حضرت ابو سعید رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب تو کسی چیز کی بیع سلف کرے تو اسے دوسری چیز (کی بیع) سے تبدیل نہ کر۔“ [سنن ابن ماجه/كتاب التجارات/حدیث: 2283]

نجرانی سے روایت ہے، انہوں نے کہا: میں نے حضرت عبداللہ بن عمر رضی اللہ عنہ سے کہا: ”کیا میں خوشے نکلنے سے پہلے کھجوروں کے درختوں کی بیع سلم کر لیا کروں؟“ انہوں نے فرمایا: ”نہیں!“ میں نے کہا: ”کیوں؟“ انہوں نے فرمایا: ”رسول اللہ صلی اللہ علیہ وسلم کے زمانے میں ایک شخص نے کھجوروں کے درختوں پر خوشے ظاہر ہونے سے پہلے کھجوروں کے ایک باغ کی بیع سلم کی۔ اس سال باغ میں پھل نہ لگا۔ خریدار نے کہا: خوشے آنے تک یہ میرا باغ ہے۔ بیچنے والے نے کہا: میں نے تجھے یہ باغ ایک سال کے لیے فروخت کیا تھا۔ انہوں نے اپنا مقدمہ رسول اللہ صلی اللہ علیہ وسلم کی خدمت میں پیش کیا تو آپ صلی اللہ علیہ وسلم نے بیچنے والے سے کہا: ”کیا اس نے تیرے درختوں سے کچھ (پھل یا روپیہ پیسہ) وصول کیا ہے؟“ اس نے کہا: ”نہیں۔“ آپ صلی اللہ علیہ وسلم نے فرمایا: ”تو پھر اس کا مال اپنے لیے کس طرح حلال سمجھتا ہے؟ اس سے جو کچھ لیا ہے، وہ اسے واپس کر دے اور (آئندہ) کھجور کے درختوں کی بیع سلم نہ کیا کرو جب تک اس کی صلاحیت ظاہر نہ ہو جائے۔““ [سنن ابن ماجه/كتاب التجارات/حدیث: 2284]

حضرت ابو رافع رضی اللہ عنہ سے روایت ہے کہ نبی صلی اللہ علیہ وسلم نے ایک آدمی سے جوان اونٹ قرض لیا اور فرمایا: ”جب زکاۃ کے اونٹ آئیں گے، ہم تجھے (ایک اونٹ) ادا کر دیں گے۔“ جب اونٹ آئے تو آپ صلی اللہ علیہ وسلم نے فرمایا: ”ابو رافع! اس شخص کو اس کا جوان اونٹ ادا کر دو۔“ لیکن مجھے چار دانت یا اس سے زیادہ عمر والا اونٹ ہی ملا، میں نے نبی صلی اللہ علیہ وسلم کو (صورت حال سے) آگاہ کیا تو آپ صلی اللہ علیہ وسلم نے فرمایا: ”وہی دے دو، بہترین لوگ وہ ہوتے ہیں جو اچھے طریقے سے (قرض) ادا کرتے ہیں۔“ [سنن ابن ماجه/كتاب التجارات/حدیث: 2285]

حضرت عرباض بن ساریہ رضی اللہ عنہ سے روایت ہے، انہوں نے فرمایا: ”میں رسول اللہ صلی اللہ علیہ وسلم کی خدمت میں حاضر تھا کہ ایک اعرابی نے عرض کیا: ”مجھے میرا اونٹ ادا فرما دیجئے۔“ نبی صلی اللہ علیہ وسلم نے اسے بڑی عمر کا اونٹ عطا فرمایا تو اس نے کہا: ”اللہ کے رسول صلی اللہ علیہ وسلم ! اس کی عمر تو میرے اونٹ سے زیادہ ہے (اور یہ زیادہ قیمتی ہے۔)“ رسول اللہ صلی اللہ علیہ وسلم نے فرمایا: ”بہترین لوگ وہ ہوتے ہیں جو اچھے طریقے سے (قرض) ادا کریں۔“” [سنن ابن ماجه/كتاب التجارات/حدیث: 2286]

حضرت سائب بن صیفی مخزومی رضی اللہ عنہ سے روایت ہے کہ انہوں نے نبی صلی اللہ علیہ وسلم سے کہا: ”آپ زمانہ جاہلیت میں میرے شریک تھے تو آپ بہترین شریک تھے۔ آپ نہ مجھ سے مقابلہ کرتے تھے، نہ جھگڑا کرتے تھے۔“ [سنن ابن ماجه/كتاب التجارات/حدیث: 2287]

حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”میں نے، حضرت سعد رضی اللہ عنہ نے اور حضرت عمار رضی اللہ عنہ نے جنگ بدر کے دن حاصل ہونے والے مال غنیمت میں شراکت کی۔ میں اور حضرت عمار رضی اللہ عنہ کچھ نہ لائے، جب کہ حضرت سعد رضی اللہ عنہ (کفار کے) دو آدمی (گرفتار کر کے) لے آئے۔ (جو ہم تینوں کے مشترکہ غلام ہوئے۔)“ [سنن ابن ماجه/كتاب التجارات/حدیث: 2288]

حضرت صالح بن صہیب بن سنان رضی اللہ عنہ اپنے والد (حضرت صہیب رومی رضی اللہ عنہ) سے روایت کرتے ہیں کہ رسول اللہ صلی اللہ علیہ وسلم نے فرمایا: ”تین چیزوں میں برکت ہے: ادھار بیچنا، مقارضہ، اور گھر میں استعمال کے لیے گندم میں جو ملا لینا، بیچنے کے لیے نہیں۔“ [سنن ابن ماجه/كتاب التجارات/حدیث: 2289]

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”تمہارا بہترین کھانا وہ ہے جو تمہاری کمائی سے (حاصل) ہو۔ اور تمہاری اولاد بھی تمہاری کمائی ہے۔“ [سنن ابن ماجه/كتاب التجارات/حدیث: 2290]

حضرت جابر بن عبداللہ رضی اللہ عنہ سے روایت ہے کہ ایک آدمی نے کہا: ”اے اللہ کے رسول صلی اللہ علیہ وسلم ! میرے پاس کچھ مال ہے اور میری اولاد بھی ہے اور میرا باپ میرا سارا مال لے لینا چاہتا ہے“، تو آپ صلی اللہ علیہ وسلم نے فرمایا: ”تو بھی اور تیرا مال بھی تیرے باپ ہی کا ہے۔“ [سنن ابن ماجه/كتاب التجارات/حدیث: 2291]