سیدہ عائشہ صدیقہ رضی اللہ عنہا بیان کرتی ہیں کہ جب لوگ نبی اکرم صلی اللہ علیہ وسلم کو غسل دینے کے لیے اکٹھے ہوئے تو ان کا اختلاف ہو گیا، انہوں نے کہا: اللہ کی قسم! ہمیں سمجھ نہیں آ رہی کہ کیا ہم نبی اکرم صلی اللہ علیہ وسلم کے کپڑے بھی اسی طرح اتاریں جس طرح اپنے فوت شدگان کے کپڑے اتارتے ہیں یا پھر ہم آپ صلی اللہ علیہ وسلم کے جسم پر کپڑے رہنے دیں اور اسی حالت میں آپ کو غسل دے دیں۔ سیدہ عائشہ رضی اللہ عنہا بیان کرتی ہیں کہ پھر اللہ تعالیٰ نے ان لوگوں پر نیند طاری کر دی یہاں تک کہ ان میں سے موجود ہر شخص کی ٹھوڑی اس کے سینے سے جا لگی، پھر گھر کے کسی گوشے سے کسی منادی نے آواز دی، لوگوں کو پتا نہیں چل سکا کہ وہ کون ہے، اس نے کہا: تم لوگ نبی اکرم صلی اللہ علیہ وسلم کو غسل دو یہاں تک کہ آپ صلی اللہ علیہ وسلم کی قمیص آپ کے جسم پر موجود ہو۔ راوی بیان کرتے ہیں کہ تو ان سب لوگوں کا اس بات پر اتفاق ہو گیا، انہوں نے نبی اکرم صلی اللہ علیہ وسلم کو ایسی حالت میں غسل دیا کہ نبی اکرم صلی اللہ علیہ وسلم کی قمیص آپ کے جسم پر موجود تھی، وہ نبی اکرم صلی اللہ علیہ وسلم پر پانی انڈیلتے رہے اور قمیص کے نیچے سے آپ صلی اللہ علیہ وسلم کے جسم کو ملتے رہے۔ سیدنا علی بن ابو طالب رضی اللہ عنہ نے نبی اکرم صلی اللہ علیہ وسلم کو اپنی گود میں بٹھایا ہوا تھا اور انہوں نے اپنے سینے کے ساتھ نبی اکرم صلی اللہ علیہ وسلم کو ٹیک دی ہوئی تھی۔ سیدہ عائشہ رضی اللہ عنہا بیان کرتی ہیں کہ مجھے نبی اکرم صلی اللہ علیہ وسلم کی طرف سے کوئی ایسی چیز دکھائی نہیں دی جو میت کی طرف سے دکھائی دیتی ہے (یعنی آپ کے جسم سے کوئی بول یا براز خارج نہیں ہوا)۔ [صحیح ابن حبان/كتاب التاريخ/حدیث: 6628]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کو ایک یمنی حلے میں لپیٹ دیا گیا جو سیدنا عبداللہ بن ابوبکر رضی اللہ عنہما کا تھا، پھر اسے آپ صلی اللہ علیہ وسلم کے جسمِ مبارک سے الگ کر دیا گیا اور نبی اکرم صلی اللہ علیہ وسلم کو تین یمانی سحولی کپڑوں میں کفن دیا گیا جس میں عمامہ اور قمیص شامل نہیں تھے، عبداللہ رضی اللہ عنہ نے وہ حلہ اتار لیا تھا۔ انہوں نے کہا تھا: مجھے اس حلے میں کفن دیا جائے، پھر بعد میں انہوں نے کہا: جس کپڑے میں نبی اکرم صلی اللہ علیہ وسلم کو کفن نہیں دیا گیا، اس میں مجھے کیسے کفن دیا جا سکتا ہے؟ تو انہوں نے اس کپڑے کو صدقہ کر دیا تھا۔ [صحیح ابن حبان/كتاب التاريخ/حدیث: 6629]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کو ایک نجرانی کپڑے اور دو چادروں میں کفن دیا گیا۔ [صحیح ابن حبان/كتاب التاريخ/حدیث: 6630]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کی قبر مبارک میں ایک سرخ چادر رکھی گئی تھی۔ [صحیح ابن حبان/كتاب التاريخ/حدیث: 6631]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم کو تین سحولی کپڑوں میں کفن دیا گیا، آپ کے لیے لحد بنائی گئی اور اس پر کچی اینٹیں نصب کی گئیں۔ [صحیح ابن حبان/كتاب التاريخ/حدیث: 6632]

سیدنا عبداللہ بن عباس رضی اللہ عنہما بیان کرتے ہیں کہ سیدنا عباس، سیدنا علی اور سیدنا فضل رضی اللہ عنہم نبی اکرم صلی اللہ علیہ وسلم کی قبر میں داخل ہوئے، انصار سے تعلق رکھنے والے ایک شخص نے آپ کی لحد تیار کی، یہ وہی شخص تھا جس نے غزوہ بدر کے دن شہداء کی لحدیں تیار کی تھیں۔ [صحیح ابن حبان/كتاب التاريخ/حدیث: 6633]

سیدنا انس رضی اللہ عنہ بیان کرتے ہیں: جس دن نبی اکرم صلی اللہ علیہ وسلم مدینہ منورہ تشریف لائے تھے تو اس دن ہر چیز روشن ہو گئی تھی، جب وہ دن آیا جس میں نبی اکرم صلی اللہ علیہ وسلم کا وصال ہوا، اس دن ہر چیز تاریک ہو گئی تھی، ابھی ہم نے اپنے ہاتھوں کو نبی اکرم صلی اللہ علیہ وسلم سے جدا نہیں کیا تھا اور آپ کو دفن کر رہے تھے کہ اسی دوران ہمیں اپنے قلوب کی کیفیت تبدیل ہوتی ہوئی محسوس ہوئی۔ [صحیح ابن حبان/كتاب التاريخ/حدیث: 6634]

سیدنا جابر بن عبداللہ رضی اللہ عنہما بیان کرتے ہیں: نبی اکرم صلی اللہ علیہ وسلم کے لیے لحد بنائی گئی تھی اور اس پر کچی اینٹیں نصب کی گئی تھیں، نبی اکرم صلی اللہ علیہ وسلم کی قبر مبارک کو زمین سے تقریباً ایک بالشت اونچا رکھا گیا تھا۔ [صحیح ابن حبان/كتاب التاريخ/حدیث: 6635]

سیدنا حذیفہ رضی اللہ عنہ بیان کرتے ہیں: نبی اکرم صلی اللہ علیہ وسلم ہمارے درمیان کھڑے ہوئے، آپ صلی اللہ علیہ وسلم نے اپنے اس قیام کے دوران قیامت تک ہونے والی کسی بھی چیز کو نہیں چھوڑا، ہر چیز کے بارے میں گفتگو کی؛ جس نے اسے یاد رکھنا تھا اس نے اسے یاد رکھا اور جس نے بھولنا تھا وہ بھول گیا، میرے ساتھی بھی یہ بات جانتے ہیں۔ ان میں سے کوئی شخص کوئی بات بھول چکا ہو گا لیکن جب میں اسے دیکھوں گا تو مجھے یاد آ جائے گا، جس طرح کوئی شخص کسی غیر موجود شخص کے چہرے کو یاد کرتا ہے، لیکن جب وہ اسے دیکھتا ہے تو اسے پہچان لیتا ہے۔ [صحیح ابن حبان/كتاب التاريخ/حدیث: 6636]

سیدنا حذیفہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کھڑے ہوئے اور آپ صلی اللہ علیہ وسلم نے اس وقت سے لے کر قیامت تک جو کچھ ہونا تھا، اس کے بارے میں ہمیں بتا دیا، (سیدنا حذیفہ رضی اللہ عنہ کہتے ہیں:) میں تم لوگوں سے یہ نہیں کہہ رہا کہ میں صرف تنہا تھا بلکہ میرے ساتھ دوسرے لوگ بھی تھے، ان میں سے جس نے اسے یاد رکھنا تھا اس نے یاد رکھا اور جس نے بھول جانا تھا اس نے بھلا دیا۔ [صحیح ابن حبان/كتاب التاريخ/حدیث: 6637]