سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”ہر وہ خطبہ جس میں کلمہ شہادت نہ ہو اس کی مثال کٹے ہوئے ہاتھ کی مانند ہے۔“ [صحیح ابن حبان/كتاب الصلاة/حدیث: 2796]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا ہے: ”ہر وہ کلمہ جس میں کلمہ شہادت نہ ہو اس کی مثال کٹے ہوئے ہاتھ کی مانند ہے۔“ [صحیح ابن حبان/كتاب الصلاة/حدیث: 2797]

سیدنا عدی بن حاتم رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم کے سامنے خطبہ دیا، اس نے یہ کہا: ”جس نے اللہ اور اس کے رسول کی اطاعت کی اس نے ہدایت پائی اور جس نے ان دونوں کی نافرمانی کی وہ گمراہ ہو گیا“ تو نبی اکرم صلی اللہ علیہ وسلم نے ارشاد فرمایا: ”تم کتنے برے خطیب ہو! تم یہ کہو: جس شخص نے اللہ اور اس کے رسول کی نافرمانی کی“ [صحیح ابن حبان/كتاب الصلاة/حدیث: 2798]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں خطبہ دیتے ہوئے ﴿ص﴾ [سورة ص] کی تلاوت کی، جب آپ صلی اللہ علیہ وسلم نے آیتِ سجدہ تلاوت کی تو آپ صلی اللہ علیہ وسلم منبر سے نیچے اترے، آپ صلی اللہ علیہ وسلم نے سجدہ کیا اور آپ صلی اللہ علیہ وسلم کے ہمراہ ہم نے بھی سجدہ کیا۔ پھر آپ صلی اللہ علیہ وسلم نے اسے دوسری مرتبہ تلاوت کیا، جب آپ صلی اللہ علیہ وسلم سجدے کے مقام پر پہنچے تو ہم لوگ سجدہ کرنے کے لیے تیار تھے۔ آپ صلی اللہ علیہ وسلم نے ہمیں دیکھا تو ارشاد فرمایا: ”یہ ایک نبی کی توبہ کا واقعہ ہے، لیکن میں نے تمہیں دیکھا ہے کہ تم سجدہ کرنے کے لیے تیار ہو“، تو آپ صلی اللہ علیہ وسلم منبر سے نیچے اترے۔ آپ صلی اللہ علیہ وسلم نے سجدہ کیا اور آپ صلی اللہ علیہ وسلم کے ہمراہ ہم نے بھی سجدہ کیا۔ (امام ابن حبان رحمہ اللہ فرماتے ہیں:) درست لفظ یہ ہے: «اسْتَعْدَدْتُمْ» (یعنی ”تم ایسا کرنے کے لیے مستعد ہو“)۔ [صحیح ابن حبان/كتاب الصلاة/حدیث: 2799]

قیس بن ابوحازم اپنے والد (سیدنا ابوحازم رضی اللہ عنہ) کا یہ بیان نقل کرتے ہیں کہ میرے والد (مسجد میں) آئے، نبی اکرم صلی اللہ علیہ وسلم اس وقت خطبہ دے رہے تھے، (میرے والد) دھوپ میں کھڑے ہو گئے، تو نبی اکرم صلی اللہ علیہ وسلم نے انہیں حکم دیا کہ ”وہ سائے میں آ جائیں۔“ [صحیح ابن حبان/كتاب الصلاة/حدیث: 2800]

سماک بن حرب رحمہ اللہ بیان کرتے ہیں: میں نے سیدنا جابر بن سمرہ رضی اللہ عنہ سے سوال کیا کہ نبی اکرم صلی اللہ علیہ وسلم کس طرح خطبہ دیا کرتے تھے؟ انہوں نے بتایا کہ نبی اکرم صلی اللہ علیہ وسلم پہلے خطبہ دیتے تھے، پھر آپ صلی اللہ علیہ وسلم کچھ دیر کے لیے بیٹھ جاتے تھے، پھر کھڑے ہو کر خطبہ دیتے تھے۔ [صحیح ابن حبان/كتاب الصلاة/حدیث: 2801]

سیدنا جابر بن سمرہ رضی اللہ عنہ بیان کرتے ہیں: میں نبی اکرم صلی اللہ علیہ وسلم کی اقتدا میں نماز ادا کرتا رہا ہوں، آپ کی نماز بھی درمیانی ہوتی تھی اور خطبہ بھی درمیانہ ہوتا تھا (نہ زیادہ مختصر ہوتے تھے نہ زیادہ طویل ہوتے تھے)۔ [صحیح ابن حبان/كتاب الصلاة/حدیث: 2802]

سیدنا جابر بن سمرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم منبر پر خطبہ دیتے تھے، پھر آپ صلی اللہ علیہ وسلم تشریف فرما ہو جاتے تھے، پھر کھڑے ہو کر خطبہ دیتے تھے، آپ صلی اللہ علیہ وسلم دو خطبوں کے درمیان بیٹھتے تھے، آپ صلی اللہ علیہ وسلم (خطبے کے دوران) اللہ تعالیٰ کی کتاب (کی آیات) تلاوت کرتے تھے اور لوگوں کو وعظ و نصیحت کرتے تھے۔ [صحیح ابن حبان/كتاب الصلاة/حدیث: 2803]

سیدنا عدی بن حاتم رضی اللہ عنہ بیان کرتے ہیں کہ نبی اکرم صلی اللہ علیہ وسلم کھڑے ہوئے اور آپ نے ارشاد فرمایا: ”جہنم سے بچنے کی کوشش کرو۔“ پھر آپ نے اپنا منہ پھیر لیا اور خود کو بچانے کی کوشش کی، پھر آپ نے ارشاد فرمایا: ”تم جہنم سے بچو۔“ پھر آپ نے اپنا منہ پھیر لیا اور اپنے آپ کو بچانے کی کوشش کی، یہاں تک کہ ہمیں یوں محسوس ہوا جیسے آپ اسے دیکھ رہے ہیں اور آپ نے ارشاد فرمایا: ”جہنم سے بچنے کی کوشش کرو، خواہ وہ نصف کھجور کے ذریعے ہو، اگر یہ بھی نہیں ملتی، تو پاکیزہ بات کے ذریعے (جہنم سے بچنے کی کوشش کرو)۔“ [صحیح ابن حبان/كتاب الصلاة/حدیث: 2804]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم منبر سے نیچے اترے، نماز کے لیے اقامت کہی جا چکی تھی، ایک شخص آیا اور اپنے کسی کام کے سلسلے میں آپ صلی اللہ علیہ وسلم سے بات چیت کرنے لگا، نبی اکرم صلی اللہ علیہ وسلم اس کے ساتھ کھڑے رہے یہاں تک کہ اس شخص نے اپنی حاجت مکمل کر لی، پھر نبی اکرم صلی اللہ علیہ وسلم آگے بڑھے اور آپ صلی اللہ علیہ وسلم نے نماز پڑھائی۔ [صحیح ابن حبان/كتاب الصلاة/حدیث: 2805]