عابس بن ربیعہ رحمہ اللہ بیان کرتے ہیں کہ سیدنا عمر رضی اللہ عنہ «الْحَجَرَ الْأَسْوَدَ» (حجر اسود) کے پاس آئے، اس کو بوسہ دیا اور فرمایا: ”میں یہ بات جانتا ہوں کہ تم ایک پتھر ہو، تم نہ کوئی نفع دے سکتے ہو اور نہ کوئی نقصان پہنچا سکتے ہو؛ اگر میں نے نبی اکرم صلی اللہ علیہ وسلم کو تمہیں بوسہ دیتے ہوئے نہ دیکھا ہوتا، تو میں تمہیں بوسہ نہ دیتا۔“ [صحیح ابن حبان/كتاب الحج/حدیث: 3822]

سیدنا عبدالرحمن بن عوف رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”تم نے حجر اسود کا استلام کرتے ہوئے کیا، کیا؟“ میں نے عرض کی: میں نے اس کا استلام کیا اور پھر اسے چھوڑ دیا، نبی اکرم صلی اللہ علیہ وسلم نے فرمایا: ”تم نے ٹھیک کیا۔“ [صحیح ابن حبان/كتاب الحج/حدیث: 3823]

نافع، سیدنا عبداللہ بن عمر رضی اللہ عنہما کے بارے میں یہ بات نقل کرتے ہیں کہ انہوں نے حجر اسود کا استلام کرنے کے بعد اپنے ہاتھ کو بوسہ دیا اور فرمایا: جب سے میں نے نبی اکرم صلی اللہ علیہ وسلم کو اسے بوسہ دیتے ہوئے دیکھا ہے، اس کے بعد میں نے اسے کبھی ترک نہیں کیا۔ [صحیح ابن حبان/كتاب الحج/حدیث: 3824]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے اپنی اونٹنی پر سوار ہو کر طواف کیا، جب آپ صلی اللہ علیہ وسلم حجر اسود کے مد مقابل آئے، تو نبی اکرم صلی اللہ علیہ وسلم نے اس کی طرف اشارہ کیا۔ [صحیح ابن حبان/كتاب الحج/حدیث: 3825]

سیدنا عبداللہ بن سائب رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو رکن یمانی اور حجر اسود کے درمیان یہ دعا مانگتے ہوئے سنا: «رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ» ﴿رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ﴾ [سورة البقرة: 201] ”اے ہمارے پروردگار! تو ہمیں دنیا میں بھلائی عطا کر اور آخرت میں بھی بھلائی عطا کر اور ہمیں جہنم کے عذاب سے بچا لے۔“ [صحیح ابن حبان/كتاب الحج/حدیث: 3826]

سیدنا عبداللہ بن عمر رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو بیت اللہ کے صرف دو یمانی رکنوں پر ہاتھ پھیرتے ہوئے دیکھا ہے۔ [صحیح ابن حبان/كتاب الحج/حدیث: 3827]

سیدنا عبداللہ بن عمر رضی اللہ عنہما بیان کرتے ہیں کہ فتح مکہ کے موقع پر نبی اکرم صلی اللہ علیہ وسلم نے اپنی اونٹنی قصواء پر طواف کیا تھا، آپ نے اپنی چھڑی کے ذریعے حجر اسود کا استلام کیا، آپ کو اونٹنی کو بٹھانے کے لیے مسجد میں کوئی جگہ نہیں ملی یہاں تک کہ اسے وادی کے نشیبی حصے کی طرف لے جا کر بٹھایا گیا، پھر آپ نے اللہ تعالیٰ کی حمد و ثنا بیان کی اور یہ بات ارشاد فرمائی: «أَمَّا بَعْدُ» ”امّا بعد! اے لوگو! بے شک اللہ تعالیٰ نے تم سے زمانہ جاہلیت کی خرابیوں کو ختم کر دیا ہے، اے لوگو! لوگ دو طرح کے ہوتے ہیں: ایک وہ جو اپنے پروردگار کے نزدیک نیک اور معزز ہوں اور دوسرے وہ جو اپنے پروردگار کے نزدیک گناہگار، بدبخت اور بے حیثیت ہوں، پھر آپ نے یہ آیت تلاوت فرمائی: ﴿يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا﴾ [سورة الحجرات: 13] ”اے لوگو! بے شک ہم نے تمہیں مذکر اور مونث سے پیدا کیا ہے، ہم نے تمہیں مختلف گروہوں میں تقسیم کیا ہے، تاکہ تم ایک دوسرے کی شناخت حاصل کرو“۔“ نبی اکرم صلی اللہ علیہ وسلم نے یہ آیت مکمل تلاوت کی، پھر آپ نے ارشاد فرمایا: ”میں یہ بات کہتا ہوں، میں اپنے لیے اور تمہارے لیے اللہ تعالیٰ سے مغفرت طلب کرتا ہوں“۔ [صحیح ابن حبان/كتاب الحج/حدیث: 3828]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے اپنی اونٹنی پر بیٹھ کر بیت اللہ کا طواف کیا تھا، آپ نے اپنی چھڑی کے ذریعے حجر اسود کا استلام کیا تھا۔ [صحیح ابن حبان/كتاب الحج/حدیث: 3829]

سیدہ زینب بنت ام سلمہ رضی اللہ عنہا، ام سلمہ رضی اللہ عنہا کا یہ بیان نقل کرتی ہیں: ہم نے نبی اکرم صلی اللہ علیہ وسلم کی خدمت میں بیمار ہونے کی شکایت کی تو آپ صلی اللہ علیہ وسلم نے فرمایا: ”تم لوگوں سے پرے ہو کر طواف کر لو۔“ سیدہ ام سلمہ رضی اللہ عنہا بیان کرتی ہیں: میں نے ایسا ہی کیا۔ [صحیح ابن حبان/كتاب الحج/حدیث: 3830]

سیدنا عبداللہ بن عباس رضی اللہ عنہما بیان کرتے ہیں کہ خانہ کعبہ کا طواف کرتے ہوئے نبی اکرم صلی اللہ علیہ وسلم کا گزر ایک شخص کے پاس سے ہوا جسے ایک دوسرا شخص ساتھ لے کر چل رہا تھا اور اس نے اس کی ناک میں نکیل ڈالی ہوئی تھی، تو نبی اکرم صلی اللہ علیہ وسلم نے اپنے دستِ مبارک کے ذریعے اسے کاٹ دیا اور پھر آپ صلی اللہ علیہ وسلم نے اسے یہ ہدایت کی: ”وہ اسے اپنے ہاتھ کے ساتھ پکڑ کر ساتھ لے کر چلے۔“ [صحیح ابن حبان/كتاب الحج/حدیث: 3831]