سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”تم اللہ تعالیٰ کا اتنی کثرت سے ذکر کرو کہ لوگ یہ کہیں: یہ پاگل ہے۔“ [صحیح ابن حبان/كتاب الرقائق/حدیث: 817]

سیدنا معاذ بن جبل رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم سے سوال کیا: ”اللہ تعالیٰ کے نزدیک کون سا عمل زیادہ محبوب ہے؟“ نبی اکرم صلی اللہ علیہ وسلم نے فرمایا: ”تم اس حالت میں مرو کہ تمہاری زبان اللہ تعالیٰ کے ذکر سے تر ہو۔“ [صحیح ابن حبان/كتاب الرقائق/حدیث: 818]

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا: ”جب کوئی شخص اپنے گھر میں داخل ہو اور داخلے کے وقت اللہ کا ذکر کرتا ہے اور کھانے کے وقت اللہ کا ذکر کرتا ہے، تو شیطان (اپنے ساتھیوں سے) یہ کہتا ہے: تمہیں یہاں رہنے کے لئے جگہ بھی نہیں ملے گی اور کھانا بھی نہیں ملے گا، اور جب کوئی شخص گھر میں داخلے کے وقت اللہ کا ذکر نہیں کرتا، تو شیطان یہ کہتا ہے کہ تمہیں یہاں جگہ مل جائے گی، اور جب کوئی شخص کھانے کے وقت اللہ کا ذکر نہیں کرتا، تو شیطان کہتا ہے: تمہیں یہاں رہنے کی جگہ بھی مل جائے گی اور کھانا بھی مل جائے گا۔“ [صحیح ابن حبان/كتاب الرقائق/حدیث: 819]

سیدنا ابوذر غفاری رضی اللہ عنہ بیان کرتے ہیں کہ میں نبی اکرم صلی اللہ علیہ وسلم کے پیچھے چل رہا تھا، آپ صلی اللہ علیہ وسلم نے ارشاد فرمایا: ”اے ابوذر! کیا میں تمہاری رہنمائی جنت کے ایک خزانے کی طرف نہ کروں؟“ میں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: «لَا حَوْلَ وَلَا قُوَّةَ إِلَّا بِاللّٰهِ» ”(جنت کا خزانہ ہے)“ [صحیح ابن حبان/كتاب الرقائق/حدیث: 820]

سالم بن عبداللہ بیان کرتے ہیں کہ نبی اکرم صلی اللہ علیہ وسلم کے صحابی سیدنا ابو ایوب انصاری رضی اللہ عنہ نے مجھے یہ بات بتائی کہ جس رات نبی اکرم صلی اللہ علیہ وسلم کو معراج کروائی گئی، آپ کا گزر سیدنا ابراہیم خلیل علیہ السلام کے پاس سے ہوا، تو سیدنا ابراہیم علیہ السلام نے سیدنا جبرائیل علیہ السلام سے دریافت کیا: اے جبرائیل! آپ کے ساتھ کون ہے؟ سیدنا جبرائیل علیہ السلام نے بتایا: یہ سیدنا محمد صلی اللہ علیہ وسلم ہیں، تو سیدنا ابراہیم علیہ السلام نے کہا: اے محمد صلی اللہ علیہ وسلم ! آپ اپنی امت کو یہ ہدایت کریں کہ وہ جنت میں زیادہ درخت لگائے، کیونکہ اس کی مٹی پاکیزہ ہے اور اس کی زمین کشادہ ہے، تو نبی اکرم صلی اللہ علیہ وسلم نے سیدنا ابراہیم علیہ السلام سے دریافت کیا: ”جنت میں درخت لگانے سے مراد کیا ہے؟“ انہوں نے جواب دیا: «لَا حَوْلَ وَلَا قُوَّةَ إِلَّا بِاللّٰهِ» ”پڑھنا“۔ [صحیح ابن حبان/كتاب الرقائق/حدیث: 821]

سیدنا انس بن مالک رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”جب کوئی شخص اپنے گھر سے نکلتے ہوئے یہ کہتا ہے: «بِسْمِ اللّٰهِ تَوَكَّلْتُ عَلَى اللّٰهِ، لَا حَوْلَ وَلَا قُوَّةَ إِلَّا بِاللّٰهِ» ”اللہ کے نام سے، میں نے اللہ پر بھروسا کیا، اور اللہ کی مدد کے بغیر نہ (گناہوں سے) بچنے کی طاقت ہے اور نہ (نیکی کرنے کی) قوت۔“ تو اس سے کہا جاتا ہے: ”تمہاری رہنمائی کر دی گئی، تمہاری کفایت کر دی گئی اور تمہاری حفاظت کر لی گئی“، تو شیطان اس سے دور ہو جاتا ہے، پھر دوسرا شیطان اس سے کہتا ہے: ”تم اس شخص پر کیسے قابو پا سکتے ہو جس کی رہنمائی کر دی گئی ہو، جس کی کفایت کر دی گئی ہو اور جس کی حفاظت کر لی گئی ہو؟““ [صحیح ابن حبان/كتاب الرقائق/حدیث: 822]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”میں کیسے نعمت میں رہ سکتا ہوں جبکہ (صور میں) پھونک مارنے والے نے اپنا منہ صور کے ساتھ لگایا ہوا ہے اور اس نے اپنی پیشانی کو اس بات کے انتظار میں تیار رکھا ہوا ہے کہ کب اسے پھونک مارنے کا حکم ہوتا ہے۔“ راوی بیان کرتے ہیں کہ ہم نے کہا: یا رسول اللہ! ہمیں پھر اس دن کیا کہنا چاہیے؟ نبی اکرم صلی اللہ علیہ وسلم نے فرمایا: ”تم یہ کہو: «حَسْبُنَا اللَّهُ وَنِعْمَ الْوَكِيلُ» ”ہمارے لیے اللہ تعالیٰ کافی ہے، وہ بہترین کارساز ہے“۔“ (امام ابن حبان رحمہ اللہ فرماتے ہیں:) ابویعلی نے اپنی سند کے ساتھ اسی کی مانند روایت نقل کی ہے، تاہم انہوں نے یہ الفاظ نقل کیے ہیں: «حَسْبُنَا اللَّهُ وَنِعْمَ الْوَكِيلُ، عَلَى اللَّهِ تَوَكَّلْنَا» ”تم لوگ یہ کہو: ہمارے لیے اللہ تعالیٰ کافی ہے اور وہ بہترین کارساز ہے اور ہم اللہ تعالیٰ پر ہی توکل کرتے ہیں“۔ [صحیح ابن حبان/كتاب الرقائق/حدیث: 823]

سیدنا ابوہریرہ رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے ساتھ جا رہے تھے، ہمارا گزر دو قبروں کے پاس سے ہوا۔ نبی اکرم صلی اللہ علیہ وسلم ٹھہر گئے، ہم بھی آپ کے ساتھ ٹھہر گئے۔ نبی اکرم صلی اللہ علیہ وسلم کی رنگت تبدیل ہو گئی، یہاں تک کہ آپ کی قمیض کی آستین کپکپانے لگی۔ ہم نے دریافت کیا: ”اے اللہ کے نبی! آپ کو کیا ہوا ہے؟“ نبی اکرم صلی اللہ علیہ وسلم نے ارشاد فرمایا: ”جو میں سن رہا ہوں کیا تم بھی وہ سن رہے ہو؟“ ہم نے دریافت کیا: ”اے اللہ کے نبی! وہ کیا چیز ہے؟“ نبی اکرم صلی اللہ علیہ وسلم نے فرمایا: ”ان دو لوگوں کو ان کی قبروں میں دو ہلکے گناہوں کی وجہ سے شدید عذاب ہو رہا ہے۔“ ہم نے عرض کی: ”اے اللہ کے نبی! اس کی وجہ کیا ہے؟“ نبی اکرم صلی اللہ علیہ وسلم نے فرمایا: ”ان میں سے ایک شخص پیشاب سے بچتا نہیں تھا، اور دوسرا شخص اپنی زبان کے ذریعے لوگوں کو اذیت پہنچاتا تھا اور ان کے درمیان چغلی کیا کرتا تھا۔“ پھر نبی اکرم صلی اللہ علیہ وسلم نے کھجور کی شاخوں میں سے دو شاخیں منگوائیں اور آپ صلی اللہ علیہ وسلم نے ہر ایک کی قبر پر اسے گاڑ دیا۔ ہم نے دریافت کیا: ”یا رسول اللہ! کیا ان دونوں کو اس کا کوئی فائدہ ہو گا؟“ نبی اکرم صلی اللہ علیہ وسلم نے جواب دیا: ”جی ہاں، جب تک یہ دونوں خشک نہیں ہو جاتیں ان کے عذاب میں تخفیف رہے گی۔“ [صحیح ابن حبان/كتاب الرقائق/حدیث: 824]

مصعب بن سعد اپنے والد سیدنا سعد بن ابی وقاص رضی اللہ عنہ کا یہ بیان نقل کرتے ہیں: ہم لوگ نبی اکرم صلی اللہ علیہ وسلم کے پاس بیٹھے ہوئے تھے، آپ صلی اللہ علیہ وسلم نے ارشاد فرمایا: ”کیا کوئی شخص یہ کر سکتا ہے کہ روزانہ ایک ہزار نیکیاں کمایا کرے؟“ تو آپ صلی اللہ علیہ وسلم کے پاس بیٹھے ہوئے لوگوں نے آپ صلی اللہ علیہ وسلم سے دریافت کیا: یا رسول اللہ! ہم میں سے کوئی شخص روزانہ ایک ہزار نیکیاں کیسے کما سکتا ہے؟ نبی اکرم صلی اللہ علیہ وسلم نے فرمایا: ”وہ «سُبْحَانَ اللّٰهِ» ”اللہ پاک ہے“ سو مرتبہ پڑھے، تو اللہ تعالیٰ اس کے لیے ایک ہزار نیکیاں لکھ لے گا وہ اس کے ایک ہزار گناہوں کو مٹا دے گا۔“ [صحیح ابن حبان/كتاب الرقائق/حدیث: 825]

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص «سُبْحَانَ اللّٰهِ وَبِحَمْدِهِ» پڑھتا ہے اس کے لیے جنت میں کھجور کا درخت لگا دیا جاتا ہے۔“ [صحیح ابن حبان/كتاب الرقائق/حدیث: 826]