اللہ تعالیٰ کے اس فرمان کے بیان میں کہ ”ان لوگوں کی اکثر خفیہ سرگوشیوں اور باہمی مشوروں میں کوئی خیر اور بھلائی نہیں ہے، سوائے اس شخص کے (کلام کے) جو صدقہ و خیرات کرنے، یا کسی نیک کام، یا لوگوں کے درمیان صلح و آشتی کرانے کا حکم دے؛ اور جو کوئی اللہ تعالیٰ کی رضا جوئی کی خاطر ایسا کرے گا، تو عنقریب ہم اسے اجرِ عظیم عطا فرمائیں گے۔“

”اور جو شخص ہدایت کے واضح ہو جانے کے بعد رسول کی مخالفت کرے گا اور اہلِ ایمان کی راہ کے سوا کسی اور راستے کی پیروی کرے گا، تو ہم اسے اسی گمراہی کی طرف پھیر دیں گے جسے اس نے خود اختیار کیا ہے اور اسے جہنم میں داخل کریں گے، جو کہ بہت ہی برا ٹھکانا ہے۔“

اللہ تعالیٰ کے اس ارشاد کے بیان میں کہ ”(کامیابی و نجات کا دارومدار) نہ تمہاری تمناؤں پر ہے اور نہ ہی اہل کتاب کی آرزوؤں پر؛ جو شخص بھی برائی کرے گا اسے اس کا بدلہ دیا جائے گا، اور وہ اللہ کے سوا اپنے لیے نہ کوئی کارساز پائے گا اور نہ ہی کوئی مددگار (123)۔“

اللہ تعالیٰ کے اس ارشادِ گرامی کے بیان میں ہے ”اور اس شخص سے دین کے اعتبار سے بہتر کون ہو سکتا ہے جس نے اپنا رخِ نیاز اللہ کے سپرد کر دیا درآنحالیکہ وہ نیکوکار بھی ہو، اور اس نے ملتِ ابراہیم کی اتباع کی ہو جو سب سے کٹ کر ایک اللہ کے ہو رہے تھے، اور اللہ تعالیٰ نے ابراہیم کو اپنا مخلص دوست بنا لیا۔“

اللہ تعالیٰ کے اس ارشادِ گرامی کے بیان میں کہ ”اور وہ لوگ آپ سے عورتوں کے متعلق فتویٰ طلب کرتے ہیں، آپ فرما دیجیے کہ اللہ تمہیں ان کے بارے میں حکم دیتا ہے اور وہ احکام بھی جو تمہیں اس کتاب میں ان یتیم عورتوں کے متعلق پڑھ کر سنائے جاتے ہیں جنہیں تم ان کا وہ حق نہیں دیتے جو ان کے لیے مقرر کیا گیا ہے اور تم ان سے نکاح کرنے کی رغبت رکھتے ہو، نیز بے بس و ناتواں بچوں کے بارے میں بھی (حکم دیتا ہے) اور یہ کہ تم یتیموں کے حق میں انصاف پر قائم رہو، اور تم جو بھی نیک کام کرو گے تو یقیناً اللہ تعالیٰ اسے خوب جاننے والا ہے“۔