سیدنا عبدالرحمن بن یعمر دیلی رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ” «الْحَجُّ عَرَفَةُ» ”حج عرفات (میں وقوف کا نام) ہے“، جو شخص مزدلفہ کی رات صبح صادق ہونے سے پہلے عرفہ پہنچ جاتا ہے وہ منیٰ کے ایام جو تین دن ہیں انہیں پا لیتا ہے، ﴿فَمَن تَعَجَّلَ فِي يَوْمَيْنِ فَلَا إِثْمَ عَلَيْهِ وَمَن تَأَخَّرَ فَلَا إِثْمَ عَلَيْهِ﴾ [سورة البقرة: 203] ”جو شخص دو دنوں کے بعد پہلے چلا جائے، تو اسے بھی کوئی گناہ نہیں ہے اور جو ٹھہرا رہے اور تین دن کے بعد جائے اسے بھی کوئی گناہ نہیں ہے“۔“ ابن عیینہ رحمہ اللہ کہتے ہیں: میں نے سفیان ثوری رحمہ اللہ سے کہا: آپ لوگوں کے پاس کوفہ میں کوئی ایسی حدیث نہیں ہو گی جو اس حدیث سے زیادہ معزز اور عمدہ ہو۔ [صحیح ابن حبان/كتاب الحج/حدیث: 3892]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم منیٰ میں دو رکعات ادا کرتے تھے، سیدنا ابوبکر اور سیدنا عمر رضی اللہ عنہما اور سیدنا عثمان رضی اللہ عنہ بھی (دو رکعات ہی ادا کرتے تھے)، پھر اس کے بعد سیدنا عثمان رضی اللہ عنہ نے یہاں چار رکعات ادا کرنا شروع کر دیں، سیدنا عبداللہ بن عمر رضی اللہ عنہما امام کی اقتداء میں ان کی نماز کے مطابق نماز ادا کرتے تھے اور جب تنہا نماز ادا کرتے تھے، تو دو رکعات ادا کرتے تھے۔ [صحیح ابن حبان/كتاب الحج/حدیث: 3893]

سیدنا عبداللہ بن عباس رضی اللہ عنہما بیان کرتے ہیں کہ عکاظ اور ذوالجاز زمانہ جاہلیت کے بازار تھے (جو حج کے موقع پر لگا کرتے تھے)، جب اللہ تعالیٰ نے اسلام (کو غلبہ عطا کر دیا) تو لوگوں نے حج کے موقع پر تجارت کرنے کو گناہ سمجھا، لوگوں نے اس بارے میں نبی اکرم صلی اللہ علیہ وسلم سے دریافت کیا تو یہ آیت نازل ہوئی: ﴿لَيْسَ عَلَيْكُمْ جُنَاحٌ أَن تَبْتَغُوا فَضْلًا مِّن رَّبِّكُمْ﴾ [سورة البقرة: 198] ”تم لوگوں پر کوئی گناہ نہیں ہے، اگر تم اپنے پروردگار کا فضل تلاش کرتے ہو۔“ (اس سے مراد یہ ہے) کہ حج کے موقع پر ایسا کرتے ہو۔ [صحیح ابن حبان/كتاب الحج/حدیث: 3894]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم ، سیدنا ابوبکر رضی اللہ عنہ، سیدنا عمر رضی اللہ عنہ اور سیدنا عثمان غنی رضی اللہ عنہ وادی محصب میں پڑاؤ کیا کرتے تھے۔ [صحیح ابن حبان/كتاب الحج/حدیث: 3895]

ہشام بن عروہ اپنے والد کا یہ بیان نقل کرتے ہیں کہ سیدہ اسماء اور سیدہ عائشہ رضی اللہ عنہما وادیِ محصب میں پڑاؤ نہیں کیا کرتی تھیں، اور سیدہ عائشہ رضی اللہ عنہا فرماتی تھیں کہ نبی اکرم صلی اللہ علیہ وسلم نے یہاں اس لیے پڑاؤ کیا تھا کیونکہ یہ روانگی کے لیے زیادہ آسان تھا۔ [صحیح ابن حبان/كتاب الحج/حدیث: 3896]

سیدنا عبداللہ بن عباس رضی اللہ عنہما بیان کرتے ہیں کہ پہلے لوگ کسی بھی سمت سے روانہ ہو جایا کرتے تھے، تو نبی اکرم صلی اللہ علیہ وسلم نے ارشاد فرمایا: ”کوئی بھی شخص اس وقت تک واپس روانہ نہ ہو جب تک وہ سب سے آخر میں بیت اللہ کا طواف نہ کرے۔“ [صحیح ابن حبان/كتاب الحج/حدیث: 3897]

سیدنا عبداللہ بن عباس رضی اللہ عنہما بیان کرتے ہیں: (نبی اکرم صلی اللہ علیہ وسلم نے) ”حیض والی خواتین کو اس بات کی اجازت دی ہے کہ جب اسے حیض آیا ہو، تو وہ (بیت اللہ کا طواف کرنے سے پہلے) روانہ ہو سکتی ہے۔“ سیدنا عبداللہ بن عمر رضی اللہ عنہما فرماتے ہیں: ”بے شک اللہ کے رسول صلی اللہ علیہ وسلم نے ان خواتین کو اس بات کی رخصت دی ہے۔“ [صحیح ابن حبان/كتاب الحج/حدیث: 3898]

سیدنا عبداللہ بن عمر رضی اللہ عنہما بیان کرتے ہیں: ”جو شخص حج کرے اسے سب سے آخر میں بیت اللہ کا طواف کرنا چاہیے،“ البتہ حیض والی خواتین کا حکم مختلف ہے، اللہ کے رسول صلی اللہ علیہ وسلم نے انہیں رخصت دی ہے۔ [صحیح ابن حبان/كتاب الحج/حدیث: 3899]

سیدہ عائشہ صدیقہ رضی اللہ عنہا بیان کرتی ہیں کہ میں نے عرض کی: ”یا رسول اللہ صلی اللہ علیہ وسلم ! میرا خیال ہے سیدہ صفیہ رضی اللہ عنہا کی وجہ سے ہمیں رکنا پڑے گا۔“ نبی اکرم صلی اللہ علیہ وسلم نے دریافت فرمایا: ”اسے کیا ہوا ہے؟“ ہم نے عرض کی: انہیں حیض آ گیا ہے۔ نبی اکرم صلی اللہ علیہ وسلم نے فرمایا: ”کیا وہ پہلے طواف نہیں کر چکی ہے؟“ ہم نے عرض کی: جی ہاں، لیکن انہیں حیض آ گیا ہے۔ نبی اکرم صلی اللہ علیہ وسلم نے فرمایا: ”پھر اس کا رکنا ضروری نہیں ہے، وہ روانہ ہو سکتی ہے۔“ [صحیح ابن حبان/كتاب الحج/حدیث: 3900]

سیدہ زینب بنت ام سلمہ رضی اللہ عنہا بیان کرتی ہیں کہ سیدہ ام سلمہ رضی اللہ عنہا نے انہیں یہ بات بتائی: ایک مرتبہ میں نبی اکرم صلی اللہ علیہ وسلم کے ہمراہ لحاف میں لیٹی ہوئی تھی، اسی دوران مجھے حیض آ گیا، میں اٹھ کر آ گئی اور میں نے اپنے حیض کے کپڑے رکھے (اور واپس آئی)، تو نبی اکرم صلی اللہ علیہ وسلم نے مجھ سے دریافت کیا: ”کیا تمہیں حیض آ گیا تھا؟“ میں نے عرض کی: جی ہاں، تو نبی اکرم صلی اللہ علیہ وسلم نے مجھے بلایا اور میں آپ صلی اللہ علیہ وسلم کے ساتھ لحاف میں لیٹ گئی۔ [صحیح ابن حبان/كتاب الحج/حدیث: 3901]