سیدنا عبداللہ بن عمر رضی اللہ عنہما کے بارے میں منقول ہے کہ وہ قربانی کے دن روانہ ہو جاتے، پھر واپس آتے اور ظہر کی نماز منیٰ میں ادا کرتے تھے، اور وہ یہ ذکر کرتے تھے کہ نبی اکرم صلی اللہ علیہ وسلم نے بھی ”ایسا ہی کیا تھا۔“ [صحیح ابن حبان/كتاب الحج/حدیث: 3882]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم قربانی کے دن تشریف لے گئے، پھر آپ واپس تشریف لے آئے اور آپ نے ظہر کی نماز منیٰ میں ادا کی۔ [صحیح ابن حبان/كتاب الحج/حدیث: 3883]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ظہر اور عصر، مغرب اور عشاء کی نمازیں ادا کیں، پھر آپ صلی اللہ علیہ وسلم منی میں تھوڑی دیر کے لیے سو گئے، پھر آپ صلی اللہ علیہ وسلم سوار ہو کر بیت اللہ کی طرف آئے اور اس کا طواف کیا۔ (امام ابن حبان رحمہ اللہ فرماتے ہیں:) سیدنا عبداللہ بن عمر رضی اللہ عنہما کی نقل کردہ روایت میں یہ بات مذکور ہے کہ نبی اکرم صلی اللہ علیہ وسلم قربانی کے دن روانہ ہوئے تھے، پھر آپ صلی اللہ علیہ وسلم واپس تشریف لے آئے تھے اور آپ صلی اللہ علیہ وسلم نے منی میں ظہر کی نماز ادا کی تھی، جبکہ سیدنا انس رضی اللہ عنہ سے منقول روایات میں یہ بات مذکور ہے کہ نبی اکرم صلی اللہ علیہ وسلم نے ظہر، عصر، مغرب اور عشاء کی نمازیں ادا کی تھیں، پھر آپ صلی اللہ علیہ وسلم منی میں تھوڑی دیر کے لیے سو گئے تھے، پھر آپ صلی اللہ علیہ وسلم سوار ہو کر بیت اللہ گئے، پھر آپ صلی اللہ علیہ وسلم نے اس کا طواف کیا۔ سیدنا انس رضی اللہ عنہ نے یہ بات بیان کی ہے کہ نبی اکرم صلی اللہ علیہ وسلم نے طوافِ زیارت رات کے وقت کیا تھا، جبکہ سیدنا عبداللہ بن عمر رضی اللہ عنہما نے یہ بات بیان کی ہے کہ نبی اکرم صلی اللہ علیہ وسلم نے طوافِ زیارت ظہر سے پہلے کیا تھا، تو یہ ایک ہی حج کی بات ہے اور ایک ہی مرتبہ طوافِ زیارت کیا تھا، تو جن حضرات نے ان دونوں روایات کو جمع کیا ہے انہوں نے یہ بات بیان کی ہے کہ نبی اکرم صلی اللہ علیہ وسلم نے جمرہ عقبہ کی رمی کی، قربانی کی، پھر آپ صلی اللہ علیہ وسلم نے طوافِ زیارت کیا اور خوشبو لگائی، پھر آپ صلی اللہ علیہ وسلم روانہ ہوئے، آپ صلی اللہ علیہ وسلم نے بیت اللہ کا طوافِ زیارت کیا، پھر آپ صلی اللہ علیہ وسلم منی تشریف لے آئے، وہاں آپ صلی اللہ علیہ وسلم نے ظہر کی نماز ادا کی، عصر، مغرب اور عشاء کی نمازیں ادا کیں، پھر وہاں کچھ دیر کے لیے سو گئے، پھر آپ صلی اللہ علیہ وسلم سوار ہو کر دوبارہ بیت اللہ کی طرف گئے اور وہاں آپ صلی اللہ علیہ وسلم نے رات کے وقت دوسری مرتبہ طواف کیا، تو اس طرح ان دونوں روایات میں کوئی تضاد اور اختلاف باقی نہیں رہے گا۔ [صحیح ابن حبان/كتاب الحج/حدیث: 3884]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم قربانی کے دن تشریف لے گئے، پھر آپ واپس تشریف لائے اور آپ نے منی میں ظہر کی نماز ادا کی۔ [صحیح ابن حبان/كتاب الحج/حدیث: 3885]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے قربانی کے دن چاشت کے وقت جمرہ کو کنکریاں ماریں، آپ صلی اللہ علیہ وسلم نے باقی دنوں میں زوال کے وقت کنکریاں ماری تھیں۔ [صحیح ابن حبان/كتاب الحج/حدیث: 3886]

سیدنا عبداللہ بن عمر رضی اللہ عنہما کے بارے میں یہ بات منقول ہے کہ وہ پہلے جمرہ کو سات کنکریاں مارتے تھے، ہر کنکری کے ہمراہ تکبیر کہتے تھے، پھر آگے بڑھ جاتے اور قبلہ کی طرف رخ کر کے کھڑے ہو جاتے، وہ طویل قیام کرتے اور دعا مانگتے تھے، دونوں ہاتھوں کو بلند کرتے تھے، پھر ذات عقبہ والے جمرہ کو وادی کے نشیبی حصے سے کنکریاں مارتے تھے، وہ اس کے پاس ٹھہرتے نہیں تھے، پھر واپس آ جاتے تھے اور یہ کہتے تھے: ”میں نے نبی اکرم صلی اللہ علیہ وسلم کو اسی طرح کرتے ہوئے دیکھا ہے۔“ [صحیح ابن حبان/كتاب الحج/حدیث: 3887]

ابوالبداح اپنے والد رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے (اونٹوں کے) چرواہوں کو اس بات کی اجازت دی کہ وہ ”ایک دن کنکریاں ماریں اور ایک دن نہ ماریں۔“ [صحیح ابن حبان/كتاب الحج/حدیث: 3888]

سیدنا عبداللہ بن عمر رضی اللہ عنہما بیان کرتے ہیں کہ سیدنا عباس بن عبدالمطلب رضی اللہ عنہ نے نبی اکرم صلی اللہ علیہ وسلم سے اس بات کی اجازت مانگی کہ وہ منی کی راتیں مکہ میں بسر کریں، اس کی وجہ یہ تھی کہ انہوں نے (حاجیوں کو) پانی پلانا ہوتا ہے، تو نبی اکرم صلی اللہ علیہ وسلم نے انہیں اجازت دے دی۔ [صحیح ابن حبان/كتاب الحج/حدیث: 3889]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا عباس رضی اللہ عنہ کو اس بات کی اجازت دی تھی کہ وہ ”منی کے دنوں کی راتیں مکہ میں بسر کریں“ کیونکہ انہوں نے حاجیوں کو (آب زمزم) پلانا ہوتا تھا۔ [صحیح ابن حبان/كتاب الحج/حدیث: 3890]

سیدنا عبداللہ بن عمر رضی اللہ عنہما بیان کرتے ہیں کہ سیدنا عباس بن عبدالمطلب رضی اللہ عنہ نے نبی اکرم صلی اللہ علیہ وسلم سے اس بات کی اجازت مانگی کہ وہ منیٰ کی راتیں مکہ میں بسر کریں، کیونکہ انہوں نے (حاجیوں کو آب زمزم) پلانا ہوتا ہے، تو نبی اکرم صلی اللہ علیہ وسلم نے ان کے پلانے کی خدمت کی وجہ سے انہیں اس بات کی اجازت دے دی۔ [صحیح ابن حبان/كتاب الحج/حدیث: 3891]