سیدنا جابر رضی اللہ عنہ نبی صلی اللہ علیہ وسلم کا یہ فرمان نقل کرتے ہیں: ”جو شخص «سُبْحَانَ اللّٰهِ الْعَظِيمِ» ”پاک ہے اللہ عظمت والا“ پڑھتا ہے، اس کے لیے جنت میں ایک درخت لگا دیا جاتا ہے۔“ [صحیح ابن حبان/كتاب الرقائق/حدیث: 827]

سیدہ جویریہ بنت حارث رضی اللہ عنہا بیان کرتی ہیں کہ نبی اکرم صلی اللہ علیہ وسلم میرے پاس تشریف لائے، میں اس وقت تسبیح پڑھ رہی تھی۔ پھر آپ اپنے کام کے سلسلے میں تشریف لے گئے، پھر دوپہر کے وقت آپ واپس تشریف لائے تو آپ نے دریافت فرمایا: ”کیا تم اس وقت سے اب تک بیٹھی ہوئی ہو؟“ سیدہ جویریہ رضی اللہ عنہا بیان کرتی ہیں، میں نے جواب دیا: جی ہاں! نبی اکرم صلی اللہ علیہ وسلم نے فرمایا: ”کیا میں تمہیں ایسے کلمات کی تعلیم نہ دوں اگر (انہیں تمہارے پڑھے ہوئے کلمات) کے ساتھ ملایا جائے تو وہ زیادہ ہوں اور اگر ان کا وزن ان کے وزن کے ساتھ ملایا جائے تو وہ زیادہ وزنی ہوں (وہ کلمات یہ ہیں:) «سُبْحَانَ اللّٰهِ عَدَدَ خَلْقِهِ» ”اللہ تعالیٰ کی میں اتنی پاکی بیان کرتا ہوں جو اس کی مخلوق کی تعداد کے برابر ہو۔“ یہ تین مرتبہ پڑھنا ہے، «سُبْحَانَ اللّٰهِ زِنَةَ عَرْشِهِ» ”میں اللہ تعالیٰ کی اتنی پاکی بیان کرتا ہوں، جو اس کے عرش کے وزن جتنی ہو۔“ یہ تین مرتبہ پڑھنا ہے، «سُبْحَانَ اللّٰهِ رِضَا نَفْسِهِ» ”(میں اللہ تعالیٰ کی اتنی پاکی بیان کرتا ہوں جو اس کی ذات کی رضامندی کے مطابق ہو)“ یہ تین مرتبہ پڑھنا ہے اور «سُبْحَانَ اللّٰهِ مِدَادَ كَلِمَاتِهِ» ”میں اس کی اتنی پاکی بیان کرتا ہوں جو اس کے کلمات کی سیاہی جتنی ہو)“ یہ تین مرتبہ پڑھنا ہے۔“ [صحیح ابن حبان/كتاب الرقائق/حدیث: 828]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص روزانہ سو مرتبہ «سُبْحَانَ اللّٰهِ وَبِحَمْدِهِ» ”پاک ہے اللہ اور اپنی تعریف کے ساتھ ہے“ پڑھتا ہے اس کے گناہ ختم کر دیے جاتے ہیں، اگرچہ وہ سمندر کی جھاگ کے برابر ہوں۔“ [صحیح ابن حبان/كتاب الرقائق/حدیث: 829]

سیدنا ابوامامہ باہلی رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم ان کے پاس سے گزرے، وہ اس وقت اپنے ہونٹوں کو حرکت دے رہے تھے، نبی اکرم صلی اللہ علیہ وسلم نے دریافت فرمایا: ”اے ابو امامہ! تم کیا پڑھ رہے ہو؟“ انہوں نے عرض کی: ”میں اپنے پروردگار کا ذکر کر رہا ہوں۔“ نبی اکرم صلی اللہ علیہ وسلم نے ارشاد فرمایا: ”کیا میں تمہیں ایسی چیز کے بارے میں نہ بتاؤں جو تمہارے دن کے ہمراہ تمہارے رات بھر ذکر کرنے اور تمہارے رات کے ہمراہ دن بھر ذکر کرنے سے زیادہ (راوی کو شک ہے شاید یہ الفاظ ہیں:) افضل ہوں؟ تم یہ پڑھو: «سُبْحَانَ اللّٰهِ عَدَدَ مَا خَلَقَ، وَسُبْحَانَ اللّٰهِ مِلْءَ مَا خَلَقَ، وَسُبْحَانَ اللّٰهِ عَدَدَ مَا فِي الْأَرْضِ وَالسَّمَاءِ، وَسُبْحَانَ اللّٰهِ مِلْءَ مَا فِي السَّمَاءِ وَالْأَرْضِ، وَسُبْحَانَ اللّٰهِ عَدَدَ مَا أَحْصَى كِتَابُهُ، وَسُبْحَانَ اللّٰهِ مِلْءَ مَا أَحْصَى كِتَابُهُ، وَسُبْحَانَ اللّٰهِ عَدَدَ كُلِّ شَيْءٍ، وَسُبْحَانَ اللّٰهِ مِلْءَ كُلِّ شَيْءٍ» ”میں اللہ تعالیٰ کی پاکی بیان کرتا ہوں جو اس کی مخلوق کی تعداد کے برابر ہو، میں اللہ تعالیٰ کی پاکی بیان کرتا ہوں جو اس کی مخلوق کو بھر دے، میں اللہ تعالیٰ کی پاکی بیان کرتا ہوں جو آسمان اور زمین کے درمیان والی جگہ کو بھر دے، میں اللہ تعالیٰ کی پاکی بیان کرتا ہوں جو اتنی تعداد میں ہو جس کو اس کی کتاب نے گھیرا ہوا ہے، اور میں اللہ تعالیٰ کی پاکی بیان کرتا ہوں جو ہر شے کی تعداد جتنی ہو، اور میں اللہ تعالیٰ کی پاکی بیان کرتا ہوں جو ہر چیز کو بھر دے۔“ (نبی اکرم صلی اللہ علیہ وسلم نے ارشاد فرمایا:) ”الحمد للہ بھی اس کی مانند پڑھو۔““ [صحیح ابن حبان/كتاب الرقائق/حدیث: 830]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”دو کلمات ایسے ہیں جو زبان پر ہلکے ہیں، رحمان کے نزدیک پسندیدہ ہیں، میزان میں وہ بھاری ہوں گے، وہ «سُبْحَانَ اللّٰهِ وَبِحَمْدِهِ سُبْحَانَ اللّٰهِ الْعَظِيمِ» ”پاک ہے اللہ اپنی تعریفوں کے ساتھ، پاک ہے اللہ نہایت عظمت والا ہے“ ہیں۔“ [صحیح ابن حبان/كتاب الرقائق/حدیث: 831]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم صبح کی نماز کے لیے تشریف لے گئے۔ اس وقت سیدہ جویریہ رضی اللہ عنہا اپنی جائے نماز پر بیٹھی ہوئی تھیں۔ دن چڑھنے کے بعد جب نبی اکرم صلی اللہ علیہ وسلم واپس تشریف لائے، تو آپ صلی اللہ علیہ وسلم نے دریافت کیا: ”تم میرے بعد اسی طرح بیٹھی رہی ہو؟“ انہوں نے عرض کیا: جی ہاں! نبی اکرم صلی اللہ علیہ وسلم نے فرمایا: ”میں نے چار کلمات پڑھے تھے، اگر ان کا وزن ان کلمات کے ساتھ کیا جائے جو تم نے کہے ہیں، تو وہ کلمات وزنی ہوں گے: «سُبْحَانَ اللهِ وَبِحَمْدِهِ، عَدَدَ خَلْقِهِ، وَرِضَا نَفْسِهِ، وَزِنَةَ عَرْشِهِ، وَمِدَادَ كَلِمَاتِهِ» ”میں اللہ تعالیٰ کی پاکی بیان کرتا ہوں اور اس کے ہمراہ اس کی حمد بیان کرتا ہوں جو اس کی مخلوق کی تعداد جتنی ہے، اس کی ذات کی رضا کے مطابق، اس کے عرش کے وزن جتنی اور اس کے کلمات کی سیاہی جتنی ہے۔““ (امام ابن حبان رحمہ اللہ فرماتے ہیں:) جویریہ (نامی خاتون) جناب حارث بن عبدالمطلب کی صاحبزادی ہیں جو نبی اکرم صلی اللہ علیہ وسلم کے چچا ہیں۔ [صحیح ابن حبان/كتاب الرقائق/حدیث: 832]

ابوسلمی رضی اللہ عنہ جو نبی اکرم صلی اللہ علیہ وسلم کے چرواہے ہیں، میری ان سے ملاقات کوفہ کی مسجد میں ہوئی، تو انہوں نے مجھے یہ حدیث سنائی۔ وہ کہتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے، آپ صلی اللہ علیہ وسلم نے اپنے دستِ مبارک سے پانچ کا اشارہ کرتے ہوئے فرمایا: ”بہت خوب، بہت خوب، (یہ پانچ چیزیں) میزان میں کتنی وزنی ہیں۔ «سُبْحَانَ اللّٰهِ» ”سبحان اللہ“، «الْحَمْدُ لِلّٰهِ» ”الحمد للہ“، «لَا إِلٰهَ إِلَّا اللّٰهُ» ”لا الہ الا اللہ“ اور «اللّٰهُ أَكْبَرُ» ”اللہ اکبر“ پڑھنا اور یہ کہ کسی مسلمان کا نیک بچہ فوت ہو جائے اور وہ اس پر ثواب کی امید رکھے۔“ [صحیح ابن حبان/كتاب الرقائق/حدیث: 833]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ” «سُبْحَانَ اللهِ، وَالْحَمْدُ لِلّٰهِ، وَلَا إِلٰهَ إِلَّا اللهُ، وَاللهُ أَكْبَرُ» ”اللہ پاک ہے، تمام تعریفیں اللہ ہی کے لیے ہیں، اللہ کے سوا کوئی معبودِ برحق نہیں اور اللہ سب سے بڑا ہے“ پڑھنا میرے نزدیک ہر اس چیز سے زیادہ پسندیدہ ہے جس پر سورج طلوع ہوتا ہے۔“ [صحیح ابن حبان/كتاب الرقائق/حدیث: 834]

سیدنا سمرہ بن جندب رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ کے نزدیک سب سے زیادہ پسندیدہ کلام چار کلمات ہیں: «سُبْحَانَ اللّٰهِ، وَالْحَمْدُ لِلّٰهِ، وَلَا إِلٰهَ إِلَّا اللّٰهُ، وَاللّٰهُ أَكْبَرُ» ”اللہ پاک ہے، سب تعریف اللہ ہی کے لیے ہے، اللہ کے سوا کوئی معبودِ برحق نہیں اور اللہ سب سے بڑا ہے۔““ [صحیح ابن حبان/كتاب الرقائق/حدیث: 835]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”سب سے بہترین کلام چار کلمات ہیں، تمہیں کوئی نقصان نہیں ہو گا، ان میں سے کسی کے ذریعے بھی آغاز کر لو: «سُبْحَانَ اللّٰهِ، وَالْحَمْدُ لِلّٰهِ، وَلَا إِلٰهَ إِلَّا اللّٰهُ، وَاللّٰهُ أَكْبَرُ» ”اللہ پاک ہے، تمام تعریفیں اللہ کے لیے ہیں، اللہ کے سوا کوئی معبودِ برحق نہیں اور اللہ سب سے بڑا ہے۔““ [صحیح ابن حبان/كتاب الرقائق/حدیث: 836]