سیدنا مغیرہ رضی اللہ عنہ نے ابووائل کے واسطے سے سیدنا قیس بن ابی غرزہ رضی اللہ عنہ کا یہ بیان نقل کیا ہے ” نبی اکرم صلی اللہ علیہ وسلم بازار میں ہمارے پاس تشریف لائے اور فرمایا: اے گروہِ تاجراں! ان بازاروں میں قسمیں شامل ہو جاتی ہیں تو تم ان کو صدقہ کے ساتھ ملا لیا کرو۔ حبیب ابن ابی ثابت کی حدیث: [المستدرك على الصحيحين/كتاب: البيوع/حدیث: 2169]

سیدنا حبیب ابن ابی ثابت رضی اللہ عنہ نے ابووائل کے واسطے سے سیدنا قیس ابن ابی غرزہ رضی اللہ عنہ کا یہ بیان نقل کیا ہے: رسول اللہ صلی اللہ علیہ وسلم ہمارے پاس تشریف لائے اس وقت ہم لوگ مدینہ میں غلاموں کی تجارت کرتے تھے اور ہم اپنے آپ کو ” سماسرہ “ (دلال) کہتے تھے تو رسول اللہ صلی اللہ علیہ وسلم نے ہمیں اس سے زیادہ اچھے نام کے ساتھ پکارا جو ہم خود اپنا نام رکھتے تھے۔ آپ صلی اللہ علیہ وسلم نے فرمایا: اے گروہِ تاجراں! اس تجارت میں فضول گوئی اور قسمیں شامل ہو جاتی ہیں اس لیے اس کو صدقہ کے ساتھ ملا لیا کرو۔ ٭٭ (مذکورہ حدیث کی تین سندیں بیان کی گئی ہیں جبکہ) یہ الفاظ سفیان ثوری کی روایت کے ہیں۔ [المستدرك على الصحيحين/كتاب: البيوع/حدیث: 2170]

سیدنا عبداللہ بن عمر رضی اللہ عنہما فرماتے ہیں: رسول اللہ صلی اللہ علیہ وسلم نے ارشاد فرمایا: مسلمان، ایماندار اور سچا تاجر قیامت کے دن شہداء کے ہمراہ ہو گا۔ ٭٭ یہ کلثوم ” بصری “ ہیں اور ان کی مرویات بہت کم ہیں۔ امام بخاری رحمۃ اللہ علیہ اور امام مسلم رحمۃ اللہ علیہ نے ان کی روایات نقل نہیں کیں۔ ٭٭ حسن کی مراسیل میں مذکورہ حدیث کی ایک شاہد حدیث بھی موجود ہے جو کہ درج ذیل ہے۔ [المستدرك على الصحيحين/كتاب: البيوع/حدیث: 2171]

سیدنا ابوسعید خدری رضی اللہ عنہ فرماتے ہیں، نبی اکرم صلی اللہ علیہ وسلم نے ارشاد فرمایا: ایماندار، سچا تاجر (قیامت کے دن) انبیاء کرام، صدیقین اور شہداء کے ہمراہ ہوں گے۔ [المستدرك على الصحيحين/كتاب: البيوع/حدیث: 2172]

سیدنا رفاعہ بن رافع زرقی رضی اللہ عنہ کے بارے میں مروی ہے کہ وہ رسول اللہ صلی اللہ علیہ وسلم کے ہمراہ عیدگاہ کی طرف گئے تو وہاں پر کچھ لوگوں کو خرید و فروخت کرتے پایا تو فرمایا: اے گروہِ تاجراں! تو سب لوگ آپ کی طرف متوجہ ہوئے اور اپنی گردنیں اور آنکھیں رسول اللہ صلی اللہ علیہ وسلم کی طرف اٹھا کر دیکھنے لگے۔ آپ صلی اللہ علیہ وسلم نے فرمایا: بے شک تاجر لوگ قیامت کے دن اس حالت میں اٹھائے جائیں گے کہ وہ فاجر ہوں گے، سوائے ان تاجروں کے جو اللہ سے ڈرنے والے ہیں، نیکی کرنے والے اور سچ بولنے والے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب: البيوع/حدیث: 2173]

سیدنا عبدالرحمن بن شبل رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: بے شک تاجر لوگ گنہگار ہیں۔ صحابہ کرام رضوان اللہ علیہم اجمعین نے عرض کی: یا رسول اللہ صلی اللہ علیہ وسلم ! کیا اللہ تعالیٰ نے تجارت کو حلال نہیں کیا ہے؟ آپ صلی اللہ علیہ وسلم نے جواباً فرمایا: ہاں۔ لیکن تاجر لوگ قسمیں کھاتے ہیں جس کی وجہ سے گنہگار ہو جاتے ہیں اور گفتگو کے دوران جھوٹ بولتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور ہشام بن ابی عبداللہ نے ابوراشد سے یحیی ابن ابی کثیر کا سماع ثابت کیا ہے اور ہشام ثقہ راوی ہیں اور ابان بن یزید عطار نے (اپنی سند میں) (یحیی ابن ابی کثیر اور ابوراشد) دونوں کے درمیان زید بن سلام کو داخل کیا ہے۔ (جیسا کہ درج ذیل حدیث سے واضح ہے)۔ [المستدرك على الصحيحين/كتاب: البيوع/حدیث: 2174]

ابان بن یزید العطار نے یحیی ابن کثیر کے بعد زید بن سلام کے واسطے سے ابوراشد الجرانی سے روایت کیا ہے کہ عبدالرحمن بن شبل رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: تاجر ہی گنہگار ہیں، تاجر ہی گنہگار ہیں، صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ! کیا اللہ تعالیٰ نے تجارت کو حلال نہیں کیا ہے؟ آپ صلی اللہ علیہ وسلم نے جواباً فرمایا: کیوں نہیں، لیکن یہ گفتگو میں جھوٹ بولتے ہیں اور قسمیں کھاتے ہیں اس لیے گنہگار ہو جاتے ہیں۔ [المستدرك على الصحيحين/كتاب: البيوع/حدیث: 2175]

سیدنا عمرو بن تغلب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت کی نشانیوں میں سے یہ بھی ہے کہ مال کی کثرت ہو گی، جاہلوں کی کثرت ہو گی، فتنے ظاہر ہوں گے اور تجارت عام ہو جائے گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور اس کی سند امام بخاری رحمۃ اللہ علیہ اور امام مسلم رحمۃ اللہ علیہ کے معیار پر صحیح ہے۔ البتہ عمرو بن تغلب رضی اللہ عنہ کا حسن کے علاوہ اور دوسرا کوئی راوی نہیں ہے۔ [المستدرك على الصحيحين/كتاب: البيوع/حدیث: 2176]

سیدنا جبیر بن مطعم رضی اللہ عنہ سے روایت ہے کہ ایک شخص رسول اکرم صلی اللہ علیہ وسلم کی بارگاہ میں آیا اور بولا: یا رسول اللہ صلی اللہ علیہ وسلم ! شہر کی کونسی جگہ سب سے زیادہ بُری ہے؟ آپ صلی اللہ علیہ وسلم نے فرمایا: مجھے نہیں معلوم! جب آپ صلی اللہ علیہ وسلم کے پاس سیدنا جبریل امین علیہ السلام آئے تو آپ صلی اللہ علیہ وسلم نے پوچھا: اے جبریل! شہر کی کونسی جگہ سب سے زیادہ بُری ہے؟ جبریل نے جواباً کہا: مجھے نہیں معلوم، میں اپنے رب سے پوچھ کر بتاؤں گا۔ پھر سیدنا جبریل امین علیہ السلام تشریف لے گئے اور کچھ عرصہ کے بعد تشریف لائے اور بولے: اے محمد ( صلی اللہ علیہ وسلم ) آپ صلی اللہ علیہ وسلم نے پوچھا تھا کہ شہر کی سب سے بُری جگہ کون سی ہے؟ اور میں نے جواباً کہا تھا: مجھے معلوم نہیں، میں اللہ تعالیٰ سے پوچھ کر بتاؤں گا۔ چنانچہ میں نے اللہ تعالیٰ سے پوچھا تھا کہ شہر کی کونسی جگہ سب سے بُری ہے؟ اللہ تعالیٰ نے فرمایا:” بازار “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور اس حدیث کو قیس بن ربیع اور عمرو بن ثابت رضی اللہ عنہ نے ابوالمقدام کے واسطے سے عبداللہ بن محمد بن عقیل رضی اللہ عنہ سے روایت کیا ہے۔ ایک صحیح حدیث مذکورہ حدیث کی شاہد بھی ہے (جو کہ درج ذیل ہے) [المستدرك على الصحيحين/كتاب: البيوع/حدیث: 2177]

سیدنا عبداللہ بن عمر رضی اللہ عنہما فرماتے ہیں: ایک شخص رسول اکرم صلی اللہ علیہ وسلم کے پاس آیا اور بولا: یا رسول اللہ ( صلی اللہ علیہ وسلم ) کونسی جگہ سب سے زیادہ اچھی ہے؟ آپ صلی اللہ علیہ وسلم نے فرمایا: میں نہیں جانتا، اس نے پوچھا: کونسی جگہ سب سے زیادہ بُری ہے؟ آپ صلی اللہ علیہ وسلم نے فرمایا: میں نہیں جانتا، آپ کی خدمت میں سیدنا جبریل علیہ السلام آئے۔ آپ صلی اللہ علیہ وسلم نے فرمایا: اللہ تعالیٰ سے یہ بات پوچھ کر آؤ، تو جبریل کہنے لگے: ہم اللہ تعالیٰ سے کچھ پوچھا نہیں کرتے ہیں۔ پھر آپ صلی اللہ علیہ وسلم پر کپکپی طاری ہو گئی۔ قریب تھا کہ رسول اکرم صلی اللہ علیہ وسلم پر غشی طاری ہو جاتی۔ جب سیدنا جبریل علیہ السلام اوپر گئے تو اللہ تعالیٰ نے فرمایا: آپ سے محمد ( صلی اللہ علیہ وسلم ) پوچھ رہے ہیں کہ کونسا مقام سب سے بہتر ہے؟ اور تم نے جواب دیا کہ میں نہیں جانتا، انہوں نے پوچھا: کونسا مقام سب سے بُرا ہے؟ تم نے اس سے بھی لا علمی کا اظہار کر دیا۔ (عبداللہ) فرماتے ہیں: سیدنا جبریل علیہ السلام نے اقرار کر لیا تو اللہ تعالیٰ نے فرمایا: ان کو بتا دو کہ سب سے بہتر مقام ”مساجد“ ہیں اور سب سے بُرا مقام ”بازار“ ہے۔ [المستدرك على الصحيحين/كتاب: البيوع/حدیث: 2178]