سیدنا مالک بن اوس رضی اللہ عنہ بیان کرتے ہیں کہ سیدنا عمر بن خطاب رضی اللہ عنہ نے مجھے پیغام بھیجا کہ تمہاری قوم کے کچھ گھرانوں کے لوگ مدینہ منورہ آئے ہوئے ہیں، ہم نے ان کے لیے کچھ عطیات دینے کا حکم دیا ہے، تم وہ ان کے درمیان تقسیم کر دو۔ میں نے عرض کی: اے امیر المؤمنین! آپ میری بجائے کسی اور کو یہ ہدایت کر دیجیے۔ انہوں نے فرمایا: اے آدمی! تم اسے اپنے قبضے میں لو۔ راوی کہتے ہیں: میں وہاں بیٹھا ہی ہوا تھا کہ اسی دوران سیدنا عمر رضی اللہ عنہ کا غلام یرفا آیا، اس نے کہا: سیدنا عثمان، سیدنا عبدالرحمن بن عوف، سیدنا سعد بن ابی وقاص اور سیدنا زبیر بن عوام رضی اللہ عنہم تشریف لائے ہیں، (راوی بیان کرتے ہیں) مجھے یاد نہیں ہے کہ اس نے سیدنا طلحہ رضی اللہ عنہ کا ذکر کیا تھا یا نہیں کیا تھا، وہ لوگ اندر آنے کی اجازت مانگ رہے ہیں۔ سیدنا عمر رضی اللہ عنہ نے کہا: انہیں اندر آنے کی اجازت دے دو۔ راوی کہتے ہیں: تھوڑی دیر بعد وہ غلام پھر آیا اور کہا: سیدنا عباس اور سیدنا علی رضی اللہ عنہما اندر آنے کی اجازت مانگ رہے ہیں۔ سیدنا عمر رضی اللہ عنہ نے فرمایا: ان دونوں کو اندر آنے کی اجازت دے دو۔ جب سیدنا عباس رضی اللہ عنہ اندر آئے تو انہوں نے کہا: اے امیر المؤمنین! آپ میرے اور ان صاحب کے درمیان فیصلہ کر دیجیے۔ ان دونوں صاحبان کا اس وقت اس چیز کے بارے میں اختلاف ہو گیا تھا جو اللہ تعالیٰ نے بنو نضیر کے اموال میں سے اپنے رسول کو مال فے کے طور پر عطا کیا تھا۔ حاضرین نے کہا: اے امیر المؤمنین! آپ ان دونوں صاحبان کے درمیان فیصلہ کر دیجیے اور ان میں سے ہر ایک کو دوسرے کی طرف سے مطمئن کر دیجیے کیونکہ ان کا اختلاف طویل ہو چکا ہے، تو سیدنا عمر رضی اللہ عنہ نے کہا: میں آپ دونوں کو اس اللہ کا واسطہ دے کر دریافت کرتا ہوں جس کے حکم کے تحت آسمان اور زمین قائم ہیں، کیا آپ لوگ یہ بات جانتے ہیں کہ نبی اکرم صلی اللہ علیہ وسلم نے یہ بات ارشاد فرمائی ہے: ”ہماری وراثت نہیں ہوتی، ہم جو چھوڑ کے جائیں وہ صدقہ ہوتا ہے۔“؟ انہوں نے کہا: نبی اکرم صلی اللہ علیہ وسلم نے یہ بات ارشاد فرمائی ہے۔ پھر سیدنا عمر رضی اللہ عنہ نے ان دونوں سے یہی کلمہ کہا تو ان دونوں نے یہی جواب دیا: جی ہاں۔ تو سیدنا عمر رضی اللہ عنہ نے کہا: میں آپ لوگوں کو اس مال فے کے بارے میں بتاتا ہوں جو اللہ تعالیٰ نے بطور خاص اپنے نبی کو عطا کیا تھا، وہ اس نے اپنے نبی کے سوا کسی کو عطا نہیں کیا۔ اللہ تعالیٰ نے ارشاد فرمایا: ﴿وَمَا أَفَاءَ اللَّهُ عَلَى رَسُولِهِ مِنْهُمْ فَمَا أَوْجَفْتُمْ عَلَيْهِ مِنْ خَيْلٍ وَلَا رِكَابٍ﴾ [سورة الحشر: 6] ”اور وہ چیز اللہ تعالیٰ نے اپنے رسول کو مال فے کے طور پر عطا کی ہے، اس کے بارے میں تم نے اپنے گھوڑے اور سواریاں نہیں دوڑائی ہیں۔“ تو یہ چیز نبی اکرم صلی اللہ علیہ وسلم کے لیے مخصوص تھی۔ اللہ کی قسم! نبی اکرم صلی اللہ علیہ وسلم نے تم کو چھوڑ کر اسے اپنے لیے نہیں رکھا اور نہ ہی اس کے بارے میں آپ لوگوں کے ساتھ امتیازی سلوک کیا۔ نبی اکرم صلی اللہ علیہ وسلم نے اس چیز کو آپ کے درمیان تقسیم کیا، اسے آپ کے درمیان پھیلایا یہاں تک کہ اس مال میں سے یہ تھوڑا سا حصہ باقی رہ گیا۔ نبی اکرم صلی اللہ علیہ وسلم اس میں سے اپنے گھر والوں کے لیے سال بھر کی خوراک کا انتظام کرتے تھے۔ بعض اوقات معمر نامی راوی نے یہاں یہ لفظ نقل کیے ہیں: نبی اکرم صلی اللہ علیہ وسلم اس میں سے اپنے گھر والوں کی سال بھر کی خوراک کو روک کر رکھتے تھے اور جو مال باقی بچ جاتا تھا اسے اللہ کی راہ میں خرچ کر دیتے تھے، جب نبی اکرم صلی اللہ علیہ وسلم کا وصال ہوا تو سیدنا ابوبکر رضی اللہ عنہ نے کہا: نبی اکرم صلی اللہ علیہ وسلم کے بعد میں نبی اکرم صلی اللہ علیہ وسلم کی پیروی کرنے کا سب سے زیادہ حق دار ہوں، میں اس بارے میں وہی کروں گا جو نبی اکرم صلی اللہ علیہ وسلم کرتے رہے۔ پھر سیدنا عمر رضی اللہ عنہ، سیدنا علی اور سیدنا عباس رضی اللہ عنہما کی طرف متوجہ ہوئے اور بولے: آپ دونوں صاحبان یہ گمان کرتے ہیں کہ سیدنا ابوبکر رضی اللہ عنہ اس بارے میں ظلم کرنے والے اور گناہ کرنے والے تھے، حالانکہ اللہ جانتا ہے کہ وہ سچے تھے، نیکی کرنے والے تھے، حق کے پیروکار تھے۔ پھر سیدنا ابوبکر رضی اللہ عنہ کے بعد مجھے اس کا نگران بنایا گیا، یہ میری حکومت کے دو سال کے عرصے کی بات ہے، میں نے بھی اس کے بارے میں وہی کچھ کیا جو نبی اکرم صلی اللہ علیہ وسلم اور سیدنا ابوبکر رضی اللہ عنہ اس کے بارے میں کرتے رہے۔ آپ دونوں صاحبان کا یہ گمان تھا کہ میں اس کے بارے میں ظلم کرنے والا اور گناہ کرنے والا ہوں، حالانکہ اللہ تعالیٰ یہ بات جانتا ہے کہ میں اس کے بارے میں سچا تھا، نیکوکار تھا، حق کی پیروی کرنے والا تھا، پھر آپ دونوں صاحبان میرے پاس آئے۔ یہ صاحب یعنی سیدنا عباس رضی اللہ عنہ تشریف لائے، یہ اپنے بھتیجے کی وراثت کے طلب گار تھے اور یہ صاحب یعنی سیدنا علی رضی اللہ عنہ تشریف لائے اور یہ اپنی بیوی کی وراثت کا مجھ سے مطالبہ کر رہے تھے، تو میں نے آپ دونوں سے کہا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”ہم لوگوں کی وراثت نہیں ہوتی، ہم جو چھوڑ کر جائیں وہ صدقہ ہوتا ہے۔“ (سیدنا عمر رضی اللہ عنہ نے فرمایا:) اس کے بعد مجھے یہ مناسب لگا کہ میں اسے آپ دونوں کے سپرد کر دوں، میں نے آپ دونوں سے اللہ کے نام کا عہد اور پختہ وعدہ لیا کہ آپ اس کے بارے میں وہی عمل کرتے رہیں گے جو اس میں نبی اکرم صلی اللہ علیہ وسلم نے کیا، سیدنا ابوبکر رضی اللہ عنہ نے کیا اور خلیفہ بننے کے بعد میں نے کیا، تو آپ دونوں صاحبان نے یہ کہا کہ آپ اس شرط پر یہ ہمارے سپرد کر دیں۔ اب آپ اس کے بارے میں دوسرے فیصلے کے طلب گار ہیں؟ اس ذات کی قسم! جس کے حکم کے تحت آسمان اور زمین قائم ہیں، میں آپ دونوں کے درمیان اس کے بارے میں اس کے علاوہ اور کوئی فیصلہ نہیں دوں گا، اگر آپ دونوں اس کی دیکھ بھال نہیں کر سکتے تو آپ یہ میرے سپرد کر دیں۔ راوی کہتے ہیں: اس کے بعد سیدنا علی رضی اللہ عنہ کے پاس وہ زمینیں آ گئیں، پھر وہ سیدنا علی رضی اللہ عنہ کے ہاتھ میں رہیں، پھر سیدنا حسن بن علی رضی اللہ عنہ کے ہاتھ میں رہیں، پھر سیدنا حسین بن علی رضی اللہ عنہما کے ہاتھ میں رہیں، پھر امام زین العابدین رضی اللہ عنہ کے ہاتھ میں رہیں، پھر سیدنا حسن بن حسن رضی اللہ عنہ کے ہاتھ میں رہیں، پھر سیدنا زید بن حسن کے پاس رہیں۔ معمر نامی راوی نے یہ الفاظ نقل کیے ہیں کہ پھر سیدنا عبداللہ بن حسن رضی اللہ عنہ کے ہاتھ میں رہیں۔ [صحیح ابن حبان/كتاب التاريخ/حدیث: 6608]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میرے ورثاء میرے بعد دینار تقسیم نہیں کریں گے، اپنے گھر والوں کے خرچ اور اپنے اہل کاروں کے معاوضے کے بعد جو کچھ میں چھوڑ کر جاؤں وہ صدقہ شمار ہوگا۔“ [صحیح ابن حبان/كتاب التاريخ/حدیث: 6609]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میرے ورثاء دینار تقسیم نہیں کریں گے، اپنی بیویوں کے خرچ اور اپنے اہل کاروں کے معاوضے کے بعد جو کچھ میں چھوڑ کر جاؤں وہ صدقہ شمار ہو گا۔“ [صحیح ابن حبان/كتاب التاريخ/حدیث: 6610]

سیدہ عائشہ صدیقہ رضی اللہ عنہا بیان کرتی ہیں کہ جب نبی اکرم صلی اللہ علیہ وسلم کا وصال ہوا تو آپ کی ازواج نے یہ ارادہ کیا کہ سیدنا عثمان غنی رضی اللہ عنہ کو سیدنا ابوبکر صدیق رضی اللہ عنہ کے پاس بھیجیں تاکہ نبی اکرم صلی اللہ علیہ وسلم کی طرف سے ملنے والی اپنی وراثت کا مطالبہ کریں، تو سیدہ عائشہ رضی اللہ عنہا نے ان لوگوں سے کہا: کیا نبی اکرم صلی اللہ علیہ وسلم نے یہ بات ارشاد نہیں فرمائی: ”ہم (انبیاء کرام) کی وراثت نہیں ہوتی، ہم جو چھوڑ کر جائیں وہ صدقہ ہوتا ہے۔“ [صحیح ابن حبان/كتاب التاريخ/حدیث: 6611]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ کی قسم! میرے ورثاء دینار تقسیم نہیں کریں گے۔ اپنی بیویوں کے خرچ اور اپنے اہل کاروں کے معاوضے کے بعد جو کچھ میں چھوڑوں گا وہ صدقہ شمار ہو گا۔“ [صحیح ابن حبان/كتاب التاريخ/حدیث: 6612]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کے وصال کا وقت قریب آیا تو سیدہ فاطمہ رضی اللہ عنہا نے کہا: ہائے کتنی تکلیف ہو رہی ہے، تو نبی اکرم صلی اللہ علیہ وسلم نے فرمایا: ”آج کے بعد تمہارے باپ کو کبھی کوئی تکلیف نہیں ہو گی۔“ [صحیح ابن حبان/كتاب التاريخ/حدیث: 6613]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم بیمار ہوئے تو آپ کی ازواج نے عرض کیا: آپ دیکھ لیں آپ جہاں رہنا چاہتے ہیں (وہاں منتقل ہو جائیں) ہم آپ کی خدمت میں حاضر ہو جایا کریں گی، تو نبی اکرم صلی اللہ علیہ وسلم نے ارشاد فرمایا: ”تو کیا تم سب لوگ اس بات پر متفق ہو؟“ انہوں نے عرض کیا: جی ہاں، تو نبی اکرم صلی اللہ علیہ وسلم سیدہ عائشہ رضی اللہ عنہا کے گھر منتقل ہو گئے اور وہیں آپ کا انتقال ہوا۔ [صحیح ابن حبان/كتاب التاريخ/حدیث: 6614]

سیدہ عائشہ رضی اللہ عنہا بیان کرتی ہیں کہ سیدنا ابوبکر رضی اللہ عنہ نے مجھ سے دریافت کیا: نبی اکرم صلی اللہ علیہ وسلم کا وصال کس دن ہوا تھا؟ میں نے جواب دیا: پیر کے دن، تو سیدنا ابوبکر رضی اللہ عنہ نے فرمایا: مجھے یہ امید ہے کہ میرا انتقال بھی اسی دن ہو گا، چنانچہ سیدنا ابوبکر رضی اللہ عنہ کا انتقال پیر کی شام کو ہو گیا اور انہیں رات کے وقت دفن کر دیا گیا۔ [صحیح ابن حبان/كتاب التاريخ/حدیث: 6615]

سیدہ عائشہ رضی اللہ عنہا بیان کرتی ہیں نبی اکرم صلی اللہ علیہ وسلم کا وصال میرے گھر میں میری باری کے مخصوص دن میں میرے سینے اور گردن کے درمیان (ٹیک لگائے ہوئے) ہوا اللہ تعالیٰ نے میرے لعابِ دہن اور آپ صلی اللہ علیہ وسلم کے لعابِ دہن کو اکٹھا کر دیا تھا (سیدنا ابوبکر رضی اللہ عنہ کے صاحبزادے) عبدالرحمن رضی اللہ عنہما گھر میں داخل ہوئے ان کے پاس مسواک تھی، جسے وہ چبا رہے تھے میں نے اس مسواک کو لیا، اسے چبایا اور نبی اکرم صلی اللہ علیہ وسلم کے دانتوں پر پھیرا۔ [صحیح ابن حبان/كتاب التاريخ/حدیث: 6616]

سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کا وصال میری باری کے مخصوص دن میں میرے سینے اور گردن کے درمیان ہوا۔ سیدنا عبدالرحمن بن ابی بکر رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، ان کے پاس ایک تازہ مسواک تھی، نبی اکرم صلی اللہ علیہ وسلم نے ان کی طرف دیکھا تو مجھے اندازہ ہو گیا کہ نبی اکرم صلی اللہ علیہ وسلم کو مسواک کی ضرورت محسوس ہو رہی ہے، میں نے اسے لیا، اسے چبایا، اسے نرم کیا اور اسے اچھا کیا تو نبی اکرم صلی اللہ علیہ وسلم نے بڑے عمدہ طریقے سے مسواک کی، پھر آپ صلی اللہ علیہ وسلم اٹھنے لگے لیکن گر گئے، میں نے اللہ تعالیٰ سے وہ دعا مانگنا شروع کی جو نبی اکرم صلی اللہ علیہ وسلم کی بیماری کے وقت سیدنا جبرائیل علیہ السلام مانگتے تھے یا نبی اکرم صلی اللہ علیہ وسلم خود مانگتے تھے، تو نبی اکرم صلی اللہ علیہ وسلم نے یہ کہنا شروع کیا: «بَلِ الرَّفِيْقُ الْأَعْلٰی» ”بلکہ جنت میں رفیقِ اعلیٰ (کا میں طلب گار ہوں)۔“ یہ آپ صلی اللہ علیہ وسلم نے تین مرتبہ کہا، پھر آپ صلی اللہ علیہ وسلم کی سانس رک گئی۔ سیدہ عائشہ رضی اللہ عنہا فرماتی ہیں: ہر طرح کی حمد اللہ تعالیٰ کے لیے مخصوص ہے جس نے نبی اکرم صلی اللہ علیہ وسلم کے دنیا کے آخری دن میں میرے اور نبی اکرم صلی اللہ علیہ وسلم کے لعابِ دہن کو جمع کر دیا۔ [صحیح ابن حبان/كتاب التاريخ/حدیث: 6617]