امام محمد بن سیرین رحمہ اللہ کہتے ہیں کہ ”یہ عمل احکامِ حدود نازل ہونے سے پہلے کا ہے، یعنی جو حدیثِ انس میں مذکور ہوا ہے۔“ [سنن ابي داود/كتاب الحدود /حدیث: 4371]

سیدنا ابن عباس رضی اللہ عنہ سے مروی ہے کہ ﴿إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلَافٍ أَوْ يُنْفَوْا مِنَ الْأَرْضِ- إِلَى قَوْلِهِ- غَفُورٌ رَحِيمٌ﴾ [سورة المائدة: 33-34] ”ان لوگوں کی سزا جو اللہ تعالیٰ سے اور اس کے رسول سے لڑیں اور زمین میں فساد کرتے پھریں یہی ہے کہ وہ قتل کر دیے جائیں، یا سولی چڑھا دیے جائیں یا الٹے طور سے ان کے ہاتھ پاؤں کاٹ دیے جائیں یا انہیں جلا وطن کر دیا جائے، یہ تو ہوئی ان کی دنیاوی ذلت اور خواری اور آخرت میں ان کے لیے بڑا بھاری عذاب ہے۔ ہاں جو لوگ اس سے پہلے توبہ کر لیں کہ تم ان پر اختیار پا لو تو یقین مانو کہ اللہ تعالیٰ بہت بڑی بخشش اور رحم و کرم والا ہے۔ یہ آیت مشرکین کے بارے میں نازل ہوئی ہے۔ تو جو ان میں سے قابو پائے جانے سے پہلے توبہ کر لے یہ آیت اس کے حق میں اس بات کی مانع نہیں ہے کہ جو جرم اس نے کیا ہے اس کی سزا اس پر لاگو نہ ہو۔“ [سنن ابي داود/كتاب الحدود /حدیث: 4372]

ام المؤمنین سیدہ عائشہ رضی اللہ عنہا سے روایت ہے کہ قریش کو بنو مخزوم کی اس عورت کی بہت فکر ہوئی جس نے چوری کی تھی۔ انہوں نے کہا: ”اس سلسلے میں کون بات کر سکتا ہے؟“ یعنی رسول اللہ صلی اللہ علیہ وسلم سے۔ کہنے لگے: ”اسامہ بن زید رضی اللہ عنہما کے علاوہ اور کوئی یہ جرات نہیں کر سکتا، وہ نبی کریم صلی اللہ علیہ وسلم کے چہیتے ہیں۔“ چنانچہ سیدنا اسامہ رضی اللہ عنہ نے آپ صلی اللہ علیہ وسلم سے بات کی تو رسول اللہ صلی اللہ علیہ وسلم نے فرمایا: ”اسامہ! کیا اس حد میں سفارش کرتے ہو جو اللہ کی حدود میں سے ہے؟“ پھر آپ صلی اللہ علیہ وسلم کھڑے ہوئے اور خطبہ دیا، اور فرمایا: ”تم سے پہلے لوگ صرف اسی وجہ سے ہلاک ہوئے تھے کہ ان میں سے جب کوئی معزز آدمی چوری کر لیتا تو وہ اسے چھوڑ دیتے، اور اگر کوئی کمزور چوری کرتا تو اس پر حد قائم کر دیتے تھے۔ اور اللہ کی قسم! اگر محمد صلی اللہ علیہ وسلم کی بیٹی فاطمہ رضی اللہ عنہا بھی چوری کرتی تو میں اس کا بھی ہاتھ کاٹ ڈالتا۔“ [سنن ابي داود/كتاب الحدود /حدیث: 4373]

ام المؤمنین سیدہ عائشہ رضی اللہ عنہا نے بیان کیا کہ ”بنو مخزوم کی ایک عورت تھی جو چیزیں مانگ کر لے جاتی اور پھر ان سے مکر جاتی تھی۔“ چنانچہ نبی کریم صلی اللہ علیہ وسلم نے اس کا ہاتھ کاٹنے کا حکم دیا اور مذکورہ بالا حدیثِ لیث کے مانند قصہ بیان کیا۔ کہا: ”چنانچہ نبی کریم صلی اللہ علیہ وسلم نے اس کا ہاتھ کاٹ ڈالا۔“ امام ابوداؤد رحمہ اللہ کہتے ہیں کہ ابن وہب نے یہ حدیث بواسطہ یونس، زہری سے روایت کی اور اسی طرح کہا جیسے کہ لیث نے بیان کیا کہ ”ایک عورت نے نبی کریم صلی اللہ علیہ وسلم کے دور میں فتح مکہ کے دنوں میں چوری کر لی۔“ اور لیث نے بواسطہ یونس، ابن شہاب سے اپنی سند سے روایت کیا تو کہا: ”ایک عورت کوئی چیز مانگ کر لے گئی۔“ مسعور بن اسود نے نبی کریم صلی اللہ علیہ وسلم سے اس حدیث کی مانند روایت کیا، کہا: ”اس عورت نے رسول اللہ صلی اللہ علیہ وسلم کے گھر سے ایک چادر چوری کی۔“ امام ابوداؤد رحمہ اللہ نے کہا: اور ابوزبیر نے سیدنا جابر رضی اللہ عنہ سے روایت کیا کہ ”ایک عورت نے چوری کر لی پھر سیدہ زینب رضی اللہ عنہا دختر رسول اللہ صلی اللہ علیہ وسلم کے ہاں جا کر پناہ لے لی۔“ اور سفیان بن عیینہ نے اسے بواسطہ ایوب بن موسیٰ، عن زہری، عن عروہ، عن عائشہ رضی اللہ عنہا روایت کیا۔ اور سفیان سے روایت کرنے والوں میں الفاظِ روایت کا اختلاف ہے، ان میں سے بعض کہتے ہیں کہ ”وہ عورت چیزیں مانگ کر لے جاتی تھی“ اور بعض کہتے ہیں کہ ”وہ چوری کرتی تھی،“ اور شعیب بواسطہ زہری، عن عروہ، عن عائشہ رضی اللہ عنہا بیان کرتے ہیں تو کہتے ہیں کہ ”وہ عورت چیزیں مانگ کر لے جاتی تھی“ اور آگے مذکورہ حدیث بیان کی۔ اور جب اسماعیل بن امیہ اور اسحاق بن راشد دونوں زہری سے بیان کرتے ہیں تو کہتے ہیں کہ ”اس عورت نے نبی کریم صلی اللہ علیہ وسلم کے گھر سے چوری کی تھی“ اور باقی حدیث مذکورہ حدیث کی مثل بیان کی۔ [سنن ابي داود/كتاب الحدود /حدیث: 4374]

ام المؤمنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”عزت دار لوگوں کی لغزشیں معاف کر دیا کرو سوائے اس کے کہ شرعی حدود ہوں۔“ [سنن ابي داود/كتاب الحدود /حدیث: 4375]

سیدنا عبداللہ بن عمرو بن عاص رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”حدود کے معاملات کو آپس ہی میں ایک دوسرے کو معاف کر دیا کرو، لیکن جو مقدمہ حد مجھ تک پہنچ گیا تو پھر اس کی تنفیذ واجب ہے۔“ [سنن ابي داود/كتاب الحدود /حدیث: 4376]

یزید بن نعیم اپنے والد (نعیم بن ہزال اسلمی رضی اللہ عنہ) سے روایت کرتے ہیں کہ ماعز بن مالک نبی کریم صلی اللہ علیہ وسلم کے پاس آئے اور آپ کے سامنے چار بار اعتراف و اقرار کیا (کہ اس نے زنا کیا ہے) تو آپ صلی اللہ علیہ وسلم نے اس کو رجم کرنے کا حکم دیا اور ہزال اسلمی رضی اللہ عنہ سے فرمایا: ”اگر تو اس پر اپنے کپڑے سے پردہ ڈال دیتا تو تیرے لیے بہتر ہوتا۔“ [سنن ابي داود/كتاب الحدود /حدیث: 4377]

جناب ابن منکدر رحمہ اللہ سے روایت ہے کہ ہزال رضی اللہ عنہ نے ماعز رضی اللہ عنہ سے کہا: ”وہ نبی کریم صلی اللہ علیہ وسلم کے پاس جائے اور معاملے کی خبر دے۔“ [سنن ابي داود/كتاب الحدود /حدیث: 4378]

جناب علقمہ بن وائل اپنے والد رضی اللہ عنہ سے روایت کرتے ہیں کہ نبی کریم صلی اللہ علیہ وسلم کے زمانے میں ایک عورت نماز کے ارادے سے نکلی تو راستے میں اسے ایک مرد ملا جو اس پر چڑھ بیٹھا اور اس سے اپنی نفسانی خواہش پوری کی، وہ چیخی چلائی اور وہ چلا گیا۔ پھر عورت کے پاس سے ایک اور آدمی گزرا تو وہ عورت بولی: ”یہی ہے وہ جس نے میرے ساتھ ایسے ایسے کیا ہے۔“ مہاجرین کی ایک جماعت وہاں سے گزری تو عورت نے کہا: ”بے شک اس آدمی نے میرے ساتھ ایسے ایسے کیا ہے۔“ تو وہ گئے اور اسے پکڑ لائے جس کے بارے میں اس نے گمان کیا کہ اس نے اس کے ساتھ مباشرت کی ہے۔ وہ اسے پکڑ کر عورت کے پاس لائے تو اس نے کہا: ”ہاں، یہی ہے وہ۔“ پس وہ اسے رسول اللہ صلی اللہ علیہ وسلم کے پاس لے آئے۔ جب آپ صلی اللہ علیہ وسلم نے اس کے متعلق حکم دیا (یعنی حد لگانے کا) تو اصل مجرم، جو عورت کے ساتھ ملوث ہوا تھا، کھڑا ہو گیا اور بولا: ”اے اللہ کے رسول! اس کا مجرم میں ہوں۔“ آپ صلی اللہ علیہ وسلم نے اس عورت سے فرمایا: ”تم جاؤ، اللہ نے تمہیں معاف کر دیا ہے۔“ اور اس آدمی کے متعلق اچھے کلمات فرمائے۔ امام ابوداؤد رحمہ اللہ نے کہا: ”یعنی اس آدمی کے متعلق جو (شبہے میں) پکڑا گیا تھا۔“ اور جو مرتکب ہوا تھا اس کے متعلق فرمایا: ”اسے رجم کر دو۔“ پھر فرمایا: ”اس نے ایسی توبہ کی ہے، اگر یہ (توبہ) اہل مدینہ کرتے تو بھی قبول کر لی جاتی۔“ امام ابوداؤد رحمہ اللہ فرماتے ہیں کہ اس روایت کو اسباط بن نصر نے بھی سماک سے روایت کیا ہے۔ [سنن ابي داود/كتاب الحدود /حدیث: 4379]

سیدنا ابوامیہ مخزومی رضی اللہ عنہ سے روایت ہے کہ نبی کریم صلی اللہ علیہ وسلم کے پاس ایک چور کو لایا گیا جس نے ازخود اعتراف کیا، مگر مال اس کے پاس سے نہیں ملا تھا۔ تو رسول اللہ صلی اللہ علیہ وسلم نے اس سے فرمایا: ”میں نہیں سمجھتا کہ تو نے چوری کی ہے۔“ اس نے کہا: ”کیوں نہیں (یعنی کی ہے)۔“ آپ صلی اللہ علیہ وسلم نے دو یا تین بار ایسے ہی فرمایا۔ پھر آپ صلی اللہ علیہ وسلم نے حکم دیا تو اس کا ہاتھ کاٹ ڈالا گیا۔ پھر پیش کیا گیا تو آپ صلی اللہ علیہ وسلم نے اس سے فرمایا: «اسْتَغْفِرِ اللَّهَ وَتُبْ إِلَيْهِ» ”اللہ سے معافی مانگو اور توبہ کرو۔“ اس نے کہا: «أَسْتَغْفِرُ اللَّهَ وَأَتُوبُ إِلَيْهِ» ”میں اللہ سے معافی مانگتا ہوں اور توبہ کرتا ہوں۔“ آپ صلی اللہ علیہ وسلم نے «اللَّهُمَّ اتُبْ عَلَيْهِ» ”اے اللہ! اس کی توبہ قبول فرما لے۔“ تین بار فرمایا۔ امام ابوداؤد رحمہ اللہ فرماتے ہیں: اس روایت کو عمرو بن عاصم نے بواسطہ ہمام، اسحاق بن عبداللہ سے روایت کرتے ہوئے یوں کہا: ابوامیہ جو کہ انصاری آدمی تھے وہ نبی کریم صلی اللہ علیہ وسلم سے روایت کرتے ہیں۔ [سنن ابي داود/كتاب الحدود /حدیث: 4380]