سیدنا عبداللہ بن عباس رضی اللہ عنہما، سیدنا فضل بن عباس رضی اللہ عنہما کا یہ بیان نقل کرتے ہیں جو نبی اکرم صلی اللہ علیہ وسلم کے پیچھے سواری پر سوار تھے، وہ بیان کرتے ہیں: عرفہ کی شام اور مزدلفہ کی صبح نبی اکرم صلی اللہ علیہ وسلم نے روانگی کے وقت لوگوں سے فرمایا: ”تم لوگ آرام سے چلو۔“ نبی اکرم صلی اللہ علیہ وسلم خود بھی اپنی اونٹنی کو آہستہ رفتار سے چلا رہے تھے، وادی محسر روح میں آپ صلی اللہ علیہ وسلم نے اپنی اونٹنی کی رفتار کو کچھ تیز کیا، یہ وادی منی کا حصہ ہے، نبی اکرم صلی اللہ علیہ وسلم نے ارشاد فرمایا: ”تم لوگوں پر اتنی چھوٹی کنکریاں اختیار کرنا لازم ہے جو چٹکی میں آ جاتی ہوں، انہیں جمرات کو مارا جائے گا۔“ سیدنا فضل بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم جمرہ کی رمی کرنے تک مسلسل تلبیہ پڑھتے رہے۔ [صحیح ابن حبان/كتاب الحج/حدیث: 3872]

اعمش رحمہ اللہ بیان کرتے ہیں: میں نے حجاج بن یوسف کو منبر پر یہ بات کہتے ہوئے سنا: تم قرآن کو اسی طرح پڑھو جس طرح سیدنا جبرائیل علیہ السلام نے اسے پڑھا تھا (یعنی یہ کہو) وہ سورۃ جس میں گائے کا ذکر ہے، وہ سورۃ جس میں آل عمران کا ذکر ہے، وہ سورۃ جس میں خواتین کا ذکر ہے۔ اعمش رحمہ اللہ کہتے ہیں: پھر میری ملاقات ابراہیم نخعی رحمہ اللہ سے ہوئی، میں نے انہیں اس بارے میں بتایا، تو انہوں نے حجاج کو برا کہا؛ پھر ابراہیم نخعی رحمہ اللہ نے بتایا: عبدالرحمن بن یزید رحمہ اللہ نے مجھے یہ بات بتائی ہے کہ وہ سیدنا عبداللہ بن مسعود رضی اللہ عنہ کے ساتھ تھے اس وقت جب انہوں نے جمرہ عقبہ کو کنکریاں ماری تھیں۔ وہ وادی کے نشیبی حصے میں کھڑے ہوئے تھے۔ انہوں نے وادی کے نشیبی حصے سے سات کنکریاں ماریں، ہر کنکری کے ہمراہ تکبیر کہی۔ میں نے کہا: اے ابوعبدالرحمن! لوگ تو وادی کے اوپر والے حصے سے انہیں کنکریاں مارتے ہیں۔ سیدنا عبداللہ بن مسعود رضی اللہ عنہ نے فرمایا: اس ذات کی قسم! جس کے علاوہ اور کوئی معبود نہیں ہے، یہ اس ہستی صلی اللہ علیہ وسلم کے کھڑے ہونے کی جگہ ہے جن پر ﴿سورة البقرة﴾ نازل ہوئی تھی۔ [صحیح ابن حبان/كتاب الحج/حدیث: 3873]

اسماعیل بیان کرتے ہیں: میں نے سیدنا ابوکاہل رضی اللہ عنہ کو یہ بات بیان کرتے ہوئے سنا ہے، وہ کہتے ہیں: میں نے نبی اکرم صلی اللہ علیہ وسلم کو دیکھا، آپ عید کے دن لوگوں کو خطبہ دے رہے تھے، آپ ایک اونٹنی پر سوار تھے جس کے کان (کا کچھ حصہ) کٹا ہوا تھا اور ایک سیاہ فام شخص نے اس اونٹنی کی لگام کو پکڑا ہوا تھا۔ [صحیح ابن حبان/كتاب الحج/حدیث: 3874]

سیدنا ہرماس بن زیاد باہلی رضی اللہ عنہما بیان کرتے ہیں: میں نے اور میرے والد نے نبی اکرم صلی اللہ علیہ وسلم کی زیارت کی ہے، میں اس وقت اونٹ پر اپنے والد کے پیچھے سوار تھا، میں کم سن بچہ تھا، میں نے نبی اکرم صلی اللہ علیہ وسلم کو منیٰ میں اپنی اونٹنی «عَضْبَاءَ» پر (سوار ہو کر) لوگوں کو خطبہ دیتے ہوئے دیکھا ہے۔ [صحیح ابن حبان/كتاب الحج/حدیث: 3875]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم سے ایسے شخص کے بارے میں دریافت کیا گیا جو ذبح کرنے سے پہلے سرمنڈوا لیتا ہے یا رمی کرنے سے پہلے جانور ذبح کر لیتا ہے، تو نبی اکرم صلی اللہ علیہ وسلم یہی فرماتے رہے: ”کوئی گناہ نہیں ہے۔“ [صحیح ابن حبان/كتاب الحج/حدیث: 3876]

سیدنا عبداللہ بن عمرو رضی اللہ عنہما بیان کرتے ہیں کہ حجۃ الوداع کے موقع پر نبی اکرم صلی اللہ علیہ وسلم منی میں لوگوں کے لیے وقوف کیے ہوئے تھے، لوگ آپ سے مسائل دریافت کر رہے تھے۔ ایک شخص آپ کی خدمت میں حاضر ہوا، اس نے عرض کی: یا رسول اللہ صلی اللہ علیہ وسلم ! مجھے پتہ نہیں تھا میں نے رمی کرنے سے پہلے ہی قربانی کر لی، تو نبی اکرم صلی اللہ علیہ وسلم نے فرمایا: ”تم اب رمی کر لو کوئی حرج نہیں ہے“ (راوی کہتے ہیں:) اس دن نبی اکرم صلی اللہ علیہ وسلم سے کسی بھی چیز کے پہلے یا بعد میں کیے جانے کے بارے میں پوچھا جاتا، تو آپ یہی فرماتے: ”تم اب کر لو کوئی حرج نہیں ہے“۔ [صحیح ابن حبان/كتاب الحج/حدیث: 3877]

سیدنا جابر بن عبداللہ رضی اللہ عنہما بیان کرتے ہیں کہ ایک شخص نے عرض کی: یا رسول اللہ صلی اللہ علیہ وسلم ! میں نے رمی کرنے سے پہلے ذبح کر لیا ہے، نبی اکرم صلی اللہ علیہ وسلم نے فرمایا: ”تم اب رمی کر لو، کوئی حرج نہیں ہے“۔ دوسرے صاحب نے عرض کی: یا رسول اللہ صلی اللہ علیہ وسلم ! میں نے ذبح کرنے سے پہلے سر منڈوا لیا ہے، آپ صلی اللہ علیہ وسلم نے فرمایا: ”تم اب ذبح کر لو، کوئی حرج نہیں ہے“۔ ایک اور شخص نے دریافت کیا: یا رسول اللہ صلی اللہ علیہ وسلم ! میں نے رمی کرنے سے پہلے طواف کر لیا ہے، آپ صلی اللہ علیہ وسلم نے فرمایا: ”تم اب رمی کر لو، کوئی حرج نہیں ہے“۔ [صحیح ابن حبان/كتاب الحج/حدیث: 3878]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے جمرہ کی رمی کر لی اور اپنی قربانی کو قربان کر لیا، تو آپ نے اپنے سر کا دایاں حصہ حجام کی طرف بڑھایا، اس نے اسے مونڈ دیا، پھر آپ نے (اپنے بال) سیدنا ابوطلحہ انصاری رضی اللہ عنہ کو دیے، پھر آپ نے (دوسرا حصہ حجام کی طرف) بڑھایا اور فرمایا: ”اسے مونڈ دو“ اس نے اسے مونڈ دیا، تو نبی اکرم صلی اللہ علیہ وسلم نے (اس حصے کے بال بھی) سیدنا ابوطلحہ رضی اللہ عنہ کو عطا کر دیے اور فرمایا: ”انہیں لوگوں کے درمیان تقسیم کر دو۔“ [صحیح ابن حبان/كتاب الحج/حدیث: 3879]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے دعا مانگی: «اللَّهُمَّ ارْحَمِ الْمُحَلِّقِينَ» ”اے اللہ! سر منڈوانے والوں پر رحم کر،“ لوگوں نے عرض کی: یا رسول اللہ صلی اللہ علیہ وسلم ! بال چھوٹے کروانے والوں کے لیے (دعائے رحمت کیجیے)، نبی اکرم صلی اللہ علیہ وسلم نے (پھر) دعا کی: «اللَّهُمَّ ارْحَمِ الْمُحَلِّقِينَ» ”اے اللہ! سر منڈوانے والوں پر رحم کر،“ لوگوں نے عرض کی: یا رسول اللہ صلی اللہ علیہ وسلم ! بال چھوٹے کروانے والوں (کے لیے بھی دعا کیجیے)، نبی اکرم صلی اللہ علیہ وسلم نے فرمایا: «وَالْمُقَصِّرِينَ» ”اور بال چھوٹے کروانے والوں (پر بھی رحم کر)۔“ [صحیح ابن حبان/كتاب الحج/حدیث: 3880]

سالم بن عبداللہ بیان کرتے ہیں کہ سیدہ عائشہ رضی اللہ عنہا نے یہ بات بیان کی ہے: میں نے منی میں نبی اکرم صلی اللہ علیہ وسلم کو خوشبو لگائی تھی اس سے پہلے کہ آپ بیت اللہ کی زیارت کرتے (یعنی حج سے فارغ ہونے کے بعد ایسا کرتے)۔ [صحیح ابن حبان/كتاب الحج/حدیث: 3881]