتاب الرقائق/حدیث: 792]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ایک شخص کو ایک مہم کا امیر بنا کر روانہ کیا۔ وہ اپنے ساتھیوں کو نماز پڑھاتے ہوئے سورۂ اخلاص پڑھا کرتا تھا، وہ لوگ واپس آئے۔ انہوں نے اس بات کا تذکرہ نبی اکرم صلی اللہ علیہ وسلم سے کیا، تو نبی اکرم صلی اللہ علیہ وسلم نے فرمایا: ”تم لوگ اس سے دریافت کرو وہ ایسا کیوں کرتا ہے۔“ لوگوں نے اس سے دریافت کیا، تو اس نے بتایا کہ مجھے اس سورت کی تلاوت کرنا اچھا لگتا ہے، تو نبی اکرم صلی اللہ علیہ وسلم نے فرمایا: ”تم لوگ اسے بتا دو اللہ تعالیٰ بھی اس سے محبت کرتا ہے۔“ [صحیح ابن حبان/كتاب الرقائق/حدیث: 793]

سیدنا انس رضی اللہ عنہ بیان کرتے ہیں کہ ایک شخص باقاعدگی کے ساتھ نماز میں ہر سورہ کے ساتھ سورہ اخلاص کی تلاوت کیا کرتا تھا، وہ شخص اپنے ساتھیوں کی امامت بھی کرتا تھا۔ نبی اکرم صلی اللہ علیہ وسلم نے اس سے اس بارے میں دریافت کیا، تو اس نے عرض کی: میں اس سورہ سے محبت کرتا ہوں، تو نبی اکرم صلی اللہ علیہ وسلم نے فرمایا: ”تمہارا اس سورہ سے محبت کرنا تمہیں جنت میں داخل کر دے گا“۔ [صحیح ابن حبان/كتاب الرقائق/حدیث: 794]

سیدنا عقبہ بن عامر رضی اللہ عنہ بیان کرتے ہیں: ایک مرتبہ میں نبی اکرم صلی اللہ علیہ وسلم کے پیچھے تھا، آپ اس وقت سوار تھے، میں نے اپنا ہاتھ آپ کے دستِ مبارک پر رکھا اور عرض کی: یا رسول اللہ! آپ مجھے سورۃ ہود اور سورۃ یوسف پڑھنی سکھا دیں، تو نبی اکرم صلی اللہ علیہ وسلم نے ارشاد فرمایا: ”تم ایسی کسی چیز کی تلاوت نہیں سیکھو گے، جو اللہ تعالیٰ کی بارگاہ میں سورۃ فلق سے زیادہ بلیغ ہو (یا زیادہ مرتبے کی حامل ہو)۔“ [صحیح ابن حبان/كتاب الرقائق/حدیث: 795]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جابر! تلاوت کرو۔“ سیدنا جابر رضی اللہ عنہ بیان کرتے ہیں کہ میں نے عرض کی: میرے ماں باپ آپ پر قربان ہوں، میں کیا تلاوت کروں؟ آپ صلی اللہ علیہ وسلم نے فرمایا: ”سورۃ الفلق اور سورۃ الناس۔“ سیدنا جابر رضی اللہ عنہ کہتے ہیں کہ میں نے ان دونوں کی تلاوت کی، تو نبی اکرم صلی اللہ علیہ وسلم نے فرمایا: ”تم ان دونوں کی تلاوت کیا کرو، تم ان دونوں جیسی کسی اور (سورت) کی تلاوت نہیں کرو گے۔“ [صحیح ابن حبان/كتاب الرقائق/حدیث: 796]