سیدنا جابر بن عبداللہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”لٹیرے کا ہاتھ نہیں کٹتا اور جو علانیہ مال لوٹے وہ ہم میں سے نہیں۔“ [سنن ابي داود/كتاب الحدود /حدیث: 4391]

اسی مذکورہ سند سے مروی ہے کہ رسول اللہ صلی اللہ علیہ وسلم نے فرمایا: ”خیانت کرنے والے کا ہاتھ نہیں کٹتا۔“ [سنن ابي داود/كتاب الحدود /حدیث: 4392]

سیدنا جابر رضی اللہ عنہ نے نبی کریم صلی اللہ علیہ وسلم سے اسی حدیث کے مثل روایت کیا اور مزید کہا: ”اچکے کا ہاتھ نہیں کٹتا۔“ امام ابوداؤد رحمہ اللہ فرماتے ہیں کہ ”یہ دونوں حدیثیں ابن جریج نے ابوزبیر سے نہیں سنی ہیں۔ اور مجھے امام احمد بن حنبل رحمہ اللہ سے یہ بات پہنچی ہے، انہوں نے کہا کہ یہ احادیث ابن جریج نے یاسین الزیات سے سنی ہیں۔“ امام ابوداؤد رحمہ اللہ نے کہا: ”یہ احادیث مغیرہ بن مسلم نے بھی بواسطہ ابوزبیر، جابر رضی اللہ عنہ سے اور انہوں نے نبی کریم صلی اللہ علیہ وسلم سے روایت کی ہیں۔“ [سنن ابي داود/كتاب الحدود /حدیث: 4393]

سیدنا صفوان بن امیہ رضی اللہ عنہ بیان کرتے ہیں کہ میں مسجد میں سویا ہوا تھا، مجھ پر ایک منقش اونی چادر تھی جس کی قیمت تیس درہم تھی، ایک آدمی آیا اور اس نے یہ چپکے سے مجھ سے بڑی جلدی سے نکال لی، پھر اس آدمی کو پکڑ لیا گیا اور نبی کریم صلی اللہ علیہ وسلم کے پاس لایا گیا تو آپ صلی اللہ علیہ وسلم نے حکم دیا کہ ”اس کا ہاتھ کاٹ دیا جائے۔“ سیدنا صفوان رضی اللہ عنہ کہتے ہیں کہ میں آپ صلی اللہ علیہ وسلم کی خدمت میں حاضر ہوا اور عرض کیا کہ ”کیا بھلا صرف تیس درہم کے بدلے میں آپ اس کا ہاتھ کاٹیں گے؟ میں اسے اس کو فروخت کرتا ہوں اور قیمت کی ادائیگی ادھار کر لیتا ہوں۔“ آپ صلی اللہ علیہ وسلم نے فرمایا: ”تم نے یہ اس کو میرے پاس لانے سے پہلے کیوں نہ کیا۔“ امام ابوداؤد رحمہ اللہ کہتے ہیں کہ یہ روایت بسند «زَائِدَةُ عَنْ سِمَاكٍ عَنْ جُعَيْدِ بْنِ جُحَيْرٍ» ”زائدہ، سماک سے اور وہ جعید بن جحیر سے“ یوں ہے: ”سیدنا صفوان رضی اللہ عنہ سو گئے۔“ طاؤس اور مجاہد کے الفاظ میں یوں ہے کہ ”وہ سوئے ہوئے تھے تو ایک چور آیا اور اس نے ان کی چادر ان کے سر کے نیچے سے چرا لی“ اور ابوسلمہ بن عبدالرحمٰن کی روایت میں ہے کہ ”اس نے یہ چادر سر کے نیچے سے سرکا لی تو وہ جاگ گئے اور شور مچایا تو اسے پکڑ لیا گیا۔“ زہری نے صفوان بن عبداللہ سے روایت کرتے ہوئے کہا: ”سیدنا صفوان بن امیہ رضی اللہ عنہ مسجد میں سو گئے اور اپنی چادر کو اپنے سر کے نیچے بطور تکیہ رکھ لیا، ایک چور آیا اور اس نے یہ چادر اڑا لی تو انہوں نے اسے پکڑ لیا اور نبی کریم صلی اللہ علیہ وسلم کی خدمت میں لے آئے۔“ [سنن ابي داود/كتاب الحدود /حدیث: 4394]

سیدنا ابن عمر رضی اللہ عنہ سے روایت ہے کہ بنو مخزوم کی ایک عورت چیزیں مانگ کر لے جاتی اور پھر مکر جایا کرتی تھی، چنانچہ نبی کریم صلی اللہ علیہ وسلم نے حکم دیا اور اس کا ہاتھ کاٹ دیا گیا۔ امام ابوداؤد رحمہ اللہ فرماتے ہیں کہ اس روایت کو جویریہ نے بواسطہ نافع، ابن عمر رضی اللہ عنہ سے یا صفیہ بنت ابی عبید رضی اللہ عنہا سے روایت کیا تو اس میں مزید یوں کہا: نبی کریم صلی اللہ علیہ وسلم خطبہ دینے کے لیے کھڑے ہوئے اور فرمایا: ”کیا کوئی عورت ہے جو اللہ اور اس کے رسول کی طرف توبہ کر لے۔“ آپ صلی اللہ علیہ وسلم نے یہ بات تین بار دہرائی، جبکہ وہ عورت سامنے موجود دیکھ رہی تھی، مگر نہ وہ اٹھی اور نہ وہ بولی۔ امام ابوداؤد رحمہ اللہ بیان کرتے ہیں کہ اس روایت کو ابن غنج نے بواسطہ نافع، صفیہ بنت ابی عبید رضی اللہ عنہا سے بیان کیا، اس میں ہے کہ پھر اس پر شہادت دی گئی۔ [سنن ابي داود/كتاب الحدود /حدیث: 4395]

ام المؤمنین سیدہ عائشہ رضی اللہ عنہا نے بیان کیا کہ ”ایک عورت نے کئی معروف لوگوں کے نام سے کچھ زیورات عاریتاً لیے جبکہ وہ خود کوئی معروف نہ تھی۔ پھر وہ زیورات اس نے بیچ ڈالے، تو پکڑ لی گئی اور نبی کریم صلی اللہ علیہ وسلم کی خدمت میں لائی گئی تو آپ صلی اللہ علیہ وسلم نے اس کا ہاتھ کاٹ دینے کا حکم دیا۔ اور یہ وہی عورت ہے جس کے بارے میں سیدنا اسامہ بن زید رضی اللہ عنہ نے سفارش کی تھی اور رسول اللہ صلی اللہ علیہ وسلم نے اس سلسلے میں جو کچھ کہنا تھا کہا۔“ [سنن ابي داود/كتاب الحدود /حدیث: 4396]

ام المؤمنین سیدہ عائشہ رضی اللہ عنہا نے بیان کیا کہ ”بنو مخزوم کی ایک عورت مال مانگ کر لے جاتی اور پھر مکر جاتی تھی تو نبی کریم صلی اللہ علیہ وسلم نے حکم دیا کہ اس کا ہاتھ کاٹ دیا جائے اور قصہ بیان کیا جو «قُتَيْبَةَ عَنِ اللَّيْثِ عَنِ ابْنِ شِهَابٍ» کی (گزشتہ) روایت (4373) میں آیا ہے۔ مزید کہا کہ پھر نبی کریم صلی اللہ علیہ وسلم نے اس کا ہاتھ کاٹ ڈالا۔“ [سنن ابي داود/كتاب الحدود /حدیث: 4397]

ام المؤمنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”تین آدمیوں سے قلم اٹھا لیا گیا ہے: سویا ہوا حتیٰ کہ جاگ جائے، دیوانہ حتیٰ کہ عقلمند ہو جائے اور بچے سے حتیٰ کہ بڑا (بالغ) ہو جائے۔“ [سنن ابي داود/كتاب الحدود /حدیث: 4398]

سیدنا ابن عباس رضی اللہ عنہ سے روایت ہے کہ سیدنا عمر رضی اللہ عنہ کے پاس ایک پاگل عورت لائی گئی جس نے زنا کیا تھا۔ تو انہوں نے اس کے بارے میں صحابہ رضی اللہ عنہم سے مشورہ کیا اور پھر حکم دیا کہ اسے سنگسار کر دیا جائے۔ سیدنا علی بن ابی طالب رضی اللہ عنہ اس عورت کے پاس سے گزرے، انہوں نے پوچھا: ”اس کا کیا معاملہ ہے؟“ لوگوں نے کہا کہ یہ بنو فلاں کی پاگل عورت ہے اور اس نے زنا کیا ہے اور سیدنا عمر رضی اللہ عنہ نے حکم دیا ہے کہ اسے سنگسار کر دیا جائے۔ تو انہوں نے (سیدنا علی رضی اللہ عنہ) نے فرمایا: ”اسے واپس لے جاؤ“ اور خود سیدنا عمر رضی اللہ عنہ کے ہاں چلے آئے اور کہا: ”اے امیر المؤمنین! کیا آپ نہیں جانتے کہ تین طرح کے آدمیوں سے قلم اٹھا لیا گیا ہے: پاگل مجنون حتیٰ کہ صحت مند ہو جائے، سوئے ہوئے سے حتیٰ کہ جاگ جائے اور بچے سے حتیٰ کہ عقلمند (بالغ) ہو جائے۔“ انہوں نے کہا: ”کیوں نہیں۔“ کہا: ”تو پھر کیا وجہ ہے کہ اس مجنون عورت کو رجم کیا جانے لگا ہے؟“ سیدنا عمر رضی اللہ عنہ نے کہا: ”(اب تو) اس پر کچھ نہیں ہو گا۔“ کہا کہ: ”پھر اسے چھوڑ دیں۔“ چنانچہ انہوں نے اس عورت کو چھوڑ دیا۔ اور راوی نے کہا کہ پھر وہ (سیدنا عمر رضی اللہ عنہ) «اللهُ أَكْبَرُ، اللهُ أَكْبَرُ» ”اللہ بہت بڑا ہے، اللہ بہت بڑا ہے“ کہنے لگے۔ [سنن ابي داود/كتاب الحدود /حدیث: 4399]

وکیع نے اعمش سے مذکورہ بالا حدیث کی مانند روایت کیا اور کہا: ”(بچے سے قلم اٹھا لیا گیا ہے) حتیٰ کہ عقلمند ہو جائے اور مجنون سے بھی حتیٰ کہ افاقہ پا جائے۔“ بیان کیا کہ پھر سیدنا عمر رضی اللہ عنہ تکبیر کہنے لگے۔ [سنن ابي داود/كتاب الحدود /حدیث: 4400]