سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: سیاہ ہلیلج (ایک کانٹے دار درخت ہے) استعمال كیا كرو، كیونكہ یہ جنتی درخت ہے، اس کا ذائقہ كڑوا ہے لیکن ہر بیماری کا علاج ہے۔ [المستدرك على الصحيحين/كتاب الطب/حدیث: 8434]

ابوعبیدہ بن حذیفہ کی پھوپھی سیدہ فاطمہ رضی اللہ عنہا فرماتی ہیں کہ میں کچھ عورتوں کے ہمراہ رسول اللہ صلی اللہ علیہ وسلم کی عیادت کے لئے گئی، آپ کے قریب ایک مشکیزہ لٹک رہا تھا، اور اس کا پانی آپ صلی اللہ علیہ وسلم پر ٹپک رہا تھا، بخار کی وجہ سے آپ صلی اللہ علیہ وسلم کو بہت سخت گرمائش محسوس ہو رہی تھی، میں نے عرض کی: یا رسول اللہ صلی اللہ علیہ وسلم آپ اللہ تعالیٰ سے دعا کریں کہ اللہ تعالیٰ اس سختی کو آپ سے ختم فرما دے، آپ صلی اللہ علیہ وسلم نے فرمایا: لوگوں میں سب سے زیادہ سخت آزمائش انبیاء کرام علیہم السلام کی ہوتی ہے، اس سے کم آزمائش ان لوگوں کی ہوتی ہے جو ان کے قریب ہوتے ہیں۔ [المستدرك على الصحيحين/كتاب الطب/حدیث: 8435]

سیدنا عبداللہ بن مسعود رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: گائے کا دودھ پیا کرو، ان کا گھی بھی کھایا کرو، اور اس کا گوشت کھانے سے بچو، کیونکہ اس کے دودھ اور گھی میں شفاء ہے، اور اس کے گوشت میں بیماری ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الطب/حدیث: 8436]

سیدہ اسماء بنت عمیس رضی اللہ عنہا فرماتی ہیں: رسول اللہ صلی اللہ علیہ وسلم نے مجھ سے پوچھا: تم کس چیز سے جلاب لیتی ہو؟ میں نے کہا: شبرم (چنے کی طرح دانے) سے۔ آپ صلی اللہ علیہ وسلم نے فرمایا: (یہ تو بہت) گرم (بہت) گرم (ہوتا ہے)۔ انہوں نے کہا: اس کے بعد میں نے سناء سے جلاب لینا شروع کر دیئے۔ آپ صلی اللہ علیہ وسلم نے فرمایا: اگر کسی چیز میں موت سے شفاء ہوتی تو وہ سناء میں ہوتی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس كو نقل نہیں كیا۔ [المستدرك على الصحيحين/كتاب الطب/حدیث: 8437]

سیدنا زید بن ارقم رضی اللہ عنہ فرماتے ہیں كہ رسول اللہ صلی اللہ علیہ وسلم نے ارشاد فرمایا: ذات الجنب بیماری كے لئے قسط بحری (سمندری عود ہندی) اور زیتون سے علاج كرو۔ یہ حدیث صحیح الاسناد ہے لیكن امام بخاری رحمۃ اللہ علیہ اور امام مسلم رحمۃ اللہ علیہ نے اس كو نقل نہیں كیا۔ [المستدرك على الصحيحين/كتاب الطب/حدیث: 8438]

ام المومنین سیدہ عائشہ رضی اللہ عنہا فرماتی ہیں کہ جب لوگ یہ باتیں کرنے لگے کہ ہمیں خدشہ ہے کہ رسول اللہ صلی اللہ علیہ وسلم کو ذات الحنب کی بیماری ہے، رسول اللہ صلی اللہ علیہ وسلم نے ارشاد فرمایا: یہ بیماری تو شیطان کی طرف سے ہوتی ہے اور اللہ تعالیٰ مجھ پر شیطان مسلط نہیں فرمائے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ ام المومنین سیدہ عائشہ رضی اللہ عنہا سے اس حدیث کی متضاد حدیث مروی ہے اور اس کی اسناد ” واہی “ ہے۔ [المستدرك على الصحيحين/كتاب الطب/حدیث: 8439]

ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم کا انتقال ذات الجنب کی وجہ سے ہوا۔ [المستدرك على الصحيحين/كتاب الطب/حدیث: 8440]

ام المؤمنین سیدہ عائشہ رضی اللہ عنہا فرماتی ہیں كہ رسول اللہ صلی اللہ علیہ وسلم نے ارشاد فرمایا: خاصرہ (كے درد كی اصل یہ ہے كہ) یہ گردے كی ایک رگ ہے، جب یہ حركت كرتی ہے تو انسان كو تكلیف دیتی ہے، ابلے ہوئے پانی اور شہد كے ساتھ اس كا علاج كریں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الطب/حدیث: 8441]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے پچھنے لگوائے، اور پچھنے لگانے والے کو اس کی اجرت بھی دی، اور ناک میں دوا ڈلوائی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو اس اسناد کے ہمراہ نقل نہیں کیا۔ [المستدرك على الصحيحين/كتاب الطب/حدیث: 8442]

سیدنا جابر رضی اللہ عنہ فرماتے ہیں: ایک خاتون رسول اللہ صلی اللہ علیہ وسلم کی بارگاہ میں آئی، اور عرض کی: یا رسول اللہ صلی اللہ علیہ وسلم ، اس کو حلق میں درد ہے آپ صلی اللہ علیہ وسلم نے فرمایا: اپنی اولادوں کے حلق کو مت جلاؤ، تم قسط ہندی اور ورس کو استعمال کرو اور اسی کی دوا ناک میں ڈلواؤ۔ [المستدرك على الصحيحين/كتاب الطب/حدیث: 8443]