محمد بن سعد کہتے ہیں کہ میں نے محمد بن عمر (واقدی) سے کہا: اہل کوفہ نے اعمش کے واسطے سے سیدنا جابر رضی اللہ عنہ سے روایت کیا ہے کہ انہوں نے کہا: میں بدر کے دن اپنے ساتھیوں کے لیے کنویں سے پانی بھرتا تھا! تو محمد بن عمر نے کہا: یہ اہل عراق کی روایت کی غلطی ہے کہ وہ سیدنا جابر اور ابومسعود انصاری رضی اللہ عنہما کو ان لوگوں میں شمار کرتے ہیں جو بدر میں شریک ہوئے، حالانکہ موسیٰ بن عقبہ، محمد بن اسحاق اور ابومعشر نے اور نہ ہی سیرت روایت کرنے والوں میں سے کسی اور نے اسے روایت کیا ہے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6542]

خارجہ بن حارث سے روایت ہے کہ سیدنا جابر بن عبداللہ رضی اللہ عنہما کی وفات 78 ہجری میں ہوئی جبکہ ان کی عمر چورانوے برس تھی، وہ اپنی بینائی کھو چکے تھے، میں نے ان کے جنازے پر ایک یمنی چادر دیکھی اور مدینہ کے گورنر ابان بن عثمان نے ان کی نماز جنازہ پڑھائی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6542M]

عاصم بن عمر بن قتادہ سے روایت ہے کہ سیدنا جابر بن عبداللہ رضی اللہ عنہما ہمارے پاس اس حال میں تشریف لائے کہ ان کے سر اور داڑھی کے بال زرد (خضاب کی وجہ سے) تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6543]

محمد بن منکدر سے روایت ہے کہ میں نے سیدنا جابر بن عبداللہ رضی اللہ عنہما کو یہ فرماتے ہوئے سنا: ”میں حجاج کے پاس گیا تو میں نے اسے سلام نہیں کیا۔“ [المستدرك على الصحيحين/كتاب معرفة الصحابة رضي الله تعالى عنهم/حدیث: 6544]

سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے بیعتِ عقبہ کی رات میرے لیے پچیس مرتبہ مغفرت کی دعا فرمائی۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6545]

سیدنا جابر بن عبداللہ رضی اللہ عنہما سے روایت ہے کہ رسول اللہ صلی اللہ علیہ وسلم نے اکیس غزوات فرمائے اور میں ان میں سے انیس میں آپ صلی اللہ علیہ وسلم کے ہمراہ شریک رہا، اور آپ صلی اللہ علیہ وسلم کا آخری غزوہ جس میں آپ صلی اللہ علیہ وسلم خود تشریف لے گئے وہ غزوہ تبوک تھا۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6546]

زید بن خالد جہنی رضی اللہ عنہ کی کنیت کے متعلق اختلاف ہے، اہل مدینہ کا خیال ہے کہ ان کی کنیت ابوعبدالرحمن تھی جبکہ دیگر نے کہا کہ ان کی کنیت ابوطلحہ تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6547]

زید بن اسلم اور محمد بن حجازی جہنی سے روایت ہے کہ سیدنا زید بن خالد جہنی رضی اللہ عنہ کی وفات 78 ہجری میں مدینہ منورہ میں ہوئی جبکہ ان کی عمر پچاسی برس تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6548]

ابراہیم بن منذر سے روایت ہے کہ سیدنا زید بن خالد جہنی رضی اللہ عنہ کی کنیت ابوعبدالرحمن تھی، ان کی وفات 78 ہجری میں مدینہ منورہ میں ہوئی جبکہ ان کی عمر پچاسی سال تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6549]

ابن شہاب زہری سے روایت ہے کہ سیدہ اسماء بنت عمیس رضی اللہ عنہا کے ہاں سیدنا عبداللہ بن جعفر بن ابی طالب رضی اللہ عنہما کی ولادت سرزمینِ حبشہ میں ہوئی، ان کی وفات 80 ہجری میں ہوئی جبکہ ان کی عمر اسی برس تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6550]