ابونعیم سے مروی ہے کہ سیدنا سہل بن سعد ساعدی رضی اللہ عنہ کی وفات 88 ہجری میں ہوئی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6581]

ابن شہاب زہری سے مروی ہے کہ سیدنا سہل بن سعد انصاری رضی اللہ عنہ نے رسول اللہ صلی اللہ علیہ وسلم کا زمانہ پایا جبکہ ان کی عمر پندرہ برس تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6582]

قدامہ بن ابراہیم بن محمد بن حاطب سے مروی ہے کہ میں نے حجاج بن یوسف کو دیکھا کہ وہ سیدنا ابن زبیر رضی اللہ عنہما کے دورِ حکومت میں عباس بن سہل بن سعد کو مار رہا تھا، اتنے میں سیدنا سہل رضی اللہ عنہ نمودار ہوئے، وہ ایک تہبند اور زرد رنگ کی چادر اوڑھے ہوئے تھے، جب وہ قریب آئے تو حجاج نے ان کے بیٹے کو مارنے سے روکنے کا اشارہ کر دیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6583]

سیدنا سہل بن سعد رضی اللہ عنہ سے مروی ہے کہ انہوں نے فرمایا: ”میں لوگوں کو رسول اللہ صلی اللہ علیہ وسلم کی احادیث سناتا ہوں اور وہ ادھر ادھر کی باتیں بناتے ہیں، اگر میں وفات پا گیا تو وہ پھر کسی سے یہ نہیں سن سکیں گے کہ میں نے رسول اللہ صلی اللہ علیہ وسلم کو فرماتے ہوئے سنا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6584]

ابو مودود سے مروی ہے کہ میں نے سیدنا سہل بن سعد رضی اللہ عنہ کو دیکھا کہ ان کی داڑھی سفید ہو چکی تھی اور انہوں نے اپنی مونچھیں کتروا رکھی تھیں۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6585]

عبدالمہیمن بن عباس بن سہل بن سعد اپنے والد سے اور وہ ان کے دادا سیدنا سہل بن سعد رضی اللہ عنہ سے روایت کرتے ہیں کہ وہ غزوہ احد کے دن رسول اللہ صلی اللہ علیہ وسلم کے ساتھ حاضر تھے۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6586]

ابراہیم بن منذر سے مروی ہے کہ سیدنا سہل بن سعد ساعدی رضی اللہ عنہ (جن کی کنیت ابوالعباس تھی) کی وفات مدینہ منورہ میں 91 ہجری میں ہوئی، اور وہ مدینہ منورہ میں وفات پانے والے رسول اللہ صلی اللہ علیہ وسلم کے آخری صحابی تھے، اس وقت ان کی عمر ایک سو سال تھی۔
سیدنا عبداللہ بن ابی حدرد اسلمی رضی اللہ عنہ کا ذکر [المستدرك على الصحيحين/كتاب معرفة الصحابة رضي الله تعالى عنهم/حدیث: 6587]

مصعب بن عبداللہ سے مروی ہے کہ سیدنا عبداللہ بن ابی حدرد اسلمی رضی اللہ عنہ (جن کی کنیت ابومحمد تھی) کی وفات 71 ہجری میں ہوئی، جبکہ ان کی عمر اکیاسی برس تھی، ابوحدرد کا نام سلامہ تھا اور ان کا تعلق قبیلہ اسلم کی شاخ بنو رفاعہ سے تھا۔
سیدنا انس بن مالک انصاری رضی اللہ عنہ کا ذکر [المستدرك على الصحيحين/كتاب معرفة الصحابة رضي الله تعالى عنهم/حدیث: 6588]

سیدنا انس بن مالک رضی اللہ عنہ کے ایک آزاد کردہ غلام سے مروی ہے کہ میں نے سیدنا انس رضی اللہ عنہ سے پوچھا: ”کیا آپ غزوہ بدر میں شریک تھے؟“ تو انہوں نے جواب دیا: ”تیری ماں تجھے روئے! بھلا میں بدر سے کہاں غائب رہ سکتا تھا؟!“ انصاری کہتے ہیں کہ سیدنا انس رضی اللہ عنہ رسول اللہ صلی اللہ علیہ وسلم کے ساتھ بدر کی طرف روانہ ہوئے تھے جبکہ وہ ایک نوجوان لڑکے تھے اور رسول اللہ صلی اللہ علیہ وسلم کی خدمت کیا کرتے تھے۔ ابوحاتم کہتے ہیں کہ ہم نے انصاری سے پوچھا کہ سیدنا انس بن مالک رضی اللہ عنہ کی وفات کے وقت کتنی عمر تھی؟ تو انہوں نے بتایا کہ ان کی عمر ایک سو سات برس تھی۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6589]

اسحاق بن یزید سے مروی ہے کہ میں نے سیدنا انس بن مالک رضی اللہ عنہ کو اس حال میں دیکھا کہ ان کی گردن پر مہر لگی ہوئی تھی جو حجاج نے لگائی تھی، حجاج اس کے ذریعے آپ کی تذلیل کرنا چاہتا تھا۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6590]