سیدہ ام عطیہ رضی اللہ عنہا بیان کرتی ہیں: اللہ کے رسول صلی اللہ علیہ وسلم نے ہمیں یہ حکم دیا تھا: ”ہم عیدالفطر کے دن اور عیدالاضحی کے دن خواتین کو بھی ساتھ لے جائیں یعنی کنواری لڑکیوں کو بھی اور پردہ دار خواتین کو بھی اور حیض والی خواتین کو بھی۔“ (سیدہ ام عطیہ رضی اللہ عنہا بیان کرتی ہیں) میں نے عرض کی: آپ کا کیا خیال ہے اگر کسی عورت کے پاس چادر نہ ہو؟ نبی اکرم صلی اللہ علیہ وسلم نے فرمایا: ”تو اس کی بہن اپنی چادر میں سے اسے بھی اوڑھا دے۔“ [صحیح ابن حبان/كتاب الصلاة/حدیث: 2816]

سیدہ ام عطیہ رضی اللہ عنہا بیان کرتی ہیں کہ نبی اکرم صلی اللہ علیہ وسلم عید کے دن کنواری لڑکیوں، پردہ دار خواتین اور حیض والی خواتین کو بھی (عیدگاہ کی طرف) لے جاتے تھے، جہاں تک حیض والی خواتین کا تعلق ہے وہ نماز سے الگ رہتی تھیں، وہ بھلائی اور مسلمانوں کی دعا میں شریک ہوتی تھیں۔ کسی خاتون نے عرض کی: اگر ہم میں سے کسی کے پاس چادر نہ ہو؟ تو نبی اکرم صلی اللہ علیہ وسلم نے فرمایا: ”کوئی دوسری عورت اسے اپنی چادر دے دے۔“ [صحیح ابن حبان/كتاب الصلاة/حدیث: 2817]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم عید الفطر یا شاید عید الاضحی کے دن تشریف لے گئے، آپ صلی اللہ علیہ وسلم نے لوگوں کو دو رکعات پڑھائیں، پھر آپ صلی اللہ علیہ وسلم نے نماز مکمل کی، آپ صلی اللہ علیہ وسلم نے اس سے پہلے یا اس کے بعد کوئی (نفل نماز) ادا نہیں کی۔ [صحیح ابن حبان/كتاب الصلاة/حدیث: 2818]

سیدنا جابر بن سمرہ رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کی اقتدا میں عید کی نماز ایک یا دو مرتبہ سے زیادہ ادا کی ہے، وہ کسی اذان اور اقامت کے بغیر ادا کی جاتی تھی۔ [صحیح ابن حبان/كتاب الصلاة/حدیث: 2819]

عبیداللہ بن عبداللہ بیان کرتے ہیں: سیدنا عمر بن خطاب رضی اللہ عنہ نے سیدنا ابو واقد لیثی رضی اللہ عنہ سے دریافت کیا: نبی اکرم صلی اللہ علیہ وسلم عید الفطر اور عید الاضحی کے دن کون سی سورت کی تلاوت کرتے تھے؟ انہوں نے بتایا: نبی اکرم صلی اللہ علیہ وسلم سورہ الکہف اور سورہ ﴿اقْتَرَبَتِ السَّاعَةُ﴾ [سورة القمر: 1] کی تلاوت کرتے تھے۔ [صحیح ابن حبان/كتاب الصلاة/حدیث: 2820]

سیدنا نعمان بن بشیر رضی اللہ عنہ بیان کرتے ہیں: نبی اکرم صلی اللہ علیہ وسلم عیدین میں سورہ الاعلیٰ اور سورہ غاشیہ کی تلاوت کرتے تھے۔ [صحیح ابن حبان/كتاب الصلاة/حدیث: 2821]

سیدنا نعمان بن بشیر رضی اللہ عنہما بیان کرتے ہیں: نبی اکرم صلی اللہ علیہ وسلم جمعہ کے دن جمعہ کی نماز میں ﴿سورة الأعلى﴾ اور ﴿سورة الغاشية﴾ کی تلاوت کرتے تھے اور جب عید اور جمعہ ایک ہی دن آ جاتے تو جمعہ اور عید دونوں نمازوں میں انہی دو سورتوں کی تلاوت کرتے تھے۔ [صحیح ابن حبان/كتاب الصلاة/حدیث: 2822]

عبدالرحمن بن عابس بیان کرتے ہیں کہ میں نے سیدنا عبداللہ بن عباس رضی اللہ عنہما کو سنا، ان سے دریافت کیا گیا: کیا آپ عید کے دن نبی اکرم صلی اللہ علیہ وسلم کے ہمراہ شریک ہوئے ہیں؟ انہوں نے جواب دیا: جی ہاں! اگر مجھے نبی اکرم صلی اللہ علیہ وسلم کا قربِ خاص حاصل نہ ہوتا تو کم سن ہونے کی وجہ سے میں آپ کے ساتھ شریک نہ ہو پاتا، نبی اکرم صلی اللہ علیہ وسلم تشریف لے گئے یہاں تک کہ آپ کثیر بن صلت کے گھر کے پاس موجود نشان تک آئے، وہاں آپ نے نماز ادا کی، پھر آپ نے خطبہ دیا، پھر آپ خواتین کے پاس تشریف لائے، آپ کے ساتھ سیدنا بلال رضی اللہ عنہ تھے، آپ نے خواتین کو وعظ و نصیحت کی، آپ نے انہیں صدقہ کرنے کا حکم دیا، تو میں نے خواتین کو دیکھا، وہ اپنے ہاتھوں کے ذریعے صدقے کی چیزیں سیدنا بلال رضی اللہ عنہ کے کپڑے میں ڈال رہی تھیں، پھر نبی اکرم صلی اللہ علیہ وسلم اور سیدنا بلال رضی اللہ عنہ گھر کی طرف تشریف لے گئے۔ [صحیح ابن حبان/كتاب الصلاة/حدیث: 2823]

سیدنا عبداللہ بن عباس رضی اللہ عنہما بیان کرتے ہیں: میں نبی اکرم صلی اللہ علیہ وسلم کے بارے میں گواہی دے کر یہ بات بیان کرتا ہوں، نبی اکرم صلی اللہ علیہ وسلم اپنے اصحاب کے ہمراہ عید الفطر کے دن تشریف لے گئے، آپ نے نماز ادا کی، پھر آپ نے خطبہ دیا، پھر آپ خواتین کے پاس تشریف لائے، آپ نے انہیں صدقہ کرنے کا حکم دیا، تو انہوں نے صدقہ ڈالنا شروع کیا۔ [صحیح ابن حبان/كتاب الصلاة/حدیث: 2824]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے عید کے دن اپنے پاؤں پر (یعنی زمین پر) کھڑے ہو کر خطبہ دیا۔ [صحیح ابن حبان/كتاب الصلاة/حدیث: 2825]