عائشہ بنت سعد بن ابی وقاص اپنے والد سیدنا سعد بن ابی وقاص رضی اللہ عنہ کا بیان نقل کرتی ہیں کہ وہ نبی اکرم صلی اللہ علیہ وسلم کے ہمراہ ایک خاتون کے پاس تشریف لے گئے جن کے ہاتھ میں گٹھلیاں تھیں جن پر وہ گن کر تسبیحات پڑھ رہی تھیں، تو نبی اکرم صلی اللہ علیہ وسلم نے ارشاد فرمایا: ”کیا میں تمہیں ایسی چیز کے بارے میں نہ بتاؤں جو تمہارے لئے زیادہ آسان اور زیادہ فضیلت والی ہو (وہ یہ کلمات ہیں) «سُبْحَانَ اللهِ عَدَدَ مَا خَلَقَ فِي السَّمَاءِ» ”میں اللہ تعالیٰ کی پاکی بیان کرتا ہوں جو ان چیزوں کی تعداد کے مطابق ہو جنہیں آسمان میں پیدا کیا“، «سُبْحَانَ اللهِ عَدَدَ مَا خَلَقَ فِي الْأَرْضِ» ”میں اللہ تعالیٰ کی پاکی بیان کرتا ہوں جو ان چیزوں کی تعداد کے مطابق ہو جنہیں زمین میں پیدا کیا“، «سُبْحَانَ اللهِ عَدَدَ مَا هُوَ خَالِقٌ» ”پاکی بیان کرتا ہوں ان چیزوں کی تعداد کے برابر جنہیں پیدا کرنا ہے“، پھر تم «اللهُ أَكْبَرُ» بھی اسی کی مانند کہو، «الْحَمْدُ لِلَّهِ» بھی اس کی مانند کہو، «لَا إِلَهَ إِلَّا اللهُ» بھی اسی کی مانند کہو اور «لَا حَوْلَ وَلَا قُوَّةَ إِلَّا بِاللَّهِ» بھی اسی کی مانند پڑھو۔“ [صحیح ابن حبان/كتاب الرقائق/حدیث: 837]

سیدنا ابوذر غفاری رضی اللہ عنہ بیان کرتے ہیں کہ کچھ صحابہ کرام رضی اللہ عنہم نے نبی کریم صلی اللہ علیہ وسلم کی خدمت میں عرض کی: ”یا رسول اللہ! صاحبِ حیثیت لوگ اجر لے گئے ہیں۔ وہ نماز ادا کرتے ہیں جس طرح ہم نماز ادا کرتے ہیں، وہ اسی طرح روزے رکھتے ہیں جس طرح ہم روزے رکھتے ہیں، لیکن وہ اپنے اضافی مال کو صدقہ کر دیتے ہیں۔“ نبی اکرم صلی اللہ علیہ وسلم نے ارشاد فرمایا: ”کیا اللہ تعالیٰ نے تمہارے لیے وہ چیز نہیں بنائی جسے تم صدقہ کیا کرو؟ «سُبْحَانَ اللّٰهِ» ”اللہ پاک ہے“ کہنا صدقہ ہے، «اَللّٰهُ أَكْبَرُ» ”اللہ سب سے بڑا ہے“ کہنا صدقہ ہے، «اَلْحَمْدُ لِلّٰهِ» ”سب تعریف اللہ ہی کے لیے ہے“ کہنا صدقہ ہے، «لَا إِلٰهَ إِلَّا اللّٰهُ» ”اللہ کے سوا کوئی معبود نہیں“ پڑھنا صدقہ ہے، نیکی کا حکم دینا صدقہ ہے اور برائی سے منع کرنا صدقہ ہے۔“ [صحیح ابن حبان/كتاب الرقائق/حدیث: 838]

سیدنا سمرہ بن جندب رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”سب سے زیادہ فضیلت والا کلام چار کلمات ہیں، تم اس بات کی پرواہ نہ کرو کہ کس کے ذریعے آغاز کرتے ہو: «سُبْحَانَ اللّٰهِ وَبِحَمْدِهِ، سُبْحَانَ اللّٰهِ الْعَظِيمِ، لَا إِلٰهَ إِلَّا اللّٰهُ، وَاللّٰهُ أَكْبَرُ» ”اللہ اپنی تعریف کے ساتھ پاک ہے، اللہ عظیم پاک ہے، اللہ کے سوا کوئی معبود نہیں اور اللہ سب سے بڑا ہے“۔“ [صحیح ابن حبان/كتاب الرقائق/حدیث: 839]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”باقی رہنے والی نیکیوں کی کثرت کرو۔“ عرض کی گئی: یا رسول اللہ! اس سے مراد کیا ہے؟ نبی اکرم صلی اللہ علیہ وسلم نے فرمایا: ”اس سے مراد «سُبْحَانَ اللهِ»، «الْحَمْدُ لِلّٰهِ»، «اللهُ أَكْبَرُ» اور «لَا حَوْلَ وَلَا قُوَّةَ» پڑھنا ہے۔“ [صحیح ابن حبان/كتاب الرقائق/حدیث: 840]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”دو کلمات ایسے ہیں جو زبان پر آسان ہیں اور میزان میں وزنی ہوں گے۔ (وہ یہ ہیں:) «سُبْحَانَ اللّٰهِ وَبِحَمْدِهِ» ”اللہ اپنی تعریف کے ساتھ پاک ہے۔“” [صحیح ابن حبان/كتاب الرقائق/حدیث: 841]

حمیضہ بنت یاسر اپنی دادی سیدہ یسیرہ رضی اللہ عنہا کا بیان نقل کرتی ہیں، وہ ہجرت کرنے والی خواتین میں سے ایک تھیں، وہ بیان کرتی ہیں کہ نبی اکرم صلی اللہ علیہ وسلم نے ہم سے فرمایا: ”تم خواتین «التَّسْبِيحَ» ”تسبیح“، «التَّهْلِيلَ» ”تہلیل“ اور «التَّقْدِيسَ» ”تقدیس“ پڑھا کرو اور اپنی انگلیوں کے پوروں پر انہیں شمار کیا کرو، کیونکہ ان سے سوال کیا جائے گا اور انہیں گویائی عطا کی جائے گی۔“ [صحیح ابن حبان/كتاب الرقائق/حدیث: 842]

سیدنا عبداللہ بن عمرو رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو اپنے دستِ مبارک پر تسبیح شمار کرتے ہوئے دیکھا ہے۔ [صحیح ابن حبان/كتاب الرقائق/حدیث: 843]

سیدنا ابو مالک اشعری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”اچھی طرح وضو کرنا نصف ایمان ہے، «اَلْحَمْدُ لِلّٰهِ» ”الحمدللہ“ پڑھنا میزان کو بھر دیتا ہے، «سُبْحَانَ اللّٰهِ، اَلْحَمْدُ لِلّٰهِ، اَللّٰهُ أَكْبَرُ» ”سبحان اللہ، الحمدللہ، اللہ اکبر“ پڑھنا آسمانوں اور زمین کے (درمیان کی جگہ کو) بھر دیتا ہے، نماز نور ہے، زکوۃ برہان ہے، صدقہ روشنی ہے، قرآن تمہارے حق میں یا تمہارے خلاف حجت ہے، ہر شخص نکلتا ہے اور وہ اپنے آپ کا سودا کرتا ہے، تو یا تو خود کو آزاد کروا لیتا ہے یا خود کو غلام بنا لیتا ہے۔“ [صحیح ابن حبان/كتاب الرقائق/حدیث: 844]

سیدنا انس بن مالک رضی اللہ عنہ بیان کرتے ہیں: میں نبی اکرم صلی اللہ علیہ وسلم کے ساتھ ایک حلقے میں بیٹھا ہوا تھا، اس دوران ایک شخص آیا، اس نے نبی اکرم صلی اللہ علیہ وسلم کو سلام کیا اور حاضرین کو بھی سلام کیا، اس نے کہا: «السَّلَامُ عَلَيْكُمْ» نبی اکرم صلی اللہ علیہ وسلم نے فرمایا: ” «وَعَلَيْكُمُ السَّلَامُ وَرَحْمَةُ اللّٰهِ وَبَرَكَاتُهُ» “ یا وہ شخص بیٹھ گیا تو اس نے کہا: «الْحَمْدُ لِلّٰهِ حَمْدًا كَثِيرًا طَيِّبًا مُبَارَكًا فِيهِ كَمَا يُحِبُّ رَبُّنَا وَيَرْضَى» ”اللہ تعالیٰ کے لیے ہر طرح کی حمد مخصوص ہے، ایسی حمد جو زیادہ ہو، پاک ہو، اس میں برکت موجود ہو، جسے ہمارا پروردگار پسند کرے“، تو نبی اکرم صلی اللہ علیہ وسلم نے اس شخص سے دریافت کیا: ”تم نے کیا کلمات کہے ہیں؟“ نبی اکرم صلی اللہ علیہ وسلم کے سامنے یہ کلمات اس نے دوبارہ دہرا دیے، تو نبی اکرم صلی اللہ علیہ وسلم نے ارشاد فرمایا: ”اس ذات کی قسم! جس کے قبضہ قدرت میں میری جان ہے، بارہ فرشتے تیزی سے اس کی طرف لپکے تھے، ان میں سے ہر ایک کی یہ خواہش تھی کہ وہ اسے نوٹ کر لے، پھر انہیں یہ سمجھ نہیں آئی کہ وہ اسے کیسے نوٹ کریں، وہ واپس اللہ تعالیٰ کی بارگاہ میں گئے، تو اللہ تعالیٰ نے فرمایا: تم اسے ایسے نوٹ کر لو جس طرح میرے بندے نے کہے ہیں“، شیخ کہتے ہیں: ”میرے بندے نے کہا“ کا مطلب درحقیقت یہ ہے کہ میں نے اس کو قبول کر لیا ہے۔ [صحیح ابن حبان/كتاب الرقائق/حدیث: 845]

سیدنا جابر بن عبداللہ رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”سب سے افضل ذکر «لَا إِلٰهَ إِلَّا اللّٰهُ» اور سب سے افضل دعا «الْحَمْدُ لِلّٰهِ» ہے۔“ [صحیح ابن حبان/كتاب الرقائق/حدیث: 846]