سیدنا ابو جعد ضمری رضی اللہ عنہ صحابیِ رسول ہیں، وہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص جمعے کو کم تر سمجھتے ہوئے اسے تین مرتبہ ترک کر دے گا، تو اللہ تعالیٰ اس کے دل پر مہر لگا دے گا۔“ [صحیح ابن حبان/كتاب الصلاة/حدیث: 2786]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب بندہ کوئی غلطی کرتا ہے، تو اس کے دل پر ایک نکتہ لگا دیا جاتا ہے، اگر وہ اس سے الگ ہو جائے اور مغفرت طلب کر لے اور توبہ کر لے، تو وہ نکتہ صاف ہو جاتا ہے، البتہ اگر وہ دوبارہ وہی غلطی کرتا ہے، تو اس میں اضافہ ہو جاتا ہے، یہاں تک کہ (وہ سیاہی) اس کے دل پر غالب آ جاتی ہے، یہ وہ «الرَّانُ» (زنگ) ہے، جس کا ذکر اللہ تعالیٰ نے کیا ہے: ﴿كَلَّا بَلْ رَانَ عَلَى قُلُوبِهِمْ مَا كَانُوا يَكْسِبُونَ﴾ [سورة المطففين: 14] ”بلکہ ان کے دلوں پر زنگ لگ گیا ہے اس وجہ سے جو وہ کماتے ہیں۔““ [صحیح ابن حبان/كتاب الصلاة/حدیث: 2787]

سیدنا سمرہ بن جندب رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جس شخص کا جمعہ فوت ہو جائے اسے ایک دینار صدقہ کرنا چاہیے، اگر وہ (اتنا) نہ پائے، تو اسے نصف دینار صدقہ کرنا چاہیے۔“ [صحیح ابن حبان/كتاب الصلاة/حدیث: 2788]

سیدنا سمرہ بن جندب رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص کسی عذر کے بغیر جمعے کو ترک کر دے اسے ایک دینار صدقہ کرنا چاہیے، اگر وہ دستیاب نہ ہو، تو نصف دینار کرنا چاہیے۔“ [صحیح ابن حبان/كتاب الصلاة/حدیث: 2789]

سیدنا عبداللہ بن بسر رضی اللہ عنہ بیان کرتے ہیں: میں جمعہ کے دن منبر کے پہلو پر بیٹھا ہوا تھا، اسی دوران ایک شخص آیا اور لوگوں کی گردنیں پھلانگنے لگا، نبی اکرم صلی اللہ علیہ وسلم لوگوں کو خطبہ دے رہے تھے، نبی اکرم صلی اللہ علیہ وسلم نے اس سے فرمایا: ”تم بیٹھ جاؤ، تم نے اذیت پہنچائی ہے اور تم دیر سے آئے ہو۔“ [صحیح ابن حبان/كتاب الصلاة/حدیث: 2790]

ابووائل بیان کرتے ہیں کہ سیدنا عمار بن یاسر رضی اللہ عنہما نے ہمیں مختصر اور بلیغ خطبہ دیا، جب وہ منبر سے اترے تو ہم نے کہا: اے ابویقظان! آپ نے بلیغ اور مختصر خطبہ دیا ہے، اگر آپ مزید (خطبہ) دیتے (تو مناسب ہوتا) تو انہوں نے فرمایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”آدمی کا نماز کو طویل ادا کرنا اور خطبے کو مختصر دینا آدمی کے سمجھدار ہونے کی نشانی ہے، تو تم لوگ نماز کو طویل ادا کرو اور خطبہ مختصر دیا کرو کیونکہ بعض بیان جادو ہوتے ہیں۔“ [صحیح ابن حبان/كتاب الصلاة/حدیث: 2791]

سیدنا عبداللہ بن عمر رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”جب جمعہ کے دن کسی شخص کو اپنی جگہ پر بیٹھے اونگھ آ جائے، تو اسے دوسری جگہ چلے جانا چاہیے۔“ [صحیح ابن حبان/كتاب الصلاة/حدیث: 2792]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”جب تم نے امام کے خطبے کے دوران اپنے ساتھی سے کہا: تم خاموش رہو، تو تم نے لغو حرکت کی۔“ [صحیح ابن حبان/كتاب الصلاة/حدیث: 2793]

سیدنا جابر بن عبداللہ رضی اللہ عنہما بیان کرتے ہیں کہ سیدنا عبداللہ بن مسعود رضی اللہ عنہ مسجد میں داخل ہوئے، نبی اکرم صلی اللہ علیہ وسلم اس وقت خطبہ دے رہے تھے، وہ سیدنا ابی بن کعب رضی اللہ عنہ کے پہلو میں بیٹھ گئے۔ انہوں نے ان سے کسی چیز کے بارے میں دریافت کیا یا ان سے کسی چیز کے بارے میں کوئی بات کی، تو سیدنا ابی رضی اللہ عنہ نے انہیں جواب نہیں دیا۔ سیدنا عبداللہ بن مسعود رضی اللہ عنہ یہ سمجھے کہ شاید سیدنا ابی بن کعب رضی اللہ عنہ کسی بات پر ناراض ہیں، جب نبی اکرم صلی اللہ علیہ وسلم نماز پڑھ کر فارغ ہوئے، تو سیدنا عبداللہ بن مسعود رضی اللہ عنہ نے فرمایا: اے ابی! کیا وجہ ہے کہ تم نے مجھے جواب نہیں دیا؟ تو سیدنا ابی رضی اللہ عنہ نے کہا: تم ہمارے ساتھ جمعے میں شریک نہیں ہوئے۔ سیدنا عبداللہ رضی اللہ عنہ نے دریافت کیا: وہ کیوں؟ سیدنا ابی رضی اللہ عنہ نے کہا: اس کی وجہ یہ ہے کہ نبی اکرم صلی اللہ علیہ وسلم کے خطبہ دینے کے دوران تم نے کلام کیا تھا، تو سیدنا عبداللہ بن مسعود رضی اللہ عنہ اٹھے اور نبی اکرم صلی اللہ علیہ وسلم کی خدمت میں حاضر ہو کر آپ کے سامنے اس بات کا تذکرہ کیا، تو نبی اکرم صلی اللہ علیہ وسلم نے ان سے فرمایا: ”ابی نے ٹھیک کہا ہے، تم ابی کی بات مان لو۔“ روایت کے یہ الفاظ عبدالاعلیٰ کے نقل کردہ ہیں۔ [صحیح ابن حبان/كتاب الصلاة/حدیث: 2794]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص اپنے ساتھی سے یہ کہے: تم خاموش رہو، اور امام اس وقت خطبہ دے رہا ہو، تو اس شخص نے لغو حرکت کی۔“ ابن جریج بیان کرتے ہیں: یہی روایت ایک اور سند کے ساتھ سیدنا ابوہریرہ رضی اللہ عنہ کے حوالے سے منقول ہے۔ [صحیح ابن حبان/كتاب الصلاة/حدیث: 2795]