عطاء رحمہ اللہ روایت کرتے ہیں کہ رسول اللہ صلی اللہ علیہ وسلم نے وضو کیا، پگڑی کھولی، اور سر کے اگلے حصے پر مسح کیا یا فرمایا: ”اپنی پیشانی پر پانی سے مسح کیا۔“ [المستدرك على الصحيحين/كتاب: البيوع/حدیث: 2159]

مغیرہ بن شعبہ رضی اللہ عنہ روایت کرتے ہیں کہ رسول اللہ صلی اللہ علیہ وسلم نے اپنی پیشانی کا مسح کیا یا فرمایا: ”سر کے اگلے حصہ کا پانی سے مسح کیا۔“ [المستدرك على الصحيحين/كتاب: البيوع/حدیث: 2160]

لقیط بن صبرہ رضی اللہ عنہ سے مروی ہے، وہ فرماتے ہیں: میں وفدِ بنی المنتفق میں شامل تھا، ہم نبی صلی اللہ علیہ وسلم کی خدمت میں حاضر ہوئے لیکن آپ صلی اللہ علیہ وسلم سے ملاقات نہ ہو سکی۔ ہمارا سامنا عائشہ رضی اللہ عنہا سے ہوا تو انہوں نے کھجور کے پتوں سے بنے ہوئے برتن میں ہمارے پاس کھجوریں بھیجیں اور ہمارے لیے گوشت کے چھوٹے ٹکڑے کر کے پکانے کا حکم دیا، وہ گوشت پکایا گیا، پھر ہم نے کھایا۔ ہم تھوڑی دیر ٹھہرے کہ نبی صلی اللہ علیہ وسلم بھی تشریف لے آئے، آپ صلی اللہ علیہ وسلم نے فرمایا: ”کیا تم نے کچھ کھایا؟ کیا تمہارے لیے کچھ لانے کا کہا گیا ہے؟“ ہم نے عرض کیا: جی ہاں۔ تھوڑی دیر بعد ایک چرواہے نے بکریاں ہانکیں تو ان میں ایک بکری چلا رہی تھی، آپ صلی اللہ علیہ وسلم نے فرمایا: ”اے فلاں! بکری نے کیا جنا؟“ چرواہے نے کہا: بچہ۔ آپ صلی اللہ علیہ وسلم نے فرمایا: ”ہمارے لیے اس کی جگہ بکری ذبح کرو۔“ پھر آپ صلی اللہ علیہ وسلم نے میری طرف رخ کیا اور فرمایا: ”یہ مت سمجھو کہ ہم نے یہ جانور تمہارے لیے ذبح کیا، ہماری سو بکریاں ہیں، ہم نہیں چاہتے کہ وہ زیادہ ہوں، جب ایک بکری بچہ جنم دیتی ہے تو ہم اس کی جگہ دوسری کو ذبح کر دیتے ہیں۔“ لقیط بن صبرہ رضی اللہ عنہ کہتے ہیں، میں نے عرض کیا: اے اللہ کے رسول صلی اللہ علیہ وسلم ! میری بیوی بد زبان ہے۔ آپ صلی اللہ علیہ وسلم نے فرمایا: ”اس کو طلاق دے دو۔“ میں نے عرض کیا: میں نے اس کے ساتھ وقت گزارا ہے اور میری اس سے اولاد بھی ہے، تو آپ صلی اللہ علیہ وسلم نے فرمایا: ”اس کو نصیحت کرو، اگر اس میں خیر ہوئی تو وہ قبول کر لے گی، اور اپنی بیوی کو لونڈی کی طرح نہ مارو۔“ میں نے عرض کیا: اے اللہ کے رسول صلی اللہ علیہ وسلم ! مجھے وضو کے متعلق بتائیے؟ آپ صلی اللہ علیہ وسلم نے فرمایا: ”وضو اچھی طرح پورا کرو، انگلیوں کا خلال کرو، اور ناک میں پانی اچھی طرح چڑھایا کرو مگر روزہ کی حالت میں (ایسا نہ کرو)۔“ [المستدرك على الصحيحين/كتاب: البيوع/حدیث: 2161]

سالم رحمہ اللہ روایت کرتے ہیں کہ ہم اُم المومنین عائشہ رضی اللہ عنہا کے ساتھ مکہ کے لیے نکلے، اور وہ میرے باپ کے ساتھ نکلتی تھیں اور ان کے ساتھ نماز بھی پڑھتی تھیں، سالم کہتے ہیں کہ عبدالرحمن بن ابی بکر رضی اللہ عنہما کے لیے وضو کا پانی لایا گیا تو اُم المومنین عائشہ رضی اللہ عنہا نے فرمایا: اے عبدالرحمن! وضو اچھی طرح پورا کرو، میں نے رسول اللہ صلی اللہ علیہ وسلم سے سنا ہے: ”قیامت کے دن ایڑیوں کے لیے آگ کا عذاب ہے۔“ [المستدرك على الصحيحين/كتاب: البيوع/حدیث: 2162]

عائشہ رضی اللہ عنہا سے روایت ہے کہ انہوں نے (اپنے بھائی) عبدالرحمن رضی اللہ عنہما سے کہا: اے عبدالرحمن! وضو اچھی طرح پورا کرو، میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”ایڑیوں کے لیے آگ کا عذاب ہے۔“ [المستدرك على الصحيحين/كتاب: البيوع/حدیث: 2163]

حمران رحمہ اللہ روایت کرتے ہیں کہ عثمان رضی اللہ عنہ نے بیٹھنے کی جگہ پر وضو کیا اور اعضائے وضو کو تین تین دفعہ دھویا، پھر فرمایا: میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”جس نے میرے اس وضو کی طرح وضو کیا تو اس کے گناہ چہرے، ہاتھوں اور پاؤں سے نکل جائیں گے۔“ [المستدرك على الصحيحين/كتاب: البيوع/حدیث: 2164]

ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اگر مجھے اپنی امت کے مشقت و تکلیف میں مبتلا ہونے کا اندیشہ نہ ہوتا، تو انہیں عشاء کی نماز تاخیر سے پڑھنے اور ہر نماز کے ساتھ مسواک کا حکم دیتا۔“ [المستدرك على الصحيحين/كتاب: البيوع/حدیث: 2165]

عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”مسواک منہ کو پاک کرنے والی اور پروردگار کی خوشنودی کا ذریعہ ہے۔“ [المستدرك على الصحيحين/كتاب: البيوع/حدیث: 2166]

عروہ بن زبیر رحمہ اللہ بیان فرماتے ہیں: میں مروان بن حکم کے پاس گیا تو ہم نے مذاکرہ کیا کہ کس چیز سے وضو (ضروری) ہوتا ہے، تو مروان نے کہا: ذکر کو چھونے سے وضو (ضروری) ہے، عروہ نے کہا: مجھے اس کا علم نہیں، مروان نے کہا: مجھے بسرہ بنت صفوان رضی اللہ عنہا نے خبر دی، انہوں نے نبی صلی اللہ علیہ وسلم سے سنا، آپ صلی اللہ علیہ وسلم فرما رہے تھے: ”جب تم میں سے کوئی اپنے ذکر کو چھوئے تو وہ وضو کرے۔“ [المستدرك على الصحيحين/كتاب: البيوع/حدیث: 2167]

ابوہریرہ رضی اللہ عنہ سے روایت ہے، وہ رسول اللہ صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جب تم میں سے کوئی اپنی شرمگاہ کو ہاتھ لگائے جبکہ درمیان میں کچھ (کپڑا وغیرہ) نہ ہو تو وہ وضو کرے۔“ [المستدرك على الصحيحين/كتاب: البيوع/حدیث: 2168]