529. جو نوجوان کسی بوڑھے شخص کی اس کی عمر کی وجہ سے عزت کرے گا اللہ تعالیٰ اس (نوجوان) کے بڑھاپے میں اس کے لئے ایسا شخص مقرر فرما دے گا جو اس کی عزت کرے گا

530. جو گھر خوشیوں سے بھرتا ہے وہ عبرت ونصیحت سے ضرور بھرتا ہے

531. جس بندے کو اللہ نے عوام کا حاکم بنایا پھر اس نے ان کی خیر خواہی نہ کی اللہ نے اس پر جنت حرام کر دی ہے

532. جس بندے کو اللہ تعالیٰ ٰ عوام کا حاکم بنائے (اور) وہ اپنی موت کے دن اس حال میں مرے کہ اپنی عوام کو دھوکا دینے والا ہوتو اللہ تعالیٰ اس پر جنت حرام کر دیتا ہے۔

533. مسلمانوں میں سے کوئی آدمی نیک وزیر سے زیادہ اجر والا نہیں جو کسی حاکم کے ساتھ رہے اس کی اطاعت کرے اور اسے ذات باری تعالیٰ ٰ کی اطاعت کرنے کا حکم دے

534. ہر مؤمن کا کوئی نہ کوئی ایسا گناہ ہوتا ہے جسے وہ وقتاً فوقتاً کرتا رہتا ہے وہ اسے نہیں چھوڑتا حتیٰ کہ دنیا چھوڑ جاتا ہے اور بے شک مومن بہت بھولنے والا پیدا کیا گیا ہے جب، اسے (توبہ کی) یاد دہانی کرائی جائے تو وہ یاد کر لیتا ہے۔

535. جب بھی سورج طلوع ہوتا ہے تو اس کے دو پہلوؤں میں دو فرشتے ہوتے ہیں جو کہتے ہیں: اے اللہ! خرچ کرنے والے کو جلد نعم البدل عطا فرما اور کنجوسی کرنے والے کے مال کو جلد تلف کر دے

536. دو خونخوار بھیڑیے جو بکریوں کے باڑے میں ہوں اس میں (نقصان کرنے میں) وہ بھی اتنی جلدی نہیں کرتے جتنی کہ مال و جاہ کی محبت مسلمان بندے کے دین میں (نقصان پہنچانے میں) کرتی ہے

537. دین میں فقہ (سمجھ داری) سے افضل اللہ کی کوئی عبادت نہیں کی گئی

538. صلہ رحمی سے بڑھ کر کوئی چیز ایسی نہیں جس میں اللہ کی اطاعت کی جائے اور اس کا ثواب جلد ملے

539. جو آدمی اپنے اوپر مانگنے کا دروازہ کھول لے اللہ اس پر فقر و محتاجی کا دروازہ کھول دیتا ہے لہٰذا تم بے نیازی اختیار کرو

540. تم میں سے ہر ایک بس حد سے تجاوز کر دینے والی تو نگری کا منتظر ہے

541. مومن کو جو بھی کوئی تھکاوٹ مرض بخار، تکلیف اور غم پہنچتا ہے حتیٰ کہ وہ پریشانی جو اسے رنجیدہ کر دے تو اللہ اس کی وجہ سے اس کے گناہ معاف فرما دیتا ہے

542. بندہ ہمیشہ مانگتا رہتا ہے یہاں تک کہ وہ الله تعالیٰ ٰ سے جاملتا ہے (روز قیامت وہ اس حال میں اللہ سے ملے گا) کہ اس کے چہرے پر گوشت کا کوئی ٹکڑا نہیں ہوگا

543. مومن ایک بل سے دو مرتبہ نہیں ڈسا جاتا

544. جو شخص لوگوں کا شکریہ ادا نہیں کرتا وہ اللہ کا بھی شکر گزار نہیں ہوتا

545. دعا ہی قضا کو ٹال سکتی ہے اور نیکی ہی عمر دراز کرسکتی ہے

546. بردباری ٹھوکریں کھانے ہی سے آتی ہے

547. جہالت سے بڑھ کر کوئی فقر نہیں

548. بلوغت کے بعد یتیمی نہیں رہتی

549. اسلام میں (جاہلیت والا نیا) کوئی عہد و پیمان نہیں

550. اسلام میں صرورہ (گوشہ نشینی اختیار کرنا، شادی نہ کرنا یا استطاعت کے باوجود حج نہ کرنا) نہیں

551. فتح (مکہ) کے بعد ہجرت نہیں

552. جس میں امانت نہیں اس کا ایمان نہیں

553. دم صرف نظر یا ڈنگ کی وجہ سے ہے

554. تین دن سے زیادہ ترک تعلق (جائز) نہیں ہے

555. استغفار کے ساتھ کوئی گناہ کبیرہ نہیں رہتا اور اصرار کے ساتھ کوئی گناہ صغیر نہیں رہتا

556. قرض کے غم کے سوا کوئی غم نہیں

557. اس شخص کے لیے کوئی فاقہ نہیں جو قرآن پڑھتا ہے

558. اس میں دو بکریوں کے سر بھی نہیں ٹکرائیں گے (یعنی اس معاملے میں دو رائے نہیں ہیں)

559. احتیاط تقدیر سے بچا نہیں سکتی

560. مومن دھو کے سے قتل نہیں کرتا

561. وہ قوم فلاح نہیں پاسکتی جس پر عورت حکمرانی کرے

562. مومن کے شایان شان نہیں کہ وہ اپنے آپ کو ذلیل کرے

563. صدیق کے شایان شان نہیں کہ وہ بڑا لعنت کرنے والا ہو

564. دو رُخے آدمی کے لیے ممکن نہیں کہ وہ ا للہ ہاں امین ہو

565. عجز و بے بسی کا اظہار والدین اور عادل حکمران کے سامنے ہی مناسب ہے

566. بھلائی کرنا کسی خاندانی یا دیندار شخص کے پاس ہی مناسب ہے

567. خالق کی نافرمانی میں مخلوق کی اطاعت نہیں

568. وہ شخص جنت میں داخل نہیں ہو سکتا جس کی ایذا رسانیوں سے اس کا ہمسایہ محفوظ نہ ہو

569. چغل خور جنت میں نہیں جائے گا

570. کسی مسلمان کے لیے حلال نہیں کہ وہ کسی مسلمان کو ڈرائے

571. کسی شخص کے لیے حلال نہیں کہ وہ اپنے بھائی سے تین دن سے زیادہ ترک تعلق رکھے

572. کسی مال دار شخص کے لیے صدقہ لینا حلال نہیں

573. لوگ اس وقت تک ہرگز ہلاک نہ ہوں گے جب تک ان کی نافرمانیوں کی کثرت نہ ہو جائے

574. کسی شخص کا ایمان اس وقت تک درست نہیں ہو سکتا جب تک اس کا دل درست نہ ہو جائے

575. بندہ اس وقت تک مومن نہیں ہو سکتا جب تک اپنے بھائی کے لیے اسی طرح خیر و بھلائی پسند نہ کرے جس طرح اپنے لیے کرتا ہے

576. بندہ اس وقت تک ایمان کی حقیقت کو نہیں پہنچ سکتا جب تک یہ یقین نہ کر لے کہ بے شک جو کچھ اسے پہنچا ہے وہ اس سے چوک نہیں سکتا تھا اور جو اسے نہیں پہنچا وہ اسے (کسی صورت) پہنچ نہیں سکتا تھا

577. بندہ اس وقت تک ایمان کو مکمل نہیں کر سکتا جب تک اس میں تین خصلتیں نہ ہوں: تنگدستی میں خرچ کرنا، اپنے نفس کے ساتھ انصاف کرنا اور سلام کو عام کرنا

578. تم میں سے کوئی شخص اس وقت تک ایمان کی حقیقت مکمل نہیں کر سکتا جب تک اپنی زبان قابو میں نہ کر لے

579. اللہ تعالیٰ اس شخص پر رحم نہیں کرتا جو لوگوں پر رحم نہیں کرتا

580. مومن اپنے پڑوسی کو (بھوکا) چھوڑ کر شکم سیر نہیں ہوتا

581. عالم علم سے سیر نہیں ہوتا یہاں تک کہ اس کی انتہا جنت ہوتی ہے

582. (دنیا کا) معاملہ مزید سنگین ہی ہوتا جائے گا

583. لوگوں پر جو بھی دور آئے گا وہ اپنے سے پہلے دور سے برا ہوگا

584. قیامت اس وقت تک نہیں آئے گی جب تک کہ مرد کم اور عورتیں زیادہ نہ ہو جائیں

585. جو بندہ دنیا میں کسی بندے کی پردہ پوشی کرتا ہے تو اللہ روز قیامت اس کی پردہ پوشی فرمائے گا

586. اس شخص کی صحبت میں کوئی بھلائی نہیں جو تیرے لیے اسی طرح خیر کا خواہش مند نہ ہو جس طرح تو اس کے لیے ہے

587. جس بندے کی دو محبوب چیزیں (آنکھیں) چلی جائیں پھر وہ صبر کرے اور ثواب کی امید رکھے تو وہ جنت میں داخل ہوگا

588. بندہ اس وقت تک متقی لوگوں کے درجے کو نہیں پہنچ سکتا جب تک کہ مشکوک امور سے بچنے کے لیے ان امور کو بھی نہ چھوڑ دے جن میں کوئی حرج نہیں ہے

589. میری امت کا ایک گروہ ہمیشہ حق پر غالب رہے گا یہاں تک کہ اللہ کا فیصلہ آجائے

590. بندے کی روح اس کے قرض کی وجہ سے ہمیشہ معلق رہتی ہے جب تک کہ اس کی طرف سے ادا نہ کردیا جائے

591. بندہ جب تک نماز کا انتظار کرتا ہے وہ برابر نماز ہی میں رہتا ہے

592. اپنے بھائی کی تکلیف پر خوشی کا اظہار مت کر (کہیں ایسا نہ ہو) کہ اسے اللہ تعالیٰ ٰ عافیت دے دے اور تجھے آزمائش میں ڈال دے

593. زمانے کو گالی نہ دو کیونکہ اللہ ہی زمانہ (یعنی زمانے کا خالق) ہے

594. حاکم کو گالی نہ دو کیونکہ وہ اللہ کا اس کی زمین میں سایہ ہے

595. مُردوں کو گالی نہ دو کیونکہ انہوں نے جو آگے بھیجا ہے اسے وہ حاصل کر چکے ہیں

596. مُردوں کو گالی نہ دو کہ (اس سے) تم زندوں کو تکلیف دو گے

597. آدمی اپنے بھائی کا ہدیہ واپس نہ کرے پھر اگر وہ (اپنے پاس کچھ) پائے تو ضرور اچھا بدلہ دے

598. اس شخص کے کپڑے سے اپنا ہاتھ مت صاف کر جس کو تو نے پہنایا نہیں

599. سائل کو (خالی ہاتھ) نہ لوٹاؤ اگرچہ کھجور کا ایک ٹکڑا ہی کیوں نہ ہو

600. مسلمانوں کی غیبت نہ کرو

601. کسی کا عیب ہرگز نہ ظاہر کرو

602. نیکی کے کسی بھی کام کو ہرگز نہ حقیر سمجھو

603. اپنے بھائی سے ایسا وعدہ نہ کر جس کی تو خلاف ورزی کرے

604. تم میں سے کوئی شخص کسی تکلیف کی وجہ سے جو اسے پہنچی ہو موت کی تمنا ہرگز نہ کرے

605. ہر شخص کو بس اس حال میں موت آئے کہ وہ اللہ کے بارے میں اچھا گمان رکھتا ہو

606. ایک دوسرے سے حسد نہ کرو اور نہ خریداری کی نیت کے بغیر بولی میں اضافہ کرو

607. تم عیب جوئی کرنے والے بنو نہ مدح وتعریف کرنے والے

608. کسی عمل کرنے والے کے عمل پر اس وقت تک تعجب نہ کرو جب تک تم یہ نہ دیکھ لو کہ اس کا خاتمہ کس عمل پر ہو رہا ہے

609. کسی شخص کا اسلام تمہیں اس وقت تک بھلا نہ لگے جب تک تم یہ نہ جان لو کہ اس کی عقل کی گہرائی کتنی ہے

610. مجھے سوار (مسافر) کے پیالہ کی طرح مت بناؤ

611. لوگوں کا خوف تم میں سے کسی کو حق بات کہنے سے ہرگز نہ روکے جبکہ وہ اسے جانتا ہو

612. کوئی مرد کسی عورت کے ساتھ علیحدگی اختیار نہ کرے کیونکہ ان میں تیسرا شیطان ہوتا ہے

613. اللہ کی ناراضی سے کسی کو ہرگز راضی نہ کر

614. امارت نہ مانگنا

615. قیامت قائم نہ ہوگی جب تک کہ اولاد غیظ وغضب کا باعث نہ بنے

616. مشورے کے بعد بندہ ہرگز بر باد نہیں ہوتا

617. رعایا ہرگز ہلاک نہ ہوگی خوہ وہ ظالم ہو

618. اس چیز سے بچو جس سے (بعد میں) معذرت کرنی پڑے

619. مدح سرائی سے بچو کیونکہ یہ ذبح کرنا ہے

620. معمولی سمجھے جانے والے گناہوں سے بچو

621. لوگوں کی رائے لینے سے بچو

622. گندی جگہوں میں پیدا ہونے والے سبزے سے بچو

623. قرض سے بچو

624. بدگمانی سے بچو کیونکہ بدگمانی سب سے بڑا جھوٹ ہے

625. مظلوم کی بددعا سے بچو خواہ وہ کافر ہی ہو

626. بے شک بعض بیان جادو ہوتے ہیں

627. بے شک میری امت امت مرحومہ ہے

628. دوستی نبھانا ایمان میں سے ہے

629. بے شک حسن ظن حسن عبادت میں سے ہے

630. بے شک علماء انبیاء کے وارث ہیں

631. بے شک دین آسان ہے

632. بے شک اللہ کا دین سیدھا اور آسان ہے

633. بے شک سب سے جلد جس بھلائی کا بدلہ ملتا ہے وہ صلہ رحمی ہے

634. بے شک حکمت شریف آدمی کی شرافت میں اضافہ کرتی ہے

635. بے شک حلال چیز کو حرام کرنے والا ایسا ہی ہے جیسے حرام کو حلال کرنے والا

636. بے شک دنیا والوں کا حسب یہ مال ہے

637. بے شک صاحب حق کوبات کرنے کا حق ہے

638. بے شک اعلیٰ اخلاق اہل جنت کے اعمال میں سے ہیں

639. بے شک بہترین حسن، حسن خلق ہے۔

640. بے شک قوم کا آزاد کردہ غلام انہی میں شمار ہوتا ہے

641. بے شک اہل جنت کی اکثریت بھولے بھالے لوگوں کی ہوگی

642. بے شک جنت کے رہنے والوں میں عورتیں بہت کم ہیں

643. بے شک بندے پر مدد ذمہ داری کے بقدر آتی ہے

644. بے شک سب سے بڑی نیکی یہ ہے کہ آدمی اپنے والدکے دوستوں سے صلہ رحمی کرے

645. بے شک شیطان ابن آدم (کے اندر) اس طرح دوڑتا ہے جس طرح خون گردش کرتا ہے

646. بے شک لوگوں میں سے اللہ تعالیٰ کا سب سے زیادہ شکر گزار وہ ہے جو لوگوں کا زیادہ شکر ادا کرنے والا ہو

647. بلاشبہ اس مال کا ملنا آزمائش ہے

648. بے شک اس امت کا عذاب اس کی دنیا میں رکھ دیا گیا ہے