سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”بے شک اللہ تعالیٰ کے 99 نام ہیں یعنی ایک کم 100، جو انہیں یاد کر لے گا وہ جنت میں داخل ہو گا۔“ [صحیح ابن حبان/كتاب الرقائق/حدیث: 807]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ کے ننانوے نام ہیں یعنی ایک کم سو، اللہ تعالیٰ «وِتْرٌ» ”وتر“ ہے اور «الْوِتْرَ» ”وتر“ کو پسند کرتا ہے، جو شخص انہیں یاد کر لے گا وہ جنت میں داخل ہو گا۔ وہ اللہ ہے، اس کے سوا کوئی معبود نہیں ہے، وہ رحمان ہے، رحم کرنے والا ہے، بادشاہ ہے، پاک ہے، سلامتی عطا کرنے والا ہے، امن دینے والا ہے، نگرانی کرنے والا ہے، غالب ہے، زبردست ہے، کبریائی والا ہے، پیدا کرنے والا ہے، بنانے والا ہے، شکل و صورت عطا کرنے والا ہے، مغفرت کرنے والا ہے، قہر والا ہے، عطیہ دینے والا ہے، رزق عطا کرنے والا ہے، کھولنے والا ہے، علم رکھنے والا ہے، تنگی کرنے والا ہے، کشادگی دینے والا ہے، پست کرنے والا ہے، بلند کرنے والا ہے، عزت دینے والا ہے، ذلت دینے والا ہے، سماعت والا ہے، بصیرت والا ہے، فیصلہ دینے والا ہے، عدل کرنے والا ہے، مہربان ہے، خبر رکھنے والا ہے، بردبار ہے، عظیم ہے، مغفرت کرنے والا ہے، شکر کرنے والا ہے، بلند ہے، بڑا ہے، حفاظت کرنے والا ہے، نگرانی کرنے والا ہے، حساب رکھنے والا ہے، عظمت والا ہے، معزز ہے، نگران ہے، وسعت والا ہے، حکمت والا ہے، مہربان ہے، بزرگی والا ہے، دعا قبول کرنے والا ہے، زندہ کرنے والا ہے، گواہ ہے، حق ہے، وکیل ہے، طاقت ور ہے، متین ہے، نگران ہے، لائقِ حمد ہے، شمار کرنے والا ہے، آغاز کرنے والا ہے، دوبارہ پیدا کرنے والا ہے، زندگی دینے والا ہے، موت دینے والا ہے، زندہ ہے، قیوم ہے، پالنے والا ہے، بزرگی والا ہے، ایک ہے، یکتا ہے، بے نیاز ہے، قدرت والا ہے، اقتدار والا ہے، آگے کرنے والا ہے، پیچھے کرنے والا ہے، پہلا ہے، آخر ہے، ظاہر ہے، باطن ہے، بلند و برتر ہے، مہربان ہے، توبہ قبول کرنے والا ہے، انتقام لینے والا ہے، معاف کرنے والا ہے، مہربان ہے، بادشاہ ہے، جلال و اکرام والا ہے، انصاف کرنے والا ہے، روکنے والا ہے، بے نیاز ہے، غنی ہے، جمع کرنے والا ہے، نقصان پہنچانے والا ہے، نفع دینے والا ہے، نور ہے، ہدایت دینے والا، (کسی سابقہ شان کے بغیر) پیدا کرنے والا ہے، باقی ہے، وارث ہے، ہدایت دینے والا ہے، صبر عطا کرنے والا (برداشت کرنے والا) ہے۔“ [صحیح ابن حبان/كتاب الرقائق/حدیث: 808]

سیدنا سعد بن ابی وقاص رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”سب سے بہترین ذکر وہ ہے جو پست آواز میں ہو، اور سب سے بہترین رزق (ضروریاتِ زندگی، راوی کو شک ہے شاید یہ الفاظ ہیں: بہتر زندگی) وہ ہے جو کفایت کر جائے۔“ یہاں روایت کے الفاظ میں شک ابن وہب نامی راوی کو ہے۔ [صحیح ابن حبان/كتاب الرقائق/حدیث: 809]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ فرماتا ہے: اے آدم کے بیٹے! تم اپنے دل میں مجھے یاد کرو، میں اپنے دل میں تمہیں یاد کروں گا، تم لوگوں کی محفل میں مجھے یاد کرو، میں ان سے بہتر گروہ میں تمہیں یاد کروں گا۔“ [صحیح ابن حبان/كتاب الرقائق/حدیث: 810]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ فرماتا ہے: میں اپنے بارے میں اپنے بندے کے گمان کے مطابق ہوتا ہوں۔ وہ جب جہاں مجھے یاد کرتا ہے میں اس کے ساتھ ہوتا ہوں؛ اگر وہ مجھے اپنے دل میں یاد کرتا ہے، تو میں بھی اسے اپنے دل میں یاد کرتا ہوں اور اگر وہ لوگوں میں مجھے یاد کرتا ہے، تو میں اس سے بھی بہترین گروہ میں اسے یاد کرتا ہوں۔ اگر وہ ایک بالشت میرے قریب آتا ہے، تو میں ایک ذراع اس کے قریب ہوتا ہوں؛ اور اگر وہ چل کر میری طرف آتا ہے، تو میں دوڑ کر اس کی طرف آتا ہے۔“ (امام ابن حبان رحمہ اللہ فرماتے ہیں:) اللہ تعالیٰ کی ذات اس بات سے بلند و برتر ہے کہ مخلوق کی صفات میں سے کوئی چیز اس کی طرف منسوب کی جائے، کیونکہ کوئی بھی چیز اس کی مثل نہیں ہے۔ یہ الفاظ (جو اس روایت میں استعمال ہوئے ہیں) یہ اس عام محاورے کے مطابق ہیں جو لوگوں کے درمیان رائج ہے۔ جو شخص تنہائی میں زبان کے ذریعے یا عمل کے ذریعے اپنے پروردگار کا ذکر کرتا ہے، جس کے ذریعے وہ اپنے پروردگار کی بارگاہ میں قرب حاصل کرے تو اللہ تعالیٰ اپنے فضل و کرم کے تحت، اپنی ملکوت میں مغفرت کے ہمراہ اس کا ذکر کرتا ہے اور جو شخص اپنے پروردگار کا ذکر اس کے بندوں کی موجودگی میں کرتا ہے، تو اللہ تعالیٰ اپنے مقرب فرشتوں کے سامنے اس شخص کا ذکر مغفرت کے ہمراہ کرتا ہے۔ اس نے اپنے بندے کے ذکر کو قبول کر لیا ہے (اس کے ہمراہ بندے کا ذکر کرتا ہے) اور جو شخص ایک بالشت جتنی فرمانبرداری کے ہمراہ پروردگار کے قریب ہو، تو پروردگار کی طرف سے مہربانی اور رحمت ایک ذراع (درمیانی بڑی انگلی کے کنارے سے لے کر کہنی تک) جتنا اس کے قریب ہوتی ہے۔ جو شخص ایک ذراع جتنی فرمانبرداری کے ہمراہ (اپنے) خالق کے قریب ہوتا ہے، تو اس (پروردگار) کی طرف سے مغفرت ایک باع (دونوں بازوؤں کے پھیلاؤ) سے زیادہ اس کے قریب ہوتی ہے؛ جو شخص مختلف طرح کی نیکیاں پیدل چلنے جتنی سرعت کے ساتھ کرتا ہے، تو وسائل، مہربانی اور رحمت کے وجود اور مغفرت اتنی تیزی سے اس کی طرف آتے ہیں جس طرح دوڑنا ہوتا ہے، تو اللہ تعالیٰ بلند و برتر ہے۔ [صحیح ابن حبان/كتاب الرقائق/حدیث: 811]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ فرماتا ہے: میں اپنے بارے میں اپنے بندے کے گمان کے مطابق ہوتا ہوں، جب وہ مجھے پکارتا ہے، تو میں اس کے ساتھ ہوتا ہوں، اگر وہ دل میں مجھے یاد کرتا ہے، تو میں بھی دل میں اسے یاد کرتا ہوں، اگر وہ لوگوں میں مجھے یاد کرتا ہے، تو میں بھی اس سے بہتر اور پاکیزہ گروہ میں اس کا تذکرہ کرتا ہوں۔“ (امام ابن حبان رحمہ اللہ فرماتے ہیں: اللہ تعالیٰ کا یہ فرمان: ”اگر وہ اپنے نفس میں (یعنی دل میں یا تنہائی میں) میرا ذکر کرتا ہے، تو میں اپنے من میں اس کا ذکر کرتا ہوں“، اس سے مراد یہ ہے کہ اگر وہ اپنے من میں اس معرفت کی وجہ سے باقاعدگی سے میرا ذکر کرتا ہے، جو (معرفت) میں نے اسے ہبہ کی ہے اور میں نے اسے اس کا اہل بنایا ہے، تو پھر میں اپنے من میں اس کا ذکر کرتا ہوں۔ اس سے مراد یہ ہے: میں اپنے ملکوت میں اس کی طرف سے اس معرفت کو قبول کرتا ہوں، اور اس کے ہمراہ اس کے گزشتہ گناہوں کی مغفرت کر دیتا ہوں۔ پھر اس نے یہ فرمایا: ”اگر وہ لوگوں میں میرا ذکر کرے“، اس سے مراد یہ ہے: اگر وہ اپنی زبان کے ہمراہ میرا ذکر کرے گا، اس سے مراد وہ اقرار ہے، جو لوگوں کی موجودگی میں اس معرفت کی علامت ہو گا تاکہ انہیں اس کے اسلام کا پتہ چل جائے۔ تو میں اس سے بہتر گروہ میں اس کا ذکر کرتا ہوں۔ اس سے مراد یہ ہے میں اس کا ذکر ایسے گروہ میں کرتا ہوں، جو اس سے بہتر ہے، جس میں انبیاء، صدیقین، شہداء اور صالحین ہوں گے جو جنت میں ہوں گے، اس (شخص کے ذکر کی صورت یہ ہو گی) اس نے دنیا میں بھلائی کی ہو گی جو ایمان ہے، یہاں تک کہ اس (ایمان) کی وجہ سے وہ جنت میں رہنے کا مستحق ہو جائے گا)۔ [صحیح ابن حبان/كتاب الرقائق/حدیث: 812]

سیدنا ابوسعید خدری رضی اللہ عنہ بیان کرتے ہیں کہ سیدنا معاویہ بن ابوسفیان رضی اللہ عنہما مسجد میں ایک حلقے کے پاس تشریف لائے اور دریافت کیا: ”تم لوگ یہاں کیوں بیٹھے ہو؟“ لوگوں نے بتایا: ”ہم اللہ تعالیٰ کا ذکر کر رہے ہیں۔“ سیدنا معاویہ رضی اللہ عنہ نے دریافت کیا: ”اللہ کی قسم! کیا تم لوگ صرف اسی مقصد کے لیے بیٹھے ہو؟“ انہوں نے کہا: ”اللہ کی قسم! ہم لوگ صرف اسی مقصد کے لیے بیٹھے ہیں۔“ سیدنا معاویہ رضی اللہ عنہ نے بتایا کہ ایک مرتبہ نبی اکرم صلی اللہ علیہ وسلم اپنے اصحاب کے ایک حلقے کے پاس تشریف لائے، آپ صلی اللہ علیہ وسلم نے دریافت فرمایا: ”تم لوگ کیوں بیٹھے ہوئے ہو؟“ انہوں نے کہا: ”ہم اللہ کا ذکر کرنے کے لیے اور اس نے جو اسلام کی ہدایت دی ہے اور ہم پر یہ احسان کیا ہے، اس بات پر اس کی حمد بیان کرنے کے لیے بیٹھے ہوئے ہیں۔“ نبی اکرم صلی اللہ علیہ وسلم نے فرمایا: ”اللہ کی قسم! کیا تم صرف اسی مقصد کے لیے بیٹھے ہوئے ہو؟“ لوگوں نے عرض کی: ”اللہ کی قسم! ہم صرف اسی مقصد کے لیے بیٹھے ہیں۔“ نبی اکرم صلی اللہ علیہ وسلم نے فرمایا: ”میں نے تم پر کوئی الزام عائد کرنے کے لیے تم سے قسم نہیں لی ہے، بلکہ جبرائیل میرے پاس آئے، انہوں نے مجھے بتایا کہ اللہ تعالیٰ فرشتوں کے سامنے تم پر فخر کا اظہار کر رہا ہے۔“ [صحیح ابن حبان/كتاب الرقائق/حدیث: 813]

سیدنا عبداللہ بن بسر رضی اللہ عنہ بیان کرتے ہیں کہ دو دیہاتی نبی اکرم صلی اللہ علیہ وسلم کی خدمت میں حاضر ہوئے، ان میں سے ایک نے عرض کیا: یا رسول اللہ! آپ کسی ایسی چیز کے بارے میں مجھے بتائیں جسے میں مضبوطی سے پکڑ لوں، نبی اکرم صلی اللہ علیہ وسلم نے فرمایا: ”تمہاری زبان اللہ کے ذکر سے ہمیشہ تر رہنی چاہیے۔“ [صحیح ابن حبان/كتاب الرقائق/حدیث: 814]

کریمہ بنت حسحاس بیان کرتی ہیں: میں نے سیدہ ام درداء رضی اللہ عنہا کے گھر میں سیدنا ابوہریرہ رضی اللہ عنہ کو یہ حدیث بیان کرتے ہوئے سنا کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ فرماتا ہے: میں اپنے بندے کے ساتھ ہوتا ہوں جب وہ میرا ذکر کرتا ہے اور اس کے ہونٹ میرے لیے حرکت کرتے ہیں۔“ [صحیح ابن حبان/كتاب الرقائق/حدیث: 815]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ فرماتا ہے: آج کے دن اہل دولت جان لیں گے کہ کون معزز ہیں“، تو دریافت کیا گیا کہ یا رسول اللہ! کون معزز ہیں؟ نبی اکرم صلی اللہ علیہ وسلم نے فرمایا: ”مسجد میں منعقد کی جانے والی محفلِ ذکر کے افراد معزز ہیں۔“ [صحیح ابن حبان/كتاب الرقائق/حدیث: 816]