”جب تم زمانہ جاہلیت سے تعلق رکھنے والی ہماری اور اپنی یعنی (ہماری اور اپنے رشتے داروں) کی قبروں سے گزرو، تو انہیں بتا دو کہ وہ لوگ جہنم میں ہیں۔“ (امام ابن حبان رحمہ اللہ فرماتے ہیں: اس حدیث میں نبی اکرم صلی اللہ علیہ وسلم نے مسلمان کو یہ حکم دیا ہے کہ جب وہ کسی غیر مسلم کی قبر کے پاس سے گزرے تو اس بات پر اللہ تعالیٰ کی حمد بیان کرے کہ اللہ تعالیٰ نے اسے اسلام کی ہدایت نصیب کی ہے۔ یہاں ”امر“ کے لفظ کے ذریعے اس بات کی اطلاع دی گئی ہے کہ وہ اہل جہنم (میں سے) ہیں؛ کیونکہ یہ بات ناممکن ہے کہ ان کو مخاطب کیا جائے جو بوسیدہ ہو چکے ہیں اور مخاطب کی طرف سے خطاب کو قبول نہیں کر سکتے)۔ [صحیح ابن حبان/كتاب الرقائق/حدیث: 847]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اللہ تعالیٰ فرماتا ہے: میرے بندے نے مجھے جھوٹا قرار دیا حالانکہ اسے ایسا نہیں کرنا چاہیے تھا، اور اس نے مجھے برا کہا ہے، حالانکہ اسے ایسا نہیں کرنا چاہیے تھا۔ اس کا مجھے جھوٹا قرار دینا یہ ہے کہ وہ یہ کہے: اللہ تعالیٰ نے جیسے ہمیں پہلے پیدا کیا ہے دوبارہ ہمیں کیسے پیدا کرے گا؟ اس کا مجھے برا کہنا یہ ہے کہ اللہ تعالیٰ کی اولاد ہے، حالانکہ اس کا یہ کہنا جبکہ میں «الصَّمَدُ» ”صمد“ ہوں، میں نے کسی کو جنم نہیں دیا، مجھے جنم نہیں دیا گیا اور میرا کوئی ہمسر نہیں ہے۔“ [صحیح ابن حبان/كتاب الرقائق/حدیث: 848]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص یہ کلمات پڑھتا ہے: «لَا إِلَهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، وَهُوَ عَلَى كُلِّ شَيْءٍ قَدِيرٌ» ”اللہ تعالیٰ کے علاوہ کوئی معبود نہیں ہے وہی ایک معبود ہے، بادشاہی اسی کے لیے مخصوص ہے حمد اس کے لیے مخصوص ہے اور وہ ہر شے پر قدرت رکھتا ہے“، جو شخص روزانہ سو مرتبہ یہ کلمات پڑھ لے اسے دس غلام آزاد کرنے کے برابر ثواب ہو گا، ایک سو نیکیاں لکھ لی جائیں گی، ایک سو گناہ مٹا دیے جائیں گے اور یہ بات اس دن میں شام تک شیطان سے اس کے بچاؤ کا ذریعہ بن جائے گی اور اس دن میں کسی بھی شخص نے اس شخص کے عمل سے افضل کوئی عمل نہیں کیا ہو گا ماسوائے اس شخص کے جس نے اس سے زیادہ تعداد میں اس کلمے کو پڑھا ہو۔“ [صحیح ابن حبان/كتاب الرقائق/حدیث: 849]

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص دس مرتبہ یہ کلمہ «لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، يُحْيِي وَيُمِيتُ، وَهُوَ عَلَى كُلِّ شَيْءٍ قَدِيرٌ» ”اللہ تعالیٰ کے علاوہ اور کوئی معبود نہیں ہے، وہی ایک معبود ہے، کوئی شریک نہیں ہے، بادشاہی اسی کی ہے، حمد اسی کے لیے مخصوص ہے، وہ زندگی دیتا ہے اور وہ موت دیتا ہے، وہ ہر شے پر قدرت رکھتا ہے“ پڑھتا ہے“، راوی کو شک ہے شاید (نبی صلی اللہ علیہ وسلم کے) یہ الفاظ ہیں: ”غلام آزاد کرنے (یا گردن آزاد کرنے) کی مانند ہے“۔ [صحیح ابن حبان/كتاب الرقائق/حدیث: 850]

سیدنا ابوسعید خدری اور سیدنا ابوہریرہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب بندہ «لَا إِلٰهَ إِلَّا اللّٰهُ وَاللّٰهُ أَكْبَرُ» پڑھتا ہے، تو پروردگار اس کی تصدیق بیان کرتا ہے: ”اس نے سچ کہا، میرے علاوہ کوئی معبود نہیں ہے اور میں سب سے بڑا ہوں۔“ جب بندہ «لَا إِلٰهَ إِلَّا اللّٰهُ وَحْدَهُ» پڑھتا ہے، تو اس کا پروردگار اس کی تصدیق کرتے ہوئے فرماتا ہے: ”اس نے سچ کہا، میرے علاوہ کوئی معبود نہیں ہے، صرف میں معبود ہوں۔“ اور جب بندہ «لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ» کہتا ہے، تو اس کا پروردگار اس کی تصدیق کرتا ہے: ”میرے بندے نے سچ کہا، میرے علاوہ کوئی معبود نہیں ہے اور میرا کوئی شریک نہیں ہے۔“ جب بندہ «لَا إِلٰهَ إِلَّا اللّٰهُ لَهُ الْمُلْكُ وَلَهُ الْحَمْدُ» پڑھتا ہے، تو اس کا پروردگار اس کی تصدیق کرتے ہوئے فرماتا ہے: ”میرے بندے نے سچ کہا، میرے علاوہ کوئی معبود نہیں ہے، بادشاہی میرے لیے ہے اور حمد میرے لیے مخصوص ہے۔“ اور بندہ جب «لَا إِلٰهَ إِلَّا اللّٰهُ وَلَا حَوْلَ وَلَا قُوَّةَ إِلَّا بِاللّٰهِ» پڑھتا ہے، تو اس کا پروردگار اس کی تصدیق کرتے ہوئے فرماتا ہے: ”میرے بندے نے سچ کہا، میرے علاوہ کوئی معبود نہیں ہے اور میری مدد کے بغیر کچھ نہیں ہو سکتا۔““ [صحیح ابن حبان/كتاب الرقائق/حدیث: 851]

سیدنا عثمان غنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص صبح کے وقت یہ پڑھ لے: «بِسْمِ اللّٰهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ» ”اس اللہ کے نام سے برکت حاصل کرتے ہوئے جس کے اسم کے ہمراہ کوئی چیز زمین اور آسمان میں نقصان نہیں پہنچا سکتی اور وہ سننے والا اور علم رکھنے والا ہے“ تو شام تک اسے کوئی اچانک آزمائش درپیش نہیں ہو گی اور اگر وہ شام کے وقت انہیں پڑھ لے گا تو صبح تک اسے کوئی آزمائش درپیش نہیں ہو گی۔“ [صحیح ابن حبان/كتاب الرقائق/حدیث: 852]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”جب بھی کوئی شخص کسی محفل میں اللہ کا ذکر نہیں کرتا، تو وہ اس کے لیے حسرت کا باعث ہوگی، جب کوئی شخص کسی راستے پر چلتا ہے اور وہ اس میں اللہ کا ذکر نہیں کرتا، تو وہ اس کے لیے حسرت کا باعث ہوگی اور جب کوئی شخص اپنے بستر پر جاتا ہے اور وہ اللہ کا ذکر نہیں کرتا، تو یہ اس کے لیے حسرت کا باعث ہوگی۔“ [صحیح ابن حبان/كتاب الرقائق/حدیث: 853]

سیدنا ابو موسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”وہ گھر جس میں اللہ کا ذکر کیا جاتا ہے اور وہ گھر جس میں اللہ کا ذکر نہیں کیا جاتا، ان کی مثال زندہ اور مردہ شخص جیسی ہے۔“ [صحیح ابن حبان/كتاب الرقائق/حدیث: 854]

اغر کہتے ہیں: میں سیدنا ابوسعید خدری اور سیدنا ابوہریرہ رضی اللہ عنہما کے بارے میں گواہی دیتا ہوں کہ ان دونوں حضرات نے نبی اکرم صلی اللہ علیہ وسلم کے بارے میں گواہی دے کر یہ بات بیان کی ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”جب کچھ لوگ اللہ کا ذکر کرتے ہیں، تو فرشتے ان کو ڈھانپ لیتے ہیں اور ان پر رحمت نازل ہوتی ہے اور ان لوگوں پر سکینت نازل ہوتی ہے اور اللہ تعالیٰ اپنی بارگاہ میں موجود (فرشتوں) میں ان کا تذکرہ کرتے ہیں۔“ [صحیح ابن حبان/كتاب الرقائق/حدیث: 855]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اللہ تعالیٰ کے کچھ فرشتے ہیں جو لوگوں کے اعمال نوٹ کرنے والوں کے علاوہ ہیں، وہ راستوں میں چلتے پھرتے ہیں اور ذکر کو تلاش کرتے رہتے ہیں؛ جب وہ کچھ لوگوں کو دیکھتے ہیں جو اللہ تعالیٰ کا ذکر کر رہے ہوں، تو ایک دوسرے کو پکارتے ہیں: اپنے مقصود کی طرف آ جاؤ، پھر وہ آسمان تک اپنے پروں سے انہیں ڈھانپ لیتے ہیں۔ ان کا پروردگار ان سے دریافت کرتا ہے، حالانکہ وہ ان سے زیادہ بہتر جانتا ہے، وہ فرماتا ہے: میرے بندے کیا کہتے ہیں؟ تو فرشتے عرض کرتے ہیں: اے ہمارے پروردگار! وہ تیری تسبیح اور تیری حمد بیان کرتے ہیں۔ پروردگار دریافت کرتا ہے: کیا انہوں نے مجھے دیکھا ہے؟ فرشتے جواب دیتے ہیں: جی نہیں۔ پروردگار دریافت کرتا ہے: اگر وہ مجھے دیکھ لیتے، تو کیا ہوتا؟ فرشتے عرض کرتے ہیں: اگر وہ تجھے دیکھ لیتے تو وہ زیادہ شدت کے ساتھ تیری تسبیح، تیری بزرگی، تیری کبریائی اور تیری حمد بیان کرتے۔ پروردگار دریافت کرتا ہے: وہ کیا چیز مانگتے ہیں؟ فرشتے جواب دیتے ہیں: اے ہمارے پروردگار! وہ تجھ سے جنت مانگتے ہیں۔ پروردگار دریافت کرتا ہے: کیا انہوں نے اسے دیکھا ہے؟ وہ جواب دیتے ہیں: جی نہیں، پروردگار فرماتا ہے: اگر وہ اسے دیکھ لیتے، تو کیا ہوتا؟ تو فرشتے عرض کرتے ہیں: اگر وہ اسے دیکھ لیتے، تو زیادہ شدت کے ساتھ اسے طلب کرتے اور زیادہ شدت کے ساتھ اس کے حصول کے خواہش مند ہوتے۔ پروردگار دریافت کرتا ہے: وہ کس چیز سے پناہ مانگتے ہیں؟ فرشتے عرض کرتے ہیں: وہ جہنم سے تیری پناہ مانگتے ہیں۔ پروردگار دریافت کرتا ہے: کیا انہوں نے اسے دیکھا ہے؟ فرشتے جواب دیتے ہیں: جی نہیں، پروردگار دریافت کرتا ہے: اگر وہ اسے دیکھ لیتے، تو کیا ہوتا؟ فرشتے جواب دیتے ہیں: اگر وہ اسے دیکھ لیتے، تو وہ زیادہ شدت کے ساتھ اس سے پناہ مانگتے، تو پروردگار فرماتا ہے: میں تم لوگوں کو گواہ بناتا ہوں کہ میں نے ان لوگوں کی مغفرت کر دی ہے۔“ [صحیح ابن حبان/كتاب الرقائق/حدیث: 856]