سیدنا زید بن ارقم رضی اللہ عنہ فرماتے ہیں کہ نبی اکرم صلی اللہ علیہ وسلم نے ذات الجنب کی بیماری کے لئے زیتون اور ورس کی بہت تعریف فرمائی۔ سیدنا قتادہ فرماتے ہیں: جس جانب درد ہو، اسی جانب ” لد “ کرو۔ (منہ کے ایک کنارے سے دوا پلانے کو لد کہتے ہیں)۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الطب/حدیث: 8444]

سیدنا جابر رضی اللہ عنہ فرماتے ہیں کہ نبی اکرم صلی اللہ علیہ وسلم ام المومنین سیدہ عائشہ صلی اللہ علیہ وسلم کے پاس تشریف لائے، اس وقت ام المومنین کے پاس ایک عورت بیٹھی ہوئی تھی، اس کے پاس ایک بچہ تھا، اس کے ناک سے خون بہہ رہا تھا، نبی اکرم صلی اللہ علیہ وسلم نے پوچھا: اس بچے کو کیا ہوا؟ لوگوں نے بتایا کہ اس بچے کے حلق میں درد ہے، آپ صلی اللہ علیہ وسلم نے فرمایا: تم ہلاک ہو جاؤ، تم اپنے بچوں کو قتل مت کرو، کسی بھی عورت کے بچے کے حلق میں درد ہو، اس کو چاہئے کہ قسط ہندی لے کر پانی میں بھگو لیں، اس کے ڈراپ ناک میں ڈالیں، پھر آپ صلی اللہ علیہ وسلم نے ام المومنین سیدہ عائشہ رضی اللہ عنہا کو یہ سب کرنے کا حکم دیا، ام المومنین نے ایسا کیا، تو وہ بچہ تندرست ہو گیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین نے اس کو نقل نہیں کیا۔ [المستدرك على الصحيحين/كتاب الطب/حدیث: 8445]

سیدنا رافع بن عمرو المزنی رضی اللہ عنہ فرماتے ہیں: میں غلام تھا، میں نے رسول اللہ صلی اللہ علیہ وسلم کو یہ ارشاد فرماتے ہوئے سنا ہے کہ ” شجرہ اور عجوہ کھجور جنتی ہیں “۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین نے اس کو نقل نہیں کیا۔ [المستدرك على الصحيحين/كتاب الطب/حدیث: 8446]

سیدنا مزیدہ فرماتے ہیں: جب ہم نبی اکرم صلی اللہ علیہ وسلم کی خدمت میں گئے تو لوگوں نے اپنی کھجوروں میں کچھ کھجوریں رسول اللہ صلی اللہ علیہ وسلم کو ہدیہ پیش کیں، یہ لوگ وہاں کھجوریں کھانے لگ گئے، نبی اکرم صلی اللہ علیہ وسلم نے ان کو کھجوروں کے نام بھی بتائے۔ انہوں نے کہا: یا رسول اللہ صلی اللہ علیہ وسلم ہم آپ سے زیادہ ان کھجوروں کے نام نہیں جانتے ہیں، پھر آپ صلی اللہ علیہ وسلم نے ایک آدمی سے کہا: اس نے ہمیں مقربین کی بچی ہوئی کھجوریں کھلائی ہیں۔ پھر نبی اکرم صلی اللہ علیہ وسلم نے فرمایا: یہ کھجور برنی ہے، اور یہ کھجور تمہارے ہاں بہت اچھی ہے۔ اور یہ اس بیماری سے بھی شفاء دیتی ہے جس کا کوئی علاج نہ ہو۔ [المستدرك على الصحيحين/كتاب الطب/حدیث: 8447]

ام منذر عدویہ بیان کرتی ہیں کہ میرے پاس رسول اللہ صلی اللہ علیہ وسلم تشریف لائے، آپ کے ہمراہ سیدنا علی رضی اللہ عنہ بھی تھے، سیدنا علی (بیماری کی وجہ سے) بہت کمزور ہو چکے تھے، آپ فرماتی ہیں: ہمارے ڈول لٹکے ہوئے تھے۔ آپ فرماتی ہیں: حضور صلی اللہ علیہ وسلم اٹھ کر کھڑے ہوئے، اور (ان میں سے کچھ) کھا لیا، پھر سیدنا علی رضی اللہ عنہ بھی ان میں سے کھانے کے ارادے سے اٹھ کر کھڑے ہونے لگے تو، نبی اکرم صلی اللہ علیہ وسلم نے فرمایا: اے علی! تم اس کو رہنے دو، کیونکہ تم ابھی کمزور ہو۔ سیدنا علی رضی اللہ عنہ بیٹھ گئے، پھر میں نے ان کے لیے چقندر اور جو کا کھانا تیار کیا۔ نبی اکرم صلی اللہ علیہ وسلم نے فرمایا: اے علی! اس میں سے کھا لو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الطب/حدیث: 8448]

ام المومنین سیدہ عائشہ رضی اللہ عنہا فرماتی ہیں کہ نبی اکرم صلی اللہ علیہ وسلم نے ارشاد فرمایا: تم وہ چیز استعمال کیا کرو جو کھانے میں بہت بری ہے لیکن اس کا فائدہ بہت زیادہ ہے، وہ ہے ” تلبینہ “ (یعنی بھوسی)۔ اس ذات کی قسم جس کے قبضہ قدرت میں میری جان ہے، یہ پیٹ کو اس طرح صاف کر دیتی ہے جیسے پانی کے ساتھ چہرے کی میل ختم ہو جاتی ہے، آپ فرماتی ہیں: جب نبی اکرم صلی اللہ علیہ وسلم کے گھر والوں میں کوئی بیمار ہوتا، تو ہنڈیا مسلسل چولہے پر رہتی (بھوسی پکتی رہتی)، جب تک کہ وہ بیمار آر یا پار نہ ہو جاتا۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الطب/حدیث: 8449]

رسول اللہ صلی اللہ علیہ وسلم کی خادمہ سیدہ سلمہ رضی اللہ عنہا فرماتی ہیں: رسول اللہ صلی اللہ علیہ وسلم کے پاس جو بھی سر درد کی شکایت لے کر آتا، آپ صلی اللہ علیہ وسلم اس کو پچھنے لگوانے کا مشورہ دیتے، اور جو پاؤں کے درد کی شکایت لے کر آتا، آپ اس کو پاؤں میں مہندی لگانے کا مشورہ دیتے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم نے اس کو نقل نہیں کیا۔ [المستدرك على الصحيحين/كتاب الطب/حدیث: 8450]

سیدنا انس بن مالک رضی اللہ عنہ فرماتے ہیں کہ نبی اکرم صلی اللہ علیہ وسلم نے عرق النساء کے لیے یہ نسخہ بتایا کہ ایک درمیانے سائز کے دنبے کی چکتی لے کر اس کو پگھلا لیا جائے، اس کے تین حصے کر لیے جائیں، روزانہ ایک حصہ پیا جائے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الطب/حدیث: 8451]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: بہترین سرمہ اثمد ہے۔ یہ بینائی کو تیز کرتا ہے اور بالوں کو بھی اگاتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الطب/حدیث: 8452]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم روزانہ رات کو سونے سے پہلے اثمد سرمے کی تین تین سلائیاں لگایا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الطب/حدیث: 8453]