سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کی زوجہ محترمہ سیدہ صفیہ رضی اللہ عنہا کو حیض آ گیا، اس بات کا تذکرہ نبی اکرم صلی اللہ علیہ وسلم سے کیا گیا، تو نبی اکرم صلی اللہ علیہ وسلم نے دریافت کیا: ”کیا اس کی وجہ سے ہمیں رکنا پڑے گا؟“ آپ کو بتایا گیا کہ وہ طوافِ افاضہ کر چکی ہیں، نبی اکرم صلی اللہ علیہ وسلم نے فرمایا: ”پھر کوئی حرج نہیں ہے۔“ [صحیح ابن حبان/كتاب الحج/حدیث: 3902]

سیدہ عائشہ صدیقہ رضی اللہ عنہا بیان کرتی ہیں کہ سیدہ صفیہ بنت حیی رضی اللہ عنہا کو طواف کرنے کے بعد حیض آ گیا، سیدہ عائشہ رضی اللہ عنہا بیان کرتی ہیں کہ میں نے ان کے حیض کا تذکرہ نبی اکرم صلی اللہ علیہ وسلم سے کیا، تو نبی اکرم صلی اللہ علیہ وسلم نے دریافت کیا: ”کیا اس کی وجہ سے ہمیں رکنا پڑے گا؟“ سیدہ عائشہ رضی اللہ عنہا بیان کرتی ہیں کہ میں نے عرض کی: یا رسول اللہ صلی اللہ علیہ وسلم ! وہ طوافِ افاضہ کر چکی ہیں، اس کے بعد انہیں حیض آیا ہے، تو نبی اکرم صلی اللہ علیہ وسلم نے فرمایا: ”پھر وہ روانہ ہو سکتی ہے۔“ [صحیح ابن حبان/كتاب الحج/حدیث: 3903]

سیدہ عائشہ صدیقہ رضی اللہ عنہا بیان کرتی ہیں، انہوں نے عرض کی: یا رسول اللہ صلی اللہ علیہ وسلم ! میرا خیال ہے سیدہ صفیہ رضی اللہ عنہا کی وجہ سے ہمیں رکنا پڑے گا، نبی اکرم صلی اللہ علیہ وسلم نے دریافت کیا: ”اسے کیا ہوا ہے؟“ سیدہ عائشہ رضی اللہ عنہا نے بتایا: انہیں حیض آ گیا ہے، نبی اکرم صلی اللہ علیہ وسلم نے فرمایا: ”کیا وہ طوافِ افاضہ کر چکی ہے؟“ میں نے عرض کی: جی ہاں، لیکن انہیں حیض آ گیا ہے، نبی اکرم صلی اللہ علیہ وسلم نے فرمایا: ”پھر اس کا رکنا ضروری نہیں ہے، وہ روانہ ہو سکتی ہے۔“ [صحیح ابن حبان/كتاب الحج/حدیث: 3904]

سیدہ عائشہ صدیقہ رضی اللہ عنہا بیان کرتی ہیں کہ سیدہ صفیہ بنت حیی رضی اللہ عنہا کو طوافِ افاضہ کرنے کے بعد حیض آ گیا، سیدہ عائشہ رضی اللہ عنہا بیان کرتی ہیں: میں نے ان کے حیض کا تذکرہ نبی اکرم صلی اللہ علیہ وسلم سے کیا، تو نبی اکرم صلی اللہ علیہ وسلم نے دریافت کیا: ”کیا اس کی وجہ سے ہمیں رکنا پڑے گا؟“ میں نے عرض کی: یا رسول اللہ صلی اللہ علیہ وسلم ! وہ طوافِ افاضہ کر چکی ہیں، طوافِ افاضہ کرنے کے بعد انہیں حیض آیا ہے، نبی اکرم صلی اللہ علیہ وسلم نے فرمایا: ”پھر وہ روانہ ہو سکتی ہے۔“ [صحیح ابن حبان/كتاب الحج/حدیث: 3905]

عبدالرحمن بن حمید رحمہ اللہ بیان کرتے ہیں: میں نے عمر بن عبدالعزیز رحمہ اللہ کو سائب بن یزید رضی اللہ عنہ سے یہ سوال کرتے ہوئے سنا: مکہ میں رہائش اختیار کرنے کے بارے میں آپ نے کیا سنا ہے؟ تو انہوں نے بتایا: علاء بن حضرمی رضی اللہ عنہ نے مجھے یہ حدیث سنائی ہے کہ نبی اکرم صلی اللہ علیہ وسلم نے ارشاد فرمایا ہے: ”باہر سے آنے والا شخص طوافِ صدر کرنے کے بعد تین دن تک (مکہ میں ٹھہر سکتا ہے)۔“ [صحیح ابن حبان/كتاب الحج/حدیث: 3906]

سیدنا علاء بن حضرمی رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”باہر سے آنے والا شخص اپنے حج کے مناسک ادا کرنے کے بعد تین دن تک (مکہ میں) ٹھہر سکتا ہے۔“ [صحیح ابن حبان/كتاب الحج/حدیث: 3907]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے «ذِي طُوًى» ”ذی طوی“ میں رات بسر کی، پھر آپ صلی اللہ علیہ وسلم نے صبح کی نماز ادا کی، اس کے بعد مکہ میں داخل ہوئے۔ سیدنا عبداللہ بن عمر رضی اللہ عنہما بھی ایسا ہی کیا کرتے تھے۔ نبی اکرم صلی اللہ علیہ وسلم مکہ مکرمہ میں بطحا میں موجود بالائی گھاٹی «كَدَاء» ”کداء“ کی طرف سے داخل ہوئے تھے اور (واپس جاتے ہوئے) آپ صلی اللہ علیہ وسلم زیریں گھاٹی کی طرف سے تشریف لے گئے تھے۔ [صحیح ابن حبان/كتاب الحج/حدیث: 3908]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب مکہ سے باہر تشریف لے گئے تھے، تو آپ شجرہ کے راستے سے تشریف لے گئے تھے اور جب آپ واپس تشریف لائے تھے، تو آپ معرس کے راستے سے تشریف لائے تھے۔ [صحیح ابن حبان/كتاب الحج/حدیث: 3909]

صبی بن معبد رحمہ اللہ بیان کرتے ہیں کہ انہوں نے حج اور عمرے کا احرام ایک ساتھ باندھ لیا، انہوں نے (بعد میں) اس بات کا تذکرہ سیدنا عمر رضی اللہ عنہ سے کیا، تو سیدنا عمر رضی اللہ عنہ نے فرمایا: تمہاری رہنمائی تمہارے نبی صلی اللہ علیہ وسلم کی سنت کی طرف کی گئی ہے۔ [صحیح ابن حبان/كتاب الحج/حدیث: 3910]

ابووائل شقیق بن سلمہ بیان کرتے ہیں: میں اکثر صبی بن معبد کی خدمت میں حاضر ہوا کرتا تھا، میں اور مسروق ان سے ان کے واقعے کے بارے میں دریافت کرتے تھے، انہوں نے بتایا: میں ایک عیسائی شخص تھا، میں نے اسلام قبول کیا، پھر میں نے حج اور عمرے کا احرام باندھ لیا، سلیمان بن ربیعہ اور زید بن صوحان رضی اللہ عنہما نے مجھے (حج اور عمرے کا ایک ساتھ) تلبیہ پڑھتے ہوئے سنا، میں (قادسیہ) میں ان کے سامنے تلبیہ پڑھ رہا تھا، تو ان دونوں نے کہا: یہ شخص اپنے گھر کے اونٹ سے زیادہ گمراہ ہے، تو ان دونوں کی اس بات سے گویا میرے اوپر پہاڑ جتنا وزن آ گیا، یہاں تک کہ جب میں مکہ آیا، تو سیدنا عمر بن خطاب رضی اللہ عنہ کی خدمت میں حاضر ہوا، وہ اس وقت منیٰ میں موجود تھے، میں نے اس بات کا تذکرہ ان کے سامنے کیا، تو انہوں نے ان دونوں کو ملامت کی اور میری طرف رخ کیا اور فرمایا: ”تمہاری تمہارے نبی صلی اللہ علیہ وسلم کی سنت کی طرف رہنمائی کی گئی ہے۔“ یہ بات انہوں نے دو مرتبہ ارشاد فرمائی۔ [صحیح ابن حبان/كتاب الحج/حدیث: 3911]