سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ کے کچھ فرشتے ایسے ہیں جو لوگوں کے اعمال نوٹ کرنے کے علاوہ ہیں، وہ راستوں میں گھومتے پھرتے رہتے ہیں اور اہل ذکر کو تلاش کرتے ہیں، جب انہیں کچھ لوگ ملتے ہیں جو اللہ کا ذکر کر رہے ہوں، تو وہ (ایک دوسرے کو) بلاتے ہیں: اپنے مقصود کی طرف آ جاؤ، پھر وہ آسمانِ دنیا تک اپنے پروں سے انہیں ڈھانپ لیتے ہیں۔ ان کا پروردگار ان سے دریافت کرتا ہے، حالانکہ وہ ان سے زیادہ بہتر جانتا ہے، پروردگار فرماتا ہے: میرے بندے کیا کہتے ہیں؟ فرشتے جواب دیتے ہیں: وہ تیری کبریائی، تیری تکبیر، تیری پاکی اور تیری حمد بیان کرتے ہیں۔ پروردگار دریافت کرتا ہے: کیا انہوں نے مجھے دیکھا ہے؟ فرشتے جواب دیتے ہیں: جی نہیں، پروردگار دریافت کرتا ہے: اگر وہ مجھے دیکھ لیتے، تو کیا ہوتا؟ فرشتے جواب دیتے ہیں: اگر وہ تجھے دیکھ لیتے، تو زیادہ شدت کے ساتھ تیری پاکی بیان کرتے، زیادہ حمد اور بزرگی بیان کرتے۔ پروردگار دریافت کرتا ہے: وہ لوگ مجھ سے کیا مانگتے ہیں؟ فرشتے جواب دیتے ہیں: وہ تجھ سے جنت مانگتے ہیں۔ پروردگار فرماتا ہے: کیا انہوں نے اسے دیکھا ہے؟ فرشتے جواب دیتے ہیں: جی نہیں، اللہ کی قسم! (اے پروردگار! انہوں نے اسے نہیں دیکھا) پروردگار فرماتا ہے: اگر وہ اسے دیکھ لیتے، تو کیا ہوتا؟ فرشتے جواب دیتے ہیں: اگر وہ اسے دیکھ لیتے، تو وہ اس کے حصول کی زیادہ خواہش کرتے اور زیادہ شدت کے ساتھ اس کی رغبت کرتے۔ پروردگار فرماتا ہے: وہ لوگ کس چیز سے پناہ مانگتے ہیں؟ فرشتے جواب دیتے ہیں: وہ جہنم سے پناہ مانگتے ہیں۔ پروردگار دریافت کرتا ہے: کیا انہوں نے اسے دیکھا ہے؟ فرشتے جواب دیتے ہیں: جی نہیں، اللہ کی قسم! اے ہمارے پروردگار! (انہوں نے اسے نہیں دیکھا) پروردگار فرماتا ہے: اگر وہ اسے دیکھ لیتے، تو کیا ہوتا؟ فرشتے جواب دیتے ہیں: اگر وہ اسے دیکھ لیتے، تو اس سے زیادہ دور بھاگتے، شدت سے بھاگتے اور اس سے زیادہ خوف زدہ ہوتے۔ تو پروردگار فرشتوں سے فرماتا ہے: میں تم لوگوں کو گواہ بنا کے کہتا ہوں کہ میں نے ان لوگوں کی مغفرت کر دی ہے۔ نبی اکرم صلی اللہ علیہ وسلم فرماتے ہیں: ان فرشتوں میں سے ایک فرشتہ عرض کرتا ہے: ان میں فلاں شخص تھا جو ان میں سے نہیں تھا، وہ اپنے کام کے سلسلہ میں وہاں آیا تھا، پروردگار فرماتا ہے: وہ ایک دوسرے کے ساتھ بیٹھے ہوئے ایسے لوگ ہیں جن کے ساتھ بیٹھنے والا بھی محروم نہیں ہوتا۔“ [صحیح ابن حبان/كتاب الرقائق/حدیث: 857]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم مکہ کے راستے میں سفر کر رہے تھے، آپ صلی اللہ علیہ وسلم کا گزر ایک پہاڑ کے پاس سے ہوا جس کا نام «جُمْدَانُ» ”جمدان“ تھا، آپ صلی اللہ علیہ وسلم نے فرمایا: ”اس «جُمْدَانُ» ”جمدان“ کی طرف چلو، «الْمُفَرِّدُونَ» ”مفردون“ سبقت لے گئے ہیں۔“ لوگوں نے عرض کی: وہ کون ہیں؟ نبی اکرم صلی اللہ علیہ وسلم نے فرمایا: ”اللہ تعالیٰ کا کثرت سے ذکر کرنے والے مرد اور کثرت سے ذکر کرنے والی خواتین۔“ [صحیح ابن حبان/كتاب الرقائق/حدیث: 858]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص صبح کے وقت سو مرتبہ «سُبْحَانَ اللّٰهِ وَبِحَمْدِهِ» ”اللہ پاک ہے اور اپنی تعریف کے ساتھ ہے“ پڑھتا ہے اور شام کے وقت بھی سو مرتبہ یہ کلمات پڑھتا ہے، تو اس شخص کے گناہوں کی مغفرت ہو جاتی ہے، اگرچہ وہ سمندر کے جھاگ سے زیادہ ہوں۔“ [صحیح ابن حبان/كتاب الرقائق/حدیث: 859]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جو شخص صبح کے وقت 100 مرتبہ اور شام کے وقت بھی اسی طرح (100 مرتبہ) «سُبْحَانَ اللّٰهِ الْعَظِيمِ وَبِحَمْدِهِ» ”پاک ہے اللہ نہایت عظمت والا اور اپنی تعریف کے ساتھ“ پڑھتا ہے تو مخلوق میں سے کسی کا (عمل) اس کے برابر نہیں ہوتا۔“ [صحیح ابن حبان/كتاب الرقائق/حدیث: 860]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص صبح کے وقت یہ پڑھتا ہے: «اللَّهُمَّ مَا أَصْبَحَ بِي مِنْ نِعْمَةٍ أَوْ بِأَحَدٍ مِنْ خَلْقِكَ، فَمِنْكَ وَحْدَكَ لَا شَرِيكَ لَكَ، فَلَكَ الْحَمْدُ وَلَكَ الشُّكْرُ» ”اے اللہ! آج کے دن مجھے جو بھی نعمت حاصل ہو، تیری مخلوق میں سے جس کسی کو جو بھی نعمت حاصل ہو وہ تیری طرف سے ہے، تو ایک ہے تیرا کوئی شریک نہیں، حمد تیرے لیے مخصوص ہے اور شکر بھی تیرے لیے ہے“ تو نبی اکرم صلی اللہ علیہ وسلم نے ارشاد فرمایا: ”وہ شخص اس دن کے شکر کو ادا کر دیتا ہے۔““ [صحیح ابن حبان/كتاب الرقائق/حدیث: 861]

سیدنا عثمان غنی رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”جو شخص صبح کے وقت تین مرتبہ یہ کلمات پڑھتا ہے: «بِسْمِ اللّٰهِ الَّذِي لَا يَضُرُّ مَعَ اسْمِهِ شَيْءٌ فِي الْأَرْضِ وَلَا فِي السَّمَاءِ وَهُوَ السَّمِيعُ الْعَلِيمُ» ”اس اللہ کے نام سے برکت حاصل کرتے ہوئے جس کے نام کے ہمراہ زمین اور آسمان میں کوئی چیز نقصان نہیں دیتی ہے اور وہ سننے والا اور علم رکھنے والا ہے“ تو شام تک اسے کوئی اچانک مصیبت لاحق نہیں ہوتی، اور جو شام کے وقت یہ کلمات پڑھ لیتا ہے، تو صبح تک اسے اچانک کوئی مصیبت لاحق نہیں ہوتی۔“ راوی بیان کرتا ہے کہ اسے فالج ہو گیا، تو انہیں کہا گیا: آپ نے ہمیں وہ حدیث سنائی، اس پر خود عمل کیوں نہیں کیا؟ تو انہوں نے بتایا: اللہ تعالیٰ نے میرے بارے میں اس بات کا ارادہ کیا، تو مجھے یہ بات یاد نہیں رہی۔ (یعنی مجھے دعا پڑھنا یاد نہیں رہا) [صحیح ابن حبان/كتاب الرقائق/حدیث: 862]

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص یہ کہے: «رَضِيتُ بِاللَّهِ رَبًّا، وَبِالْإِسْلَامِ دِينًا، وَبِمُحَمَّدٍ نَبِيًّا» ”میں اللہ تعالیٰ کے پروردگار ہونے اور اسلام کے دین ہونے اور سیدنا محمد صلی اللہ علیہ وسلم کے نبی ہونے سے راضی ہوں“ (یعنی میں ان پر ایمان رکھتا ہوں)، اس شخص کے لیے جنت واجب ہو جاتی ہے۔“ (امام ابن حبان رحمہ اللہ فرماتے ہیں:) ابوہانی نامی راوی کا نام حمید بن ہانی ہے، یہ مصر سے تعلق رکھتے ہیں جبکہ ابوعلی ہمدانی کا نام عمرو بن مالک جنبی ہے، یہ فلسطین سے تعلق رکھنے والے ثقہ راوی ہیں۔ [صحیح ابن حبان/كتاب الرقائق/حدیث: 863]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے اپنے گھر والوں کو اکٹھا کیا اور ارشاد فرمایا: ”جب تم میں سے کسی کو کوئی غم یا مصیبت لاحق ہو جائے، تو وہ یہ کلمات پڑھے: «اللَّهُ رَبِّي لَا أُشْرِكُ بِهِ شَيْئًا» ”اللہ میرا پروردگار ہے میں کسی کو اس کا شریک نہیں ٹھہراتا۔“”ابوعامر خذاز نامی راوی کا نام صالح بن رستم ہے، ان کے حوالے سے چالیس روایات نقل کی گئی ہیں اور یہ بصرہ سے تعلق رکھنے والے ثقہ راویوں میں سے ایک ہیں۔ [صحیح ابن حبان/كتاب الرقائق/حدیث: 864]

سیدنا علی بن ابی طالب رضی اللہ عنہ بیان کرتے ہیں کہ نبی کریم صلی اللہ علیہ وسلم نے مجھے چند کلمات کی تعلیم دی تھی، آپ صلی اللہ علیہ وسلم نے مجھے یہ ہدایت فرمائی تھی کہ جب بھی مجھے کوئی تکلیف یا مصیبت لاحق ہو تو میں یہ کلمات پڑھ لوں: «لَا إِلٰهَ إِلَّا اللَّهُ الْحَلِيمُ الْكَرِيمُ، سُبْحَانَ اللَّهِ، وَتَبَارَكَ اللَّهُ رَبُّ الْعَرْشِ الْعَظِيمِ، وَالْحَمْدُ لِلَّهِ رَبِّ الْعَالَمِينَ» ”اللہ تعالیٰ کے علاوہ کوئی معبود نہیں ہے، جو بردبار اور معزز ہے، اللہ کی ذات پاک ہے اور وہ برکت والا ہے جو عظیم عرش کا پروردگار ہے، حمد اللہ تعالیٰ کے لیے مخصوص ہے، جو تمام جہانوں کا پروردگار ہے۔“ [صحیح ابن حبان/كتاب الرقائق/حدیث: 865]

سیدنا انس رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”ہر شخص کو اپنے پروردگار سے تمام حاجتیں طلب کرنی چاہییں یہاں تک کہ جب اس کے جوتے کا تسمہ ٹوٹ جائے، (تو وہ بھی پروردگار سے مانگنا چاہیے)۔“ [صحیح ابن حبان/كتاب الرقائق/حدیث: 866]