حضرت ابو ہریرہ رضی اللہ عنہ سے روایت ہے، انہوں نے فرمایا: جبرائیل علیہ السلام نے نبی اکرم صلی اللہ علیہ وسلم سے داخل ہونے کی اجازت طلب کی۔ آپ صلی اللہ علیہ وسلم نے فرمایا: ”آ جائیں۔“ انہوں نے کہا: میں کیسے داخل ہو سکتا ہوں جب کہ آپ کے گھر میں ایک پردہ ہے جس میں تصویریں بنی ہوئی ہیں؟ یا تو آپ ان کے سر کاٹ دیں یا اسے چٹائی بنا کر بچھا لیں۔ ہم فرشتے کسی گھر میں داخل نہیں ہوتے جس میں تصویریں ہوں۔ [سنن نسائي/كتاب الزاينة (من المجتبى)/حدیث: 5367]

حضرت عائشہ رضی اللہ عنہا نے فرمایا: رسول اللہ صلی اللہ علیہ وسلم ہمارے لحافوں میں نماز نہیں پڑھتے تھے۔ سفیان نے ( «لُحُف» کی بجائے «مَلَاحِف») کے الفاظ بیان کیے ہیں۔ [سنن نسائي/كتاب الزاينة (من المجتبى)/حدیث: 5368]

حضرت انس رضی اللہ عنہ بیان کرتے ہیں کہ رسول اللہ صلی اللہ علیہ وسلم کے جوتے مبارک میں دو پٹیاں تھیں۔ [سنن نسائي/كتاب الزاينة (من المجتبى)/حدیث: 5369]

حضرت عمرو بن اوس رضی اللہ عنہ نے فرمایا کہ رسول اللہ صلی اللہ علیہ وسلم کے جوتے مبارک میں دو تسمے تھے۔ [سنن نسائي/كتاب الزاينة (من المجتبى)/حدیث: 5370]

حضرت ابو ہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”جب کسی کے جوتے کا تسمہ ٹوٹ جائے تو وہ ایک جوتے میں نہ چلے حتیٰ کہ اسے ٹھیک کر لے۔“ [سنن نسائي/كتاب الزاينة (من المجتبى)/حدیث: 5371]

حضرت ابورزین رحمہ اللہ بیان کرتے ہیں کہ میں نے حضرت ابوہریرہ رضی اللہ عنہ کو دیکھا، وہ اپنا ہاتھ اپنے ماتھے پر (بطور تعجب و تاسف) مار رہے تھے اور فرما رہے تھے: اے عراقیو! کیا تم سمجھتے ہو کہ میں رسول اللہ صلی اللہ علیہ وسلم کا نام لے کر جھوٹ بول رہا ہوں؟ میں گواہی دیتا ہوں کہ میں نے رسول اللہ صلی اللہ علیہ وسلم کو فرماتے ہوئے سنا: ”جب تم میں سے کسی شخص کے جوتے کا تسمہ ٹوٹ جائے تو وہ دوسرا (ایک) جوتا پہن کر نہ چلے حتیٰ کہ اسے ٹھیک کر لے۔“ [سنن نسائي/كتاب الزاينة (من المجتبى)/حدیث: 5372]

حضرت انس بن مالک رضی اللہ عنہ سے روایت ہے کہ نبی اکرم صلی اللہ علیہ وسلم (ایک دفعہ ہمارے گھر میں) چمڑے کے بچھونے پر استراحت فرما ہوئے۔ آپ کو پسینہ آگیا۔ (میری والدہ) حضرت ام سلیم رضی اللہ عنہا اٹھیں اور آپ کے بابرکت پسینے کو اکٹھا کر کے ایک شیشی میں ڈال لیا۔ نبی اکرم صلی اللہ علیہ وسلم نے ان کو (ایسے کرتے ہوئے) دیکھا تو فرمایا: ”ام سلیم! تم کیا کر رہی ہو؟“ انہوں نے کہا: میں آپ کا پسینہ اپنی خوشبو میں ڈال لوں گی۔ آپ صلی اللہ علیہ وسلم مسکرانے لگے۔ [سنن نسائي/كتاب الزاينة (من المجتبى)/حدیث: 5373]

حضرت سمرہ بن سہم رضی اللہ عنہ سے روایت ہے کہ میں حضرت ابو ہاشم بن عتبہ رضی اللہ عنہ کا مہمان بنا، ان کو طاعون کا عارضہ لاحق ہو چکا تھا۔ حضرت معاویہ رضی اللہ عنہ ان کی بیمار پرسی کے لیے آئے تو حضرت ابو ہاشم رضی اللہ عنہ رونے لگے۔ حضرت معاویہ رضی اللہ عنہ نے فرمایا: آپ کیوں رو رہے ہیں؟ کیا کوئی تکلیف آپ کو بے چین کر رہی ہے؟ یا دنیا (سے جانے) کا غم ہے جب کہ آپ کی دنیا کا بہترین حصہ گزر چکا ہے؟ انہوں نے فرمایا: ان دونوں میں سے کوئی (بات نہیں) بلکہ رسول اللہ صلی اللہ علیہ وسلم نے مجھے ایک نصیحت فرمائی تھی، کاش میں اس پر قائم رہتا، آپ صلی اللہ علیہ وسلم نے فرمایا تھا: ”شاید تجھ پر وہ دور آئے جب لوگوں میں بے تحاشا مال تقسیم کیے جائیں گے، تجھے صرف ایک نوکر اور ایک سواری جہاد کے لیے کافی ہے۔“ (واقعتاً وہ دور یا مال) میں نے پایا لیکن میں نے زیادہ مال جمع کر لیا۔ [سنن نسائي/كتاب الزاينة (من المجتبى)/حدیث: 5374]

حضرت ابو امامہ بن سہل رضی اللہ عنہ نے فرمایا کہ رسول اللہ صلی اللہ علیہ وسلم کی تلوار کے دستے کے کنارے پر چاندی لگی تھی۔ [سنن نسائي/كتاب الزاينة (من المجتبى)/حدیث: 5375]

حضرت انس رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم کی تلوار کا نعل چاندی کا تھا، اس کے دستے کے کنارے پر بھی چاندی لگی تھی اور اس کے درمیان میں بھی چاندی کے حلقے بنے ہوئے تھے۔ [سنن نسائي/كتاب الزاينة (من المجتبى)/حدیث: 5376]