سیدنا ابن عباس رضی اللہ عنہ سے روایت ہے کہ لوگ اس عورت کو لے کر سیدنا علی بن ابی طالب رضی اللہ عنہ کے پاس سے گزرے اور عثمان (عثمان بن ابی شیبہ) کی روایت (4399) کے ہم معنی بیان کیا، انہوں نے کہا: کیا آپ کو یاد نہیں کہ رسول اللہ صلی اللہ علیہ وسلم نے فرمایا ہے: ”تین افراد سے قلم اٹھا لیا گیا ہے: مجنون جس کی عقل مغلوب ہو حتیٰ کہ افاقہ پا جائے، اور سویا ہوا حتیٰ کہ جاگ جائے، اور بچہ حتیٰ کہ بالغ ہو جائے۔“ سیدنا عمر رضی اللہ عنہ نے کہا: آپ نے بجا کہا اور اس عورت کو چھوڑ دیا۔ [سنن ابي داود/كتاب الحدود /حدیث: 4401]

ابوظبیان الجنبی کا بیان ہے کہ سیدنا عمر رضی اللہ عنہ کے پاس ایک عورت لائی گئی جس نے بدکاری کا ارتکاب کیا تھا، پس انہوں نے اس کو سنگسار کرنے کا حکم دیا، چنانچہ سیدنا علی رضی اللہ عنہ گزرے تو انہوں نے اسے پکڑا اور چھوڑ دیا، سیدنا عمر رضی اللہ عنہ کو اس کی خبر ملی تو انہوں نے کہا: ”سیدنا علی رضی اللہ عنہ کو میرے پاس بلاؤ۔“ وہ آئے اور کہا: ”اے امیر المؤمنین! آپ یقیناً جانتے ہیں کہ رسول اللہ صلی اللہ علیہ وسلم نے فرمایا ہے: ”تین آدمیوں سے قلم اٹھا لیا گیا ہے، بچے سے حتیٰ کہ بالغ ہو جائے اور سوئے ہوئے سے حتیٰ کہ جاگ جائے اور مجنون پاگل سے حتیٰ کہ صحت مند ہو جائے۔“ اور یہ عورت بنو فلاں کی ہے اور پاگل ہے، شاید کہ جس نے اس کے ساتھ یہ یہ کیا ہے تو اپنی اسی کیفیت میں تھی۔“ سیدنا عمر رضی اللہ عنہ نے کہا: ”میں یہ نہیں جانتا (کہ یہ اسی کیفیت، یعنی پاگل پن میں اس کی مرتکب ہوئی ہے)۔“ سیدنا علی رضی اللہ عنہ نے کہا: ”جانتا تو میں بھی نہیں ہوں۔“ [سنن ابي داود/كتاب الحدود /حدیث: 4402]

سیدنا علی رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”تین طرح کے آدمیوں سے قلم اٹھا لیا گیا ہے، سوئے ہوئے سے حتیٰ کہ جاگ جائے، بچے سے حتیٰ کہ بالغ ہو جائے اور مجنون سے حتیٰ کہ عقلمند ہو جائے۔“ امام ابوداؤد رحمہ اللہ کہتے ہیں: ”اس روایت کو ابن جریج نے بواسطہ قاسم بن بزید، سیدنا علی رضی اللہ عنہ سے اور انہوں نے نبی کریم صلی اللہ علیہ وسلم سے بیان کیا ہے اور اس میں لفظ «الْخَرِفِ» کا اضافہ کیا۔“ یعنی وہ آدمی جو بہت زیادہ عمر کی وجہ سے عقل و شعور کی کیفیت پر قائم نہ رہتا ہو۔ [سنن ابي داود/كتاب الحدود /حدیث: 4403]

سیدنا عطیہ قرظی رضی اللہ عنہ کہتے ہیں کہ ”میں بنو قریظہ کے قیدیوں میں سے تھا، چنانچہ مسلمانوں نے دیکھنا شروع کیا، یعنی جس جس کے (زیر ناف) بال اگ آئے تھے اسے قتل کر دیا گیا اور جس کے نہیں اگے تھے اسے قتل نہ کیا گیا، چنانچہ میں ان میں سے تھا جن کے بال نہیں اگے تھے۔“ [سنن ابي داود/كتاب الحدود /حدیث: 4404]

عبدالملک بن عمیر نے یہ روایت بیان کی، (عطیہ رضی اللہ عنہ) نے کہا: ”انہوں نے میرے زیرِ ناف سے کپڑا ہٹایا اور پایا کہ میرے بال نہیں اگے ہیں تو مجھے قیدیوں میں شامل کر دیا۔“ [سنن ابي داود/كتاب الحدود /حدیث: 4405]

سیدنا ابن عمر رضی اللہ عنہما سے روایت ہے کہ ”نبی کریم صلی اللہ علیہ وسلم نے احد والے دن ان کا جائزہ لیا جبکہ ان کی عمر چودہ سال تھی تو آپ صلی اللہ علیہ وسلم نے ان کو جنگ میں شریک ہونے کی اجازت نہیں دی تھی، اور پھر خندق والے دن ان کا جائزہ لیا جبکہ وہ پندرہ سال کے تھے تو آپ صلی اللہ علیہ وسلم نے ان کو اجازت دے دی“۔ [سنن ابي داود/كتاب الحدود /حدیث: 4406]

نافع رحمہ اللہ کہتے ہیں کہ میں نے یہ حدیث سیدنا عمر بن عبدالعزیز رحمہ اللہ کو بیان کی تو انہوں نے کہا: ”بلاشبہ بچے اور بڑے میں یہی عمر حد فاصل ہے۔“ [سنن ابي داود/كتاب الحدود /حدیث: 4407]

جنادہ بن ابوامیہ کہتے ہیں کہ ”ہم سیدنا بسر بن ارطاۃ رضی اللہ عنہ کی معیت میں ایک سمندری مہم میں جا رہے تھے کہ ایک چور کو لایا گیا۔ اس کا نام «مِصْدَرٍ» تھا (میم کی زیر کے ساتھ)، اس نے ایک بختی اونٹنی چرائی تھی، تو انہوں نے کہا کہ ”میں نے رسول اللہ صلی اللہ علیہ وسلم سے سنا ہے: ”سفر میں ہاتھ نہ کاٹے جائیں۔“ اگر یہ بات نہ ہوتی تو میں اس کا ہاتھ کاٹ ڈالتا۔“” [سنن ابي داود/كتاب الحدود /حدیث: 4408]

سیدنا ابوذر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھ سے فرمایا: ”اے ابوذر!“ میں نے عرض کیا: ”میں حاضر ہوں اے اللہ کے رسول صلی اللہ علیہ وسلم اور مطیع و فرمانبردار ہوں!“ فرمایا: ”تیرا کیا حال ہوگا جب لوگوں کو موت آئے گی اور ان حالات میں گھر ایک غلام کے بدلے میں ملے گا؟“ اور آپ صلی اللہ علیہ وسلم کی مراد تھی: ”قبر۔“ میں نے عرض کیا: ”اللہ اور اس کا رسول صلی اللہ علیہ وسلم بہتر جانتے ہیں،“ یا کہا: ”جو اللہ اور اس کا رسول صلی اللہ علیہ وسلم میرے لیے پسند فرما دیں۔“ آپ صلی اللہ علیہ وسلم نے فرمایا: ”صبر کرنا۔“ امام ابوداؤد رحمہ اللہ کہتے ہیں کہ حماد بن ابوسلیمان نے کہا: ”کفن چور کا ہاتھ کاٹا جائے، کیونکہ وہ میت کے گھر میں داخل ہوتا ہے۔“ [سنن ابي داود/كتاب الحدود /حدیث: 4409]

سیدنا جابر بن عبداللہ رضی اللہ عنہ سے روایت ہے کہ نبی کریم صلی اللہ علیہ وسلم کے پاس ایک چور لایا گیا، آپ صلی اللہ علیہ وسلم نے فرمایا: ”اسے قتل کر دو۔“ صحابہ رضی اللہ عنہم نے عرض کیا: اے اللہ کے رسول! اس نے تو چوری کی ہے، آپ صلی اللہ علیہ وسلم نے فرمایا: ”اس کا (ہاتھ) کاٹ دو۔“ چنانچہ اس کا (ہاتھ) کاٹ دیا گیا۔ پھر اسے دوبارہ لایا گیا تو آپ صلی اللہ علیہ وسلم نے فرمایا: ”اسے قتل کر دو۔“ صحابہ رضی اللہ عنہم نے کہا: اے اللہ کے رسول! اس نے چوری کی ہے، آپ صلی اللہ علیہ وسلم نے فرمایا: ”اس کا (بایاں پاؤں) کاٹ دو۔“ چنانچہ کاٹ دیا گیا۔ پھر اسے تیسری بار لایا گیا تو آپ صلی اللہ علیہ وسلم نے فرمایا: ”اسے قتل کر دو۔“ صحابہ رضی اللہ عنہم نے کہا: اے اللہ کے رسول! اس نے چوری کی ہے، آپ صلی اللہ علیہ وسلم نے فرمایا: ”اس کا (بایاں ہاتھ) کاٹ دو۔“ پھر چوتھی بار لایا گیا، آپ صلی اللہ علیہ وسلم نے فرمایا: ”اسے قتل کر دو۔“ صحابہ رضی اللہ عنہم نے کہا: اے اللہ کے رسول! اس نے چوری کی ہے، آپ صلی اللہ علیہ وسلم نے فرمایا: ”اس کا (دایاں پاؤں) کاٹ دو۔“ پھر اسے پانچویں بار لایا گیا تو آپ صلی اللہ علیہ وسلم نے فرمایا: ”اسے قتل کر دو۔“ سیدنا جابر رضی اللہ عنہ کہتے ہیں کہ پھر ہم اسے لے گئے اور اسے قتل کر ڈالا، پھر اسے گھسیٹ کر ایک کنویں میں ڈال دیا اور اوپر سے پتھر مارے۔ [سنن ابي داود/كتاب الحدود /حدیث: 4410]