سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے مجھے ان لوگوں کے ہمراہ بھیج دیا تھا، جنہیں مزدلفہ سے (پہلے ہی) رات کے وقت بھجوا دیا تھا۔ [صحیح ابن حبان/كتاب الحج/حدیث: 3862]

سیدنا عبداللہ بن عباس رضی اللہ عنہما بیان کرتے ہیں: اللہ کے رسول صلی اللہ علیہ وسلم نے مجھے مزدلفہ سے رات کے وقت بھجوا دیا تھا۔ [صحیح ابن حبان/كتاب الحج/حدیث: 3863]

سیدہ عائشہ صدیقہ رضی اللہ عنہا بیان کرتی ہیں: میری یہ خواہش ہے کہ میں نے بھی نبی اکرم صلی اللہ علیہ وسلم سے اسی طرح اجازت لے لی ہوتی جس طرح سیدہ سودہ رضی اللہ عنہا نے لی تھی اور میں صبح کی نماز منیٰ میں ادا کرتی، جمرہ کو کنکریاں لوگوں کے آنے سے پہلے مار لیتی۔ راوی کہتے ہیں: میں نے سیدہ عائشہ رضی اللہ عنہا سے پوچھا: کیا سیدہ سودہ رضی اللہ عنہا نے نبی اکرم صلی اللہ علیہ وسلم سے اجازت لی تھی؟ انہوں نے جواب دیا: جی ہاں، وہ ایک بھاری بھرکم خاتون تھیں، انہوں نے نبی اکرم صلی اللہ علیہ وسلم سے اجازت مانگی تو نبی اکرم صلی اللہ علیہ وسلم نے انہیں اجازت دے دی۔ [صحیح ابن حبان/كتاب الحج/حدیث: 3864]

سیدنا عبداللہ بن عباس رضی اللہ عنہما بیان کرتے ہیں: ہم ان لوگوں میں شامل تھے، جنہیں نبی اکرم صلی اللہ علیہ وسلم نے اپنے اہل خانہ کے کمزور افراد کے ہمراہ مزدلفہ کی رات (دوسرے لوگوں سے) پہلے ہی روانہ کر دیا تھا۔ [صحیح ابن حبان/كتاب الحج/حدیث: 3865]

سیدہ عائشہ صدیقہ رضی اللہ عنہا بیان کرتی ہیں کہ سیدہ سودہ رضی اللہ عنہا بھاری بھرکم خاتون تھیں، انہوں نے نبی اکرم صلی اللہ علیہ وسلم سے اجازت مانگی کہ وہ مزدلفہ سے (دوسرے لوگوں سے) رات کے وقت ہی روانہ ہو جائیں، تو نبی اکرم صلی اللہ علیہ وسلم نے انہیں اجازت دے دی۔ سیدہ عائشہ رضی اللہ عنہا فرماتی ہیں کہ میری یہ خواہش تھی کہ میں نے بھی نبی اکرم صلی اللہ علیہ وسلم سے اسی طرح اجازت مانگ لی ہوتی، جس طرح سے سیدہ سودہ رضی اللہ عنہا نے اجازت مانگی تھی۔ [صحیح ابن حبان/كتاب الحج/حدیث: 3866]

سالم بیان کرتے ہیں کہ میرے والد (سیدنا عبداللہ بن عمر رضی اللہ عنہما) اپنے اہل خانہ میں سے کمزور افراد کو مزدلفہ سے پہلے ہی منیٰ کی طرف روانہ کر دیتے تھے، وہ یہ بات ذکر کرتے تھے کہ نبی اکرم صلی اللہ علیہ وسلم نے بھی اسی طرح کیا تھا۔ [صحیح ابن حبان/كتاب الحج/حدیث: 3867]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم ظہر کی نماز ادا کرنے کے بعد روانہ ہوئے، آپ صلی اللہ علیہ وسلم منیٰ واپس تشریف لے آئے، آپ صلی اللہ علیہ وسلم نے ایام تشریق وہاں گزارے، وہاں آپ صلی اللہ علیہ وسلم جمرات کو کنکریاں مارتے تھے، یہاں تک کہ جب سورج ڈھل جاتا تو آپ صلی اللہ علیہ وسلم ہر جمرہ کو سات کنکریاں مارتے اور ہر کنکری کے ہمراہ تکبیر کہتے تھے۔ آپ صلی اللہ علیہ وسلم پہلے اور دوسرے جمرہ کے قریب وادی کے نشیبی حصے میں ٹھہرتے تھے اور طویل قیام کرتے تھے، اور جب بڑے جمرہ کو کنکریاں مار لیتے تو آپ صلی اللہ علیہ وسلم واپس تشریف لے جاتے تھے، اس کے پاس ٹھہرتے نہیں تھے؛ یہ جمرات سیدنا ابراہیم علیہ السلام (کے واقعہ) کی نشانیاں ہیں۔ [صحیح ابن حبان/كتاب الحج/حدیث: 3868]

سیدنا عبداللہ بن عباس رضی اللہ عنہما بیان کرتے ہیں: ہم لوگ بنو عبدالمطلب سے تعلق رکھنے والے چند نوجوان مزدلفہ سے نبی اکرم صلی اللہ علیہ وسلم کی خدمت میں جمرات کے پاس حاضر ہوئے، تو نبی اکرم صلی اللہ علیہ وسلم نے ہمارے زانوں پر ہاتھ مارتے ہوئے ارشاد فرمایا: ”اے میرے بیٹو! تم اس وقت تک جمرات کو کنکریاں نہ مارنا جب تک سورج نکل نہ آئے۔“ [صحیح ابن حبان/كتاب الحج/حدیث: 3869]

ابراہیم بن عبدالرحمن بیان کرتے ہیں کہ سیدنا عبداللہ رضی اللہ عنہ نے وادی کے نشیبی حصے سے کنکریاں ماریں، تو میں نے کہا: اے ابوعبدالرحمن! لوگ تو اوپر کی طرف سے انہیں کنکریاں مارتے ہیں، تو انہوں نے فرمایا: اس ذات کی قسم! جس کے علاوہ اور کوئی معبود نہیں ہے، یہ اس ہستی صلی اللہ علیہ وسلم کے کھڑے ہونے کی جگہ ہے جن پر ﴿سورۃ البقرہ﴾ نازل ہوئی تھی۔ [صحیح ابن حبان/كتاب الحج/حدیث: 3870]

سیدنا عبداللہ بن عباس رضی اللہ عنہما بیان کرتے ہیں کہ عقبہ کی صبح نبی اکرم صلی اللہ علیہ وسلم اپنی سواری پر وقوف کیے ہوئے تھے، آپ نے ارشاد فرمایا: ”آگے آؤ اور مجھے کنکریاں چن دو۔“ میں نے آپ کو کنکریاں چن کر دیں جو اتنی چھوٹی تھیں جو چٹکی میں آ سکیں، جب میں نے انہیں نبی اکرم صلی اللہ علیہ وسلم کے دستِ اقدس پر رکھا، تو آپ نے فرمایا: ”جی ہاں! اسی طرح کی ہونی چاہیے، اسی طرح کی ہونی چاہیے۔ تم لوگ دین میں غلو کرنے سے بچو، کیونکہ تم سے پہلے کے لوگ دین میں غلو کرنے کی وجہ سے ہلاکت کا شکار ہوئے تھے۔“ [صحیح ابن حبان/كتاب الحج/حدیث: 3871]